Kata Dibata Kap Tendang

BAHAN BIMBINGAN PA MAMRE
TANGGAL, 21 JUNI - 27 JUNI 2026
( Konfesi V : Pustaka Si Badia )

Ogen : Masmur 119

105. KataNdu kap tendang man nahengku, nerangi dalan si kudalani.

Tema : Kata Dibata Kap Tendang

Tujun : Gelah Mamre:
1) Meteh kerina isi Pustaka Sibadia eme rehna lcarah Dibata nari ras ertujun guna mbangun ras ngkuhi geluh kalak si tek
2) Ertutus ate ngoge Pustaka Sibadia

I. KATA PENARUH
Kalak si nggeluh ibas kegelapen identik ras nggeluh ibas kecemasen, kebiaren, terisolasi, ras tempa nggeluh ibas kinilapastin erkiteken bas kegelapen kai pe la idah, kegelapen pe jadi gambaren kesedihen, kesusahen ras benena harapen ibas geluh, sierbanca kalak putus asa ras desken terjebak ibas kondisi si sulit. Bagem gambaren kalak si nggeluh la ertendang, bagem pentingna kata Dibata jadi tendang ibas kegeluhen enda.

II. URAIAN TEKS
   Bahan PA nta enda eme termasuk kubas Masmur sigedangna bagepe pasal sigedangna ibas Pustaka Sibadia. Masmur enda itulis Esra kenca Rumah Pertoton ipajdekken mulihi (Esra 6:14-15) jadi ende-enden meditasi kalak Israel si nuriken kerna uga jilena kata Dibata ras uga kata e nampati kalak Jahudi tetap setia ras bertumbuh ibas kiniteken. Masmur 119 enda isusun sedemikian rupa seh maka 119 pasal enda terbagi 22 kelompok sajak si isusun secara beruruten alu tiap-tiap kelompok make huruf awal si seri' janah menam tiap ayat nuriken kerna Kata Dibata, janah memang bage kin tradisi ngerengget ibas kalak Jahudi eme alu ngendeken sajak si iulih-ulihi.
   Asum sie labo lit pustaka sibadia ibas tiap-tiap jabu emaka sada kebiasaan man kalak Jahudi ngapal isi pustaka, gelah murah ngapalsa me maka isusun ende-enden si gedang enda kubas kelompok sajak sibenaken alu huruf Si seri, buena 22 huruf Ibrani (bdk ras jembatan ingatan) Ibas ayat 105 pemazmur ngakuken maka :" KataNdu kap tendang man nahengku, nerangi dalan si kudalani" . Ula siakap maka ibas jaman pemasmur enda asum berngi lampu dalan enggo bagi jamanta enda terangna, lit paksa-paksa ija tengah berngi kalak Jahudi arus erdalan itengah kerangen si gelap, janah tendang si ibabana la ngasup ngerangi kerina dalan arah ujung ku ujung, tapi si pasti tendang e ngasup nerangi langkah berikutna si man dalanen.
   Tendang si ipake kalak Jahudi asum sie iban arah abu taneh nari janah apina pe kitik kel, la ngasup norot ndauh tapi setidakna ngasup nuduhken langkah kecil berikutna siman dalanen. Bagem kepe kata Dibata e nerangi dalan geluhta asum kita erdalan ibas kegelapen geluh, enggo si oge kata e tapi lenga terang man banta kerna kuja pagi ujungna perdalanenta, tapi setidakna kata e jelas nerangi langkah demi langkah si man dalanenta.
   Alu pengarak-ngarak tendang kata Dibata e pemasmur nerusken pengakunna kubas ayat 106 : "Padan si enggo kusumpahken, kusehken me, aturenNdu si bujur kupatuhi", perkataan enda eme perkataan si tegas dingen pasti maka ibas ndalani geluhna pemasmur erpadan maka kata Dibata e me ipakekenna jadi gelemen geluhna ibas kerina situasi. Dalanku sinimaksudken ibas bahanta enda eme soal moral, etika ras keputusen kai siman pilihen ibas geluhta sitep-tep wari. Misalna langkah kai selanjutna si arus ibas ngalaken anak-anakku sila megiken kata? Uga aku ngasup ertahan ndampingi teman geluh ibas perbebenna? Uga arusna ningku ngerana man teman geluhku sangana patah semangat? Uga arusna aku ersikap nandangi seninangku si mbaru denga kepaten? Kata Dibata e desken tendang sierbanca tetap ukurta melangkah.

III. PENGKENAINA
Lit Ungkapen ngatakenca "hanya di dalam kegelapan kita membutuhkan terang" alu kata sideban la perlu kalak mpegeluh lampuna itengah las ciger wari. Ban gelapna kap geluh enda alu erbage-bage kiniseran ras perbeben erbanca terang kata Dibata e iperluken kel. Janah makeken terang nina ibas bahanta enda maksudna eme "melakukan sesuatu/take action" lit tendang tapi la ipake la kap lit ertina, meteh kata Dibata tapi la makekensa la lit kap ertina.

IV. DISKUSI
1. Uga penggejapenndu asum kam nggeluh ibas situasi geluh sidem kegelapen?
2. Kai makna kata Dibata eme kap tendang kegeluhen?

USULEN ENDE-ENDEN :
1) KEE GBKP No 345 :1 ( KLIK JUDUL LAGU UNTUK MELIHAT LIRIK TEKS )
2) KEE GBKP No 309 :1-2 ( KLIK JUDUL LAGU UNTUK MELIHAT LIRIK TEKS )
3) KEE GBKP No 41:1 ( KLIK JUDUL LAGU UNTUK MELIHAT LIRIK TEKS )
4) KEE GBKP No 445 : 1 (Persembahen) ( KLIK JUDUL LAGU UNTUK MELIHAT LIRIK TEKS )

Pdt. Sinar Rehaganta Barus, M.Th.

HP/WA : 0852 7007 8361