ItebusNa Gelah Jadi Meherga

Bahan Bimbingen PA Mamre
TANGGAL, 16-22 AGUSTUS 2026
( HUT Mamre / HUT RI )

Ogen : 1 Petrus 1:18-25

18. Ietehndu kap alu kai kam itebusi i bas kegeluhenndu si la erguna, si ialokenndu i bas nini-ninindu nai nari. Kam itebusi labo alu barang si banci masap, umpamana emas ntah pirak.
19. Kam itebusi alu dareh Kristus si meherga, bagi sada anak biri-biri si la cacat dingen la erpandangen si igeleh.
20. IA enggo ipilih Dibata ope denga doni enda ijadiken, janah enggo ipetangkas i bas wari-wari si arah pudi enda guna kiniulinndu.
21. Arah IA, tek kam man Dibata si pekeke IA i bas si mate nari dingen si mereken kemulian man baNa. E maka kiniteken ras pengarapenndu itamakenndu i bas Dibata
22. Erkiteken patuh kam ngikutken pengajaren si tuhu-tuhu e, enggo ibersihkenndu dirindu seh maka lit i bas kam keleng ate si tuhu-tuhu nandangi temanndu si sada kiniteken. E maka sikeleng-kelengenlah kam alu bulat ukur.
23. Sabap arah kata Dibata si nggeluh dingen tetap rasa lalap, kam enggo tubuh jadi manusia si mbaru si labo tubuh arah manusia tapi i bas Bapa si rasa lalap nari.
24. Bagi lit tersurat i bas Pustaka Si Badia, “Kerina manusia desken dukut-dukut, janah kerina kemulianna desken rudang dukut. Dukut melus, rudangna pe nartar;
25. tapi kata Tuhan tetap seh rasa lalap.” Kata enda me Berita Si Meriah si enggo iberitaken man bandu.

Tema : ItebusNa Gelah Jadi Meherga

Tujun : Gelah MAMRE:

Meteh maka kegeluhenna enggo itebus alu dareh Jesus
Ngangkai maka kemerdekan pemere Dibata si meherga ras nggeluh bagi siisuraken Dibata

I. KATA PENARUH

Surat 1 Petrus isuratken man kalak Kristen si paksana merap i belang-belang daerah utara Asia Kitik eme Pontus, Galati, Kapadokia, Asia Kitik ras Bitinia. Paksa si e, perpulungen enda ngenanami kiniseran simbelin erkiteken kinitekenna man Tuhan. Kiniseran kalak si erkiniteken man Tuhan jadi i bas masa pemerentahen Kaisar Nero bagepe i bas masa pemerentahen Kaisar Domitianus. Salah sada pokok persoalenna eme kalak Kristen la nggit nembah kaisar si nganggap dirina selaku dewa.

Surat enda jadi pergegeh gelah kalak enda tetap setia i bas kiniteken amin pe melala perbeben si arus ialaken. Isingetken i bas kitab enda maka kematen, kekeken ras kerehen Jesus jadi palas pengarapen man bangsa pilihen Dibata guna tetap megenggeng i bas kiniseran si reh man bana. I bas keberadan selaku kalak minoritas si maun-maun kebenen identitas, la lit kelebihen ntah pe hak istimewa, megati ipalitken si la tuhu man bana ras megati pe ngaloken perbahanen-perbahanen si la adil, Petrus mpersingeti kalak enda kerna ise kin ia situhuna. Ia eme anak-anak si nggo ipilih Dibata jadi sikerajangenNa arah penebusen Kristus janah selaku anak- anak si nggo ipilih Dibata, kalak enda idilo guna ncidahken buah keterkelinenna alu nggeluh badia i bas kerina situasi si man alanken. Enda me si ipelajari kita i bas PA nta wari enda.

II. URAIAN TEKS

Kata Dibata si jadi bahan PA nta wari enda eme bagin i bas tema besar kerna "nggeluh selaku anak-anak Dibata Si Badia". I bas kegeluhen si dem alu tantangen ras kesusahen, Petrus mpersingeti perpulungen gelah nginget mulihi maka ia nggo ipilih Dibata jadi sikerajangenNa. Keterpilihen enda ianggap penting sebab kalak si nggo ipilih pasti ijagai dingen iselamatken Dibata. Dibata si nggo milih pasti ngasup guna njagai seh ku ujung perlumban kegeluhen eme penghakimen i bas kerehen Jesus pedua kaliken janah kalak si nggo ipilih pasti iselamatken sue ras sura-sura Dibata si ilakokenNa arah Jesus Kristus. Enda jadi sada jaminen si mpeturah pengarapen ras kiniteken guna tetap nggeluh badia. I bas dampar si deban, Petrus mpersingeti perpulungen kerna keterpilihenna gelah jadi sada tanggung jabab guna nggeluh sue ras sura-sura Tuhan. Jadi anak-anak Dibata labo sekedar pemeteh tapi jadi sada konsep teologi simabai kita seh ku perbahanen si teridah tep-tep wari. Identitas teridah arah perbahanen si ilakoken.

Petrus mpersingeti perpulungen maka kalak enda ipilih jadi anak-anak Dibata erkiteken dahin penebusen silakoken Jesus Kristus. Praktek penebusen labo sada hal si asing i bas budaya kalak Jahudi bagepe Junani. I bas duana tradisi budaya enda melala hal si banci itebus umpamana budak, tawanen perang, barang, rsd. Penebusen eme sada kegiaten guna ngelepasken sekalak jelma ntah pe barang arah tuan si ndekah ku tuan si mbaru selaku si mada si sah. Kalak enda enggo itebus arah cara nggeluh si la erguna si ialokenna i bas nini-nina nari. Arah piga- piga tafsiren, kegeluhen si la erguna sinimaksudken Petrus i jenda eme penembahen man berhala. Cara nggeluh enda ianggap la erguna erkiteken berhala labo Dibata janah berhala labo ngasup guna njagai ras nelamatken manusia. Kalak man berhala ujung kegeluhenna eme kematen.

Kalak enda nggo itebus alu dareh Kristus si meherga labo alu barang si banci masap umpaman emas ntah pirak. I bas bagin enda, Petrus ngerana kerna ergana penebusen e. I bas tradisi penebusen, tebusen e ianggap meherga adi si ipake guna nebussa pe meherga. Labo lit kalak si nggit nebus barang si kurang meherga alu tebusen si meherga (Jes. 52:3). Enda nuduhken maka kita manusia si perdosa e tuhu-tuhu meherga iadepen Dibata. itebusNa kita alu barang si mehergana kel ngelebihi emas ras pirak eme alu dareh Jesus Kristus. Ituriken Petrus maka dareh Jesus e tuhu-tuhu mulia ras sempurna, la lit cacatna dingen la lit man pandangen. Alu keterangen enda, icidahken maka penebusen Kristus e tuhu-tuhu nggo ngubah status kalak enda jadi kalak si meherga eme anak-anak pilihen nggo ipilihNa Dibata amin uga gia doni enda mereken pandangenna. Kemulian ras kesempurnan pemilihen Dibata e pe ituriken alu penetapen si ibahanNa ope denga doni enda ijadiken. Dibata alu kreatif ras erdaulat netapken ras milih anak-anakNa arah Jesus Kristus simpeturah kiniteken ras pengarapen man Dibata. Arah Jesus, manusia ipengasup guna nandai Dibata dingen meteh sura-suraNa. Arah Jesus me maka manusia ngasup tek man Dibata si ngasup mpekeke manusia i bas si mate nari dingen mereken kemulian man manusia bagi si nggo iberekenNa man Jesus. Kerina enda jadi pengapul guna ngangkai maka Dibata tetap erdahin guna kiniulin kalak si nggo ipilihNa.

Pengapul enda me si mpengasup anak-anak Dibata ncidahken kekelengen amin gia kalak enda arus nggeluh i bas kondisi si dem alu tantangen ras kesusahen. Lit dua pandangen kerna palas nehken kekelengen enda. Pemena, enda erkawiten ras penyucian ntah pe pengudusen. Enda nuduhken maka bangsa pilihen Dibata nehken kekelengen labo alu gegehna jine tapi alu gegeh Kesah Si Badia. Labo berarti la kita erpala-pala guna nehken kekelengen, tapi arus si sedari maka arah gegeh Kesah Si Badia ngenca kita ngasup reh majuna ibas nehken kekelengen. Kalak si ikuasai gegeh Kesah Si Badia ngasup njagai dirina ibas cara rukur kedagingen. Ibas perikop enda, cara rukur kedagingen si megati erbahansa la kita ngasup nehken kekelengen eme putus asa, khawatir, kiniganjangen ukur ras pesta pora. Tambah si e, kata Dibata/ kebenaren arus jadi palas ibas kita nehken kekelengen e. Kata Dibata jadi gegeh guna ngubah diri jadi manusia si la seri ras si nggo-nggona. Adi ibas paksa si lewat la kita ngasup ngkelengi, kata Dibata si nggeluh i bas pusuhta erbahansa ngasup kita ngkelengi. Peduaken, enda erkawiten ras kiniteken man Jesus. Enda nuduhken maka kalak si ngasup nehken kekelengen eme kalak si erkiniteken

man Jesus janah kekelengen tuhu-tuhu kin kinitekenna e.

III. PENGKENAINA

I bas bulan enda, lit dua acara si mbelin si jadi i tengah tengah bangsata bagepe i tengah-tengah kategorial Mamre eme penyambuten peringeten kemerdekan Republik Indonesia pe 81 ken i bas tanggal 17 Agustus bagepe HUT Mamre pe 31 ken i bas tanggal 26 Agustus. Tek kita maka kemerdekaan eme

pasu-pasu simbelin sibereken Dibata man banta. Peristiwa enda ngubah status bangsata arah bangsa si ijajah jadi bangsa merdeka. Alu bage, sue ras kata Dibata si nggo sipelajari, kemerdekaan e perlu si syukuri janah si isi alu dahin-dahin si ncidahken maka kita Mamre tuhu-tuhu nggo jadi kalak

merdeka. Ulanai min kita mulih ku biak-biak manusia si ndekah si ncidahken maka kita terjajah denga. Mamre eme anak-anak Dibata si nggo itebus alu dareh Jesus si meherga emaka ulanai pediat biak malas erdahin, minem-minem keras seh mabuk, erjudi la erngadi-ngadi, rubati, rsd engkuasai dirinta. Janah kesempaten ngerayaken HUT Mamre i bas tanggal 26 Agustus enda pe arusna jadi sada introspeksi diri selaku Mamre kerna pertumbuhen kiniteken si lit i bas kita. Arusna min reh dewasana umur sekalak jelma reh dewasana ka pe ia i bas pemikiren bagepe kiniteken. Mamre si nggo merdeka janah si nggo reh dewasana i bas kiniteken arus lebih ngasup ncidahken jati dirina selaku Mamre si nggit ncidahken

kekelengen bagepe erdiate ras erpemere.

IV. DISKUSI

1. Erpalasken ogenta wari enda, kai menurutndu si erbahanca kita jadi meherga?

2. Cuba diskusiken kai-kai saja si patut ilakokenndu selaku Mamre si ncidahken maka kam nggo imerdekaken Tuhan jadi kalak si meherga? Janah bahanlah sada Yel-Yel sinuduhken maka kam nggo itebus Tuhan janah atendu ngisi kemerdekaan bangsata alu jadi mamre si erdiate dingen erpemere.

USULEN ENDE-ENDEN :

1) KEE GBKP No. 205:1-2 ( KLIK JUDUL LAGU UNTUK MELIHAT LIRIK )

2) KEE GBKP No. 402:1-3 ( KLIK JUDUL LAGU UNTUK MELIHAT LIRIK )

3) KEE GBKP No. 166:1-3 ( KLIK JUDUL LAGU UNTUK MELIHAT LIRIK )

4) KEE GBKP No. 364:1 (Persembahen) ( KLIK JUDUL LAGU UNTUK MELIHAT LIRIK )

Pdt. Wisely Pinem, M.Th.

HP/ WA. 0823 6531 1780/ 0821 7403 2986