Nggit Mpekena-Kena Diri

BAHAN BIMBINGEN PA MORIA
Tanggal 8-14 November 2026
Merawat Diri : Fisik, Penampilen, Ras Kesehaten

SI MAN OGEN : Ester 2: 8-14

8. Kenca perentah raja imomoken, nterem singuda-nguda ibaba ku Susan, janah Ester pe ikut i je. Ia pe ibaba ku istana raja, jenari iendesken man Hagai si ertugas ngawasi rumah gundik raja.
9. Ngena ate Hagai ngenen Ester, janah mehuli kal ia man bana. Erkiteken si e, pedas-pedas ipekena Hagai minak si mejile guna pekena-kena daging Ester ras ngaturken pangan si mehulina man bana. Iberekenna ingan si mehulina i bas istana janah isuruhna pitu kalak singuda-nguda pilihen i bas istana jadi suruh-suruhen Ester guna pekena-kenasa.
10. Kidekah si e, sue ras ajar Mordekai, la lit man ise pe ituriken Ester maka ia kalak Jahudi.
11. Tep-tep wari Mordekai gawah-gawah i bas kesain rumah gundik e guna meteh uga kecibal Ester, janah kai si nandangi jadi man bana.
12. Rikutken aturen, singuda-nguda e ipekena-kena lebe dagingna sada tahun dekahna gelah mejile. Enem bulan alu make minak wangi campur kumenen, janah enem bulan nari alu make minak si merim-merim si debanna. Kenca dung si e, ibaba man Raja Ahasweros rikutken gilirenna.
13. Adi sekalak singuda-nguda berkat i bas rumah gundik e nari ku istana, banci ipakena uis si mehulina kal bagi atena ngena.
14. Kari gelap bengket ia ku istana, janah pepagina ibaba ia ku rumah gundik si deban i teruh pengawasen Sahasgas, suruh-suruhen si njagai kerina gundik raja. Diberu si enggo ngadap man raja, lanai perlu ndahi raja, pala mesikel raja man bana janah ipindona alu ngataken gelar diberu e.

TEMA : Nggit Mpekena-Kena Diri

TUJUN : Gelah Moria:

Meteh aturen mpekena-kena diberu gelah mejile
Mpekena-kena diri secara fisik, penampilen ras kesehaten.

METODE PA : Merias diri

Kata Penaruh
Kitab Ester e me sada kitab turi-turin. Tupung paksa e pemerentahen Ahasweros naluken Babel i bas tahun 538 SM. Ibereken me ijin man kalak si sedekah enda itaban i Babel guna mulihken ku kutana. Amin bage gia mbue kalak Jahudi si enggo 70 tahun tading i Babel, enggo riahen akapna tading i Babel asangken mulih ku Jerusalem. Paksa si e Jerusalem enggo runtuh. Ingan tading i Babel enggo sikap. I bas turi-turin enda Mordekai ras Ester turangna sembuyak bapa simewakili terpuk si tading. Kentisik tuhu aman, dungna lit perbeben si man alanken. Kalak Jahudi terancam ilesapken kalak sideban. Gegeh ngalaken si bage e me kiniersadan dingen lit pejuang singgit mereken dirina (erkorban) guna kiniulin si enterem. Ester ras Mordekai me kalakna si erjuang e. Ia me pahlawan kemenangen nelamatken kalak Jahudi i bas rencana jahat kalak sideban. Kitab enda nuriken kemenangen si mehuli/si benar i bas si jahat nari.

Mpebagesi Pengangkan Kerna Ogen
Kalak Jahudi si tading i Babel e me kalak minoritas i tengah-tengah bangsa si la tek man Dibata. Benana labo ndube seh ukur ku istana, tapi lit saja dalan seh ku je. Ibenai alu turin-turin kecedana ate raja Ahasweros erkiteken perbahanen ratu Wasti, mahan bana ipedarat me momo segelah singuda-nguda si mejile rupana idarami guna banci jadi gancih ratu Wasti. Momo e jadi peluang ras kesempaten man Ester bengket ku istana ras singuda-singuda sideban. Sope singuda-nguda e tading i Susan, perlebe kerina ia ipesikap ras ipekena-kena. La banci menggo entah bage-bage saja jumpa ras raja. Inganna tading sedekah ipesikap e me rumah gundik, janah si ertugas i bas rumah e Hagai. Ia me sida-sida entah suruh- suruhen raja si ngurus kerina gundik; tugasna mpekena-kena singuda-nguda e segelah tambah jilena bage pe ertanggungjabap nandangi kerina singuda-nguda si ibaba ngadap ku raja. Hagai ngena atena ngenehen Ester, janah mehuli kel ia man bana. Iperdiatekenna tuhu-tuhu kai si iperluken Ester alu mereken pitu dayang pilihen. Si ilakoken dayang-dayang lako mpesikap Ester e me namaken minak si merim-merim ku daging kula Ester, ngaturken pangan simehulina guna ipan, dingen mereken ingan si mehulina jadi ingan tading ras pekesahken.
Kidekah Ester ipekena-kena rumah Hagai la ituriken Ester kerna kecibalna selaku kalak Jahudi. Beluh ia muniken ukurna ras idalanina kerina proses si man dalanenken. Aturen si lit maka setahun dekahna ibere waktu guna mpekena-kena daging segelah mejile. I bas setahun e; enem bulan make minak wangi campur kumenen, kenca si e enem bulan ka make minak si merim-merim sidebanna. Minak si merim-merim e me minak Saitun si banci ngangkat si melket-melket i bas kulit, erbahan kulit lembut ras mejile. Minak ras parfum iperluken erkiteken bau kula dilaki ras diberu i bas negara-negara panas (Persia) kurang rimna, e maka perlu ipekena-kena alu mereken si merim-merim. Kenca mentasi proses mpejile diri, ibahan me giliren guna njumpai raja. Sekalak gundik si njumpai raja ibereken milih baju simehulina bagi atena ngena. I jenda me ibereken wewenang ncidahken cara rukur, arah perose si ipake guna jumpa ras raja. Semalna arah perose e pe nuriken kerna biak ras cara rukur.

Pengkenaina
Kulanta e me pemere Dibata si meherga. Reh bagesna penandaita kerna Dibata reh ngasupna kita ngergaken kulanta enda. Bahanlah kula enda jadi persembahen si merim iadep-adepen Dibata. Ula gelah menggo. Maun terbegi belas-belas kalak moria, "adi enggom lit empuna (erjabu), bagenda pe enggo banci." Oratna kenca sitandai dirinta enggo lit punana (Dibata ras perbulangen), bahanlah perhatin kusus guna nambahi durma daging si mada dirinta e arah pesikap diri. Aturkenlah pangan si sehat guna ipan. Kai sipan e mereken ngaruh si cukup mbelin nandangi kesehaten kula. Genduari enggo cukup melala tawaren pangan, entabeh nanamna tapi la sehat ku daging kula. Guna si e pentarlah milih pangan si sehat. Ula babah penggurun, banlah pangan si sehat i bas dapurta nari. Enggo melala cara gelah meteh uga erbahan pangan si sehat arah internet, pelajarilah! Tambah si e, jaga kebersihen kula ras inganta tading. Sabab ingan tading pe mereken ngaruh si cukup penting guna kesehaten. Adi melket ingan e icinepi laneng me, sienda banci mpeturah pinakit.
Pakelah paken si cocok, si nyaman ku daging kula, sehat dingen tetap mejile. Adi ipakeken paken si sembaba ras kulanta tentuna nambahi kinijilen, percaya diri janah itatap kalak sideban pe metunggung. Rawat pe kinijilen pusuh. Ngasup ertimbang kai si banci ituriken man kalak sideban ras si la man turinken. Enda me kepentaren, la terjeng mpekena-kena daging kula, tapi pusuh pe ikut ipekena-kena.

Merias Diri
Teptep Moria maba perlengkapen guna merias diri.
1. Anggota Moria si lit talentana i bas merias diri (subuk bas ersanggul, erbedak, make up si sederhana ras sidebanna) ibahan jadi narasumber.
2. Narasumber nuriken tips merias diri alu sederhana kenca si e kerina mperaktekkenca.

Pdt. Rosani br Sembiring