Orat Persidangan Si Mehuli

Bahan Bimbingen PA Mamre
Tanggal 5-11 Juli 2026
(Praktek Persidangen II: Matuhi P2P Mamre)

Ogen : Perbahanen Rasul-Rasul 15:1-12

Tema : Orat Persidangen Simehuli

Tujun : Gelah Mamre:
1.Ngasup ngergaken pendapat kalak si deban
2. Ngidah maka lit aturen I bas persidangen sue ras iaturken P2P Mamre

Metode: Diskusi

KATA PENARUH
Sidang, runggu, arih-arih situhuna sada budaya si bas bangsa ija pa pe lit bas doni enda, termasuk bas kita kalak Karo. Praktek sidang, runggu, arih-arih labo saja guna ndungi sada persoalen tapi pe arih-arih guna ngelakoken dahin si sifatna dahin ras-ras. Umpamana adi bas kita kalak Karo guna ngelakoken dahin adat perjabun, mengket rumah ntah dahin ibas kemalangen kerina imulai alu runggu gelah sikap perdalinenna. Bage pe semal kal ilakoken bas kita kalak Karo adi lit kalak ersoal, la siangkan maka runggu eme salah sada si biasa ilakoken guna ndungi persoalen kalak si la siangkan.

URAIAN TEKS
   Dua Pengajaren Si Berbeda (ay 1-2)Lit piga-piga kalak reh i Judea nari ku Antiokia janah iajarina kalak si enggo tek man Jesus nina, “Labo kam terkelin ibahan Dibata adi la kin kam isunatken bagi iaturken Undang-undang Musa.” Pengajaren enda ipengaruhi budaya kalak Jahudi ntah pe bas kalak Jahudi eme Hukum Sunat si ajarken Musa enggo tuhu-tuhu mandarah daging. E maka enggo pe ia jadi pengikut Jesus, pengajaren kerna sunat enda terus denga iajarkenna sebagai sada kewajiben si arus ipatuhi kalak si tek man Jesus termasuk pe man kalak si labo Jahudi.
   Pengajaren kalak enda ilawan Paulus ras Barnabas tuhu-tuhu seh jadi perjengilen si mesangat. Engkai maka ilawan Paulus ras Barnabas? Sabab Paulus ras Barnabas ibas meritaken BSM ntah pe nehken pengajaren kata Dibata, khususna man kalak si labo Jahudi maka sunat labo kearusen guna ndatken ntah pe ngaloken keterkelinen. Siutama ras sipentingna ibas ngaloken keterkelinen eme kiniteken man Jesus (bd. Ef. 2.8-9; Galati 5.1-6; rsd)
   Ersada Arih Gelah Persoalen Enda Irungguken (ay.2-3)E maka dungna ersada arih perpulungen gelah Paulus ras Barnabas bage pe piga-piga kalak anggota perpulungen berkat ku Jerusalem ndahi rasul-rasul ras pertua-pertua guna ncakapken persoalen enda. Itaruhken perpulungen ia seh ku darat kuta. Jenari erdalan ia arah Penike ras Samaria. I bas kuta-kuta si ibentasina, iturikenna man kalak si enggo tek maka si la kalak Jahudi pe enggo robah. Meriah ukur perpulungen megi berita enda.
   Kenca seh i Jerusalem, ngalo-ngalo perpulungen, rasul-rasul ras pertua-pertua. Iturikenna man kalak e kai si enggo ibahan Dibata arah ia. Tapi tedis piga-piga kalak i bas kalak Parisi si enggo tek jenari nina, “Si labo kalak Jahudi e arus isunatken lebe, jenari ikutkenna Undang-undang Musa.”
   Bagem siidah maka enggo pe ituriken Paulus ras Barnabas perbahanen Dibata man kalak si labo Jahudi, si labo ia ersunat pe maka teridah uga kuasa Dibata erdahin. Enda jadi sada bukti maka kerna ersunat ntah la ersunat man kalak si labo Jahudi labo biakna jadi kearusen. Tapi kalak Parisi si enggo tek man Jesus tetap mpertahanken pendapatna maka si labo kalak Jahudi pe arus isunatken.
   Sidang Guna Ncakapken Persoalen Si Turah (ay.6-)E maka ersidang rasul-rasul ras pertua-pertua guna ncakapken persoalen e. Kenca ndekah ngerana, janah percakapen e lalap la erkedungen. Enda ngatakenca maka bas persidangen biasa lit dinamika ope denga ibuat sada keputusen. Sabab masing-masing pihak tentu lit argumentna, dasar berpikirna seh maka pendapatna ras kalak si deban la bali. Kalak si la ka ngaloken pandangen ntah pendapat kalak si deban tentu ia pe lit ka dasar berpikirna. E maka megati sidang ndekah, la mesukah muat sada keputusen.
   Tedis Petrus, jenari nina, “O senina-senina, ietehndu maka nai nari aku enggo ipilih Dibata i tengah-tengahndu nari guna meritaken Berita Si Meriah man si labo kalak Jahudi gelah ibegina dingen tek ia. Janah Dibata, si nandai perukuren manusia, enggo encidahken maka si labo kalak Jahudi pe iakuiNa nge. IcidahkenNa e alu mereken Kesah Si Badia man kalak e bali ras iberekenNa man banta. Labo erndobah idahNa kita ras si labo kalak Jahudi. IbersihkenNa ukur kalak e perbahan ia tek. Dage ngkai maka genduari icubaindu Dibata alu namaken baban si mberat man ajar-ajar e? Nininta nai bage pe kita jine labo ngasup mersansa. Tapi sebalikna, tek kita, maka erkiteken lias ate Tuhan Jesus kita terkelin bali ras si labo kalak Jahudi.”
   Banci kataken ijenda Petrus eme pimpinen sidang, Janah nuriken alu bijaksana rikut ras fakta-fakta si lit maka man kalak si labo Jahudi si la isunat pe icidahkenNa kuasa ras perkuah ateNa bali ras man kalak Jahudi. Alu bage maka labo perlu iwajibken, arus ersunat man kalak si labo Jahudi. Sieteh maka kedungenna kai si isehken Petrus teraloken peserta sidang, janah erpalasken sie me ibahan keputusen.
   Paulus ras Barnabas Nuriken Pelayanenna (ay.12)Sinik kerina kalak si pulung e. Jenari ibegikenna Paulus ras Barnabas nuriken kerina tanda-tanda sengget si mbelin si enggo ibahan Dibata arah ia i tengah-tengah si labo kalak Jahudi.

PENGKENAINA
   Orat Persidangen Simehuli (Tema)Bas P2P Mamre BAB VI Rapat Dan Musyawarah, makai bas pasal 26-29 enggo iaturken orat Rapat/Persidangen bas Kategorial Mamre mulai tingkat Perminggun/Perpulungen/ PJJ; Tingkat Runggun, Tingkat Klasis ras Tingkat Pusat. Ibas P2P Mamre enggo iaturken kerna jadwalna, pesertana, keabsahen persidangen ras si debanna. P2P enda ibahan guna jadi panduan ibas Mamre ngelakoken rapat-rapatna ntah pe musyawarahna. Jadi persidangen labo hanya ilakoken adi lit persoalen tapi persidangen e enggo tertata dengan baik kerna waktuna gelah banci irunggui dahin-dahin pelayanen bas Mamre alu mehuli.
   Bas persidangen berbeda pandangen ntah pendapat hal si biasa. Bagi enggo ndai ituriken arah nats ogenta maka maun-maun labo mesukah muat keputusen. Tapi tep-tep kalak arusna nuriken pendapatna ntah pandangenna mesti lit palasna. Emaka tep-tep peserta sidang perlu kal megiken alu sabar ras menyimak kai si ituriken temanta nandangi pendapat kalak si deban. Jenari persidangen Mamre ntah pe persidangen gereja labo bali ras persidangen bas organisasi-organisasi si megati si ikuti walau pe banci ka lit piga-piga perserina. Intina kita arus ndalanken persidangenta erpalasken bagi si enggo iaturken bas P2P Mamrenta.
   Ngergaken Pimpinen Sidang eme sada kearusen bas persidangen. Adi la siergaken pimpinen sidang tentu persidangen banci rukrak. Bage pe pimpinen persidangen arus ka bijaksana bagi Petrus mereken pandangen si mehuli ibas dua pendapat si berbeda jenari mereken sada usulen guna jadi keputusen janah kedungenna dua pihakna banci ngaloken keputusen bersama guna idalanken bersama.
   P2P Mamre si enggo ngaturken aturen persidangen ntah pe Rapat ras Musyawarah bas Kategorial Mamre perlu kal iperdiateken guna idalanken gelah pelayanen ras kiniteken Mamre banci terus semakin meningkat.

DISKUSI
1. Uga sedekah enda idahndu ras pengalamenndu kerna Perdalinen Rapat ras Musyawarah Mamre GBKP (PJJ, Runggun, Klasis ras Pusat)? Turiken!
2. Kai usulen-usulenta gelah perdalinen persidangen Mamre ku lebe wari enda banci reh ulina.

USULEN ENDE-ENDEN:
1. KEE GBKP No. 424: 1, 2 ( KLIK JUDUL LAGU UNTUK MELIHAT LIRIK )
2. KEE GBKP No. 209: 1, 2 ( KLIK JUDUL LAGU UNTUK MELIHAT LIRIK )
3. KEE GBKP No. 92: 1, 2 ( KLIK JUDUL LAGU UNTUK MELIHAT LIRIK )
4. KEE GBKP No. 302: 1 (Persembahen) ( KLIK JUDUL LAGU UNTUK MELIHAT LIRIK )

Pdt. Sahabat Perangin Angin, M.Th.

Ketua BPMK GBKP Klasis Jakarta Kalimantan.
HP/WA: 0821 2526 2771