Wari Pelimaken Kebaktin Keluarga Kamis 19 November 2026
LITURGI RAS RENUNGEN PEKAN KEBAKTIN KELARGA
WARI SI PELIMAKEN
Kamis, 19 Nopember 2026
A. PERSIKAPEN
- Nikapken kerina perlengkapen guna Kebaktin dingen ngaturken simuat bagin
- Nuratken Pertoton sapaat
- Singoge Kata Dibata si pemena eme Simada Jabu
- Mpelajari ende-enden Kebaktin
- Hal si deban sue ras keperlunta
B. KEBAKTIN
Kata Penaruh
Mejuah-juah man banta kerina perpulungen si ikelengi Tuhan. Sikataken bujur man Tuhan sebab iatankenNa kita pulung i bas Pekan Kebaktin Keluarga Sipelimaken (V) enda. Si jadi tema sendah "Radu Ras Berkat Ersembah". Arah tema enda iajuk kita gelah jadi jabu si ersada arih, sepengodak sepengole, sada tujun i bas nembah Dibata. Labo kepe bias adi Bapa ngenca mejingkat ku gereja, tapi Nande ras Anak-anak kurang jingkatna. Bage pe adi Nande ngenca tutus ku gereja tapi Bapa ras anak- anak kurang tutusna. Sura-sura Tuhan gelah seisi jabunta ergiah-giah muji gelarNa. Enda me kearusen nggeluh jabu si erkiniteken eme nggit ngelai. Dage guna menaken Kebaktinta enda, mari siendesken dirinta ras pe Serayan Tuhan si ipakeken Dibata guna pembarken kataNa arah pertoton.
Mari ras kita ertoto ...
Rende : KEE GBKP No. 213:1-2 Sipuji
--- (Perpulungen Tedis/Ngendesken Perlengkapen Kebaktin) ---
Sipuji sipuji sipujilah lebe, Sipuji gelarNa sipuji me dage
Dibata Bapanta simada kuasa e, Sinasa kerina 'nggo itepaNa pe
'Lah kita k'rina jore
Sipuji sipuji sipujilah lebe, Sipuji gelarNa sipuji me dage
AnakNa Si Tonggal em Jesus Kristus e
Si teklah man baNa ikeliniNa pe, 'Lah ola kita bene
Votum - Salam
L I bas gelar Dibata Bapa, I bas gelar AnakNa Jesus Kristus, ras I bas gelar Kesah Sibadia. Perkuah ate ras dame i bas Dibata Bapa, i bas Tuhan Jesus Kristus nari ras i bas kerembaken Kesah Si Badia ras kita (kam) kerina gelah. Amin
P Amin, Amin, Amin ... (iendeken)
Berita Kerna perbahanen ras sura-sura Dibata (Invocatio)
"Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabap sieteh maka wari Tuhan, eme wari kerehenNa, reh me" (Heber 10:25).
Erpalasken kata Dibata enda, sipuji Tuhan arah ende-endenta:
KEE GBKP No. 243:1-2
Siraskenlah si puji k'rina, Tuhanta ras kiniulinNa
'Ngkunduli kursi kerajanNa, Ku je ukurta min si ban
I jem' kepeken erta e, Sinama kesenangen e
I jem' kepeken erta e, Sinama kesenangen e
'Di IA kal nge Pengulunta, Si bujur saja ban gurunta
E kita ginemgemNa me kap, Si arus ngikut pe tetap
'Nggo ipesaiNa dalin e, Ku surga kitalah dage
'Nggo ipesaiNa dalin e, Ku surga kitalah dage
--- (Perp. Kundul) ---
Pujin Man Dibata si masu-masu manusia arah Perjabun
L Terpujilah Tuhan Dibatanta, si nggo mpersadaken manusia arah Perjabun
P Ipuji kami Kam Tuhan, Kam kap Bapa si nggo masu-masu Perjabun. IdiloNdu kami jadi sada rarasen bagi sura-suraNdu. Tangkas idah kami keleng ateNdu i bas jabu si enggo iberekenNdu enda
L Dibata si erdolat, ermulia, erkuasa rasa lalap, eme singarak-ngarak kegeluhen Perjabun.
P I bas ndalani kegeluhen Jabu, igejapken kami pengkawali ras penemani Tuhan. Kam me Dibatasi patut isembah kami. Tedeh ate kami radu ras berkat ku rumah pertotonNdu. Madin sada wari i bas rumahNdu, asangken seribu wari i bas ingan si deban. Madin tedis i bas gerbang rumah Dibatangku, asangken ringan i bas rumah kalak jahat.
L+P Terpujilah Dibata i bas geluhta, genduari seh rasa lalap !
Mari sipuji Tuhan : KEE GBKP No. 124:2,3
Senang me kap si 'rjabu sada arih,
Pehaga Tuhan peratenna ras
Mehuli kal 'di ise pe la 'rdalih
Berkat ku Minggu 'lah ertoto ras
'Di kebiaken gelgel banci salih
'Di pengerana reh hamatna pe
Bas kehamaten labo 'rlatih-latih
Ipasu-pasu Tuhan me kepe
Meriah kal iakap orangtua
Adi anakna ngikut ajar e
E malem ukur si mesui lupa
'Di la 'njuruken lagu anak e
Senangna e'di Tuhan si perkuah
Rembak kin rusur ras dahinna e
Ipasu-pasu Tuhan daten tuah
Je malem-malem me ukurna e
Kinilangasupen Manusia Nggeluhken Jabu Singena Ate Dibata
L Sura-sura Tuhan gelah min kerina isi jabu nggeluh bagi si ngena ateNa Orangtua Ngaku kami Tuhan, rusur kami la ngasup nggeluhken jabu bagi si ngena ateNdu. Reh urakna keleng ate i bas jabu, reh masapna padan perjabun si ibelasken ndube, megati pe turah la siangkan, la sada arih i bas jabu
Anak Kami pe la ngasup jadi anak-anak si maba keriahen ukur orang tua. La inget kami maka kami enda tunas batang saitun, si uratna mbages tersuan i bas kata Dibata. Lanai kami nggeluh bagi sura-sura Tuhan
L Jabu idilo Tuhan gelah jadi aronNa ibabo pertibi enda
Orangtua Megati i bas jabu lenga kami ngasup jadi aron si mehuli. La kami si sampat-sampaten. Si maba ukurna kami kerina. 1 bas ersembah pe labo kami radu ras. Kiniteken e simbaba-mbaba baginna saja. Alemi kami o Tuhan
Anak Kami pe selaku anak megati la ate kami tutus ersembah man Dibata. lajuk orang tua kami berkat ku gereja, tapi rusuren kami nogan. Iajukna pe gelah ikut ku PJJ pangen iakap kami irumah er-HP. Alemi kami i bas kiningudan perukuren kami o Tuhan
L Mari siakuken kinilangasupenta arah ende-endenta : KEE GBKP No. 344:1-2
Kam O Jesus Jurus'lamat, sampat kami genduari
Pulah i bas dosa nari, si naban kami e
Reff : Tergejap latihna nggeluh i bas dosa
Lanai kami ngasup 'rdalan i bas gelap
Ku Kam Juru s'lamat kupindo penampat
Gelah kami pulah i bas dalin mberat
Kam O Jesus Si perkuah, sampatiNdu kami gelah
'Bas ndarami dalan pulah sampat kami gelah
Reff: ...
---- Perp. Tedis ----
Pergegeh segelah nggeluh jadi Jabu si Radu ras Ersembah
L Tuhan Dibata mpelimbarui pusuh si getem. IberekenNa gegeh simbaru man kalak si ngakuken salah lepakna. Biak-biak simbaru turah i bas kalak si nggit ersada ras Kristus, sebab ise mate i bas Kristus ia me tinepa simbaru, nehenlah ! simale enggo lepas janah si mbaru enggo reh. E maka kata Dibata man banta (ndu) wari enda :
"Tapi adi la iakapndu mehuli ersembah man TUHAN, pilihlah sendah ise atendu isembahndu, dibata si isembah nini-ninindu i Mesopotami, ntah dibata kalak Amori si inganindu tanehna genduari. Tapi adi aku ras isi jabungku, TUHAN saja ngenca isembah kami."
I bas keriahen ukurta jabu enggo ipegegehi Tuhan, Mari sipuji gelarNa : KEE GBKP No. 434:1-2
Geluhku bas dosa nggo ialemi,
Malem me ateku ban ipepalemNdu
Reff : Alu rende kupuji gelarNdu, Perbahan meriah kal ukurku
Kupuji Kam segedang geluhku, Tendingku muji gelarNdu
Alu rende kupuji gelarNdu, Perbahan meriah kal ukurku
Kupuji Kam segedang geluhku, Tendingku muji gelarNdu
'Di meteruk rukur, ipeganjangNdu
'Di meganjang rukur, e ipeterukNdu Reff: ...
--- (Perp. Kundul) ---
Kata Dibata
Ngoge Kata Dibata Sipemena : 2 Samuel 6:9-15 (iogeken simada jabu)
L Ketuahen kalak si megiken kata Dibata, dingen si makekenca i bas kegeluhenna si teptep wari: Haleluya!"
P Haleluya, Haleluya, Haleluya (iendeken)
Kotbah (ibenaken ras iujungi alu pertoton)
Renungen : Lukas 2:41-48
Tema : RADU RAS BERKAT ERSEMBAH
Pengakun Kiniteken (Perp. Tedis)
Persembahen (Perp. Kundul)
L Seh me paksana kita ngendesken persembahen pengataken bujurta man Dibata. Kata Dibata si jadi palas ersembah erpalasken 2 Korinti 9:7
"Sekalak-sekalak iberekennalah sue ras si nggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah"
Tupung si pepulung persembahenta, mari sipuji gelar Tuhan : KEE GBKP No.343:1-3
Pasu-pasu bas Tuhan nari, Gejapken kami teptep wari
Bas paksa-paksa geluh kami, Kam me tetap si ngkawali
Pasu-pasu bas Tuhan nari, Jadi pergegeh tendi kami
Guna ndalani wari-wari, Si rehna bas Kam Tuhan nari
Reff: Pasu-pasu dage O Tuhan, Persembahen kami anakNdu.
Labo kapen enda metunggung, Persembahen si nggo pepulung
AjariNdu pe kami gelah min, Tetap ersembah baNdu Tuhan
Buaten lit kami O Bapa, Gejapken kami Kam empuna
Tanda ukur kami meriah, Endesken kami baNdu Bapa
Persembahen enda O Bapa, Desken bunga ncole merimna
Persembahen ateNdu ngena, Bagelah akapNdu o Bapa Reff : ...
Aloken min dage O Tuhan, Persembahen kami anakNdu
Labo ban beluh kami Tuhan, Lako mere kuadepenNdu
Pakeken min dage O Tuhan, Persembahen kami anakNdu
Guna pebelangken kataNdu, Nandangi k'rina tinepaNdu Reff: ...
Pertoton Persembahen ras Sapaat
1. Persembahen ras Jabu ingan pulung
2. Gelah perpulungen erkomitmen radu ras berkat ersembah man Tuhan
3. Gelah kerina jabu perpulungen jadi jabu si sempabu, sepengodak sepengole.
4. Kerna jabu ingan pulung wari si pepagi
5. Bangsa, Negara ras Pemerintahen gelah idemi Tuhan alu kepentaren i bas ndalanken tugas ras tanggungjababna
6. Si turah i bas perpulungen : ...
Perpadanen Man Dibata (Perp. Tedis)
L Kenca enggo sibegiken kata Dibata kerna jabu Jusup, radu ras ia berkat ersembah man Tuhan, kuga dage tekadta (ndu) kulebe wari enda?
Orang tua Nggit kami radu ras berkat ersembah man Tuhan. Bapa, Nande, Anak ras se isi jabu kerina kami sada perarih muji Kam. Nggit kami nggeluhken Jabu bagi si ngena ateNdu. Tetap cikep kami padan Perjabun si ibelaÅŸken ndube
Anak Ertekad kami jadi anak-anak si maba keriahen ukur orang tua. Kami kap tunas batang saitun, si uratna mbages tersuan kempak kata Dibata. Nggeluh kami bagi sura-sura Tuhan. Nggit kami radu ras orangtua ersembah man Tuhan
L Mari sipeteguhi perpadanenta arah ende-endenta : KEE GBKP No. 309:1-2
Pengasup kami o Tuhan, Gelah pedahNdu banci idalanken
Em kap tendang kami bas kegeluhen, KataNdu si man gelemen
Gelah tangkas kata ras perbahanen
Ban min kami tetap bas kebujuren, SurgaNdu kap perayaken
Temani kami o Tuhan, Bengket ku doni si dem keguluten
SampatiNdu kami lako naluken, Dosa si man sirangenken
E maka ola kal kami tadingken
I bas kami ndalani kegeluhen, G'lah dat kami kemenangen
Pertoton Tuhan
Pengutusen ras pasu-pasu Dibata
L Mulihlah alu dame ras mejuah-juah, janah alokenlah pasu-pasu idur Dibata nari "Ipasu-pasu janah ikawali Dibata kita (kam), siang ayo Dibata ersinalsal ibabonta (ndu), janah melias ateNa ngenehen kita (kam). Itatap Dibata ku kita (kam) janah malem ateta (ndu) ibahanNa, Amin "
P Amin ... Amin ... Amin (iendeken)
DISKUSI
1) Erpalasken bahan kotbahta (Lukas 2:41-48), I bas dampar kai-kai saja seisi jabu Jusup radu ras ia ndahikenca?
2) Kai nge si jadi tekad ras usahanta gelah jabunta radu ras berkat ersembah? Mari situriken!

0 Response to "Wari Pelimaken Kebaktin Keluarga Kamis 19 November 2026"
Post a Comment