Erdahin Guna Kiniulin Ingan Tading

BAHAN BIMBINGEN PA MORIA
Tanggal 13-19 September 2026
Wujud Mengasihi Allah Terlihat Dalam Masyarakat

SI MAN OGEN : Jeremia 29: 4-9

4. “TUHAN si Mada Kuasa Dibata nu Israel ngataken man kerina kalak si enggo isuruhNa iangkut tertaban ku Babilon i Jerusalem nari:
5. ‘Pajekkenlah rumah janah tetaplah kam ringan i je. Suanilah peken jenari pan ulihna.
6. Erjabulah kam dingen mupuslah. Kenca bage pejabu ka anakndu maka ia pe mupus ka. Arus maka ertambah-tambah beliganndu labo erkurangna.
7. Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap.
8. Aku TUHAN Dibata nu Israel mpersingeti kam, ola pelepasndu dirindu itipu nabi-nabi si lit i tengah-tengahndu entah kalak si deban si penipu, si ngatakenca maka banci ia ernubuat kerna wari-wari si pepagi. Ola perdiateken nipi-nipina!
9. I bas gelarKu ikatakenna si la tuhu. Labo ia Kusuruh. Aku TUHAN kap si enggo melasken kata enda.’

TUJUN : Gelah Moria :
• Nuriken kerna perbahanen si arus ilakoken bangsa Dibata i bas pembuangen.
• Ertoto guna kinulin kuta ras erbahan gotong royong.

METODE PA : Diskusi Ras Aksi

Kata Penaruh
Jeremia e me sinursur Abyatar, sekalak imam Lewi ras salah sada imam kepala i bas masa pemerentahen Raja Daud (1 Sam. 22:20). Jeremia nggeluh i bas pengkeri-kerin abad pepituken ras pemenan abad peenemken ope Kristus. Ia erdahin guna nehken sura-sura Dibata nandangi raja Juda ras rayatna i bas masa si cukup ndekah e me tupung pemerentahen Josia, Joyakin, Joyakim ras Sedekia. Jeremia mpersingeti bangsa Dibata kerna cilaka si nandangi seh man bangsa e erkiteken dosana dingen erkiteken isembahna berhala. Nubuat ukumen si isehken Jeremia jadi tupung ia nggeluh denga. Nebukadnesar naluken ras ngkernepken Jerusalem ras rumah pertoton dingen rayatna iangkut jadi tabanen ku Babel. I bas situasi enda pe Jeremia ernubuat kerna kemulihen kalak enda i pembuangen nari dingen uga bangsa Israel mulihken jadi bangsa bagi si gelgel.
Bahan PA nta enda bagin surat kirimen si ipeseh Jeremia man kalak Israel si enggo ibuang ku taneh Babel. Tupung si e, setengah kalak Juda itadingken denga i kutana, janah Jeremia ikut ku bilangen kalak Juda si lenga i taban ku Babel.

Mpebagesi Pengangkan Kerna Ogen
   Jeremia nuratken man bangsa Juda tupung Sedekia jadi raja nggancihken Joyakin si enggo iangkut ku Babel jadi tabanen. Surat enda ibereken Jeremia man Elasah anak Sapan ras man Gemaria anak Hilkia tupung kalak enda duana isuruh Raja Sedekia njumpai Raja Nebukadnesar i Babel (Jer. 29:3). Surat enda penting sabap peristiwa pembuangen ku Babel e labo saja persoalen penjajahen tapi pe persoalen kiniteken. I bas pengangkan kalak Israel, taneh e me simbol identitas sibereken Dibata man bana. Erkiteken si e, taneh la banci idayaken tah pe ipesewaken. Pembuangen ku Babel erbahanca kalak enda arus kebenen identitasna selaku pemere Dibata si mpeturah kecedan ate dingen meneken pengarapen. Penabanen enda pe nuduhken maka talu Dibata si isembah kalak enda ibahan dibata kalak Babel. Enda erbahanca monce kiniteken bangsa Israel. Lanai ietehna ku ise ia erpengarapen dingen arus pe ia ndauh arah kuta kemulihen nari. I bas situasi enda me Jeremia mereken ketetapen ukur ras pengarapen arah surat si ipesehna.
   Piga-piga penegasen Jeremia i bas surat enda: Pemena, gelah bangsa enda sedar maka ia itaban ku Babel erkiteken dosa-dosana janah alu saber nimai penampat Tuhan guna mbebasken kalak enda i Babel nari. Enda isuratken Jeremia erkiteken lit nubuaten nabi-nabi palsu si ngataken man kalak enda maka labo ndekah itaban i Babel. Nubuat enda tempa merekan sada pengarapen si mehuli tapi banci meneken semangat ras sura-sura adi nubuaten e la tersehi. Jeremia mpersingeti bangsa enda maka nggo itetapken Dibata pitu puluh tahun dekahna ia tading i taneh pembuangen Babel janah kenca si e, Dibata si erdahin guna maba kalak enda mulih i taneh pembuangen nari (Jer. 29:10).
   Peduaken, bangsa enda arus nerusken kegeluhenna sedekah pitu puluh tahun jadi bangsa tabanen i Babel alu make waktu ngelakoken dahin si mehuli. Dibata nu Israel nuruh kalak enda guna majekken rumah dingen tetap ringan i je, nuani peken dingen man ulihna, erjabu dingen mupus, mpeabuken anak dingen tambah beligan. Enda kerina nuduhken maka sura-sura Dibata kalak enda la talu iban situasi tapi tetap nerusken kegeluhen, erpengarapen dingen ngerencanaken masa depan si mehuli. Payo maka ia nggo ndauh arah kuta kemulihenna nari janah tempa-tempa Dibata nggo talu tapi situhuna i taneh pembuangen pe Dibata tetap erdahin guna kiniulin kegeluhenna. Lit rencana Dibata kerna kegeluhen ras masa depanna gelah ula sempat turah pengangkan maka lanai lit wari si pe pagi.
   Peteluken ngelakoken kerina si mehuli nandangi ingan i ja ia tading. Enda teridah arah perentah erdahin guna kiniulin kuta dingen ertoto guna keperlun kuta. Kehadiren bangsa Israel i taneh pembuangen Babel arus mereken ngaruh si mehuli man kalak si tading i kuta e. Bangsa Israel arus ngusahaken perdamen ras kemakmuren si ipalasi alu pertemanen si mehuli (persahabatan yang tulus). Enda sada pelajaren gelah kalak enda ngasup engkelengi imbang-imbangna, kesempaten guna ngaloken situasi si la bagi ukur, dingen mereken kontribusi si mehuli.

Pengkenaina
Kata Dibata wari enda mereken persinget man banta i bas ncidahken tanda keleng ateta man Dibata. Kalak si erkeleng ate man Dibata arus isedarina maka lit tanggung jababna guna mperdiateken inganna tading; erdahin guna kiniulin dingen notoken keperlun kuta inganta tading. Alu bage perlu kepe sibuat baginta guna mendukung program-progam si lit bas inganta tading gelah reh sikapna ingan e. Ula min sidarami usur alasen gelah la ikut muat bagin i bas kegiaten-kegiaten kutanta. Banci jadi program-program e kurang siakap payona ntah la bagi sura-suranta. Tapi arah kata Dibata e erlajar kita guna erdame ras situasi dingen tetap ndukung program e guna kiniulin nterem jelma. Terdauhen, perlu kita ertoto kerna pemerentah, kerna programna dingen kerna situasi siturah i bas inganta tading e. Pertoton e me sada bentuk pengendesenta man Dibata maka ngasup Ia erdahin guna kiniulin inganta tading.

Diskusi Ras Aksi
1. Kai akapndu si jadi alasen Jeremia nuruh kalak Israel si tading i Babel erdahin dingen notoken kuta inganna tading e?
2. Turiken perbahanen-perbahanen si ncidahken maka kam nggo erdahin dingen ertoto guna kiniulin inganndu tading?
3. Aksinta: aturkenlah sada kegiaten gotong-royong si ikoordinir Moria, ncidahken maka erdahin atendu guna kiniulin kuta inganndu tading.

Pdt. Wisli Pinem