Jaga Kebadian Geluh

Bahan BIMBINGAN PA MAMRE
TANGGAL, 12 JULI - 18 JULI 2026
( Penyakit Sosial / Masyarakat PEKAT )

Ogen : Galati 5:19-23

19. Perbahanen-perbahanen si erpalasken sura-sura ukur manusia tangkas kap. Si enda teridah i bas: erlua-lua, si nggesuh, la meteh mela;
20. nembah man berhala ras erbahan ilmu sihir; simusuhen, rubati, mecimberu, perampus dingen kepentingenna saja ngenca iukurina. Erbahan perpecahen dingen erpihak-pihak.
21. Sician-cianen, mabuk, pesta minem-minem seh mabuk ras si debanna. Kukataken man bandu genduari, bagi enggo kukataken bandu nai maka, kalak si ndalanken perbahanen-perbahanen si bagi enda labo banci dat bagin i bas Kinirajan Dibata si reh pagin.
22. Tapi ulih Kesah Si Badia e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia.
23. Meteruk ukurna dingen ngasup engkuasai diri. Kerna si enda la lit isingetken pe i bas Undang-undang.

Tema : Jaga Kebadian Geluh

Tujuan : Gelah Mamre :
1) Meteh kerna kebadian geluh
2) Ngelumbaken nggeluh Badia

I. KATA PENARUH
Penyakit sosial/pekat e labo istilah medis simerujuk pinakit fisik/biologis, tapi sada konsep sosiologis, siiertiken selaku bentuk perilaku, kondisi, entah bentuk/ pola bas masyarakat si menyimpang bas nilai-nilai/ norma/ etika si erlaku, piah dampakna mbelin ncedai ku tertib ras ketenteramen rikut kesejahteraan kerina rakyat sirulo. Bas sie perekat/ kohesi modal sosial menipes guna sisampat-sampaten mpekena kiniulin lingkungen. Kiniteken pe la teridah seh ku perbahanen sibenar, bujur dingen mehuli.
Surat Galati itulis Rasul Paulus (tahun 48-55 M) man perpulungen i Galati. Bas paksa sindai lit pertentangen ajaren si ipeseh pengajar Judaisme si reh ku tengah perpulungen enca penadingenken Paulus alu negasken man kalak Kristen non-Jahudi maka guna ku keselarnaten e harus nge ia ndalanken sunat rikut menaati Hukum Taurat Musa. Galati 5:19-23 eme inti argumen Paulus menaken pasal 3. Enca mpetangkas kinitiken perpulungen maka ia kerina enggo ibebasken bas Kristus (5:1), Paulus mpersingetken gelah kebebasen/ kemerdekaan e ula ipake selaku sada kesernpatan guna ndalanken perbahanen sierpalasken sura-sura ukur manusia/ kedagingen(5:13). Daftar pertentangan "sura-sura ukur Badia" (5:16-18) tangkas bas cara kegeluhen si ertentangen/ertolak belakang. Nggeluh bas biak ulih Kesah si Badia eme aplikasi praktis kegeluhen kalak si enggo ngaloken perkuah ate ras keselamaten i dur Dibata nari bas Anak-Na Jesus Kristus (Gal. 2:16)

II. URAIAN TEKS
Perbahanen-perbahanen manusia sierpalasken sura-sura ukur manusia eme tanda kegeluhen kalak kafir, lemah, cerminen situasi sosial,. kultus budaya kiniteken rikut intrik persaingen nggeluh politik kalak Junani-Romawi tupung si ndai.Erlua-lua, si nggesuh, la meteh mela, nembah man berhala ras erbahan ilmu sihir, rubati, mecimberu, perampus dingen kepentingenna saja ngenca iukurina. Erbahan dingen erpihak-pihak. Sician-cianen, mabuk, pesta minem-minem seh mabuk ras sidebanna. Janah kebiaken sie kerina mbabai perpulungen mulihken ku kegeluhen sinulak kekelengen ras perkuah ate Dibata, terlebih mbabai kinisontaren simekelek ku sienterem. tflih Kesah si Badia eme tanda/identitas perpulungen simbaru, siiubahken ras siipersadaken bas Kristus.
Ulih Kesah Si Badia eme tanda/identitas perpulungen simbaru, siiubahken ras sipersadaken gas Kristus. "Lit keriahen" (eirene, shalom) ras "kekelengen" (agape) si iperluken bas mpersadaken perjengilen i tengah perpulungen kalak Jahudi ras non-Jahudi. Daftar enda mbaboi batas etnis ras budaya, i ja kebadian nggeluh ilumbaken selaku nilai-nilai warga Kinirajaan Dibata sienggo ibebasken. Janah bas geluhna teridah kemalemen ate, lit kesabaren, idalankenna perbahanen si mehuli, mehuli ia, setia, meteruk ukurna dingen ngasup ngkuasai diri (bd. anggur si erbuah meramis Joh, 15:1-5).

PENGKENAINA
   Mamre selaku bapa, perbulangen idilo Dibata guna jadi imam, pelindung, usihen rikut pemimpin ku tengah jabu. I tengah doni sidem tekanen rikut persoalen si multi kompleks, tantangan milih jaga kebadiaan geluh tempa teridah mberat. Kata Dibata sijadi oratenta mbereken arah si man dalanen alu meteh kai praktek kebadiaan nggeluh siman lumbanken ku tengah kegeluhenta.
   Siperdiateken uga kinata perbahanen-perbahanen sierpalasken sura-sura ukur manusia enda jadi pinakit sosial si mendominasi benta gundari enda. Marak konten pornografi ras perselingkuhan, bagepe media sosial jadi ingan transaksi penawaran prostitusi. Paparan tinggi pengguna internet i Indonesia mengakses konten dewasa, alu dominasi pengguna eme dilaki. Enda tantangen sinyata man Mamre.
   Merangap alu kepetingenna saja ngenca iukurina. Praktek korupsi ngayaki harta ras jabaten. Data: Indonesia Corruption Watch (ICW) ncatat 2023, 93% tersangka kasus korupsi eme dilaki. Bagepe tingkat kriminalitas naik tajam alu perbahanen si sadis ras kejam man korban, perampokan, begal rikut judi online/offline seh kal marakna i sekelewetta,
   Mabuk, pesta minem-minem: Penyalahgunaan narkoba ras alkohol jadi pelampiasen erkiteken tekanen pengangguren, kemusilen, kiniteken si merampek. Data: Badan Narkotika Nasional (BNN) per Mei 2025 nuduhken. 3,33 total penyalahguna eme kelompok usia produktif (15-64 tahun), i ja perbapan eme bagian simbelinna.
   Simusuhen, rubati, perpecahen erpihak-pihak subuk bas kinata entah bas sosial media jadi konflik kusut la erujung. I lingkungan kerja, rumah tangga, gereja, kekerasan dalam rumah tangga (KDRT) mekatep terjadi erkiteken la sabar, la ngasup ngkuasai dirina.
   Selaku Mamre melala kal si ndauh man ukuren dampakna adi kita celus jadi pelaku pinakit sosial. Pinakit sosial secara istilah keilmuan sosiologis enda ulihna banci jadi pinakit fisik sincedai kesehaten kulata, erbahanca kita ndabuh musil, terpenjara, kebenen harkat martabat jabu, anak-anak kebenen harga diri, minder bas pergaulen ras kena sanksi sosial. Emaka ulih Kesah si Badia perlu silumbaken, tetap nalangi pusuh/tendi/ukurta gelah dem alu penguasai Kesah si Badia, endalah penalemen alu tetap ertoto.

IV. DISKUSI
1. Adi mulih kita ku bas bahan PA-ta kai ngge si erbahanca maka perbahanen si erpalasken sura-sura ukur banci denga jadi bas kegeluhenta?
2. Kai nge sibanci silakoken Mamre gelah. ngasup ngelumbaken ulih Kesah si Badia, bas jabu, pendahin/usaha?

USULEN ENDE-ENDEN :
1) KEE GBKP No 205:1, 2
2) KEE GRKP No 271:1-3,.
3) KEE GBKP No 245:1-3.
4) KEE GBKP No 282:1 (Persembahen)

Pdt Imanuel Kemenangan Ginting, S.TH

HP/WA 0821 6484 2545