Kupakeken KepentarenNdu - HUT Moria GBKP Melihat Diri Secara Positif ( Bahan PA Moria 13 - 19 Oktober 2019 )

Suplemen Bahan Bimbingen PA Moria 13 - 19 Oktober 2019

HUT Moria GBKP

Melihat Diri Secara Positif

SI MAN OGEN : Masmur 143:8-10

8. Persingeti bangku tep-tep erpagi-pagi kerna keleng ateNdu si tetap,
man baNdu saja ngenca aku ernalem.
Pertotonku kupenangkih man baNdu,
tuduhken man bangku dalan si man dalinenku.
9. Kam me inganku cicio, o TUHAN,
pulahi min aku i bas imbang-imbangku nari.
10. Kam kap Dibatangku,
ajari aku ngelakoken peratenNdu.
Mehuli min Kam kempak aku,
jenari babai aku arah dalan si pinter.

TEMA : KUPAKEKEN KEPENTARENNDU

TUJUN : Gelah Moria:

Meteh maka ulu kepentaren Daud eme persadanna tep-tep wari ras Tuhan.
Jadi nande si pentar alu mbangun hubungenna tep-tep wari ras Tuhan.

METODE PA : Sharing pengalamen i bas kelompok.

Kata Penaruh.
I bas kegeluhen enda menaken kin medak erpagi-pagi seh berngi melala kita erbahan keputusen. Lit keputusen si labo mberatsa umpamana, ngaturken pendahin, erpagi-pagi ku sikapken pendahin i rumah, ciger kari aku ku tiga, kenca karaben kari aku ikut PA Moria. Tapi lit keputusen si agak serius / penting si megati sulit si akap mutuskenca tapi arus si buat keputusen si igelari 'pengambilan keputusan etis'. I bas keadan si bage megati turah penungkunen i bas ukurta: 'apakah keputusen ku e enggo sue ras si ngena ate Dibata entah lang?'; 'enggo nge payo keputusen si ku ban ndai?' penungkunen si bagenda banci la terjabab. Anem gia mesera tapi arus ka nge si buat keputusen guna kiniulin. I je me perlu kepentaren gelah kepatuhenta e la encedaken. Guna si e mari erlajar kita ku bas pengalamen nggeluh erkiniteken Daud.

Mpebagesi Pengangkan Kerna Ogen.
Guna ngangkai kai si ilakoken Daud mehuli kal adi si oge Masmur 143 enda menaken ayat 1 seh 12.

I bas 'pengembaraan'na asum ia iayak-ayak musuhna, si ilakokenna eme erlebuh ertoto man Tuhan. I bas erlebuh man Tuhan arah pertotonna iakuina ise ia i lebe-lebeNa; ia sekalak si erdosa (oge ayat 2 "... la lit kalak si la ersalah iadep-adepenNdu". Si pemena si ilakoken Daud eme : i bas ia enggo jumpa ras Tuhan (arah pertotonna), itandaina bana; jenari Daud ngulihi ngerenungken uga belinna penampat Dibata si enggo pernah inanamina, erkiteken sie me ertoto ia alu dem kiniteken ras erpengarapen, si iandingken desken taneh si kelegon, muas ia nandangi Tuhan.

I bas totona, Daud mindo gelah Tuhan tetap mpersingeti ia teptep erpagi-pagi kerna keleng ate Tuhan si tetap. Medak erpagi-pagi si ingetna eme

uga belinna keleng ate Tuhan, la pernah itadingken Tuhan ia i bas kerina perbebenna. Emaka Daud mindo gelah Dibata nuduhken dalan si man dalanenna gelah ola ia papak. Iakuina maka Dibata kap ngenca inganna cicio, penggurunna la lit sideban emaka tetap ia mbangun hubungenna ras Dibata tiap erpagi-pagi ( secara terus-menerus / berkesinambungen ). Sada hal si patut iteladani i bas Daud nari eme: Dibata e tuhu-tuhu ijadikenna selaku Dibatana. Maksudna, i bas cakap Indonesia kata 'ALLAH, ntah 'Tuhan' ertina: Yang Maha Kuasa, Raja, Erdolat. Jadi Daud tuhu-tuhu njadiken Dibata e erdolat, raja i bas kerina geluhna erkuasa alu ngaturken geluhna. Enggo itandaina biak Dibata e, emaka iendeskenna kerina kegeluhenna man Tuhan, la ia menggo ras la meros i bas ndalani geluhna si jadi penalemen man Tuhan.

Pengkenaina
Adi si pepayo ku bas geluhta si tep-tep wari, enggo kin si jadiken Dibata e jadi penundalenta, Dibata si erdolat i bas kerina dampar geluhta? IA jadi inganta cicio. Banci jadi Dibata si sembah kita/si itandai kita bas Tuhan Jesus terjeng jadi Juruselamat tapi lenga jadi Dibata-nta erkiteken lenga si ban jadi si erdolat / Raja si erkuasa i bas geluhta tapi tetap denga kepentarenta, ukurta, sura-sura pusuhta, erta ras kebayakenta si penalem. Tema PA-nta sendah: "Kupakeken KepentarenNdu". Enda sada pengakun Moria bas geluhna. Cara ntah pe contoh i bas makeken kepentaren Dibata eme alu nggejap maka ulu kepentaren (sumber hikmat) e i bas Dibata ngenca si dat, emaka perlu kal tetap si pelihara, si bangun kiniersadanta ras Tuhan secara terus-menerus ( la erpaksa-paksa subuk sanga meriah ukur tutus ndahi Tuhan; sanga gulut ukur kote ras la tutus atau mungkin pe sebalikna.

Umur Moria GBKP enggo seh 62 tahun, umur si nggedang ( dua generasi ertina nini tudungta nai enggo Moria ). Secara lembaga / organisasi administrasi enggo mantap, enggo tertata alu mehuli mulai kin Moria sektor nari seh ku Moria Pusat. Patut sikataken bujur man Dibata. Tentu enda lenga bias. Si la kalah pentingna patut si renungken i bas umur 62 tahun enda, seh i ja enggo Moria makeken ras nggeluh i bas kepentaren Dibata? Enggo kin teridah kita nggeluh teruh kepentaren Dibata i bas kita erbahan keputusen-keputusenta ibas ngaturken jabu (anak-anakta), inganta erdahin ras lingkungen tetangganta? Sada hal si man jagan Moria eme gelah ula sempat lit penggejapenta seh ninta: "saya sudah banyak makan asam-garam karna itu tidak perlu mengajari aku untuk mencari kehendak Tuhan".

Tentu lit tekad / komitmenta i bas umur 62 tahun enda, eme bagi pertoton Daud ndai ( mehuli pe si oge ras-ras mulihi Masmur 43:8-10; bage pe si oge: Yesaya 50: 4c ). Enda min jadi perayakenta ku lebe wari enda. Sada pergegeh man Moria: "Cari dan lakukanlah kebenaran/kepentaren Tuhan dengan kesungguhan hati. Ingatlah selalu bahwa bila Tuhan pernah menolong anda di masa lalu, maka DIA pun pasti akan menolong anda sekarang!"

SELAMAT ULANG TAHUN pe-62-ken Moria GBKP. Soli Deo Gloria.

Sharing.
Sharing i bas kelompok, tiap kempok 3-5 kalak :

Kuga pengalamen pribadinta kerna nggeluh i bas kepentaren Dibata ras nggeluh la makeken kepentaren Dibata?
Kuga ka carana gelah kita tetap nggeluh i bas kepentaren Dibata?
Kai faktor si ngambati kita maka megati la ngasup terus-menerus nggeluh i bas kepentaren/kebenaren Dibata?

Mohon Bantuan Subscribe dan Like Youtube Channel GBKP KM 8. Bujur