Tuhu-Tuhu Ersada Ras Kristus

Bahan Bimbingen PA Moria
5 - 11 Juli 2026
Hubungan Pribadi Dengan Tuhan

SI MAN OGEN : Pilipi 3:7-11

T E M A : Tuhu-Tuhu Ersada ras Kristus

TUJUN : Gelah Moria :
• Meteh cara rukur Paulus kerna kiniersadanna ras Kristus.
• Nuriken biak-biak si man tadingenken ras si man ayaken.

METODE PA : Brainstorming

Kata Penaruh
Kai saja nge si sedekah enda si akap penting ras meherga? Erta? Jabaten? Gelar si terkenal? Pendidiken? Kai nari, cuba ukuri dingen siuri. Bali ras kita genduari e, Rasul Paulus pe pernah bage perukurenna. Tapi kenca jumpa ras Jesus kerina mobah. Kiniersadanna ras Jesus mahanca reh terangna man bana kai si meherga, dingen ngubahken cara rukur si njemba ia nggeluh selaku perberita si meriah. Surat enda itulis Paulus sanga ia i bas penjara (sekitar 60-62 M), itujuken man perpulungen Pilipi si ngalaken kiniseran ras pengaruh Jahudi (Filipi 3:2). Tujun surat e ngataken man perpulungen maka keselamaten e arah kiniteken man Tuhan Jesus ngenca, labo arah kinibeluhen ntah pe perbahanenta si religius (saleh). Surat enda isina dem alu keriahen ukur, pengapul dingen penjemba man perpulungen e. Surat enda nuduhken kerembaken si mbages i bas Rasul Paulus ras perpulungen Pilipi si numpak-numpak pelayanenna subuk materi bage pe rohani. Secara teologis surat enda nuduhken penandai Paulus kerna Jesus si meteruk ukur dingen kemulianNa si jadi usihen man kalak si tek.

Mpebagesi Pengangkan Kerna Ogen
Ayat 7. Kerna pertobaten Paulus
   Kenca erpenandan man Tuhan Jesus jenari bengket ku bas pelayanen, Paulus nggejapken perubahenna, maka nina: Tapi kerina si nai ku akap untung, genduari kinirugin ku akap Kata zemia ertina "kerugian total. Kalak Jahudi erpengakap maka tubuh jadi kalak Jahudi e me sada kehebaten ras kehormaten. Ope jera Paulus pe tuhu-tuhu megah iakapna arah identitas Jahudina, sabap ia ersunat selaku tanda bangsa pilihen Tuhan, dingen statusna pe selaku kalak Parisi si ihamati ras iakap selaku kalak erpemeteh. Tapi kerina kinihagan e la lit ertina ibandingken ras penandai kerna Jesus.
Ayat 8: Nandai Kristus e simeherga.
   Paulus dungna mpeseri kinihagan agamana mbarenda selaku "sampah". Kata enda i bas cakap Junani ertina limbah/kotoran sabap si e kerina la kepe mabai ia rembak ras si mehuli, tapi erbahanca pernah jadi musuh Kristus, jadi kalak si kejam. Tapi, "penandaina kerna Jesus" mahanca ia jadi per-Berita Si Meriah, dingen ndatken kegeluhen si tuhu-tuhu. Penandai Paulus e lanai terjeng ulih pemeteh (olah pikir) tapi erdandanken kerembaken (relasi intim), si terus menerus i bas erbage-bage dampar geluhna, janah idatca kedamen i bas Kristus nari. Kristus e me pasu-pasu si mbelinna i bas geluh Paulus, dingen kiniersadan ras Tuhan Jesus e me jadi sumbul keriahen man bana. E maka i bas penjara pe la aru atena, nina i bas Pilipi 4:13, ngasup aku ngalaken kerina keadan erdandanken kuasa si ibereken Kristus bangku. Paulus nggit ngelepasken kerinana gelah nandai Kristus secara pribadi, sabap e si lebih meherga).
Ayat 9: Tuhu-tuhu ersada ras Kristus arah kiniteken.
   Persadan si mehuli ras Tuhan ibangun labo arah usaha bage pe prestasi rohani, tapi arah kiniteken si nggeluh. Paulus ngakui si e, maka labo ban kebeluhenna ndalanken taurat tapi arah perkuah ate Dibata si mbelin.
Ayat 10-11: Tujun geluhta e me nandai kuasa kekeken ras kegeluhen si mbaru.

Kerembaken ras Tuhan mahanca ia nandai kuasa kekekenNa si mabai nggeluh i bas pengarapen si mbaru. Aminna pe selaku kalak si tek jumpa perbeben, bagi Paulus si ipenjaraken erdandanken Berita Si Meriah, la mobah ukur, tetap setia amin gia mesera. Sabap siniarapkenna la terjeng doni enda ngenca tapi si rehna i bas Tuhan nari e me kegeluhen si rasa lalap.

Pengkenaina
Enggo si idah uga perukuren Paulus i bas ia tuhu-tuhu ersada ras Kristus, e maka jadi perenungen banta arah kata enda, kai saja si mbarenda siakap penting tapi genduari lanai penting e? Kai si sedekah enda si langa kita ngasup ngelepaskenca gelah sitandai Tuhan terbagesen? Sedekah enda kita erkebaktin terjeng kesemalen/rutinitas saja ntah perban pusuh si metedeh? Enggo sedekah enda tedeh ateta nandai Tuhan i bas susah ras senang? Tema sendah, e me tuhu-tuhu ersada ras Kristus, mabai kita sedar maka lit nge si arus siambekken biak-biak si la payo gelah banci kita ersada ras ia. Tuhu-tuhu ersada ras Kristus ertina labo terjeng ngikuti kebaktin-kebaktin gereja, nggalari adangen ras ikut i bas dahin-dahin pelayanen tapi soal hubungen pribadi si nggeluh, si intim, si turah, rurat dingen paguh ras Tuhan Jesus e. I je me sialoken tujun geluh situhu-tuhu; lit kedamen, ketenengen aminna pe si terjadi sangana gerupuh (la teneng). Me ketenengen kin perayaken geluh? Surga e me kedamen kap, jadikenlah surga e i bas donita (jabu, sektor, gereja, ingan erdahin ras sidebanna). Moria kekelengen Tuhan, marilah sijadiken Tuhan Jesus jadi si mehergana i bas geluhta, lebihen asa emas, jabaten ras gelar si meherga.

Brainstorming (Curah Pendapat) ras Erbahan Tabel
l. Erpalasken penuriken Paulus ndai, cuba arihken enggo nge kita tuhu-tuhu ersada ras Kristus?
2. Isi lebe tabel i teruh enda sinuriken biak-biak si man tadingenken ras si man ayaken!