Wari Pemena Kebaktin Keluarga Minggu 15 November 2026

LITURGI RAS RENUNGEN PEKAN KEBAKTIN KELUARGA
WARI SI PEMENA
Minggu, 15 Nopember 2026

PERSIKAPEN
- Pengurus PJJ nikapken kerina keperlun kebaktin dingen si maba toto sapaat
- Mpelajari lagu-lagu
- Kerna tedis dingen kundul ngikuti situasi ingan pulung

KEBAKTIN
Ngendeken lagu Pujian

Ku cinta k'luarga Tuhan, terjalin mesra sekali
Semua saling mengasihi
Betapa s'nang ku menjadi k'luarganya Tuhan

Kata Penaruh
Mejuah-juah man banta kerina. Alu pengarak-ngarak Tuhan enggo ka kita bengket ku bas Pekan Kebaktin Keluarga i bas pengujung perdalinen programta tahun enda. Tema-nta i bas berngi sipemena ras si jadi tema besar Kebaktin Pekan Keluarganta enda eme Kearusen nggeluh Keluarga Dibata. Arah tema enda negasken mulihi man banta maka lit kap kearusen (orat nggeluh) selaku keluarga Dibata, labo banci bagi ate-ate saja. Bagi teptep jabu lit peraturenna, bage ka me kita selaku keluarga Tuhan, lit aturen nggeluhna. Kearusen nggeluh enda me si membedaken jabunta ras jabu kalak si deban. Alu bage, kata Tuhan bas berngi enda banci mpeteguhi mulihi komitmenta nggeluh selaku keluarga Dibata.

Arah kebaktinnta enda mari dage sidahi Tuhan gelah ipasu-pasuNa kita alu gegehNa gelah ngasup kita ngelakoken si mehuli ras erguna i bas geluhta.

Radu ras kita ertoto

--------- Perp. Tedis ---------

Rende KEE GBKP No. 205: 1-2 Reh Kami o Tuhan
Reh kami o Tuhan, sikap kami k'rina, ersembah man baNdu jenda
Atanken min Tuhan, kami k'rina enda, ukur kami pebadia
O Bapa, b're gelah daten pasu-pasu kami k'rina enda
Tuhan Dibatanta, lit bas rumah enda, nembah k'rina kita baNa
Alu kehamaten, mungkuklah man baNa, kula tendi pe kerina
Aloken kataNa, ras pasu-pasuNa usekenNa banta

Votum, Salam ras Invocatio
L   I bas gelar Dibata Bapa sinepa langit ras doni, i bas gelar AnakNa Jesus Kristus Raja gereja, ras i bas gelar Kesah Si Badia și jadi penampat. Perkuah ate ras dame i bas Dibata Bapa ras i bas Tuhan Jesus Kristus nari, i bas kerembaken Kesah Si Badia ras kam kerina gelah, amin.
P   Amin ... amin ... amin (iendeken)
L   Ajarkenlah man anak uga kearusen nggeluh, maka iikutkenna asa umurna nggeluh" (1 Pet. 1:2a)

Rende KEE GBKP No. 249:1,3
Ajar aku o Tuhanku, Make Kata ras pedahNdu
Kueteh payo ras sentudu, Kuikutken bas geluhku
Reff: Si ngikut pedah Dibata, Daten me kerembakenNa
Pedah kata tangkas k'rina, Em jadi gelementa

Kekelengen ni Dibata, La ersibar seh man banta
Anem gia papak kita, Dalin jera tuduhkenNa Reff: ...

--- Perpulungen Kundul ---

Kata Dibata sinuriken kerna kearusen nggeluh keluarga Dibata
L           Nehenlah uga belinna keleng ate Bapa man banta, seh maka kita igelari anak-anak Dibata. Janah labo gelar saja, tapi tuhu-tuhu me kita anak Dibata.
P          Kita genduari anak-anak Dibata, tapi uga kita pagi lenga ipetangkas Dibata man banta. Tapi si eteh maka kenca reh pagi Kristus, bali me kita ras IA, sabab si idah me IA bagi situhu-tuhuna.
Kerina   Kalak si bage pengarapenna nandangi Kristus, ijagana bana gelah tetap bersih i bas dosa-dosa nari, bali ras Kristus pe bersih i bas dosa nari.
L           Kalak singelakoken singena ate Dibata asalna i bas Dibata nari, bali ras Kristus pe asalna i bas Dibata nari. Ise si enggo jadi anak Dibata lanai iteruskenna erbahan dosa janah enda me lainna anak Dibata ras anak-anak si labo anak Dibata.
L+P       Rende KEE GBKP No. 465:1-2
               Kita k'rina anak-anak Tuhan, Ersada arih i bas perpulungen
          Pandita pertua ras diaken, Tutus ngelai raduken perpulungen
          Cidahkenlah dage kegeluhen, Sentudu kata ras perbahanen
               Dage dalankenlah si isuruh Tuhan

Nggeluh 'lah kita jadi saksiNa, Ersada tetap i bas perpulungen
I bas nehken kinitekenta pe, kekelengenNa jadiken persukuten
Sehkenlah sura-sura Tuhanta, Ngelai, ersaksi bas persadan
Malem me ateta i bas kegeluhen

Pengakun dosa
L Mari siakuken kesalahen ras kelepakenta erkiteken kinilangasupenta encidahken kegeluhenta selaku anggota keluarga Dibata.
P (paksa teneng guna ngerenungken kerna lagu langkah selaku keluarga Dibata)

L       Tole siakuken dosanta alu ngendeken KEE GBKP No 440:1,
      O Bapa, salah lepakku ku 'teh nge
        Dosangku pe rusur kuinget
        Man baNdu aku erdosa
Reff :   Mekuah ateNdu min erkiteken liasNdu
          SasapkenNdu min k'rina dosangku o Tuhan
O Bapa, kubahan rusur si jahat, Patut nge aku i ukumNdu
Bujur nge keputusenNdu Reff: ...

--- Perpulungen Tedis ---

Pengalemi dosa
L       Nina Dibata man kalak singakuken kesalahenna : "desken remang erpagi- pagi, dosandu enggo Kulesapken, janah salahndu pe enggo Kusasapken desken embun. E maka mulihlah kam kempak Aku, sabab Aku kap Penebusndu".
L+P   Rende KEE GBKP No. 269: 1,2
               Enggo masap dosangku, K'rina perban dareh Jesus
               Malem ate tendingku, K'rina perban dareh Jesus
Reff: O, dareh Tuhanku, Ngurasi tendingku.
      Badia geluhku, K'rina perban dareh Jesus
Dame me kap pusuhku, K'rina perban dareh Jesus
Labo perban bujurku, K'rina perban dareh Jesus Reff: ...

--- Perpulungen Kundul ---

Kata Dibata
Pengogen kata Dibata bagin si pemena: 2 Samuel 7:13-16 (iogeken simada jabu)
L Ketuahen kalak simegiken kata Dibata dingen singelakokenca i bas geluhna, Haleluya.
P Haleluya ... haleluya ... haleluya

Kotbah
Teks : 1 Timotius 3:14-16
Tema : Kearusen Nggeluh Keluarga Dibata

Pengakun kinitekan (Perpulungen Tedis)

Persembahan (Perpulungen Kundul)
a. Kata Dibata si jadi palas persembahen: "Bahanlah pengataken bujur jadi persembahen man Dibata, sehkenlah kai si enggo ipadankenndu man si Meganjangna." (Msm. 50:14)

b. Rende : KEE GBKP No. 420:1

Asa gegeh ras kengasupen, Kami nehken persembahen
Endesken kami baNdu Tuhan, Alu dem keriahen
Reff: Ajari kami ngergaken, talenta ras kiniliten
Arah ukur ras perbahanen, Tuhan ipermuliaken

Simpar tuhu aloken kami, Pasu-pasuNdu O Tuhan
KelengNdu igejapken kami, Kam kap si negu kami Reff: ...

Arak-arak tetap o Tuhan, geluh kami anakNdu e
Gelah ngasup tetap o Tuhan, Makeken si tading e Reff: ...

c. Ertoto kerna persembahen ras Pertoton sapaat
Topik pertoton sapaat
- Notoken persembahen
- Notoken gelah perdalanen Kebaktin Pekan Keluarga sada minggu enda erdalan alu mehuli
- Notoken gelah kerina jabu-jabu encidahken kearusen keluarga Dibata
- Notoken ingan pulung wari si sendah dingen wari si pepagi
- Notoken si turah bas perpulungen

--- Perpulungen Tedis ---

Tekad njadiken jabu jadi anggota keluarga Dibata
L       Selaku anak Dibata, kita arus encidahken kearusen nggeluh si tuhu-tuhu mehuli i bas pengakap Dibata ras manusia
P       Erpadan kami tetap erusaha encidahken kegeluhen sentudu ras sura- sura Dibata, nggeluhken kearusen nggeluh selaku keluarga Dibata.
L+P   Dalani kami me kegeluhen jabu kami janah kami ertekad encidahken kearusen nggeluh selaku anak Dibata subuk nandangi keluarga, gereja bage pe masyarakat ija kami tading. Janah pegegehilah kami o Dibata guna ndalanken tekad kami! Amin.

Rende: KEE GBKP No. 381:1,3
Sura-sura Jesus bangku, Ersinalsal tetap
Nggeluh bujur ras mehuli, Si ngena ateNa
Reff : Ersinalsal terang, Em sinisuraken Jesus
Ersinalsal terang, Ku tetap ersinalsal

Kupindo Jesus nampati, Njaga pusuhku e
Gelah ngasup ersinalsal, Ngikutken Tuhan e Reff : ...

Pertoton Tuhan

Pemasu-masun

L Laweslah ku kegeluhenndu si teptep wari, cidahkenlah man doni enda tandana jabundu eme keluarga Dibata. guna jadi gegehndu, alokenlah pasu-pasu i bas Dibata nari:
Lias ate Tuhan Yesus Kristus, kekelengen Dibata Bapa ras kerembaken kesah si Badia ras kam kerina gelah, amin.
P Amin ... amin ... amin. (iendeken)

Diskusi
1. Turiken pengertinta kerna kearusen keluarga Dibata arah bahanta wari enda?
2. Turiken pengalamennta sedekah enda ndalanken kearusen nggeluh selaku keluarga Dibata! Janah bahanlah sada kalimat sijadi tekadta ku wari si reh enda!

Pdt. Liza Selvina br Tarigan. S.Th., M.M