Dibata Penampat Bahan PA Moria 26 April - 2 Mei 2026

Bahan Bimbingen PA Moria
Minggu, 26 April - 02 Mei 2026
Dibata Penampat
Makna Elohim

SI MAN OGEN : Jesaya 41: 8-13

8. Tapi kam o Israel, suruh-suruhenKu, kam kap bangsa pilihenKu, kesusuren Abraham temanKu.
9. Kubaba kam i bas ujung doni nari, Kudilo kam i bas tepi si ndauhna nari. Kukataken man bandu, ‘Kam kap suruh-suruhenKu; enggo Kupilih kam, janah labo kam Kutulak.’
10. Ola mbiar, sabap Aku kap ras kam! Aku kap Dibatandu, e maka ola atendu aru. Kusampati kam, janah Aku mahanca kam megegeh. Kukawali kam, janah Kukelini pe.
11. Kalak si merawa man bandu, mela me akapna perban talu, Kalak si erbebe ngelawan kam, kernep me janah masap pe.
12. Idaramindu me musuh-musuhndu, tapi la kam jumpa, sabap enggo lesap kerina.
13. Aku kap TUHAN Dibatandu, si ncikep tanndu si kemuhun. Janah Kukataken man bandu, ‘Ola kam mbiar, Aku nampati kam.’ ”

T E M A : Dibata Penampat

T U J U N : Gelah Moria:
• Nandai Dibata arah perbahanenNa man bangsaNa.
• Erbagi pengalamen nggeluh kerna perbahanen-perbahanen Dibata i bas geluhna.

METODE PA : Sharing

Kata Penaruh
Kitab Jesaya enda isuratken Nabi Jesaya sekitar abad pe-8-ken (tahun 740-680 ope masehi). Jesaya nggeluh sangana pemerintahen Raja Usia, Jotam, Ahas ras Hiskia i Kerajan Juda. Asum si e bangsa Israel terancam kuasa bangsa Babil ras Asur si megegeh. Jesaya meteh bangsa Israel e ibahan Dibata talu sabap kegeluhenna enggo lanai setia erkiniteken kempak Dibata, enggo erdua ukur. Bangsa e enggo nadingken Tuhan dingen ngikutken dibata-dibata si deban janah perbahanenna pe sapih-sapih ia enggo lanai sikap, lanai mehuli. Amin bage gia, Dibata tetap ncidahken perkuah ateNa janah ngajuk bangsa e guna mulihken kempak Tuhan alu nadingken dalan geluh si la mehuli.
Jesaya 41 e me bagin arah deutero Jesaya entah pe Jesaya bagin sipeduaken. Situasina bangsa e enggo ibaba dingen itaban i Babil dingen pengarapenna pe enggo bene. Nabi Jesaya nuriken dingen ngingetken maka Dibata e tetap erkeleng ate man bangsaNa. Lit nge masana pagin ibaba Dibata mulihken bangsaNa e ku Jerusalem. Sada tema si penting i bas bindu enda e me kap: Dibata e me Dibata si engkuasai sejarah, janah IA ersura-sura gelah bangsa Israel jadi persuruhenNa ku kerina bangsa-bangsa si pagin ndatken pasu-pasu arah bangsa e.

Mpebagesi Pengangkan Kerna Ogen
Oratenta sendah enda ngingetken kerna inisiatif Dibata mpetetap ukur bangsa Israel, gelah ola nari nggeluh i bas kebiaren doni enda. Respon bangsa Israel e me : iakukenna maka Dibata e me Dibata tuhu-tuhu. I idah Dibata ketutusen bangsa e, e maka iberekenNa tole padan penemanina janah kemenangen pe, sabap labo erkerin keleng ate dingen kesetiaan Dibata.
Ayat 8-9:
Pengakun Dibata kempak bangsa Israel e me bangsa pilihen Dibata (bdk.Ul. 7:6). Isuratken kata 'suruh-suruhenku,' mereken makna e me :litna pemilihen ras pengakun, tanggung jabab bage pe tugas maka adi persuruhen Dibata tentu kegeluhenna ikawali dingen ipekena-kena Dibata. Tole isingetken Dibata kerna Abraham, ngingeti kerna nini-ninina bangsa Israel nari i ja Dibata milih Abraham e tangtangna guna jadi bangsa si mbelin. Abraham e pe ikatakenNa temanNa, em penginget maka tuhu-tuhu Dibata rembak ras bangsaNa.
Kubaba kam i bas ujung doni nari, Kudilo i bas tepi si ndauhna nari. Kai ertina kata-kata Dibata enda? Kuasa Dibata e teridah arah milih dingen ngarak-ngarak bangsaNa i ja pe dingen katawari pe.
Ayat 10, 13:
Kata "ola mbiar" lit dua kali isuratken, enda me si mahanca tetap ukur bangsa Israel e. Janah lanai er-aru ate pe. Kai alasenna maka la mbiar bangsa e?
• Dibata tetap ras bangsa e.
• Dibata si nampatisa.
• Dibata si mahanca bangsa e megegeh.
• Dibata si ngkawali dingen ngkelini bangsa e.
• Dibata ncikep tanna si kemuhen.
Adina bage kal pengarak-ngarak Dibata bangsa Israel e, kai denga si jadi kearun atena? Situhuna lanai bo lit.
Ayat 11-12:
Dibata si mahanca bang sa Israel menang naluken imbang-imbangna. Kalak si merawa dingen si ngelawan enda jadi gambaren imbang. Mela dingen kernep kerina imbang bangsa Israel e ibahan kuasa Tuhan. Lanai lit i ja pe imbangna ndai, kerina rimbangken kuasa Tuhan.

Pengkenaina
1. Penandaita kempak Dibata alu gelar ELOHIM secara spesifik teologisna e me: Dibata si mada kuasa, si ncidahken gegeh ras kuasaNa si la erbatas. IA me Dibata si nepa doni dingen ngarak-ngarak kegeluhen tinepaNa janah IA me Dibata si sada si man sembahen, la lit dibata-dibata si deban. I bas konteks Jesaya ndai enggo tangkas maka Dibata erkuasa si ergegeh ngarak-ngarak kegeluhen bangsaNa Israel bage pe man banta kerina kalak si setia erkiniteken man baNa.
2. Kegeluhenta lit i bas erbage situasi. Ipegegehi Dibata kita salu Kata Dibata enda: ola mbiar, ola er-aru ate, sabap Dibata kap si nampati kita. Janah i bas tahun-tahun kegeluhenta enggo me rusur sigejapken, sinanami penampat Dibata e. E maka i bas rungga, persoalen geluh teklah isampatiNa nge kita pe.
3. Jatuh bangun dalam iman situasi si bagenda pe jadi i bas kegeluhenta, tapi la itadingken Dibata kita ibahanNa dalan sierbahanca tetap siinget keleng ate dingen kesetianNa. E maka ula lupa tetap rembakken diri kempakSa.

Sharinq
Dua kalak i bas sada kelompok. Kundul alu petala-tala. E maka alu pegancihen nuriken kerna pengalamen si inanamina kerna perbahanen-perbahanen Dibata i bas geluhna. Subuk i bas kesusahen bage pe keriahen, gelah tangkas teridah pengarak-ngarak Dibata i bas kegeluhenna. Si enda ilakoken alu tujun gelah reh paguhna kiniteken kempak Dibata. E maka i bas kelompok si kitik enda ka me itutup alu pertoton (turiken tole kai si man totonken temanta).

Pdt. Kristiani F. Br. Tarigan

Kebiasaan Hidup Sehat:

• Hindari Stress
• Olahraga setiap hari
• Kurangi konsumsi gula
• Perbanyak Minum Air Putih
• Cukup tidur
• Bijak Memilih Makanan
• Menjauhi kebiasaan buruk
• Menjaga kebersihan rumah
• Memeriksakan kesehatan secara rutin
• Sering cuci tangan