Ngergaken Kata Dibata Arah Ndalanken Adat

Bahan Bimbingen PJJ
Tanggal 24-30 Mei 2026
NGERGAKEN KATA DIBATA ARAH NDALANKEN ADAT
(Konfesi Budaya)

Ogen : Matius 15: 1-9

Pengajaren kerna adat si ndekah
(Mrk 7:1-13)
1. Jenari reh piga-piga kalak Parisi ras guru-guru agama Jahudi ndahi Jesus. Nina man Jesus,
2. “Engkai maka ajar-ajarNdu la ngikuti adat nini-nininta? Ope man la iburihina tanna rikutken adat si dekah.”
3. Ngaloi Jesus, “Kam pe ngkai maka ilanggarndu pedah Dibata erkiteken, atendu patuh man adat si ndekah saja?
4. Sabap nina Dibata, ‘Mehamatlah man bapandu ras nandendu.’ Ise numpahi bapana ntah nandena la banci lang iukum mate kap ia.
5. Tapi nindu ngajar: Adi lit kalak si ngataken man orang tuana, ‘Kai si banci ialokenndu i bas aku nari enggo kupersembahken man Dibata,’
6. e maka kalak si bage lanai iarusken enghamati orang tuana e. Alu bage lanai meherga man bandu Kata Dibata erkiteken adat nini-ninindu.
7. O kalak si pekulah-kulah! Tuhu kal kai si ikataken Nabi Jesaya kerna kam,
8. ‘Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari.
9. La lit ertina isembahna Aku, sabap undang-undang agama si ajarkenna e me peraturen-peraturen manusia!’ ”

MODEL PJJ: BUDAYA

KATA PERLEBE
Adat ras budaya eme dua konsep si erkawiten cukup erat tapi berbeda erti. Adat biasana ku aturen ntah pe kebiasan si berlaku bas masyarakat si usur iwarisken turun temurun ras lit sanksi sosialna, adi budaya eme cara nggeluh sada kelompok masyarakat si menyangkut ku perilaku ras si debanna. Bas kegeluhennta la banci ipungkiri maka gereja ras adat la banci ipisahken. Arah adat banci si peseh me Kata Dibata, ingan kita erberita kerna keleng ate Dibata. Arah ndalanken adatnta selaku kalak Karo, kita banci encidahken ras ngergaken Kata Dibata. Gerejanta Gereja Batak Karo Protestan (GBKP) mengusung adat ras budaya Karo si melekat i bas kerina dampar bidang pelayanan.

ISI
Kenca Jesus pepalem kalak pinakiten i Genesaret, e maka reh me piga-piga kalak Parisi ras guru-guru agama Jahudi ndahi Jesus, nungkun kerna ajar-ajarNa sila ngikuti adat nini-ninina? La mburihi tanna rikutken adat si ndekah. Rikutken tradisi khususna kalak Parisi ras ahli Taurat ope man lit aturen si semal ilakoken eme mburihi tan seh ku pergelangen tan si biasana enda melibatken ritual penucian. Situhuna enda labo aturen bas hukum Musa nari tapi adat istiadat si enggo ilakoken turun temurun ras enggo ianggappenting guna njagai kesucian (band. Markus 7: 1 - 4). E maka ialoi Jesus me penungkunen enda alu kai siilakoken kalak enda melanggar Kata Dibata alu alasen ndalanken adat istiadatna, patuh man adat si ndekah. Nina Jesus i bas Matius 15:4-6 : sabab nina Dibata: mehamatlah man bapandu ras nandendu. Ise si numpahi bapana ntah nandena la banci lang iukum mate kap ia. Tapi nindu ngajar: adi lit kalak si ngataken man orang tuana, 'Kai si banci ialokenndu i bas aku nari enggo kupersembahken man Dibata,' e maka kalak si bage lanai iarusken enghamati orangtuana e. Alu bage lanai meherga man banndu Kata Dibata erkiteken adat nini-ninindu. Alu kata si deban piga-piga kalak Parisi ras guru-guru agama Jahudi ngajarken lanai perlu ngehamati orang tua adi enggo mereken persembahen man Tuhan, ndalanken 'tradisi korban' guna ngindari mehamat nandangi orang tua, e maka Kata Dibata lanai idalanken. Lanai perlu ngehamati ras engkelengi orangtua adi enggo sibereken npersembahen korban tutungen (band. Keluaren 20:12). Jesus mengkritik keras kalak Parisi ras guru-guru agama Jahudi alu ngataken : o kalak si pekulah-kulah! Kritiken Jesus erpalasken bas kai si ikataken Nabi Jesaya : Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari. La lit ertina isembahna Aku, sabab undang-undang agama si ajarken eme peraturen-peraturen manusia. Jesus mengkritik kalak enda si pekulah-kulah ija lain i bas biber lain ka i bas pusuh. Kinitekenna terjeng bas biber ngenca, la ia ersembah alu pusuhna si bersih. Siidalankenna eme peraturen-peraturen manusia labo perentah Dibata.
Nats enda ngajarken kita, maka :
1. Jesus ngajarken maka adat labo gantiken Kata Dibata e maka enggo siutamaken adat piah lanai sidalanken Kata Dibata (ayat 5 - 6). Kolose 2 : 8 ngataken e maka jagalah, gelah ola ise pe nebu-nebu kam, alu kepentaren si la erguna si dem taki pacik, si reh i bas pengajaren manusia nari erpalasken pengertinna kerna biak doni enda janah labo i bas Kristus nari. Metengetlah kita bas ndalanken adat si lit bas kegeluhennta.
2. Ndalanken Kata Dibata aruslah i bas pusuh nari, labo hanya terjeng mejile arah darat. Labo salah nge peraturen-peraturen si lit e, sabab peraturen ei lit gelah ratur nge krina perdalanen. Tapi i bas ndalanken Kata Dibata, ula min ndauh pusuhnta nandangi Tuhan, aturen e nggo jadi paku mati si lanai banci iobah, lanai lit kekelengen ije. Tetaplah kinitekennta man Jesus, teklah nandangi kuasana, maka IA me Juruselamat nta situhu-tuhu. Ula bagi kalak Parisi ras guru-guru agama Jahudi, ilebe-lebena pe Jesus, iidahna pe alu matana jine kuasa Jesus maka IA me Anak Dibata, tapi Iabo ia tek man Jesus. Kita pe bage, ula sidalanken rangkaiao ibadah ras peraturen agamanta, tapi pusuhnta ras kinitekennta la man Jesus tapi man si deban.
3. Pengajaren situhu-tuhu eme rehna bas Tuhan nari, labo erpalasken ajaren si ibahan arah aturen-aturen manusia. Masmur 119 : 105 ngataken KataNdu kap tendang man nahengku, nerangi dalan si kudalani. Kata Dibata eme tuhu-tuhu terang si nerangi kegeluhennta, nerangi dalan nta. Pusuhnta si tutus ras bulat sirehna bas pusuh nari guna jumpa ras erkiniteken man Dibata.

PENGKENAINA
PJJ nta sendah ngajari kita guna ngergaken Kata Dibata arah ndalanken adat (bagi nina tema nta). Ngergaken enda labo hanya terjeng bas tindaken ntah pengerana saja tapi bas pusuh nari. Lit denga adat nta selalu kalak Karo si bertentangen ras Kata Dibata tapi tetap denga si dalanken, misalna lit denga si ndalanken erpangir ku lau dikune lit masalah; ntah nuri-nuri ku kuburen nini ntah bulang paksa ngadapi perbeben si mberat janah namaken cibal bagi belo ntah isap; namaken uis bas dalan/ingan ija ia ngenanami kecelakaan ntah kesenggeten; mindo pasu-pasu arah kalak si enggo mate misalna alu ngataken ngarak-ngarak pertendinndu nande/bapa/nini/bulang nemani kami bas kuburen/paksa jiarah; nungkun wari simehuli man simeteh wari i bas nentuken tanggal kerja ras si debanna. Si enda tentu bertentangen ras kekristenan. Lanai maba pusuhnta erkiniteken man Jesus Kristus. Marilah siarahken Kata Dibata i bas kita ndalanken adat, misalna mehamat man kalimbubu, engkelengi senina/sembuyak ras metami man anak beru sabab palasna eme kekelengen bas Dibata nari; dikune lit perbeben si mberat ertoto janah nuri-nuri lah man Dibata Bapa; dalanken kerina paksa alu tetap erkemalangen man Tuhan sabab sieteh maka kerina wari-wari janah paksa-paksa si reh man banta eme enggo iaturken Tuhan.

DISKUSI
1. Turiken pengangkan ndu kerna Matius 15 : 5 - 6. Kai-kai saja adat Karo si bertentangen ras Kata Dibata si tetap idalanken seh asa genduari ras apaika adat Karo si ngergaken Kata Dibata?
2. Aksi.
Bagi perpulungen i bas kelompok (4 seh 5 kalak i bas sada kelompok), bagiken masing-masing kelompok sada gambar batang kayu si galang ras lit cabang-cabangna (galangna setengah karton manila), bage pe piga-piga bulung-bulung kitik arah kertas origami warna hijau muda ras hijau tua man kerina peserta. Tep-tep peserta minimal datken 2 bulung warna hijau muda ras 2 bulung hijau tua.
Tep-tep peserta nulisken alu spidol bas bulung warna hijau muda nilai adat Karo si ibanggakenna bage pe bas bulung warna hijau tua ayat Alkitab si mendasari nilai adat Karo e. Contoh : Mehamat man kalimbubu (bulung hijau muda) - Epesus 6 : 1 - 3 (bulung hijau tua); Metemue man kalak si reh (bulung hijau muda) - Heber 13:2 (bulung hijau tua) Kenca sie, itempelken me bulung-bulung si enggo itulisi ndai ku cabang-cabang batang kayu si galang. Kenca dung e maka siposting ku media sosial (Fb, Instagram, Tik Tok, WA rsd) (Makna i bas aksi enda : Adat Karo bagi batang kayu si megegeh, Kata Dibata eme lau ras taneh. Adi la isiram alu Kata Dibata, adat e banci kerah ras la erguna bahkan mabai ku kebenen).

USULEN ENDE-ENDEN:
1. KEE GBKP No. 281: 1,3 ( KLIK JUDUL LAGU UNTUK MELIHAT LIRIK )
2. KEE GBKP No. 254: 1-3 ( KLIK JUDUL LAGU UNTUK MELIHAT LIRIK )
3. KEE GBKP No. 425: 1-2 ( KLIK JUDUL LAGU UNTUK MELIHAT LIRIK )
4. KEE GBKP No. 183: 1,3,4 ( KLIK JUDUL LAGU UNTUK MELIHAT LIRIK )

Pdt. Novita Hero Rosa br Surbakti S.Pd

HP/WA: 08127954662