Wari Peteluken Kebaktin Keluarga Selasa 17 November 2026

LITURGI RAS RENUNGEN PEKAN KEBAKTIN KELUARGA
WARI SI PETELUKEN
Selasa, 17 Nopember 2026

I. PERSIKAPEN
· Serayan ras pengurus PJJ nikapken si ertugas ras perlengkapen siniperluken i bas kebaktin.
· Si usahaken maka anak-anakta pe ikut muat bagin i bas kebaktin enda
· Perdalanen kebaktin i bas kundul ntah tedis ilakoken sue ras kecibalna.

II. KEBAKTIN

Kata Penaruh
Mejuah-juah man banta kerina, si salam-salamenlah kita kawes ras kemuhen tanda kita ermeriah ukur i bas perjumpanta enda (ibereken kesempaten guna sisalamen ras kerina si pulung).
Perpulungen sikelengi Tuhan, mbelin kel tuhu kekelengen Dibata man banta seh maka wari enda banci denga kita ngikuti Pekan Kebaktin Keluarga wari peteluken enda. Si jadi tema man banta e me "Ngalemi Kalak Si deban". Mbelin pengarapenta maka reh bagesna pengangkanta kerna ugakin situhuna keluarga Dibata siteridah arah persadanta si nggit lalap si alem-alemen sada ras si debanna. Mari dage sibenaken Kebaktin Keluargata enda alu radu ras kita ertoto. Mari ertoto kita .....

Perpulungen sikelengi Tuhan, mari radu ras kita rende arah

KEE GBKP No. 192: 1,3 --- Perp. Tedis ---
Meriah kita ras k'rina, Sipuji Dibatanta
Perban lias ateNa e, IsehkenNa man banta pe
Nggo pulung kita k'rina pe, I bas ingan enda
I bas ingan enda

Dage 'lah ola lupa min, Pehaga Dibatanta
Alu perbahanenta kin, Kelengilah pe temanta
I bas kegeluhenta e, I babo doni e
I babo doni e

Votum-Salam
L I bas gelar Dibata Bapa, i bas gelar AnakNa Jesus Kristus ras i bas gelar Kesah Si Badia. Perkuah ate ras dame i bas Dibata Bapa, AnakNa Jesus Kristus ras kerembaken Kesah Si Badia, ras kita (kam) kerina gelah. Amin
P Amin ... Amin ... Amin ... (iendeken)

Berita Kerna Perbahanen Ras Sura-sura Dibata (Invocatio)

L O teman, ola kel kam erbalas, tapi berelah dalan man Dibata guna nehken rawaNa. Sabab nina Tuhan i bas Pustaka Si Badia, " Kuukum me pagi! Kubalas me pagi!" (Roma 12:19).
Erpalasken kata Dibata enda, mari radu ras kita rende KEE GBKP No. 199:1-2
Senang gundari geluhku, Ban Tuhan negu langkahku
Kuja pa pe perdalanku, Tetap tanNa gelemenku
Reff : Tuhan nemani geluhku, CikepNa tanku meteguh
Dibata pengendesenku, I bas tanNa aku nggeluh

'Tah paksa berngi si gelap, 'Tah paksa g'luhku la sikap
Man baNa aku ernalem, KataNa lalap kugelem Reff: ...

--- (Perp. Kundul) ----

Kecibal Keluarga Si Ngena Ate Dibata (Kol.3:12-15a).

L Kam anak-anak Dibata. Kam ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk, lemah lembut dingen saber.
Bapa Ola kam pergelut dingen sialem-alemen salah adi kitik ukurndu ibahan kalak.

Nande Kam arus sialem-alem salah bagi Dibata enggo ngalemi salahndu.

Anak janah ibabo si e kerina, arus kam sikeleng-kelengen sabab keleng ate mpersadaken kerinana alu serta.

L Dame si ibereken Kristus i bas pusuhndu min singajari kam i bas erbahan keputusen-keputusenndu.

Si puji Tuhan alu radu ras kita rende KEE GBKP No. 374: 1-2
Jesus ulu kegeluhenku, Kam me ngenca pengendesenku
Lalap tedeh ate pusuhku, Kupehaga Kam bas geluhku
Reff : O Tuhan pernehen pusuhku, Siertedeh ate man baNdu
Kugelem pedah ras padanNdu
Kusembah Kam i bas geluhku

Ku sembah Tuhan penebusku, Si mereken kekelengenNa
Alu tutus reh aku Tuhan, Ras kerina isi jabungku Reff: ...

Pengakun Kerna Kinilangasupen Ndalanken Jabu Si Ngena Ate Dibata
L          Tuhan e tuhu mehuli, nandangi kalak si tetap erlebuh man baNa tetap ikelengiNa.
Bapa    Ngaku kami Tuhan, selaku bapa megati kami la nggit natap simehuli si iberekenNdu man kami. Mawen lanai kami erlebuh man baNdu.
L           Tuhan kap simereken gegeh man banta kerina, sitetap mpengasup kita guna nggeluh alu mehuli dem kekelengen.
Nande   Ngaku kami Tuhan, megati kami mpepiher pusuh kami mawen buniken kami denga biak si erelem-elem man kalak si deban.
L           Kita kerina ikelengiNa, metedeh ateNa nandangi anak-anak Dibata siernalem dingen setia man baNa.
Anak      I bas pedalanen kegeluhen kami, megati la icidàhken kami keleng ateNdu e o Tuhan arah keleng ate kami nandangi orang tua ras sekelewet kami, usuren rawa i isi kami bas pusuh kami.

Siakuken dage kinilangasupenta arah KEE GBKP No. 377:1-2
Kuakuken me dosangku, I lebe Tuhan
Megati aku lalar bas kegeluhenku
Keleng atendu pengarapenku
I teruh perkuahNdu malem me pusuhku
Keleng atendu pengarapenku
I teruh perkuahNdu malem me pusuhku

Erlebuh aku baNdu, O Jesus Tuhanku
Alemi min o Bapa salah ras lepakku
Keleng ateNdu pengarapenku
Tedeh 'teku ngidah belinna perkuahNdu
Keleng ateNdu pengarapenku
Tedeh 'teku ngidah belinna perkuahNdu

Berita Pengalemi Dosa (Perp. Tedis)
L Selaku persuruhen Dibata , aku nehken kataNa man banta (ndu) kerina kita (kam) si nggo ngakuken dosanta (ndu), nina : Kita (kam) enggo erkubang-kubang ibahan dosa, tapi iperidiNa (Kuperidi) kita (kam) maka bersih bagi salju. Aminna gia erkiteken dosanta (ndu) kita (kam) enggo mbiring bagi tengguang, mulihi kita (kam) jadi mbentar bagi kapas." Amin. (bdk. Jes. 1:18b-c).

Mari dage si puji Dibatanta erkite-kiteken enggo ialemiNa dosa- dosanta. Rende kita KEE GBKP No. 184:1-2
Jesus Tuhanku njaminisa, K'rina dosangku tebusiNa
Geluh simbaru jujurkenNa, M'riah ukurku ngalokenca
Reff : Tuhanku Jesus Kam me tetap
          Pengendesenku rasa lalap
      Temani aku o, Penampat,
          Tuhanku Jesus Jurus'lamat

Ngendes man baNa sikap tuhu, Keleng ateNa negu-negu
Mindo man baNa ola medu, Maka ib'reNa pasu-pasu Reff : ...

--- Perp. Kundul ---

Kata Dibata
a. Ngoge Kata Dibata Bagin Si Pemena
L        Kata Dibata sijadi bahan ogen sipemena tersurat i bas 1 Samuel 24:7-15
L        Ketuahen me kalak si megiken kata Dibata dingen si makekenca i bas kegeluhenna teptep wari. Haleluya
P        Haleluya ... haleluya ... haleluya (iendeken)

b. Kotbah (ibenai ras idungi alu pertoton)
Kotbah: Lukas 6:37-42
Tema: Ngalemi Kalak Si Deban

Pengakun Kiniteken (Perp. Tedis)

Persembahen (Perp. Kundul)

L       Kata Dibata si jadi palas i bas kita ngataken bujur e me: "Bahanlah pengataken bujur jadi persembahen man Dibata, sehkenlah kai si enggo ipadankenndu man si Meganjangna" (Msm.50:14)
Tupung kita ngendesken persembahen, radu ras kita rende arah KEE GBKP No. 272 : 1-
Ise kin kami enda o Bapa, maka kami ngasup mere man baNdu
Labo ban gegeh kami o Bapa, Kam Raja Surga doni
Reff: Kai pe si lit i bas kami o Bapa
      E kap bekas pemereNdu man kami
      Enda sada bagin Bapa, ipersembahken kami

Ngataken bujur kami man baNdu, arah persembahen kami enda
Aloken ras ipasu-pasuNdu, terpujilah gelarNdu Reff : ...

Nggejap b'linna perkuah ateNdu, makana kami mere man baNdu
Kai pe cukup i bas Kam o Bapa, Kam Raja Surga Doni Reff : ..

Pertoton Persembahen ras Sapaat :
1. Persembahen
2. Gelah ngawan perpulungen ngasup nggeluh sialem-alemen salah, lanai erelem-elem.
3. Gelah ngawan perpulungen tetap erpengendes mindo gegeh man Dibata guna banci nggeluh berdampingan ras kalak si deban.
4. Kerna siturah i bas perpulungen,ras jabu kundulen wari si sendah ras wari si pagi.

--- Perp. Tedis ---

Perpadanen Man Dibata
L               Kekelengen ni Tuhan, selaku keluarga Dibata kita iajuk lako banci ncidahken kegeluhen si ngena ate Tuhan. Kegeluhen si apai nge perlebe atendu i dalankenndu?
Orangtua   Erpadan kami Tuhan, mbebasken diri kami i bas keteriketen luka batin ntah pe akar pahit si sedekah enda lit i bas geluh kami. Lanai kami erelem elem, nggit kami si alem alemen salah.
Anak-anak  Erpadan kami Tuhan, nggit megiken pengajaren kata Dibata. segelahna kami jadi keluarga Dibata si memiliki relasi si saling menyemangati, dem kekelengen dingen perdamen.
L.               I bas mpeteguhi perpadanenta man Dibata, sipuji dage IA alu ngendeken KEE No. 276 : 1 "Ku Ikutken Kam O Tuhan" Kuikutken Kam o, Tuhan, Kam kap si perkeleng e Sabab Kam si mere dalan, Dalan terkelin kepe

Reff : IA kapen Jurus'lamat, IA kapen penampat

KataNa me kapen tambar, KuasaNa la 'rsibar

12. Pertoton Tuhan

13. Pengutusen ras Pasu-pasu Dibata
L Tetaplah kam nggeluh i bas terang kata Dibata maka ngasup kita (kam) ndalanken tanggungjababta (ndu) selaku keluarga Dibata si njagai persadan sapih-sapih manusia alu mehuli. Guna jadi gegehndu alokenlah pasu-pasu idur Dibata nari : " I pasu-pasu janah i kawali Dibata kita (kam), siang ayo Dibata ersinalsal i babonta (ndu) janah melias atena ngenehen kita (kam), itatap Dibata ku kita (kam) janah malem ateta (ndu) ibahanna. Amin (Bdk. Bil. 6:24-26).
P Amin ... Amin ... Amin ... (iendeken)

I. Diskusi / Aksi
1. Turiken pengalamenndu i bas kam pernah ngalemi kalak si deban? Kai ngge si berubah i bas kam kenca ialemindu salah kalak e? Pegancih-gancih kita nurikenca.
2. Marilah si endeken lagu kidung pujian "Mengampuni Lebih Sungguh"
Mengampuni, mengampuni lebih sungguh
Mengampuni, mengampuni lebih sungguh
Tuhan lebih dulu mengampuni kepada ku
Mengampuni, mengampuni lebih sungguh.
(siendeken 2 kali janah banci sibahan kreatifitas masing-masing i bas berekspresi)

Pdt. Oktoria Surbakti, M. Th

HP/ WA:081376206662