Ngkelengi Tuhan Ras Mehamat Man Bapa Nande Bahan PA Mamre 12-18 April 2026
Bahan Bimbingen PA Mamre
12 APRIL - 18 APRIL 2026
( Rangkaian Paskah / HUT Saitun )
Ogen : Keluaren 20:1-12
Sepuluh Pedah Dibata
(Ul 5:1-21)
1. Ngerana Dibata, janah enda me kataNa,
2. “Aku kap TUHAN Dibatandu, si maba kam ndarat i Mesir nari, inganndu iperbudak.
3. Ola isembahndu dibata-dibata si deban, tapi sembah lah Aku.
4. Ola ibahanndu gana-gana tah gambar-gambaren kerna kai pe si lit i datas langit, i doni, ntah pe si i bas lau i teruh doni.
5. Ola kam erjimpuh man gana-gana ntah pe ersembah ku je, sabap Aku kap TUHAN Dibatandu si percemburu. Asa kai kalak si ernembeh ate man bangKu Kuukum ia, ras anak-anakna, seh ku kesusurenna si peteluken ras si peempatken.
6. Tapi tetap Kukelengi kalak si engkelengi Aku ras si ngikutken undang-undangKu, seh kempak meribu-ribu kesusuren
7. Ola ipakendu gelarKu guna tujun si jahat, sabap Aku TUHAN Dibatandu, la banci la ngukum asa kai kalak si nalah gunaken gelarKu.
8. Inget wari Sabat janah pebadiaken lah wari e.
9. Enem wari arus kam erdahin guna ndahiken dahinndu;
10. tapi wari si pepituken e me sada wari pengadi-ngadin si man persembahenken man bangKu saja. I bas wari e, ise pe la banci erdahin: kam, anak-anakndu, budak-budakndu, asuh-asuhenndu, bage pe kalak pertandang si ringan i bas negerindu.
11. Sabap i bas enem wari Aku TUHAN enggo njadiken doni, langit, lawit, ras kerina isina, tapi i bas wari si pepituken ngadi Aku. Em sabapna maka Kupasu-pasu wari Sabat janah Kupebadiaken wari e.
12. Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi.
T H E M A : Ngkelengi Tuhan Ras Mehamat Man Bapa Nande
Tujun : Gelah Mamre
1) Meteh uga cara ngkelengi Tuhan ras mehamat man bapa nande rikutken teks
2) Ngelakoken Paskah arah erbahan aksi man Saitun
Metode : Diskusi ras Aksi
I. KATA PENARUH
Saitun eme salah sada kategorial ibas Gereja. GBKP. I bas tanggal 15 April 2015, enggo itetapken Saitun jadi kategorial nandangi perpulungen si enggo lanjut usia. Sehubungen ras rangkaian acara Paskah GBKP, iajuk me Mamre lako ngidah lias dingen keleng ate Tuhan man manusia janah merespon keleng ate Tuhan alu nggeluh sikeleng-kelengen ibas Tuhan. Salah sada carana eme alu encidahken kinihamaten man orangtua. Guna empengasup Mamre ibas encidahken kehamaten man orangtua, ibabai me Mamre arah bahan PA alu tema, Ngkelengi Tuhan Ras Mehamat Man Bapa Nande, erpalasken Keluaren 20:1-12.
II. URAIAN TEKS
Kitab Keluaren 20:1-12 eme bagin ibas sepuluh pedah Dibata nandangi bangsa Israel tupung bangsa Israel i bas perdalinen i gurun pasir ku Taneh Kanaan (bnd. Kel. 20:1 -17). Dibata mereken sepuluh Pedah Dibata man Musa i deleng Sinai, alu tujun guna ngaturken kegeluhen bangsa Israel segelahna tetap ngasup nggeluh bagi si ngena ate Tuhan.
Rikutken sepuluh pedah Dibata enda, pedah Dibata si pemena seh asa si peempatken eme pedah Dibata si ngaturken hubungan bangsa Israel ras Dibata. Segelah bangsa Israel encidahken kehamaten man Dibata. Janah pedah Dibata sipelimaken seh asa pesepuluhken ngaturken hubungen antara sesama manusia. Enem-na pedah enda tujunna eme guna negakken kebenaren ibas geluh manusia. Ibas menaken pedah sienem e, sipemenana ipeseh eme pedah guna encidahken kehamaten man orangtua. Ibas Padan Si Mbaru, sepuluh Pedah enda irakut jadi dua, eme guna engkelengi Tuhan Dibata bagepe teman Manusia (Mat. 22:37-39)
Rikutken Keluaren 20:1-12 enda lit 2 poin penting si itekanken, eme:
1. Engkelengi Tuhan Dibata
Selaku anak-anak Dibata tentu kita harus encidahken kinihamatenta man Dibata. Ibas kita encidahken kinihamatenta man Dibata lit 4 hal si harus ilakoken, eme nembah Dibata alu bulat ukur, ula nembah gana-gana, ula pake gelar Dibata guna erbahan jahat ras pebadiakenlah wari Sabat. Sie kerina idalanken labo guna ndatken keselamaten idur Dibata nari, tapi guna ngerespon karya keselarnaten si enggo ibereken Dibata man banta.
2. Engkelengi Teman Manusia (Bapa ras Nande)
Salah sada cara engkelengi teman manusia eme alu engkelengi bapa ras nande. Eme pedah simendasar ibas nehken keleng ate man teman manusia. Erkiteken bapa ras nande eme wakil Dibata ibas doni enda. Alu tangkas pe ituriken ibas ayat 12, "Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi." Kinihamaten man orangtua jadi palas guna ndatken kesangapen ibas geluh.
III. PENGKENAINA
Dibata enggo encidahken keleng atena man banta alu mereken AnakNa Si Tonggal guna nebusi dosanta. Kita si arusna iukum erkiteken dosanta enggo iperdameken ras Dibata. Ibas Dibata enggo encidahken keleng ateNa man banta, marilah sicidahken ka keleng ateta nandangi bapa ras nandeta. Ibas umurna si enggo lanjut bahanlah kehadirenta jadi penampat man bana. Ingetlah maka orangtuata pe enggo leben engkelengi ras nampati kita anak-anakna. Kinihamaten man orangtua eme buah kinitekenta man Dibata. Arah caranta encidahken kinihamatenta man orangtua, teridah buah kinitekenta. Ipasu-pasu Dibata geluh anak si mehamat man orangtuana. Erdandanken sie, cidahkenlah kinihamatenta man orangtuanta.
Arah HUT Saitun Si pe-11 tahunken enda, marilah sikelengi ka kerina orangtua si lit ibas jabu, gereja bagepe isekelewetta, Jadilah anak-anak Dibata si ipakeken Dibata lako nehken keleng ateNa man orangtuata Saitun. Ingetlah maka usia yang muda pasti akan. menua. Kita si gundari nguda pe kedungenna metua. Nggeluhlah kita siergan ras sikeleng-kelengen ibas Tuhan.
IV. DISKUSI
1. Rikutken teks PA enda engkai makana kita harus mehamat man Bapa ras Nande?
2. Turiken uga cara nuduhken kehamaten man bapa ras nande?
Aksi
Bahanlah perayan ulangtahun Saitun i tengah-tengah Gerejata.
USULEN ENDE-ENDEN :
1) KEE GBKP No. 399:1-2 ( KLIK JUDUL UNTUK MELIHAT LIRIK LAGU )
2) KEE GBKP No. 307:1-2 ( KLIK JUDUL UNTUK MELIHAT LIRIK LAGU )
3) KEE GBKP No. 345:1-2 ( KLIK JUDUL UNTUK MELIHAT LIRIK LAGU )
4) KEE GBKP No. 315:1 (Persembahen) ( KLIK JUDUL UNTUK MELIHAT LIRIK LAGU )
0 Response to "Ngkelengi Tuhan Ras Mehamat Man Bapa Nande Bahan PA Mamre 12-18 April 2026"
Post a Comment