Kebaktin Pekan Doa GBKP Wari Peteluken
KEBAKTIN PEKAN DOA GBKP
( I Perpulungen )
WARI III, SELASA 19 Mei 2026
I. Persikapen
• Nikapken kerina keperlun bas kebaktin enda
• I bas pengataken bujur dingen pengakun dosa enda ilakoken alu ertoto.
II. Kebaktin
Kata Penaruh
Mejuah-juah man banta kerina keluarga Dibata si tetap ersada i bas pertoton. Meriah ukurta i bas iatanken Dibata kita guna bengket ku bas Pekan Doa i bas bergi si peteluken. Kalak si ertoto eme kalak si dem kiniteken man Dibata. Kalak si ertoto itandaina Dibata si tuhu-tuhu. Igejapkenna maka Dibata megiken dingen ngaloi kerina pertoton. Pertoton jadi bentuk pengendesen diri kalak si erkiniteken man Dibata. Perpulungen si ertoto, eme perpulungen si enggo ngendesken kerina kegeluhenna, subuk i bas meriah ukur bage pe erceda ate man Dibata. Marilah si bengketi kebaktinta wari enda alu perlebe si pindo gegeh man Dibata gelah isampatiNa kita i bas ibegiken kata Dibata dingen iajariNa serayanNa i bas mpeseh kataNa. Gelah kebaktinta pe kerina banci erdalan alu mehuli. Mari ras kita ertoto
Mari dage si benai kebaktinta wari si sendah alu ras kita kerina rende KEE GBKP No. 57:1-2 (Perp. Tedis)
Nggo kita pulung i lebe Tuhannta si mbelin
Ersadalah totonta e Ras 'nde-enden pujin
O, Tuhanku si nasa lit Pematang ibas Kam
E banci kin la kami nggit Mehaga ndahi Kam?
Votum salam invocatio
L : I bas gelar Dibata Bapa, i bas gelar AnakNa Jesus Kristus, ras i bas gelar Kesah Si Badia. Penampat man banta (ndu) reh i bas Jahwe nari simereken kdgeluhen man banta (ndu) sekalak-sekalak. Amin.
P : Amin... Amin... Amin... (iendeken)
L : Kam kap Dibatangku, ajari aku ngelakoken peratenNdu. Mehuli min Kam kempak aku, jenari babai aku arah dalin si pinter (Msrn. 143:10)
Erpalasken kata Dibata enda, sipuji IA arah ende-endenta: KEE GBKP No. 368:1,3
Si puji Tuhan Dibatanta,Kataken bujur bana
Sabab lA si merekenca, Pasu-pasu man banta
Reff: Mbelin ras mulia kekelengan Tuhan, I bas doni enda
Ajari O Tuhan kami k'rina anakndu
Naksiken kerina perbahanenNdu
I inget kami padan Tuhan, Bas kegeluhen kami
Kam si mereken kegeluhen, 'mpetetap ukur kami Reff :
Perpulungen Kundul
Pertoton pengataken bujur man Tuhan si perkeleng
L : Marilah si penangkih pertotonta guna ngakuken kerna kekelengen Dibata si perkeleng. Mari si benai totonta.
Ibabai si Mada Jabu
Terpujilah gelarNdu o Tuhan si perkeleng. Keleng ateNdu igejapken kami i bas perdalananen kegeluhen kami. Keselamaten si rehna i bas Kam nari si erbahanca kami terkelin. Kami si perdosa, si la metunggung guna ngaloken keselamaten tapi ban bage keleng ateNdu nandangi kami kerina, iselamatkenNdu Jesus jadi bukti keleng ate Dibata nandangi kami kerina anakNa. Darah Jesus si mambur e me bukti keleng ateNdu. Jesus si keke. dingen nangkih ku Surga jadi bukti kuasaNdu si mbelin e. Bujur i bas keselamaten si iberekenNdu o Tuhan. Terpujilah Kam nai nari, genduari seh rasa lalap. Amin
P : Rende KEE GBKP No. 466 iendeken 3x
Bujur o Tuhanku, Bujur o Tuhanku
Terpujilah gelarNdu, Bujur O Tuhanku
Ibabai Kalimbubu Si Mada Jabu
Terpuji gelarNdu si Badia o Dibata ulu pasu-pasu. Igejapken kaini pe kekelengenNdu i bas kegeluhen kami si nggo masu-masu kami alu erbage-bage pemere. IberekenNdu man kami kesehaten, rejeki bage pe jabu. Buena keleng ateNdu bagi kersik i lawit, la terbeligai erkiteken buena. E maka ngataken bujur kami man banNdu o Tuhan. Sabab si e kerina labo erkiteken beluh dingen pentar kami, tapi erkiteken kekelengenNdu nandangi kami. Terpujilah kam o Tuhan genduari nari seh rasa lalap, Amjn.
P : Rende KEE GBKP No. 466 iendeken 3x
Bujur o Tuhanku, Bujur o Tuhanku
Terpujilah gelarNdu, Bujur o Tuhanku
Ibabai Anak Beru si mada Jabu
Terpuji gelarNdu o Bapa si mada Gereja. Igejapken kami kerna keleng ateNdu nandangi kami arah kerehen gerejaNdu. Arah gereja enda me kami nggejapken dingen ngangkai kerna kai si mehuli, si benar dingen si ngena ateNdu. Arah kerina pengajaren si ibahan gerejaNdu ertangkasna me penandai kami kerna Kam. Ipuji kami Kam o Tuhan genduari nari seh rasa lalap, Amin.
P : Rende KEE GBKP No. 466 iendeken 3x
Bujur o Tuhanku, Bujur o Tuhanku
Terpujilah gelarNdu, Bujur o Tuhanku
L : Mari tole si penangkih pujinta man Tuhan arah kita rende KEE GBKP No. 365:1,4
Kudahi Kam Tuhan Dibatangku, Kupenangkih totonku man baNdu
Kukataken bujur ermengkah ukurku
I bas ngaloken perkuah ateNdu
Reff : Nggo tangkas peratenNdu, bas geluhku
Bujur o Bapa nggo malem ateku
AlokenNdu min puji sembahku
Begikenlah totoku man baNdu
T'rangiNdu `lah min pusuh ras peratenku
Kuikutken Kam segedang geluhku Reff :
Pertoton pengakun dosa man Tuhan
L : Marilah kita kerina si dahi Dibata guna ngakuken kerina kesalahenta. Kita manusia si megati lenga erbulat ukur dingen dem kiniteken i bas pertotonta. Marilah si dahi Tuhan ngakuken kerina salah ras lepakta alu ras ertoto.
Ibabai sekalak mamre
O Bapa, aku anakndu reh ndahi Kam guna ngakuken kerina salah ras lepak kami. Adi kerna ertoto nggo me kami usur ertoto. Tapi nggo pe kami ertoto megati kurang tek denga kami nandangi Kam. E maka toto si ibelasken kami e bagi formalitas saja ngge, gejah enggo ertoto. Mela kami tempa adi la ertoto, kalak Kristen tapi la ertoto. Tapi pertoton si lakoken kami terjeng babah saja, labo seh ku pusuh ukur kami. Alemi min salah ras kelepaken kami o Tuhan, Amin.
P : Rende KEE GBKP No.476 iendeken 3x
Tuhan begiken totoku enda, Bengketi pusuhku Tuhan
Tuhan begiken toto ku enda, begiken min Tuhan
Ibabai sekalak Moria
O Bapa, enda reh aku anakNdu si kelengiNdu ngakuken salah ras lepakku. Megati gegehku jine ngge si ku penalem. Pertoton lenga jadi dalanku nguna ngendesken diringku man banNdu. Sanga ertoto e pe reh denga megati erkusik pusuhku, adi la ku ban lo kai pe erdalan. E maka pegangkanku usur papak. Ningku bas pusuhku gegehen nge aku asa gegehNdu o Tuhan. Salah kel aku Bapa, alemi min aku, Amin.
P : Rende KEE GBKP No. 476 iendeken 3x
Tuhan begiken totoku enda, Bengketi pusuhku Tuhan
Tuhan begiken toto ku enda, begiken min Tuhan
Ibabai sekalak anak
O Bapa, aku anakNdu pe ngakuken dosangku man baNdu. Genduari nggo teken aku man teknologi. E maka bicara ertoto pe aku, kai nina teknologi e ka nge si ku ikut-ikut. La pe sue ras sura-suraNdu; kai nina teknologi e nge tetap si ku penalem bas kegeluhenku.
P : Rende KEE GBKP No. 476 iendeken 3x
Tuhan begiken totoku enda, Bengketi pusuhku Tuhan
Tuhan begiken toto ku enda, begiken min Tuhan
L : Mari tole siakuken kerina salah ras lepakta man Dibatanta arah ras kita rende KEE GBKP No. 380 iendeken 3X
O Tuhanku alemi min, Salah dosangku alemi min
O Tuhanku alemi min, Salah dosangku alemi min
Perpulungen Tedis
Pengalemi Dosa
L : Selaku persuruhen Dibata, aku nehken kataNa man banta (ndu): "Dosa-dosanta (ndu) enggo ialemi (Kualemi) janah ukumen siibereken (siKubereken) erkite-kiteken dosanta (ndu) enggo bias. Erkemalangenlah man Dibata (bangKu), sipan (ipanndu) me kai si mehuli ulih tanehta (ndu) enda." (bdk. Jes. 40:2b; 1:19)
Meriah ukurta erkiteken dosanta (ndu) enggo ialemi Dibata, sipuji Dibata arah ende-endenta: KEE GBKP No. 391:1-2
Anem dosangku mekelat megara, IsalihkenNdu me jadi mbentar
Kam kap erbanca geluh meherga, Kugejap tuhu kelengNdu simper
Reff : Tendingku ersurak janah nembah, Kupakeken me pedah
Kam kap Dibata Bapa Si Perkuah,
Bas kep-kepenNdu min aku gelah
Ukur pinter ras bujur nge pindoNdu, Pusuh si getem ngena ateNdu
Demi pusuhku alu liasNdu, Gelah ku pembarken min kataNdu Reff :
Perpulungen Kundul
Kata Dibata (ibenai ras idungi alu pertoton)
Ogen : Perbahanen Rasul-Rasul 7:54:60
Tema : Tuhan Aloken Tendingku
Perpulungen Tedis
Pengakun Kiniteken
Perpulungen Kundul
Persembahen
L : Seh me paksana nehken persembahen pengataken bujur man Dibata. Kata Dibata kerna persembahen e
"Bahanlah pengataken bujur jadi persembahen man Dibata, sehkenlah kai si enggo ipadankenndu man si Meganjangna." (Msm. 50:14)
Tupung ngendesken persembahen pengataken bujur, rende kita arah ende-endenta: KEE GBKP No. 272:1-3
Ise kin kami enda o, Bapa, Maka kami ngasup mere baNdu
Labo-ban gegeh kami o, Bapa, Kam Raja surga doni
Reff : Kai pe si lit ibas kami o, Bapa
E kap bekas pemereNdu man kami
Enda sada bagin, Bapa ipersembahken kami
Ngataken bujur kami man baNdu, persembahen kami enda
Aloken ras ipasu-pasuNdu, Terpujilah gelarNdu Reff :
Nggejap bilinna perkuah ateNdu, Makana kami mere man baNdu
Kai pe cukup i bas Kam o, Bapa, Kam Raja Surga doni Reff :
Pertoton Persembahen Ras Sapaat
• Gelah pertoton erbahanca perpulungen ngasup nandai Dibata alu payo
• Notoken Daerah PI :
- Klasis Binjai Langkat : Bajem Bandar Tinggi Runggun Batang Serangen, Bajem PSL (Perkebunan Sawit Langkat) Runggun Batang Serangen, Bajem Gelugur Tani Runggun Kuala Unggas, Bajem Belinteng Runggun Namotating, Bajem Lau Ban-ban Runggun Namotating, Bajem Penampangen Runggun Pasar 2 Namoterasi, Bajem Pirlok Runggun Petani Jaya, Bajem Cinta Rakyat Runggun Securai, Bajem Telaga Said Runggun Securai, Bajem Batu 8 Runggun Stabat, Bajem Bandar Bingei Runggun Tanah Merah, Bajem Jambur Karet Runggun Tanjung Pura Gebang, Bajem Jati Tunggal Runggun Tanjung Pura Gebang, Perminggun Mandalingen, Runggun Tanjung Pura Gebang, Bajem Ujung Barat Runggun Tigasabah, Bajem Saporok Runggun Tigasabah
- Klasis Tiga Binanga : Perp. Cerumbu Rg. Liang Melas Datas, Rg. Kuta Kendit Kanaan, Perp. Pola Tebu Rg. Kuta Mbelin, Perp. Sukajulu Rg SUKMA, Perp. Kuta Mbaru Punti Rg. Sukma, Rg. Batu Mamak LM, Perp. Kuta Buara Rg. Kuala, Perp. Negri Jahe Rg Negeri Jahe - Gunung Meriah, Rg. Kuta Great, Perp. Jandi Rg. Kidupen, Perp. Lau Lingga, Perp. Sigenderang Rg II Juhar, Perp, Ketawaren-Lau Kidupen, Perp. Sigedang Pinem, Perp. Naga, Perp. Juma Batu, Perp, Pamah Silep-lep Rg BTT
- Klasis Bekasi Denpasar : Pos PI Labuan Bajo Rg. Kupang, Perp• Singaraja Rg Denpasar, Perpulungen Sukatani Rg Cikarang, Perpulungen Solo Rg Yogyakarta, Perpulungen Subang Rg Tambun, Perpulungen Ungaran Salatiga Ambarawa Rg Semarang, Perpulungen Manado Rg. Graha Harapan, Perpulungen Makassar Rg, Bekasi, Pergp.ulungen Cikopo Rg. Bekasi, Perpulungen Malang Rg. Surabaya
- Klasis Sibolangit : Perminggun Raja Berneh Rg Betimus Mbaru, Perpulungen Pagar Batu Rg Basukum, Perp. Tanjung Beringin Rg. Tambunen, Perp. Saring Kulit Rg. Batu Sianggehen, Perp. Namo Pakam Rg. Bingkawan Ertoto kerna persembahen ras Tuan rumah
Perpadanen man Dibata
L : Nggo sibegiken kerna sura-sura Dibata, marilah si peseh perpadanenta man Dibata
P : Erpadan kami o Tuhan guna tetap ernalem man baNdu saja. Toto si tiap wari ipenangkih kami erbahanca kami erpenandaina man banNdu. E maka erpadan kami tetap ertoto, guna nambahi penandai kami kerna Kam.
L : Toto eme dalan guna nandai Dibata, kai dage tekadta i bas kebaktin enda?
P : Arah pertoton kami, erbagesna me penandai kami kerna Kam o Tuhan. E maka ertutusna me kami ertoto man baNdu, seh maka erbagesna me penandai kami kerna Kam.
L : Mari tole si pebagesi perpadanenta man Dibata alu ras kita rende KEE GBKP No. 212:1,5
Perkuah ate si Nemani geluhku
Ije me aku erdalin, Teruh perkuahNdu
Perkuah ate si mbelin, Alokenlah dage
La lit jumpa si terulin, Bas Jesus ngenca e
Pertoton Tuhan
Pemasu-masun
L : Bengketlah ku bas kegeluhenta (ndu) si teptep wari, tetapkenlah ukurta (ndu) ndalanken pedah Dibata si enggo ibegiken. E maka alokenlah pasu-pasu idur Dibata nari:
"Ipasu-pasu janah ikawali Dibata kita (kam), siang ayo Dibata ersinalsal i babonta (ndu), janah melias ateNa ngenehen kita (kam). Itatap Dibata ku kita (kam), janah malem ateta (ndu) ibahanNa." Amin. (bdk. Bil. 6:24-26)
P : Amin... Amin... Amin... (iendeken)
0 Response to "Kebaktin Pekan Doa GBKP Wari Peteluken"
Post a Comment