Bapa Si Erkeleng Ate Bahan PA Mamre 24-30 Mei 2026

Bahan Bimbingen PA Mamre
24 MEI - 30 MEI 2026

( Teologia Bapa IV : Bapa Si Perkeleng )

Ogen : Lukas 15:11-32

Anak si bene
11. Iterusken Jesus ngerana nina, “Lit me sekalak perbapan, dua kalak anakna dilaki.
12. Nina si nguda man bapana, ‘O bapa, bereken genduari man bangku erta-erta sikerajangenku.’ E maka ibagi bapana erta-erta e man anakna duana.
13. Kenca piga-piga wari, idayaken anak si nguda e me sikerajangenna, jenari lawes ia ku negeri si ndauh. I je isia-siakenna duitna e.
14. Kenca keri ibahanna duitna e, jadi me kelihen i bas negeri e, janah mulai me iakapna suhsah.
15. E maka erdahin ia ras sekalak anak negeri e. Isuruhna ia ku juma ermakan babi.
16. Nakan iba-iba babi e pe meriah nge min ukurna manca, tapi ise pe la mereken kai pe man bana.
17. Dungna rukur ia, janah nina i bas ukurna, ‘Kerina si erdahin bapangku riba-iba panganna, tapi aku i jenda menam mate kelihen.
18. Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu.
19. Lanai metunggung pe aku igelari anakndu.’
20. E maka berkat ia ndahi bapana. Ndauh denga pe ia i rumah nari enggo idah bapana ia. Mekuah ate bapana, e maka kiam ia ngayakisa, idakepna janah iemaina.
21. Nina anakna e man bana, ‘O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu.’
22. Tapi idilo bapana juak-juakna nina, ‘Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia.
23. Jenari geleh sada anak lembu si mburna, gelah erbahan pesta man-man kita.
24. Sabap anakku enda nai enggo mate, tapi genduari enggo nggeluh mulihi; ia enggo bene, tapi genduari mulihken ia.’ E maka ibenakenna erpesta ras ermeriah-meriah.
25. Tapi anakna sintua paksa e i juma. Asum ia i bas perdalanen i juma nari, lanai ndauhsa ku rumah, ibegina sora gendang ras sora rende.
26. E maka idilona sekalak juak-juak, isungkunna nina, ‘Kai si jadi e?’
27. Erjabap juak-juak man bana, ‘Agindu enggo reh mulihken janah isuruh bapandu igeleh sada anak lembu si mburna, sabap agindu si enggo bene e enggo reh mulihken i bas mejuah-juah.’
28. E maka nembeh kal ate anak sintua e dingen la ia nggit ku rumah. E maka reh bapana nami-nami ia i darat.
29. Ngaloi ia man bapana, ‘Enggo piga-piga tahun aku erdahin ras kam bagi sekalak juak-juak janah la pernah kusimbak katandu. Kai kin enggo iberekenndu man bangku? Sada anak kambing pe la iberekenndu man bangku gelah aku man-man ras teman-temanku.
30. Tapi anakndu ah, enggo ikerikenna erta-ertandu ras diberu perdenggal, janah kenca ia mulihken minter igelehndu sada anak lembu pilihen si mbur!’
31. Ngaloi bapana, ‘O anakku, kam tetap ras aku janah kerina erta-ertangku sikerajangenndu kap.
32. Tapi patut pe kita erbahan kerja man-man dingen ermeriah ukur, sabap agindu si nai enggo mate, genduari enggo nggeluh mulihi; ia enggo bene, tapi genduari enggo reh mulihken.’ ”

Tema : Bapa Si Erkeleng Ate

Tujun : Gelah Mamre :
1) Erkeleng ate man anak-anakna erpalasken teks
2) Mereken dirina guna ngkelengi anak-anakna (pengajaren, mediate, erdame)

L KATA PERLEBE
   Kekelengen sekalak bapa man anak-anakna arus ncidahken gambaren kekelengen Bapa si ni surga kempak unak-anakNa. Erbage-bage nge karakteristik anak-anakna, tapi arbage bapa tetap sabar guna ngarak-ngaraksa, ngajarisa, gelah keluarga tetap lit ibas kedamen nggeluh iteruh lias ate Dibata.
   Pemahamen budaya tradisional, sekalak bapa iakapna nggo ndalanken tanggung jawabna nangdangi anak-anakna adi nggo ia ncukupken keperlun anak-anak e. La kekurangen anak-anak e, terutama ngelitken rumah ingan tading, biaya sekolah ras jajanna. Tapi megati anak-anak merasa diabaikan walau pe kerina kebutuhanna terpenuhi, sebab lit ketedehen bas anak-anakta e me perhatianta, waktu bersama, bage pe dukungen ras mereken motivasi man bana.
   Turi turin anak si bene banci ngajari kita guna ,Judi sekalak bapa si erkeleng ate nangdangi anak-anak, nandui karakteristik anak-anakta. Emaka sidatken me uga ncibalken krkelengen nangdangi anak-anakta erpalasken sura-sura Dibatanta.

II. URAIAN TEKS
   Perumpamaan enda ipake Yesus sebagai jawaban nangdangi respon man kalak Farisi (Luk.15:2). Jungut-jungut kalak Farisi ras guru-guru agama erkiteken ialoken Yesus kaiak perdosa ras pemungut cuke. Ibas perumpaman enda lit telu tokoh si dominan e me : sekalak bapa si bayak ras tuhu-tuhu erkeleng ate man anak-anakna, anak singuda ras anak sintua.
   Anak si nguda. Mindo hak waris man bapana lenga pe bapana mate. Enda seri saja ras melecehkan posisi bapa si nggeluh denga, sebab ibas paksa sie mbagiken harta warisen biasana ilakoken kenca bapa enggo metua. Posisi secara hukum ras budaya ibas paksa si e situhuna lebih berhak anak sintua guna menuntut tading-tadingen asangken anak si nguda. Karakter anak singuda enda semakin jelas ketika isehken bapana pemindonna e. Harta sikerajangenna minter idayakenna, janah duitna ipakena erpoya-poya, isia-siakenna duitna e. Duit si enggo isia-siakenna tentu la bertahan ndekah, minter keri duitna e.
   Terjadi kelihen ibas negeri anak singuda e tading. Sada ngenca si man lumbankenna eme nerusken kegeluhen, erdahin ia jadi sekalak si ermakan babi si merupaken dahin si hina ibas kalak Jahudi. Ije turah me penyesalenna. Ingetna kegeluhen ibas rumah bapana, maka juak-juak bapana jine pe la kekurangen pangan. Lanai pe kari ialoken bapa aku jadi anakna labo dalih, jadi juak-juakna saja pe enggo meriah ukurna. Enda nuriken maka ia nggo seh ku titik nol, janah turah ukurna mulih ku rumah bapana. "Laweslah aku ndahi bapangku janah ningku man bana, o bapa aku enggo erdosa man Dibata dingen ersalah man bandu. Lanai aku metunggung pe igelari anakndu" (ay. 18,19). Itehna perubahan pasti lit adi ia mulih ku bapana. Kedungenna anak singuda e enggo nandai bapana ras dirina alu payo.
   Bapa Si erkeleng ate. Bapa e sekalak si cukup bayak, teridah ibas melala juak-juakna, baju si mejile bagepe cincin siiberekenna man anakna e. Secara ekonomi la ia kekurangen kai pe. Karakter bapa teridah ibas anak singuda mindo bagin warisen sikerjangenna. Bapa e la merawa ras la numpahi anakna e. Iberekenna pemindon anak singuda e. Labo ngataken bapa e lemah, tapi ngasup ia ngergai pilihen anakna amin pe itehna e la payo. Ngasup bapa e nimai pertobaten anakna ras mereken kebebasen man anakna. Karakter bapa erkeleng ate si paling jelas ituriken, "Ndauh denga pe i rumah nari enggo idah bapana ia". (Luk. 15:20). Teridah tuhu-tuhu ketedehen, kekelengen, kesetiaan nangdangi anak si enggo lawes nadingken ia, tapi itimaina lalap. Kesalahan anak singuda la merubah kekelengen bapa man anakna Si enggo pernah ngelakoken kesalahan si fatal sekali pe. Pedasken baba ku jenda uis si mejilena janah pakeken man bana! Tamaken cincin ku jari-jarina janah sepatui ia (22). la tetap anakna gia enggo pernah erdosa man bana.
Anak sintua. Anak si suka menuntut. Kegeluhen anak sintua seharusna bahagia ibas rumah bapana si dem kebayaken tapi la iakapna adil perbahanen bapana man bana. Payo tuhu ia kalak si tutus, ertanggung jawab. "Enggo piga-piga tahun aku erdahin ras karn. ... la pernah kusimbak katandu" (ay.29). Ibas mulih agina anak singuda min meriah ulcurna tapi nembeh atena, ia menggambarkan dirina desken junk-juak bapana, igejapna maka bapana e la adil ibas situasi e.

III. PENGKENAINA
   Tema, Bapa Si Erkeleng Ate. Karakter sekalak bapa ibas perumpamaan enda, min menginspirasi kerina Mamre eme ngasup ngaloken kerina anak-anakna rikutken keberadanna ras karakterna sekalak-sekalak. Kebanggan mamre labo terjeng sanga anak meteh mehuli, ntah pe anak berprestasi ras erban gelar si merim man jabu ngenca. Tapi pe ngasup ngaloken anak-anak e ibas perbahanenna si salah . Mamre tetap `merarigkul' anak ibas kerina keterbatasenna sebagai anak si salah ntah pe erban ceda pusuh orangtuana.
   Sekalak mamre labo hanya sebage takal (pemimpin) i bas jabu tapi lit keterpanggilen ibas Dibata nari mewakili Tuhan nehken kekelengen man anak-anak, jabu, ibas gereja ras doni enda. Kekelengen e teridah la bersyarat, dem kesabaran erkiteken nggo mbages kiniteken ras kekelengen. Labo ngelakoken kekerasen ntah menghukum tapi ngalemi salah (memaafken) sebage cerminen kekelengen Bapa si ni surga.
   Sekalak bapa nehken kekelengen man anak-anak ibas zaman enda melala kel nge tantangenna. Bagi anak si nguda menuntut, membrontak man orang tua, genduari pe melala anak-anak si la mehamat man orang tuana. Bahan oratenta ngajuk Mamre gelah tetap ngasup alu saber, ngarak-ngarak anak-anakta, membimbing ras ngajari Kata Dibata. Ilustrasi kekelengen bapa man anak.

IV. DISKUSI
1. Rikutken bahan oratenta, turiken ciri ciri bapa si erkeleng ate ?
2. Kenca kita er-PA Mamre, kai si jadi tekad-ta guna jadi bapa si erkeleng ate man anak-anakta?

USULEN Ende-enden
1) KEE GBKP No. 177: 1-2 ( KLIK JUDUL UNTUK MELIHAT LIRIK LAGU )
2) KEE GBKP No. 292: 1-2 ( KLIK JUDUL UNTUK MELIHAT LIRIK LAGU )
3) KEE GBKP No. 204: 1,4 ( KLIK JUDUL UNTUK MELIHAT LIRIK LAGU )
4) KEE GBKP No. 420: 1 (Persembahen) ( KLIK JUDUL UNTUK MELIHAT LIRIK LAGU )

Pdt. Nalkken Sitepu, M.Th. Ketua Klasis Menara
HP/WA: 0813 9743 6310