Bahan PA Moria 1-7 Maret 2026

Bimbingen PA Moria 01-07 Maret 2026
Pernyataan Umum Suara Hati

SI MAN OGEN : Masmur 16:7-11

7. Kupuji TUHAN, erkiteken IA kap si mabai aku, dingen pusuh peratenku ngajari aku tupung berngi.
8. Tetap kugejap maka Dibata ndeher kap ras aku, gelah aku tetap paguh.
9. E maka meriah kal ukurku, pusuhku pe ersurak-surak senang tendingku.
10. IpulahiNdu aku i bas kuasa kematen nari, kalak si ikelengiNdu la itadingkenNdu i doni kematen.
11. ItuduhkenNdu bangku dalan si perlawesna kempak kegeluhen. I adep-adepenNdu dem keriahen, i bas tanNdu kap kesenangen.

T E M A : Pusuh Peratenku Ngajari Aku

TUJUN : Gelah Moria:
• Meteh pendahin Tuhan i bas pusuh nari.
• Megiken sora pusuh perukuren teptep muat keputusen.

METODE PA : Meditasi Lectio Devina

Kata Penaruh
Megi-megi Iabo dahin si mesukah, apaika megiken sora Dibata. Melala teori si mpelajari engakai maka manusia mesera kal akapna guna megiken sora Dibata. Salah sada sekalak teolog si tergelar Hendri Nouwen ngatakan maka kesibuken, target nggeluh, kebiaren, aru ate megati erbahanca maka lanai si begiken sora Dibata. Tedauhen nina Nouwen erkiteken manusia lanai lit waktu ngenanami keheningan ras disiplin batin, si erbahanca maka sora Dibata e lanai terbegi alu tangkas. PA Morianta wari enda mabai kita guna ngasup megiken sora Dibata i bas kegeluhenta.

Pebagesi Pencaanykan Kerna Ogen
Masmur 16 megati igelari miktam Daud, ertina ende-enden emas ntah pe lagu pengajaren si meherga. Masmur enda jadi sada toto pengakun Daud kerna Dibata si jadi sekawal ras ulu kegeluhenna. Masmur 16:7, Dibata kap si ngajari pusuh peraten. I bas bahasa Ibrani pusuh peraten e me kelayot ertina pusuh peraten jadi pusat kegeluhen, ukur si mbagesna kal. Tiap berngi Dibata ngerana man Daud. Berngi e nuduhken waktu si teneng guna megiken sora Dibata.
Si megati jadi, berngi e pe bagi nanam suari seh maka la lit waktu megiken sora Dibata. I bas ayat 8, Daud ngejapken maka Dibata e ndeher kap ras ia. Adi i bas bahasa Indonesia TB LAI-2 ikataken Hidupku berhadapan dengan Tuhan. Ertina ndeher kal ia ras Dibata. Erkiteken ndeherna ras Dibata, Daud tetap paguh dingen teneng. Erkiteken ketenengen e Daud ermeriah ukur katawari paksa pe. Meriah ukur i bas teks enda e me samach si banci iertiken keriahen si turah arah kerembaken ras Dibata. Lanai situasi si darat kegeluhen si ngaturken keriahen Daud aminna melala kal perbeben, tantangen ras permasalahen. Pusuhna pe ersurak-surak erkiteken Dibata mereken kesenangen man tendina.

I bas ayat 10 Daud tole ngerana kerna kuasa kematen. Kuasa kematen i bas konteks enda e me sheol. Si megati ipahami kalak Jahudi selaku doni kalak mate. Tapi terdauhen menurut piga-piga ahli teologi maka sheol e me sada ingan si i je la lit hubungen ras Dibata. I bas sheol memang labo lit hukumen tapi sirang ras kegeluhen si ertina pe sirang i bas kuasa Dibata. Tapi man Daud kerembaken man Dibata erbahanca sheol lanai jadi kebiaren sebab i bas doni kematen pe la itadingken Dibata kalak si rembak ras ia. Terdauhen Daud ngataken maka kerembaken ras Dibata e rulihken kengasupen meteh dalan kegeluhen, e me kegeluhen si ersada ras ras Dibata (kegeluhen si rasa lalap). Pengertin Daud la terjeng kegeluhen doni tapi pe kegeluhen si rasa lalap i bas Dibata. E maka i bas dalan si ituduhken Dibata Daud ngaloken kesenangen si tuhu-tuhu.

Pengkenaina
Penting kal megiken sora Dibata i bas kegeluhenta. Melala kal keuntungenna adi ngasup kita megiken sora Dibata i bas kegeluhenta. Kengasupenta megiken sora Dibata erbahanca kita ngaloken pengajaren si mehuli. Rikutken kesibuken doni megati lanai sibegiken sora Dibata, piahna sora si deban si nggo ngajar-ngajari kita. Erbahanca kita lanai erdalan i bas si payo. Adi ngasup kita megiken sora Dibata alu payo maka kita banci seh bas dalan kegeluhen si payo. E maka perlu nge ibahan rusur waktu teneng, megiken sora Dibata. Uga dage caranta megiken sora Dibata i bas kegeluhenta? Salah sadana e me arah ngoge isi Pustaka Si Badia. E maka perlu waktu man kerina moria guna ngoge, ngukuri dingen ndalanken kata Dibata si enggo ioge.

Meditasi Model Lectio Divina
Lectio Divina e me salah sada model meditasi alu njadiken Pustaka Si Badia jadi palasna. Carana e me Kata Dibata e iogeken alu rulih-ulih. Bayangken kata Dibata e tempa ngerana man banta.

Persiapen Meditasi
Nikapken musik ras ingan si nyaman man kerina moria guna meditasi

Meditasi
1. Rende KEE 468 Tuhan Demi Aku Salu KataNdu iendeken 5 x
2. Lectio (ngoge Pustaka). Simabai meditasi ngogeken sada teks Pustaka Si Badia. Usulen teks e me Matius 11:28. Teks enda ibaca piga-piga kali.
3. Meditatio (ngukurken). Ibereken kesempaten 3-5 menit guna ngukurken teks Matius 11:28. E maka si mabai meditasi ngerana " nina Tuhan man banta, anakku si (melasken gelar pribadi moria)...si sangana latih dingen beraten, mari anakKu Aku ingan pengadi-ngadinndu" ibabai kerina Moria tempa nggejapken secara personal Dibata.
4. Oratio (ertoto) kenca Dibata ngerana waktuna moria ngaloi kerina cakap Dibata. Cakap Dibata enda ialoi i bas toto, banci jadi pengakun dosa, banci jadi janji man Dibata.
5. Contemplatio (hening) i bas bagin enda musik tetap ersora, kerina Moria alu teneng megiken sora Tuhan.
6. Pertoton Tuhan.

Pdt. Jefri Alexander Keliat