Bapa Simereken Kiniulin ( Bahan PA Mamre 15-21 Maret 2026 )

BIMBINGAN PA MAMRE
TANGGAL, 15 MARET - 21 MARET 2026
( Teologia Bapa I : Bapa Si Jadi Usihen )

Ogen : Matius 7 : 9 - 12

9. Tentu labo lit i bas kam bapa mereken batu man anakna adi ipindona roti man bandu.
10. Bage pe tentu la iberekenndu nipe adi ipindona nurung.
11. Kuga gia jahatna kam ietehndu nge kai si mehuli man berenken man anakndu. Apai denga ka Dibata, tentu iberekenNa nge si mehuli man kalak si mindo man baNa!
12. Bahanlah man kalak si deban bagi ngena atendu ibahanna man bandu. Enda me ertina Undang-undang si isuratken Musa ras kai si enggo isuratken nabi-nabi.”

Tema : Bapa Simereken Kiniulin

Tujun : Gelah mamre:
1) Meteh Bapa simereken kiniulin man anak-anakna.
2) Gelah Mamre jadi bapa siman usihen.

I. KATA PENARUH
Berita si Meriah (Injil) Matius isuratken Matius sekalak i bas ajar-ajar Tuhan Jesus sekitar tahun 60 M. Tujunna nulisken kitab enda e me:
1. Nehken berita kempak si ngoge suratna selaku ia saksi mata kerna kegeluhen Jesus si tuhu-tuhu erkeleng ate kempak manusia.
2. Segelah si ngoge suratna tek maka Jesus e me Anak Dibata ras Juru Selamat si enggo ndube inubuatken i bas Padan si Ndekah, si enggo ndekah itimai kerehenNa
3. Lako nuriken maka Kinirajan Dibata enggo ipetangkas i bas Jesus Kristus alu cara si lenga pernah jadi.

Khusus i bas Matius 7:9 -12 bagin Matius 7:7-12 e me termasuk isi kotbah Jesus i datas uruk isina nuriken maka Dibata tuhu-tuhu erkeleng ate kempak manusia si jadi anak-anakNa. Keleng ate Tuhan si perlu tethp ipindo, idarami dingen ituk-tuk. Ertina lit kininggiten i bas anak-anak Dibata lako mindo ku Dibata bagepe patuh dingen tutus nggeluh ersada ras Dibata. Bagenda me tempas Dibata si ituriken i bas teks enda.

II. URAIAN TEKS
   Isi Matius 7:9-12 e me pengajaren Tuhan Jesus kerna orat geluh kalak si erkiniteken man Dibata i bas ertoto (ay. 7-8), kerna biak Dibata (ay. 9-11) bagepe orat perbahanen anak-anak Dibata (ay. 12). Tuhan Jesus nehken pengajaren maka ajar-ajarNa arus alu tutus nehken pertoton dingen la erngadi-ngadi ilakoken (terus menerus). La pernah lit istilah bosan, enggo me lanai perlu ertoto aminna gia lenga jadi isi pertoton e ras sidebanna. Enda ertina maka anak-anak Dibata arus tetap mindo, ndarami dinge nuktuk. Mindo isina e me anak-anak Dibata sedar dingen tek maka si ipindona e lit i bas Dibata dingen Dibata pe megiken pertotonna. Ndarami nuduhken maka pemindon e isehken alu bulat ukur iikuti alu kepatuhen kempak peraten Dibata. Nuktuk nuduhken litna ketutusen njumpai Dibata amin pe labo minter isehkenNa pemindon anak-anakNa. Tuhan Jesus nehken jaminen maka kalak si mindo ngalo me adi nggit alu tutus ndarami kinirajan Dibata, sedar maka Dibata tuhu-tuh perkeleng, ertoto rikutken peraten Dibata, tetap ersada ras Tuhan Dibata bagepe tetap patuh man Dibata. Alu pengajaren enda Tuhan Jesus tuhu-tuhu ngarapken maka anak-anak Dibata tetap njadiken ertoto jadi kesemalen i bas geluhna (bd. Luk. 18:1-8).
   Sipeduaken iajarken Jesus kerna biak Dibata segelah tuhu tuhu ajar-ajarNa tetap ertoto. Biak Dibata tuhu-tuhu perkeleng Keleng ateNa ndauh belinen asangken sekalak bapa nandangi anakna i tengah-tengah doni enda. IturikenNa maka sekalak bap labo mereken si la ipindo anakna tapi tentu si ipindo anak e. Labo lit sekalak bapa mereken batu adi anakna mindo roti man bana. Sekalak bapa i doni enda tentuna lit i bas dosa ras kesalahen Amin bagepe erjuang ia mereken si mehulina kempak anakna rikutken keperlun anakna. Tentuna Dibata e me Bapa si badia; perbahanenNa mereken kiniulin ndauh belinen. La terjen keperlun anakNa i bas doni enda isikapken Dibata tap keterkelinen e me kegeluhen si tuhu-tuhu i surga isikapken Dibata. Bageme tentuna ibahan Dibata kempak anak-anakNa si la erngadi-ngadi ertoto man baNa e me mindo, ndarami dingen nuktuk. Ertina tetap nggeluh ersada ras Dibata dingen ngelakoken peraten Dibata.
   Sipeteluken Tuhan Jesus nuruh ajar-ajarNa ngelakoken perbahanen si iarapkenna ilakoken kalak sideban man bana. Tentuna enda cara rukur si sederhana i bas manusia segelah sikap dingen dame kegeluhen. Sekalak manusia labo lit sura surana kalak sideban erbahan si jahat man bana. Bage ka arusna si turah i bas pusuhna maka kalak sideban pe ngarapken perbahanen si mehuli i bas dirina nari jine. Adi bagenda kerina lit i bas pusuh manusia enggo pasti perbahanen si mehuli nge ibahanna man temanna manusia. Perbahanen si peturah ate malem dingen banci ngerakut kiniersadan si paguh sapih-sapih kerina manusia. Kai si iajarken Tuhan Jesus e me isi si isuratken Musa ras nabi-nabi. Ertina pengajaren e isehken Tuhan Jesus mulihi nuriken maka isi Padan si Ndekah ras Padan si Mbaru bali nge e me nggeluh i bas keleng ate (bd. Mat, 22:34-40).

IV. PENKENAINA
   Tema Penelahen Alkitab (PA) Mamre i bas paksa enda e me: Bapa Simereken Kiniulin. Bapa e me orang tua si dilaki sekalak I bas kita kalak Karo lit telu (3) penggelaren kempak sekalak dilaki si enggo erjabu e me: perbulangen, bapa ras perbapan. Perbulangen e me penggelaren man sekalak dilaki erkiteken enggo lit ndeharana. Bapa e me penggelaren man sekalak dilaki erkiteken enggo lit anak/pupus i bas jabuna. Dingen perbapan e me nenggelaren man sekalak dilaki siniarapken ia jadi usihen engah-tengah jabu ras rnasyarakat. I bas kita kalak Karo pe megati lit tersena sada kuta igelari kuta perbapan. Ertina e me nnka i bas kuta e lit si jadi usihen umpamana e me kerna adat litna tokoh adat, kerna pendidiken alu litna tokoh pendidiken ras sidebanna.
   Alu bage adi ikataken sekalak mamre eme perbulangen, bapa dingen perbapan oratna mamre enggo sedar maka dirina e me urus iadi usihen i bas jabu, gereja ras masyarakat. Jadi usihen alu melasken dingen ngelakoken si mehuli. Jadi usihen i bas erdahin, kebaktin ras sidebanna. Kehadiren Bapa i tengah-tengah gereja ras masyarakat banci mpeturah si mehuli dingen mbenaken si la mehuli. Mpeturah si mehuli ertina e me kehadiren mamre banci mereken rasa arnan ras nyaman kempak kerinana. Nggeluh mereken kebutuhen jabu, gereja ras masyarakat labo nggeluh pesenangken dirina. Tentuna kecibal si bagenda banci jadi adi mamre tuhu-tuhu tetap ersada ras Dibata. Alu bage perlu kal mamre tetap mbangun dingen mpeteguhi kinitekenna alu disiplin ngelakoken ras ngikuti kebaktin.
   Sekalak bapa (mamre) si enggo jadi usihen maka ia pe pang nehken disiplin ras koreksi kempak isi jabuna (Disiplin adalah sikap taat dan patuh terhadap peraturan, norma, atau tata tertib yang berlaku, yang dapat berupa ketaatan pada aturan yang jelas maupun komitmen terhndap sesuatu. Koreksi adalah tindakan memperbaiki perilaku yana salah, yana seringkali menjadi bagian dari disinlin dengan memberikan teguran, peringatan, atau tindakan perbaikan yang bertujuan untuk merehabilitasi, bukan sekadar menghukum). Dingen kai si ilakokenna e iergaken anak jabu sabab iidahna bapa e ngerana kerna kai si enggo ilakokenna. Jadi la terjeng cakap saja. Tuhu-tuhu iidah maka si ibahanna nandangi anak jabuna palasna e me keleng ate. Disiplin ndalani kegeluhen i bas oratna dingen idalanken alu patuh rikutken aturen si enggo icakapken i bas jabu. Adi waktu erdahin tentuna erdahin. Adi waktu erlajar tentuna erlajar. Adi waktu kebaktin tentuna kebaktin ras sidebanna. Bagepe bapa (mamre) nggit ras pang nehken koreksi di kune i bas anak jabuna lit ngelakoken kesalahen. I bas paksana isehken bapa (mamre) pedah dingen persinget kempak anak jabuna segelah ulanai ngelakoken kesalahen si seri ntah pe robah. Alu bage jabuna tetap ersada dingen reh ulina.

IV. DISKUSI
1. Oge mulihi Matius 7:11. Turiken antusen ayat enda.
2. Daftarken perbahanen bapa (Mamre) si banci jadi usihen man ndehara, anak bagepe kalak sideban.

USULAN ENDE-ENDEN :
1. KEE 215 : 1, 2 ( KLIK UNTUK MELIHAT LAGU )
2. KEE 203 : 1, 5 ( KLIK UNTUK MELIHAT LAGU )
3. KEE 202 : 1, 2 ( KLIK UNTUK MELIHAT LAGU )
4. KEE 124 : 1 (Persembahen) ( KLIK UNTUK MELIHAT LAGU )

Pdt. Christoper Sinulingga, M.Th.

HP/WA : 0813 7629 1768