Kebaktin Pekan Doa GBKP Wari Pelimaken

KEBAKTIN PEKAN DOA GBKP
( I Perpulungen )
WARI V, KAMIS, 21 Mei 2026

I. PERSIKAPEN
• Nikapken kerina perlengkapen guna kebaktin dingen ngaturken simuat bagin i bas kebaktin
• Nuratken isi pertoton sapaat
• Mpelajari ende-enden i bas kebaktin

KEBAKTIN
KATA PENARUH
Mejuah-juah man banta kerina perpulungen si ikelengi Tuhan. Sikataken bujur man Tuhan sabab iatankenNa kita pulung i bas Pekan Doa Pelimaken (V) wari si sendah. Si jadi tema man banta wari enda. "Tatap janah dengkehken pertotonku". Arah tema enda iajuk kita merenungken maka Dibatanta eisikap katawari paksa pe lako natap ras ndengkehken kerina pertotonta. I bas erbage bage kelsehen, pingko-pingko, perbeben, baban simberat bage pe paksa meriah ukur ras malem ate, Dibatanta ersikap natap ras ndengkehken kita. Dage guna menake,n kebaktinta enda, mari siendesken dirinta ras pe Serayan Tuhan si ipakeken Dibata guna nehken sura-suraNa. Mari ras kita ertoto

Perpulungen Tedis

RENDE KEE No. 2:1-2
Ipuji kami Kam, gelarNdu si mejin,
O, Tuhan sinidas, si mekelek mbelin
Sinasa lit kepe i surga ras i doni
Man Dibatanta e ras kita k'rina muji
Kam Si Badia e Kam tetap si 'ngkawali
LiasNdu tangkas min i surga ras i doni

Kam lalap man pujin ibas ende-enden
'Rkiteken bujur kap mehuli peraten
Di reh nge pagi Kam ngukumsa pengarahen
Mekuah iteNdu min mb'ra ola kesalahen
La kalak kemalun si baNdulah ernalem
Kam penundalenku e maka 'teku malem

Votum - Salam - Invocatio
L : I bas gelar Dibata Bapa, i bas gelar AnakNa Jesus Kristus, ras i bas gelar Kesah Si Badia.
Perkuah ate ras dame i bas Dibata Bapa, i bas Jesus Kristus nari ras i bas kerembaken Kesah Sibadia ras kita (kam) kerina gelah. Amin
P : Amin, Amin, Amin (iendeken)
L : "La kita mbiar i bas adep-adepen Dibata sabap ibegikenNa kita adi sipindo man baNa kai si sentudu ras peratenNa" (1 Joh. 5:14). Erpalasken kata Dibata enda, sipuji Tuhan arah ende-endenta :
KEE No. 332:1-2 TOTONTA BEGIKENNA
Totonta begikenNa, Keleng ateNa kita
Ertoto isuruhNa, Em si ngena ateNa

Mbelin kal kuasaNa, Ras perkuah ateNa
Sipindo si erguna, Lah terpuji gelarNa

Perpulungen Kundul

Pujin Man Dibata si Mperdiateken Kegeluhen Manusia
L : Terpujilah Dibatanta i bas ingan si rneganjang, simperdiateken kerina dampar gelulita.

P : Ipuji kami Kam O Tuhan, Bapa si erpengidah dingen metinggel kempak manusia

L : Dibata si erdolat, ermulia, erkuasa seh rasa lalap, e me kap si ngarak-ngarak kegeluhenta katawari paksa pe

P : Suari berngi igejapken kami pengkawali ras penemani Tuhan. Kam Dibata si nandai karni alu payo, la lit sada pe kami manusia pulah i bas pengidahNdu nari

L+P : Terpujilah Dibata i bas geluhta, genduari seh rasa lalap !

Mari sipuji Tuhan : KEE 263:1-2
Adi kuidah ampar bintang terang, Ras sora lenggur guntar kubegi
O, Tuhanku i je ukurku mamang, Ngidah b'linna krina tinepaNdu
Reff : Maka pusuhku e pehaga Kam, Mbelin. me Kam o, Tuhanku
Maka pusuhku e pehaga Kam, 0, Tuhanku, mehaga Kam

O, Tuhanku di k'rina kuukurken, Perkuah 'teNdu nebusi aku
Tuhan me kap man bangku nggo Alu dareh Jesus Si Badia Reff :

Kinilangasupen Manusia Nggejapken Dibata Natap ras Ndengkehken Pertoton
L : Kearun ate megati reh ngerimrim pusuhta, kedungenna la igejapken manusia uga belinna kuasa Dibata

P : Ngaku kami Tuhan, rusur la inget kami keleng ateNdu si tetap, si nggo padankenNdu man Abraham, Isak, Jakup. Padan e icikepNdu kap seh wari enda. Tapi kearun ate kami rusur belinen asangken ukur si tetap. Wari perlego si berdampak ku perturah sinuansinuan, perbeliten jabu bagi si picet, binaga kurang lakona, usaha kurang lancarna, pinakit erdenden, lagu langkah anak jabu la bagi ukur, turah perubaten i bas sangkep nggeluh, ras si debanna. Maun enda erbahanca lanai kami ngasup ngidah keleng ateNdu si tetap. Tatap janah dengkehkenlah pertoton kami Tuhan

L : Mari siakuken kinilangasupenta nggejapken Tuhan arah endeendenta : KEE GBKP No. 378 (iendeken 3x)
O Tuhan reh aku ku lebeNdu, Nembah ras ngataken bujur baNdu
Aku enggo itebusNdu, Dosaku ialemiNdu
Pulah me aku O Tuhan, Ibas iketen kuasa dosa
Malem kal ateku Tuhan, Nggo terkelin tendingku

--- Perpulungen tedis ---

Pergegeh Guna Nggejapken Kuasa Dibata arah Pertoton
L : Tuhan Dibata kap ulu kepentaren ras pemeteh. IberekenNa pengertin simbaru man kerina anak-anakNa. IajariNa kap kita ngangkai kuasaNa simbelin, ngidah keleng ateNa si tetap, nggejapken maka Ia erpemegi ras erpengidah man kerina jelma si la erndobahen. Bagi kesaksin Pemasmur nina “Keleng ateku man Tuhan, sebab idengkehkenNa aku, ibegikenNa pertotonku. ibegikenNa aku tep tep kali aku erlebuh man baNa” (Msm. 116:1-2). I bas keriahen ukurta nggejapken kuasa Tuhan, Mari sipuji gelarNa: KEE GBKP No. 274:1-2
Kupuji Kam o, Tuhanku, perban keleng ateNdu
Ateku nggeluh badia, Ngelawan kuasa dosa
Bage me sura-surangku, Bere gegeh ras kuasa
Gelah tetap perjingkangku

Kam saja patut dat pujin, Bas kegeluhen kami
Ban Kam Tuhan si perkeleng, si nasap dosa kami
Siberitaken me dage perbahanenNa si mbelin
’Lah doni pe muji Tuhan

--- Perpulungen kundul ---

KATA DIBATA (ibenai ras idungi alu pertoton)
Renungen : Nehemia 1:4-11
Tema : “Tatap Janah Dengkehken Pertotonku Tuhan”

Pengakun Kiniteken (Perpulungen Tedis)

Persembahen (Perpulungen Kundul)
L : Seh me paksana kita ngendesken persembahen pengataken bujurta man Dibata. Kata Dibata si jadi palas ersembah erpalasken 2 Korinti 9:7 ”Sekalak-sekalak iberekennalah sue ras si nggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah” Tupung si pepulung persembahenta, mari sipuji gelar Tuhan : KEE No. 450:1-
Endesken kami man baNdu, sada bagin pemereNdu
Persembahen kami baNdu, Gelah ialokenNdu
Reff : Pasu-pasuNdu min gelah, Si tading i bas kami
Ajarindu dage kami, m’re persembahen baNdu

Si pepulung persembahen, Si endesken e man Tuhan
Asa gegeh kengasupen mari sipersembahken Reff : …

K’rina jine si aloken, erta ras pe kiniliten
Sada bagin si ulihken, asa si nggo sikapken Reff : …

Pertoton Persembahen ras Sapaat
1. Persembahen ras Jabu ingan pulung wari enda ras wari si pepagi
2. Gelah perpulungen ngasup nggejapken Dibata natap ras ndengkehken pertoton
3. Bangsa, Negara ras Pemerintahen gelah idemi Tuhan alu kepentaren i bas ndalanken tugas ras tanggungjababna
4. Notoken daerah PI :
- Klasis Medan Namorambe : Runggun Lubang Ido, Runggun Bekukul – Namo Pakam, Runggun Jaba, Runggun Namo Pinang, Perminggun Pondok Tengah, Bajem Gunung Klawas, Runggun Tangkahan, Runggun Kuta Lepar
- Klasis Medan Kuta Jurung : Perpulungen Tanjung, Perpulungen Simpang Kawat, Perpulungen Taduken Raga, Runggun Patumbak
- Klasis Medan Deli tua : Perpulungen Laja/GBKP Runggun Penen, Perpulungen Penungkiren/GBKP Runggun Penen, Perpulungen Pernangenen/GBKP Runggun P. R. B, Perpulungen Buluh Belin/GBKP Runggun P. R. B, Perpulungen Rambai /GBKP Runggun P. R. B, Perpulungen Ujung Meriah/GBKP Runggun Periaria, Perpulungen Tembengen/GBKP Runggun Periaria, Perpulungen Kwala Uruk/GBKP Runggun Tanjung Berampu, Perpulungen Namo Pinang Kuta/GBKP Runggun Simpang, Runggun Namo Mbaru/Salang Tungir, Runggun Pertumbuken, Runggun Bandar Bayu, Runggun Betala, Runggun Delitua Kuta - Klasis Barus Sibayak : Perpulungen Barus Julu - Rg. Tanjung Barus
5. Si turah i bas perpulungen : …

--- Perpulungen tedis ---

Perpadanen Man Dibata
L : Keleng ate Dibata si tetap eme jadi palas IA mperdiataken kita teptep wari. Desken sekalak teman si erkeleng ate, belinen pe kelengNa i bas natap ras ndengkehken manusia

P : Bujur O Tuhan, ipetetapNdu ukur kami wari enda. Inget kami keleng ateNdu si tetap, si nggo padankenNdu nai nari idur Pustaka. Padan e icikepNdu kap seh wari enda, setia kam natap ras ndengkehken kami. Wari perlego si berdampak ku sinuan-sinuan la erbahanca kami surut ertoto. Kuga pe cibalna perbeliten jabu tetap kami ngataken bujur. Usaha ras binaga kami endesken kami baNdu. Pinakit si erdenden, lagu langkah anak jabu la bagi ukur baba kami i bas pertoton man Tuhan. Tutus kami ertoto gelah jabu kami sempabu bagepe nggit kami sikelengen i bas sangkep nggeluh kami

L : Mari sipeteguhi perpadanenta arah ende-endenta : KEE No. 309:1-2
Pengasup kami o Tuhan, Gelah pedahNdu banci idalanken
Em kap tendang kami bas kegeluhen, KataNdu si man gelemen
Gelah tangkas kata ras perbahanen
Ban min kami tetap bas kebujuren, SurgaNdu kap perayaken

Temani kami o Tuhan, Bengket ku doni si dem keguluten
SampatiNdu kami lako naluken, Dosa si man sirangenken
E maka ola kal kami tadingken
I bas kami ndalani kegeluhen, G’lah dat kami kemenangen

Pertoton Tuhan

Pengutusen ras pasu-pasu Dibata
L : Mulihlah alu dame ras mejuah-juah, janah alokenlah pasu-pasu idur Dibata nari “Ipasu-pasu janah ikawali Dibata kita (kam), siang ayo Dibata ersinalsal ibabonta (ndu), janah melias ateNa ngenehen kita (kam). Itatap Dibata ku kita (kam)janah malem ateta (ndu)ibahanNa, Amin ”

P Amin… Amin… Amin ! (iendeken)

Pdt. Mikha Ginting, M.Th.

HP/WA : 085297419809