Berita Si Meriah Arus Ipeseh Bahan PJJ 5-11 April 2026
Bahan Bimbingen PJJ Tanggal 5-11 April 2026
BERITA SI MERIAH ARUS IPESEH
(Sehna Berita Si Meriah)
Bahan Ogen : Lukas 4:42-44
Jesus ngajar i bas rumah-rumah pertoton
(Mrk 1:35-39)
42. Kenca terang wari itadingken Jesus kuta e, berkat IA ku sada ingan si melenget. Kalak si nterem ndarami IA, janah kenca jumpa lanai iberena Jesus lawes sabap atena ola min ia itadingken Jesus.
43. Tapi nina Jesus man bana, “Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata.
44. E maka erkotbah Jesus i bas rumah-rumah pertoton i belang-belang daerah Judea.
MODEL PJJ: PUJIAN
KATA PERLEBE
Patut sikataken bujur man Dibata, si enggo nemani, nampati ras naruhken gerejaNa GBKP seh ku bas tahun enda. I bas tahun enda, GBKP mperingeti 136 tahun sehna Berita Si Meriah man kalak Karo (18 April 1890-18 April 2026). Arah PJJ sekali enda, nuate nehken persinget ras pengajuk man banta kerina, anggota GBKP segelah tetap encidahken kesetian muat bagin i bas dahin-dahin mpebelangken Berita Si Meriah. Sue ras tema PJJ "Berita Si Meriah Arus i Peseh" sabab salah sada tandana gereja si nggeluh eme gereja (anggota) muat bagin meritaken Berita Si Meriah. Ndahiken dahin meritaken Berita Si Meriah, gereja ngusih kempak Jesus Kristus sue ras ogenta i bas PJJ sekali enda.
ISI
Tupung wari Sabat, ibereken man Jesus guna ngoge Pustaka Si Badia. Ayat siioge Jesus eme "Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me. Janah mpebetehken masana Tuhan mulahi BangsaNa" (Luk. 4:18-19 erpalasken Jes. 61:1-2). Ayat enda eme nubuat nabi Jesaya si enggo isehkenna 800 tahun sope Kristus. Labo rembang tah kebetulen ayat enda iogeken Jesus, tapi sura-sura Dibata lako mpetangkas maka nubuat Jesaya enggo tersehi. Jesus me Berita Si Meriah e. Berita keriahen kerna pembebasen siisehken nabi Jesaya enggo seh, enggo igenepi. Kenca dung IA ngoge, igulungNa kitap ndai, IulihkenNa man si erdahin i je, jenari kundul Ia. Kerina mata kalak i bas rumah persembahen e ngenen ku IA. E maka ibenaken Jesus ngajar nina, "Sendah nggo seh isi Pustaka Si Badia si ibegindu ndai." Jesus mpetangkas kerna diriNa ras idahikenNa. Megi kata Jesus e, merawa kerina kalak si i bas rumah persembahen e. Tedis ia kerina irintakna Jesus ku darat kota jenari ibabana IA ku das uruk ingan kota e ipanteki. I das uruk e nari i anjemkenna atena Jesus ku embang. Tapi erdalin Jesus arah tengah-tengah kalak si nterem e, jenari lawes IA.
I bas Jesus la ialoken kalak i kuta inganNa ipebelin-belin ndube, labo e erbahanca IA surut meritaken Berita Si Meriah, sabab Berita Si Meriah e arus ipeseh man kerina kalak. Lawes Jesus ku Kapernaum i je ngajar IA, ipelawesNa setan-setan ras ipepalemNa erbage-bage pinakit kerina kalak si reh njumpai Jesus. Lit paksana kenca terang wari Jesus lawes ku ingan simelenget (bdk. Mrk. 1: 35 "Pepagina erpagi-pagi si lampas ope denga terang wari keke Jesus lawes Ia ku ingan si melenget. I je ertoto Ia"). Teridah maka i bas Jesus ndahiken dahinNa tetap irakutNa kiniersadanNa ras Dibata Bapa si nuruh IA. Sope ibenakenNa dahin meritaken Berita Si Meriah, sipemenana ilakoken Jesus eme ertoto, jumpa ras Dibata Bapa sinuruh IA.
Enterem kel kalak reh ndahi Jesus. Tupung la jumpa kalak sienterem e ras Jesus terdaram-daram ia kerina. Teridah tuhu-tuhu maka Berita Si Meriah siisehken Jesus maba keriahen ras kemalemen ate man jelma sinterem seh pe lanai iberena Jesus lawes. "Tapi nina Jesus man bana, "Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata." E maka erkotbah Jesus i bas rumah-rumah persembahen i belang-belang daerah Judea.
Tangkas teridah maka kekelengen Jesus la erdobahen. Jesus berkat meritaken Berita Si Meriah, isiar-siarNa sada kuta ku kuta si deban, sada kota ku kota si deban. Kuja pa pe Jesus berkat i je ngajar, erkhotbah IA, ipepalemNa kerina pinakit ras ipulahiNa kalak idur si setan nari. Enda me isi Berita Si Meriah e . Berita si Meriah e seh man kerina kalak, la erndobahen suku ras bangsa. Kinirajan Dibata la kap ersibar, kekelengen Dibata la kap ersibar.
PENGKENAINA
Gereja (teptep anggota) eme aron Dibata siipilih, idilo ras siisuruh guna meritaken perbahanen-perbahanen Dibata (1 Pet. 2:9). Gereja me sinerusi dahin-dahin meritaken Berita Si Meriah si enggo idahiken Jesus Kristus. Nulih kita kempak dahin-dahin mpebelangken Berita Si Meriah paksa si nuria, Zending i negeri Belanda ras Minahasa nari (NZG 1890), si reh ras ringan i tengah-tengah kalak Karo. Palas Zending ras Guru Injil i Minahasa nari eme kinitekenna nandangi pendilo ras perentah Jesus segelah nerusken meritaken Berita Si Meriah ku kerina bangsa-bangsa. Zending ras Guru-guru Injil enda enggo ngaloken Berita Si Meriah, tek ia maka enggo ngaloken keselamaten idur Dibata nari. Kalak si tek sedar maka salah sada si jadi tanggung jababna eme meritaken Berita Si Meriah man kalak si lenga nandai Jesus.
Dahin meritaken Berita Si Meriah i bas GBKP lit dua erbage eme: Pemena, sinigelari Pekabaran Injil (PI) ke Dalam, eme meritaken Berita Si Meriah man anggota GBKP, nambahi pengangkan, pengertian ras mpeteguhi kinitekenna. Seh jadi anggota gereja si misioner, anggota gereja si dewasa, muat bagin i bas mpembarken Berita Si Meriah. Peduaken, Pekabaran Injil (PI) ke Luar eme nehken Berita Si Meriah man kalak si lenga nandai Jesus Kristus, segelah itandaina, tek dingen ngaloken Jesus jadi Tuhan ras Juruselamatna.
Tuhu enggo mbue kel ulih pendahin Zending, enggo rurat, turah ras erbuah seh paksa enda. Berita Si Meriah isehken alu majekken sekolah-sekolah, Rumah Sakit, gedung Gereja ras erbahan tiga (ingan erbinaga). Si enda kerina palasna eme nerusi bagi kai siilakoken Jesus. Arah program-program gereja banci mulahi kalak i bas kiniseran ekonomi, pendidiken ras pinakit nari. Ertina, Jesus reh majekken Kinirajan Dibata si maba kejuah-juahen man doni enda. Bage ka me kerehen gereja, ernanam, erguna, jadi pasu-pasu ras maba kejuah-juahen man sekelewetna ija pa pe ras man ise saja pe. Alu bage gereja enggo njadiken majekken Kinirajan Dibata i doni enda si jadi perayakenna.
Marilah tetap setia muat bagin mpebelangken Berita Si perayakenna. Meriah, subuk secara pribadi bage pe iprogramken i bas Runggun/Perpulungen/Perminggun tah pe PJJ sektorta. Adi gereja lanai nehken Berita Si Meriah, gereja e enggo "mate" erkiteken lanai ernanam man sekelewetna.
DISKUSI :
1. Turiken kai antusen jabapen Jesus man jelma sienterem (ay. 43) erpalasken ogenta?
2. Turiken pengalamen ras rencana (banci sekalak-sekalak tah pe tim) i bas meritaken Berita Si Meriah/Pekabaran Injil (PI)!
USULEN ENDE-ENDEN:
1. KEE NO. 243:1,2 ( KLIK JUDUL UNTUK MELIHAT LIRIK )
2. KEE NO. 322:1,2( KLIK JUDUL UNTUK MELIHAT LIRIK )
3. KEE NO. 108:1-3( KLIK JUDUL UNTUK MELIHAT LIRIK )
4. KEE NO. 400:1,2( KLIK JUDUL UNTUK MELIHAT LIRIK )
5. KEE NO. 257:1,6 ( KLIK JUDUL UNTUK MELIHAT LIRIK )
0 Response to "Berita Si Meriah Arus Ipeseh Bahan PJJ 5-11 April 2026"
Post a Comment