Mere Persembahen Alu Ukur Meriah

Bahan Bimbingen PA Moria
Tanggal 12-18 Juli 2026
Hubungan Pribadi Dengan Tuhan

SI MAN OGEN : 2 Korinti 9:6-15

6. Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina.
7. Sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah.
8. Dibata ngasup mereken man bandu kasakai pemereNa alu sampur. Alu bage kerina keperlun guna dirindu i bas kai pe icukupi, seh maka sampur pe guna banci kam ndahiken dahin-dahin si mehuli si apai pe.
9. Kerna kalak si bage lit tersurat i bas Pustaka Si Badia, “Enggo iambur-amburna pemerena man si musil, kiniulinna e tahan seh rasa lalap.”
10. Dibata si nikapken benih man kalak si merdang bage pe nakan si man pangan. IA pe si nikapken benih si iperlukenndu. IA ka nge si peturah benih e dingen si mereken ulih si erlipat ganda i bas kiniulinndu e nari.
11. Dibata erbahanca kam bayak i bas kai pe, seh maka kam melumbar mere katawari pe, janah nterem kalak ngataken bujur man Dibata erkiteken pemerendu si ialokenna bekas pendahin kami.
12. Sabap penampat si ipersembahkenndu e labo saja encukupi keperlun kalak Kristen si lit i bas kekurangen, tapi pe sampur jadi pengataken bujur man Dibata.
13. Kam ngaku maka patuh kam nandangi Berita Si Meriah kerna Kristus. Pengakunndu e payo adi teridah kam menang i bas soal nampati. Janah erkiteken penampatndu e, nterem me pagi kalak muji Dibata. Tole pe ipujina Dibata erkiteken persadanndu si enteguh e, si teridah man bana ras man kerina kalak Kristen si deban.
14. Itotokenna pe kam alu dem keleng ate, nginget lias ate Dibata si la tersipati si seh man bandu.
15. Bujur ninta man Dibata kerna pemereNa si la terkataken nari uga ulina.

T E M A :Mere Persembahen Alu Ukur Meriah

TUJUN : Gelah Moria:
• Meteh palas, tujun ras pengajuk mereken persembahen.
• Ratur mereken persembahen persepuluhen.

Metode PA : Baca Gali Alkitab

Kata Penaruh
Mekatep si idah ras silakoken kerna mere persembahen pengataken bujur ku gereja, lit ka persembahen persepuluhen, ras sidebanna. Engkai maka kita mereken persembahen? Kuga caranta mereken persembahen? Man kai kin persembahen e i bas gerejanta? Mungkin melala denga kal penungkunen si turah i bas dirinta si sehubungen ras persembahen enda. Guna mpebagesi pengangkanta kerna nehken persembahen enda kita iajari arah bahan PA-nta i bas wari enda alu metode Baca Gali Alkitab.

I. Baca Gali Alkitab
Pemimpin PA menakenca alu pertoton, kenca si e kerina Moria ngoge bahan PA-nta; pemena secara bersama entah pe responsoria kenca si e iogena secara pribadi-pribadi. Kenca dung ngoge bahan PA e maka ibenaken me er-BGA
1. Kai si ku oge : jenda kita ndarami karakter (tokoh adi i bas narasi); sidaftarken kerina karakter si lit ras i bas ayat piga saja karakter e itulisken janah kai si itulisken erkawiten ras karakter e

Kenca si uri karakter ndai e maka si nen irisen ayatna; e me ayat si seri i bas kerina karakter. Janah irisen enda me kemungkinen si jadi inti surat si ioge kita.

Adi siperdiateken kerina karakter banci si dat maka si jadi irisenna e me ay 10, 11, 12,13: marl radu ras kita erbahan kalimat arah ayat enda?

2. Kai pedah Tuhan man bangku (Pesan Tuhan kepadaku) P3JT Pelajaren Perintah

II. PESAN FASILITATOR
1. Paulus nuriken prinsip nuan ras rani (menabur dan menuai); janah enda me prinsip dasar i bas mere, e me ise si ngerdangken sitik maka sitik ka nge pagi si iperanina janah ise si ngerdangken melala, maka melala ka nge pagi si iperanina. Enda itulisken Paulus man kalak Korinti erkiteken secara ekonomi kalak Korinti cukup sikap tapi i bas muat bagin nehken penampat tuhu betat kal ia.

2. I bas kita mereken persembahen e pe aruslah erpalasken ketetapen ukur; la jungut-jungut, la terpaksa tapi alu meriah ukur. Adi mere kita alu jungut-jungut jadi lasam kerina pemere e, la lit kiniulin si idatken i je nari. Sabap banci jadi man si merekenca pe terjadi penyesalen, tentu labo meriah ukur Dibata ngaloken persembahen e.

3. Perlu ka pe si eteh maka kerina si lit i bas kita e rehna i bas Dibata nari. IA ngasup mereken kerina si nasa lit alu sampur seh maka tercukupi kerina siniperluken kita. Adi bagenda nge biak Dibata e, engkai maka mbiar kita nehken persembahen? Engkai maka rugi si akap mereken persembahen? Engkai maka kita pelit man Tuhan adi i bas IA nari nge kerina si seh man banta? Ikataken Paulus maka Dibata nikapken benih, IA sinikapken si man panganenta tupung nimai benih ndai turah dingen erbuah, IA ka nge si mpeturah benih e dingen mereken ulih si erlipat ganda. Adi bagenda kin perbahanen Dibata e man banta, lanai lit alasenta Ia ngataken bujur, kecuali lanai si eteh mehuli.

4. Kusus kerna pemere kalak Korinti enda iarapken guna nampati kalak Jerusalem si lit i bas kekurangen. Alu bage ietehna tujunna kerna pemere si iberekenna e. Bage ka pe kita selaku ngawan perpulungen, si eteh nge tujun persembahenta e, e me guna nampati pendanan program gerejanta. Reh buena persembahenta maka reh buena si banci ilakoken gerejanta.

5. Salah sada jenis persembahen si tuhu-tuhu kal nampati gerejanta e me persembahen persepuluhen; e me nehken bagin perpuluhen si ilakoken teptep bulan. Beliganna erpalasken keriahen ukur sue ras pasu-pasu si ibereken Dibata man banta. Persembahen enda enggo sitetapken beliganna i bas ukurta tiap bulan janah e me si ban sikerajangen Dibata si ipakeken gerejaNa. o.

6. Dibata ersimulih nandangi kalak si nggit mere alu ukur meriah; aminna pe gerejanta singaloken persembahen e Dibata ka nge si mereken semulih man kalak si nggit mere man gerejanta.

III. Responku (SDDT);
I bas ngerespon arus alu konkrit, terukur ras banci inanami.