Kebujuren Desken Lau Mbelin
Bahan Bimbingen PJJ
Tanggal 28 Juni - 4 Juli 2026
(Konfesi Ibadah : "Kedisiplinan Beribadah")
OGEN : Amos 5:21-24
21. Nina TUHAN, “Ciga ateKu perayan-perayan agamandu; mutah Aku ngidahsa!
22. Adi ibahanndu persembahen tutungen ras persembahen gandum, la Kualoken. Asuh-asuhen si enggo ipeburburndu janah ipersembahkenndu bangKu pe la Kualoken.
23. Ende-endenndu pe gejek Kuakap; pengadilah e. La ateKu bage megiken sora kulcapindu.
24. Tapi bahanlah maka kebujuren erburak-burak desken lau sumbul, dingen kebujuren desken lau belin si la pernah kerah.
MODEL PJJ: PARTISIPATIF
KATA PERLEBE
Salah sada si penting i bas kegeluhen erkiniteken eme ibadah. Ibadah eme wadah ntah cara guna menjalin hubungen manusia ras Dibata sinepa si nasa lit. Kegeluhen kalak sitek pe arus jadi ibadah si nggeluh i adep-adepenNa. Inti penghayatan ibadah eme uga pemahamenta kerna Dibata ras manusia. Keberadaan, sifat ras karya Dibata i bas sada sisi ras keberadaan manusia i bas sisi si deban, duana jadi palas teologis engkai maka manusia arus beribadah, erkebaktin ras nembah man Dibata. Arah ibadah manusia erbahan sada hubungen vertikal ras Dibata ras encidahkensa nilai-nilai rohani i bas kegeluhen horizontal (sapih-sapih manusia). Idealna, ibadah jadi ciri utama ija manusia nggeluh i bas relasi si benar ras Dibata bage pe ras temanna manusia. Alu la litna ibadah, agama kebenen maknana jine. Tapi i bas praktek kegeluhen erkiniteken, lit kecenderungen maka ibadah e iertiken secara sempit janah banci ikataken nggo terjadi degradasi nilai ras berakibat ku bas dekadensi (kemunduren) moral. Ibadah terjeng iertiken secara ritual ntah pe berhubungen ras upacara-upacara keagamaan si bersifat formal ras legalistis. Ibadah terjeng berlaku i bas ingan-ingan suci tertentu, la mencakup wilayah kegeluhen si tep-tep wari. Ntah pe ibadah terjeng iertiken selaku perkara rohani saja si terpisah arah perkara-perkara jasmani. E maka lit kesenjangen antara kiniteken ras perbahanen, antara hal rohani ras jasmani, antara kesalahen ras tingkah laku, antara ajaran ras etika nggeluh.
ISI
Arnos eme nabi si asalna arah Tekoa si berjarak sekitar 10-20 km sebelah selatan arah Jerusalem. Ia ernubuat i Kerajan Israel Utara i bas masa pemerintahen raja Yerobeam ll (787-747 Sm) ras raja Uzia i Jehuda (787-736 Sm). I bas periode pemerintahen raja Jerobeam II ikataken periode kedamen ras kemakmuren si lenga pernah jadi i bas periode ope denga sie. Tapi i bas masa kedamen ras kemakmuren e sendalenen ras korupsi ras penindasen. Secara militer ras ekonomi kerajaan Israel Utara luar biasa aminna pe secara ekonomi kebayaken e la merata. Dampakna teridah i bas sistem peradilen si teridah runtuh ras erbansa terjadi ketimpangan sosial si nyata i bas masyarakat, si bayak reh bayakna, si musil reh musilna. Sabap sistem peradilen si lit tumpul nandangi masyarakat elit tapi tajam nandangi kalak musil. Uga kerna kegeluhen keagaman bangsa e? Kemakmuren kalak Israel pe teridah i bas kegeluhen keagamanna. Enda teridah i bas ritual agama/ibadah i Gilgal ras Betel si dem jelma sanga ersembah. Ritual ibadah si ilakokenna teridah i bas perayaan si semarak, asuh-asuhen si mbur ipersembahken ras ende-enden si iringi alat musik. Ritual ibadah idesain seindah mungkin gelah teridah serta iadepen Tuhan. Orientasi ibadah si lepak pe mulai teridah i bas kalak Israel. Tujun ibadahna segelah la mandang kesalahen kesalahen ras dosana i bas perbahanen si melket nandangi kalak-kalak si lemah ras musil. Ertina maka ibadah terjeng ritualna saja ras motifna eme sogoken man Tuhan. Em sababna maka ciga ate Tuhan nandangi ibadah ras perayan agama bangsa Israel e. lbadah si ilakokenna terjeng aspek ritual ras ngelupaken aspek tingkah laku ras etika i bas kegeluhenna. Motif ntah pe tujun arah ibadah sinilakokenna nggo ndauh ndempat arah arusna. lbadah si arusna ilakoken i bas kerangka karya Penyelamaten Tuhan si iwarnai alu pengataken bujur, berubah haluan ku sogoken man Tuhan gelah la iperhitungken Perbahanenna si nggesuh i bas kegeluhen. Penolaken Tuhan labo gg erkiteken bentuk ibadah kalak Israel tapi erkiteken kegeluhen unlatNa la sue ras keadilen ras kebujuren.
Ibadah si ngena ate-Na eme gelah keadilen ras kebujuren idalanken. Sabap Dibata ndarami keadilen ras kebujuren i bas kegeluhen umatNa. Keadilen (misphat) erhubungen ras tindak tanduk sekalak hakim, si la terjeng mutusken sada perkara tapi mulai arah proses siibenaken arah pengadilen, pembelaan nandangi pihak si terkait ras idungi alu pernyataan kerna pihak si benar ras pihak si salah. Keadilen ituriken desken lau sumbul si erburak-burak siertina maka keadilen e arus megegeh ras mbersihken si ikawitken ras sistem peradilen Israel si lemah ras ngkotori keadilen terutama keadilen antara kalak bayak ras kalak musil. Kebujuren (tsadiq) eme kejujuren ras kebenaren. Kebujuren ituriken desken lau belin si la pernah kerah ertina kebujuren arus konstan/tetap, setia ras mereken kegeluhen. Kebujuren ikawitken ras perbahanen si mehuli nandangi kalak si tertindas, kote ras musil. Keadilen ras kebujuren labo terjeng perentah-Na. tapi keadilen ras kebujuren arus pemena jadi curminen i bas ritual ibadah si ilakoken kalak Israel, e maka dungna man bana ipertegas guna mpraktikken sie i bas hubungen sosial i bas bangsa Israel. Alu bage banci ikataken maka ritual ibadah ras perbahanen si mehuli khususna i bas ngelakoken keadilen ras kebujuren desken dua sisi mata koin si la tersirangken.
PENGKENAINA
I bas konfesi GBKP kerna ibadah, ikataken," Ibadah adalah ungkapan rasa syukur orang Kristen yang telah diselamatkan oleh Allah yang dinampakkan melalui pikiran, ucapan dan tindakan dalam kehidupannya". Erkiteken ibadah eme salah sada bentuk perjumpan antara manusia ras Dibata bage pe Dibata ras manusia, maka i bas ibadah arus lit kehamaten man Dibata si icidahken i bas gerak, perkataan si tepat, pantas ras teridah i bas sikap, perbahanen ras kegeluhen. E maka perlu kedisiplinen i bas ibadah. Disiplin (latin: Disciplina, ertina pengajaran, pelatihan, pendidikan, akar katana eme "discipulus" si ertina murid). Disiplin labo soal ukumen tapi proses pembelajaren jadi sekalak murid/ajar-ajar. Secara teologis disiplin beribadah eme proses pedagogis/ pendidiken arah Dibata guna membentuk kalak si tek man baNa geluh alu bujur ras patuh janah ibadah lanai terjeng rutinitas ngenca tapi pe transformasi karakter guna ndalanken si ngena ateNa. eme keadilen ras kebujuren nandangi temanta manusia.
DISKUSI
1. Engkai maka itulak Tuhan ibadah kalak Israel padahal ia kerina ngerayaken perayaan agama ras mpersembahken persembahen man Tuhan?
2. Pernah nge kita terjebak i bas ibadah si terjeng rutinitas saja alu la lit ndalanken si ngena ate Tuhan salah sadana eme kebujuren?
USULEN ENDE-ENDEN:
DAFTAR BACAAN :
1. Eka Darmaputera, Mencari Allah: Pemahaman Kitab Amos tentang Mencintai Keadilan dan Kebenaran, No.: BPK-Gunung Mulia, 2012
2. Barton, John. 2012. The Theology of the Book of Amos.
3. Konfesi GBKP
Pdt. Dony Purba, M.Th HP/WA: 081362462731
0 Response to "Kebujuren Desken Lau Mbelin"
Post a Comment