Kebaktin Pekan Doa GBKP Wari Peempatken

KEBAKTIN PEKAN DOA GBKP
( I Perpulungen )
WARI IV, RABU 20 Mei 2026

I. PERSIKAPEN
• Nikapken kerina perlengkapen guna kebaktin dingen ngaturken simuat bagin i bas kebaktin
• Si usahaken maka anak-anakta pe ikut muat bagin i bas kebaktin enda.
• Perdalanen Kebaktin i bas kundul ntah tedis ilakoken sue ras situasi.

II. KEBAKTIN
Kata Penaruh
   Syalom ras mejuah-juah man banta kerina kekelengen ni Tuhan!!! Wari enda sibengketi Kebaktin Pekan Doa wari pe-empatken i bas perpulungenta. Senina ras turang melala tuhu ialoken kita pasu-pasu Tuhan. Tapi erkiteken lit ka megati reh si la bagi ukur i bas geluhta, maka lanai kita ngasup nggejapken ras menikmati pasu-pasu Tuhan. E maka gelah ula perbeben si mberat siengkuasai geluhta, wari enda kita idilo gelah secara rutin kita ertoto man Tuhan .guna ngalaken erbage-bage kelatihen ras kesusahen sialami kita i bas ndalani wari-warinta. Mari dage si pesikap ukurta guna ersembah man Dibata alu ras kita ertoto...
(Serayan Kebaktin Bengket ku Mimbar)
Rende : KEE No. 235: 1 "Dibata Kap Njagaisa" (Perp. Tedis)
Dibata kap njagaisa gedang berngi, sangana aku medem nderbih nai,
Je medak aku bas erpagi-pagi, gelarNdu kupebelin ras kupuji.
Reff : Wari enda wari ni Dibata ale, sialoken janah m'riahlah ukurta
      Dage baNa 'ndesken kegluhennta ale,
      Bas nembah muji g'larNa Si Badia

Votum - Salam
L : I bas gelar Dibata Bapa si jadi inganta (ndu) guna nehken pertoton, i bas gelar Jesus Kristus si ngajari kita (kam) ertoto, ras i bas gelar Kesah Si Badia si ertoto man gunanta (ndu) raduken ras kerina tendinta (ndu) Perkuah ate ras dame i bas Dibata Bapa, i bas Jesus Kristus nari ras i bas kerembaken Kesah Si Badia ras kita (kam) kerina gelah. Amin.

P : Amin..... Amin..... Amin..... (iendeken)

Berita Kerna Perbahanen Ras Sura-sura Dibata (Invocatio)
L : “Ertotolah katawari pe” (1 Tesalonika 5:17). Erpalasken Kata Dibata enda, si puji IA alu ras kita ngendeken: KEE GBKP No. 285 : 1,4 ”
Kam me o, Tuhan pematang g’luhku, Kam empuna geluhku
Tedeh ateku sikel ukurku, rembak tetap min ras Kam
Reff : RembakkenNdu aku o, Tuhan Ku kayu persilangNdu
RembakkenNdu aku, RembakkenNdulah, Ku lebeNdu o, Tuhan

La bo ’nggo serta g’luh doni endaRas Kam ngenca mambarna
I bas rumahNdu i adepenNdu, Dame me tuhu-tuhu Reff : …

Perpulungen Kundul

Berita Kerna Kinulin dingen Kekelengen Dibata
L : Turang ras senina, Dibata kap inganta (ndu) nehken pertoton. Dibata e setia jadi inganta nehken isi pusuh subuk i bas ermeriah ukur bage pe i bas keguluten ukur. IberekenNa kita pasu-pasu, ipulahiNa kita arah perbeben geluh. Sikataken bujur man Tuhan ras pujilah gelarNa arah Rende KEE No. 423:1-2
Kam nebusi aku Tuhan, Kam si mpeteneng tendingku
Tendi si ndube tertaban, TeguNdu ku adepen Ndu
Reff : Malem kel ateku Bapa, Ban keleng ate Ndu
        Ku puji gelarNdu Bapa, Mulia gelarNdu
        TeguNdu lah aku Tuhan, Ibas pusuhku Kam ringan
        PetetapNdu aku Tuhan, ‘Lah dosa talu me kuban

Kam ngalemi aku Tuhan, Kam si mpepalem pusuhku
Pusuh si megati nogan, Mbaru perbahan kelengNdu Reff : …

Pengakun Dosa

L : Senina ras turang i bas kekelengen Tuhan Jesus Kristus. Dibata kap inganta ertoto, inganta nuriken isi pusuh ukurta. Tapi megati denga kita kurang ertoto, la man Tuhan kita nuriken isi pusuhta bagepe perbeben geluhta. Kalak si setia man Dibata, itegu-tegu Dibata kap ia i bas rukur ras ndalanken si mehuli. Tuhan kap penggurunta situhu-tuhu i bas rukur ras ndalani kegeluhenta. Ikuhi Dibata alu gegeh ras kepentaren i bas ndalanken si mehuli man kerina kalak siertoto man baNa. Amin bage gia, kurang denga kap ketutusenta ertoto man Dibata, e maka siakuken dage salah lepakta man Tuhan ras sipindo pengalemi dosa arah Rende Kee No. 446:1,2

Dosangku majekkensa, SilangNdu Tuhanku
Salahku kap erbahansa, Nggo mambur darehNdu
KesahNdu asamkenNdu, Gunangku Tuhanku
Bagem pengkelengiNdu, Krina igengkenNdu

Ersembah mungkuk aku, Iadep-adepenNdu
Kerina kuakuken, 'Lah itebusiNdu
Bagem pengarapenku, Em isi pusuhku
Mekuah min ateNdu, Kam kap Penebusku

Pengalemi Dosa (Perp. Tedis)
L : Selaku persuruhen Dibata aku nehken KataNa man banta (ndu) kerina kita (kam) si ngakuken dosanta (ndu): Tole nina 'Tuhan "Marilah, maka si dungi cakapta enda. Kam enggo erkubang-kubang ibahan dosa, tapi Kuperidi kam maka bersih bagi salju. Aminna gia erkiteken dosandu kam enggo mbiring bagi tengguang. mulihi kam jadi mbentar bagi kapas" (Jes. 1:18). Bage me nina Dibata man banta (ndu) kerina. Amin.
Si puji dage Tuhan i bas dosanta enggo lalemiNa, alu ngendeken KEE No. 184 : 1, 2 "jesus Tuhanku Njarninisa"
Jesus Tuhanku njaminisa, K'rina dosangku tebusiNa
Geluh simbaru jujurkenNa, M'riah ukurku ngalokenca
Reff : Tuhanku Jesus Kam me tetap, Pengendesenku rasa lalap
Temani aku o, Penampat, Tuhanku Jesus Juruslamat

Ngendes man baNa sikap tuhu, Keleng ateNa negu-negu
Mindo man baNa ola medu, Maka ib'reNa pasu-pasu Reff :

Kata Dibata (ibenai ras idungi altipertoton) Perp. Kundul
Renungan : Masmur 55:17-20
Tema : Erlebuh Suari Bergi Man Tuhan

Pengakun Kiniteken (Perp. Tedis)

Persembahen (Perp. Kundul)
L : Kata Dibata si jadi palas i bas kita ngendesken persembahen si me tersurat i bas Masmur 50:23, NiNa : "Ngataken bujur e persembahen si mpehagaken Aku janah si ptuh ngikutken Aku tentu Kukelini". Tupung si sehken persembahentaa, ras kita rende i bas: KEE No. 405: 1-3 "Mari Si Puji Tuhanta si Badia"
Mari si puji Tuhanta si Badia, Si mereken kelengNa man banta
Kataken bujur min perban mbelin kuasaNa
Pasu-pasuNa kap teptep wari man banta

Mari si puji Tuhanta si Badia, Sipersembahken persembahenta
Kataken bujur min Perban mbelin pem'reNa
Si njaga kita suari berngi lalap min

Mari si puji Tuhanta si Badia, Sisehken kulanta ras geluhta
Jadi persembahen si nggeluh ras badia
Dame bas geluhta sabab kita anakNa

Pertoton Persembahen ras Sapaat
a) Notoken Persembahen (ibabai Jabu Merga Tarigan)
b) Notoken Jabu Kundulen ras ingan pulung wari si pepagi (ibabai Jabu Merga Perangin-angin)
c) Notoken gelah kerina perpulungen tutus ertoto i bas katawari paksa pe man Tuhan (ibabai Jabu Merga Karo-karo)
d) Notoken Pemerentah, Moderamen GBKP, Pendeta, Vicaris, Detaser, Pertua/Diaken, Pt/Dk Emeretus, BPMK, BPMR ras BP Perpulungen gelah tetap ngasup ndahiken dahin pelayanen. (ibabai Jabu Merga Sembiring)
e) Notoken Daerah PI (Ibabai Jabu Merga Ginting)
- Klasis Pembangunan Medan Delitua : Rg. Kuta Beringin, Bajem T. Mbarolan
- Rg. Pasar VI Delitua, Rg. Kuta Baru
- Klasis Kepri : Pos PI johor Bahru Malaysia, Perpulungen jodoh-Nagoya, Perminggun Trans-Barelang, Perminggun Barelang, rencana pembukaan PI ku Pulau Anambas, GBKP Rg Batu Aji
- Klasis Jakarta Kalimantan : PJJ Cigombong, ras Pengembangen ku Cianjur Rg Sukabumi, Perminggun Jonggol Rg Cibubur, Perminggun Penajam Rg Balik Papan, Pos PI Sintang Sekadau Rg Pontianak, Pos PI Singkawang Rg Pontianak, Pos PI Ketapang Rg Pontianak, Pos PI Bengkayang Rg Pontianak, Perpulungen Ngabang - Sungai Asam Rg Parindu, Perpulungen Sampit Rg Palangkaraya, Perpulungen P3S (Pundu, Parenggean, Pelantaran Sekitarnya Rg Palangkaraya, Pos PI Pangkalan Bun Rg Palangkaraya, Perpulungen Sangatta Rg Samarinda, Perminggun Bontang Rg Samarinda, Pos PI PTP (Pulosari, Tambangulang, Pleihari) Rg Banjarmasin
- Klasis Medan Kampung Lalang : Perp. Ujung Baru Rg. Berdikari, Perp. KPG Pamah Rg. Berdikari, Perp. Durin Lingga Rg. Berdikari, Perp. Dagang Kumbar Rg. Gunung Tinggi, Perp. Salang Paku Rg. Kampung Lalang, Perp. Pinang Baris Rg. Kesatria, Rg. Namo Kamuna, Rg. Rampah Dua, Rg. Sidodadi, Perp. Semangat Baru Rg. Sempat Arih, Perp. Pasar Siwah Rg. Tanjung. Selamat, Rg. Sada Kata
f) Notoken siturah i bas perpulungen (ibabai Pengkotbah).

Perpadanen Man Dibata (Perp. Tedis)

L : Ertoto e me dalanta nehken sura-sura geluhta man Dibata. Endesken kerina perbeben geluhta. Bhanlah waktuta ertoto teptep warina, ula ermedu-medu ertoto sebab kalak si tutus ertoto, ikuhi Dibata alu gegeh ras kepentaren bage pe pasu-pasu si simpar. Teklah dingen tetaplah kita (kam) ertoto man Dibata, sabap si aloken kap kai si pindo man baNa arah pertotonta.
E maka man banta kerina perpulungen salami kawes ras kemuhenta kita si salamen kataken "Tutus atendu ertoto gelah pasu-pasu Tuhan kam!".
L : Gelah kita tetap i bas perpadanenta man Dibata, mari ras kita rende arah: KEE No. 460:1,2 "Malem Ateku Tuhu"
Malem kal ateku tuhu-tuhu, Jumpa ras Tuhanku
Nggo p'limbaruiNa pusuhku, Lanai aku labuh
Ku kataken bujur baNdu, Si'ngk'lini geluhku
Terpuji kam bas geluhku, Nginget perkuahNdu

Kubegi kataNdu Tuhan, Nerangi perdalan
KesahNdu e simpepanken, Bas pusuhku ringan
Ateku min kupakeken, I bas kegeluhen
Je aku dat keriahen, Ndauh kebiaren

Pertoton Tuhan
Pengutusen Ras Pasu-pasu Dibata
L Geluhkenlah geluhta (ndu) i bas pertoton, sabab Dibata ndengkehken pertotn kalak si tek man baNa, jenari alokenlah pasu-pasu idur Dibata "Ipasu-pasu janah ikawali Dibata kita (kam), siang ayo Dibata ersinalsal ibabonta (ndu), janah mellas ateNa ngenehen kita (kam). Itatap Dibata ku kita (kam), janah malem ateta (ndu) ibahanNa" Amin. (Bdk. Bil 6:24-26).
P : Amin Amin Amin (iendeken)

Pdt. Elieser Tarigan Tambun, S.Th

HP/WA : 082277364488