Wari Peduaken Kebaktin Keluarga Senin 16 November 2026
LITURGI RAS RENUNGEN PEKAN KEBAKTIN KELUARGAWARI SI PEDUAKENSenin, 16 Nopember 2026
LITURGI RAS RENUNGEN PEKAN KEBAKTIN KELUARGA
A. PERSIKAPEN
- Pengurus PJJ nikapken kerina keperlun kebaktin dingen si maba toto sapaat
- Erlajar lagu-lagu
- Kerna tedis dingen kundul ngikuti situasi ingan pulung
B. KEBAKTIN
1. Kata Penaruh
Orat geluh kalak sierkiniteken katawari pe ras ijapape ia tetap ersembah man Dibata. Ersembah tentu labo hanya tupung wari Minggu. Labo hanya i bas gedung gereja. Labo arus enterem pulung, tapi i bas kerina ingan ras waktu ijeme kita ersembah. Wari sipeduaken Kebaktin Pekan Keluarga enda, mari radu ras kita erlajar arah Abram, i bas teptep ingan ijape ia ringan ipajekkenna batar-batar ingan persembahen. Rumahna eme tanda penemani Dibata geluhta, erkiteken sie iajuk kita pe guna "majeken batar- batar ingan persembahen" i bas rumahta masing-masing.
Man bandu serayan Tuhan singelai i bas wari enda, itaruhken kami kam i bas pertoton gelah ngasup kam ersumekah nandangi kebenaren kata Dibata.
Ertoto .....
--- Perpulungen Tedis ---
Rende : KEE GBKP No.204: 1,4
Kata ni Dibata, seh kal e perluna bas geluh enda,
Ogelah Pustaka, je IA ngerana, man banta k'rina,
Gegeh i bas geluhku, KataNdu situhu-tuhu
Ras pasu-pasuNdu
Nguda ras metua, perlu ngalokenca, Kata Dibata
Tah i japa gia, ola lupa kita, em ban temanta
Sampatlah min o Tuhan, gelah kuteh kai kubahan,
Man kerina teman
2. Votum - Salam
L I bas gelar Dibata Bapa si njadiken jabu kalak si tek, i bas gelar AnakNa Jesus Kristus si engkelengi jabu ras i bas gelar Kesah si Badia si negu-negu jabu kalak si tek. Perkuah ate ras dame i bas Dibata Bapa, AnakNa Jesus Kristus ras kerembaken Kesah si Badia, ras kita (kam) kerina gelah. Amin.
P Amin ..... Amin ..... Amin ..... (Iendeken)
3. Berità Kerna Perbahanen ras Sura-sura Dibata
Ngaloi rasul-rasul nina, "Teklah man Tuhan Jesus gelah kam terkelin, eme kam ras isi jabundu" (Perbahen Rasul-rasul 16:31).
Erpalasken Kata Dibata enda, si puji IA alu radu ras kita ngendeken : KEE GBKP No. 75 : 1 Tetapkenlah ukurta
Tetapkenlah ukurta, Ngikutken Jesus e
Sigelemlah pedahNa, Tutus ateța pe
Piher tendinta pe, Ban IA penalemen
Kesuhsahen i doni, Talu ibanNa pe
--- Perpulungen Kundul ---
4. Kecibal Jabu si erkemalangen man Tuhan Perp. Kundul
L Pujilah TUHAN! Malem ate kalak si erkemalangen man TUHAN, si ermeriah ukur ngikutken perentah-PerentahNa. Anak-anakna kalak si erkuasa i negeri, kesusurenna ipasu-pasu me pagi. Isi jabuna jadi kalak bayak namura, kebujurenna lit rasa lalap (Msm 112:1-3)
Orang tua Mulai kin kitik-kitikku nari seh bagenda nggo metua, la nggo kuidah kalak bujur itadingken TUHAN, tah kempuna jadi pemindo-mindo. Pepinjamken dingen melumbar ia mere lalap, dingen anak-anakna mereken kemalemen ate man bana (Msm.37 : 25-26).
Anak Kam kap pengarapenku, man BaNdu kap aku ernalem kitik-kitikku nari. Mulai tubuhku ndube ku Kam aku ertunande, i KawaliNdu aku mulai kin i bas bertin nandengku nari e maka lalap Kam kupuji (Msm. 71: 5-6).
L Sipuji Tuhan alu ras kita ngendeken : KEE GBKP No. 201 : 1-3
Malem ate tuhu-tuhu, Siernalem man baNdu
Kam Dibata si 'njadiken, langit ras doni enda
Sal-saliNdu pusuh kami, Maka t'rangNdu tergejap
Kalak si tek la kap bene, 'Ban kelengNdu e tetap
Matawari, bulan, bintang, Kam nepasa jadi t'rang
Doni enda dem isina, Labo kai pe si kurang
K'rina si erkesah gia, Nggeluh i doni enda
Bagi si ngerana nina : "Kam Tuhan si Madasa"
Tetap kuakuken IA, I bas kinitekenku
Kam me ngenca si mbelinNa, Kusembah bas geluhku
Jesus Kam nggo mate jine, Man penebus geluhku
Tetaplah min aku dage, I bas geluh si mbaru
5. Kinilangasupen Ndalanken Si Ngena Ate Dibata (Kej. 6:11-12)
L Tapi kerina kalak si deban tuhu-tuhu jahat i lebe-lebe Dibata, janah i japa pe ibahanna kejahaten.
P Rende KEE GBKP No. 393 : 1
Surga nari aku itatapndu, sanga lalar aku ras ngelabuh
Seh ku pusuh tangkas idahndu, ndauh kepe papak perdalanku
L Itatap Dibata doni enda, janah IdahNa kejahaten kerina i je, sabap manusia kerina nggo jahat lagu langkahna.
P KEE GBKP No.393 : 1
Surga nari aku itatapndu, sanga lalar aku ras ngelabuh
Seh ku pusuh tangkas idahndu, ndauh kepe papak perdalanku
----- Perp. Tedis -----
6. Berita Pendilo Dibata
L Selaku persuruhen Dibata, aku nehken KataNa man banta (ndu) kerina kita(kam) nggit megiken pendilo Dibata : Kupilih Abraham, gelah banci iperentahkenna anakna ras kesusurenna gelah patuh man bangKu, janah ilakokenna kai si benar ras bujur. Adi bage, Kusehken pagi man bana kasa kai si nggo Kupadanken (Kej.18:19).
I bas keriahen ukurta erkiteken pendilo Dibata, si puji dage la alu ngendeken : KEE GBKP No. 191 : 1,4
Iban kelengNdu e, Iban liasNdu e, La 'ku bene
Aku idilo Kam, Bas lias ateNdu, Ku surga e
Tergejap me tuhu, Penegu-neguNdu, Senang aku
Mejuah-juah me, Ras isi jabu pe, LiasNdu nge
7. Kata Dibata Perp. Kundul
a. Ngoge Kata Dibata Bagin Si Pemena: Matius 18:19-20
L Ketuahen me kalak simegiken kata Dibata dingen simakekenca i bas kegeluhenna teptep wari. Haleluya.
P Haleluya ..... Haleluya ..... Haleluya ...... (iendeken)
b. Kotbah:
Teks : Kejadin 12 : 4 - 9 (Ibenai ras idungi alu pertoton)
Tema : Majekken Batar-Batar Ingan Ersembah
8. Pengakun Kiniteken Perp. Tedis
9. Persembahen Perp. Kundul
L Kata Dibata si jadi palas i bas kita ngataken bujur eme : "Bahanlah pengataken bujur jadi persembahen man Dibata, sehkenlah kai si enggo ipadankenndu man si Meganjangna" (Msm. 50 : 14).
Tupung kita ngendesken persembahenta, ras kita rende arah : KEE GBKP No. 302 : 1- Nginget Perkuah Dibata Si Mbelin
Nginget perkuah Dibata si mbelin, Si isehkenNa man banta k'rina kin
I bas kerina dampar kegeluhen, I doni si dem alu keguluten
Reff :
Endeskenlah kulanta man Dibata, Kerinana si lit i bas geluhta
Selaku persembahenta si nggeluh, Em persembahen si ngena ateNa
Sabab bage me arusna kita kin, Ersembah man Dibatanta si mejin
Si' nggo m'reken man banta manusia, Keg'luhen si mehuli ras badia
Reff : ...
Marilah k'rina sipuji Dibata, Janah sipeteruk ka pe ukurta
Alu bage si dat sura-suraNa, Kai si mehuli ras ngena ateNa
Reff: ...
Pertoton Persembahen ras Sapaat
Ertoto kerna persembahen
Ertoto gelah kerina jabu terbiasa erbahan kebaktin i tengah jabu
Ertoto guna ingan pulung wari si sendah dingen wari si pepagi
Ertoto guna si turah i bas perpulungen
10. Perpadanen Man Dibata (Perp. Tedis)
L Pujilah TUHAN! Malem ate kalak si erkemalangen man TUHAN, si ermeriah ukur ngikutken perentah-PerentahNa.
Orangtua Ipuji kami kam Tuhan, jadiken kami rumah kami jadi batar-batar ingang ersembah
L Anak-anakna kalak si erkuasa i negeri, kesusurenna ipasu-pasu me pagi. Isi jabuna jadi kalak bayak namura, kebujurenna lit rasa lalap.
Anak Tuhan pasu-pasuNdu sinjadiken kami kalak sierkuasa, e maka rasa lalap metedeh ate kami batar-batar ingan persembahen.
L I bas mpeteguhi perpadanenta, sipuji Tuhan alu ngendeken KEE GBKP No.424 : 1
Ipuji kami Kam Dibata si mbelin, Alu ende-enden si meriah
Suari ras berngi Kam si 'ngkawal kami
Segelah la celus bas percuban
Reff: Sangap kap kalak, si 'rnalem baNdu e
Daten tuah ras kesenangen pe
Sangap kap kalak, si 'rnalem baNdu e
Daten tuah ras kesenangen pe
Pertoton Tuhan
Pengutusen ras Pasu-pasu Dibata
Tetaplah kam nggeluh i bas terang Kata Dibata maka ngasup kita (kam) ndalanken tanggungjababta (ndu) selaku bapa, nande ras anak i bas keluarganta (ndu). Perulihenta (ndu) eme nggeluh i bas keluarga si dem kesangapen ras kemalemen ate. Guna mpeteguhi kita (kam), alokenlah pemasu-masun idur Dibata nari :
"Dibata, si mada perkuah ate, si enggo nenahken kita (kam) ku kemulianNa si rasa lalap i bas Kristus, njadiken kita (kam) serta, tetap, megegeh dingen paguh. Ia nge si mada kuasa seh rasa lalap." Amin (Bdk. 1 Petrus 5:10-11).
Amin ... Amin ... Amin (iendeken)
0 Response to "Wari Peduaken Kebaktin Keluarga Senin 16 November 2026"
Post a Comment