Dibata Ingan Pengarapen

BAHAN BIMBINGEN PA MORIA

Minggu, 18-24 Oktober 2026
Kebutuhan Moria : Kesehaten Mental

SI MAN OGEN : Masmur 42: 1-12

KITAP SI PEDUAKEN
MASMUR 42–72
Pertoton i taneh pembuangen
1. Ende-enden anak-anak si Korah.
2. Bagi belkih mejehe nandangi lau maler si malem, bage me tedehna ateku Kam, o Dibata.
3. Muas tendingku man baNdu o, Dibata si nggeluh, ndigan aku banci ersembah i adep-adepenNdu?
4. Suari berngi aku ngandung, iluh ngenca si man panganku. Gedang-gedang wari nungkun imbang-imbangku, “I ja kin Dibatandu?”
5. Getem pusuhku adi kuinget paksa si enggo lepas, tupung aku mabai perpulungen lawes ku Rumah Dibata. Erdalan aku arah lebe arak-araken, ersurak-surak dingen ngendeken ende-enden pujin man Dibata.
6. Engkai maka ndele ateku? Engkai maka susah kuakap? Ku Dibata saja aku erpengarapen, jenari kupuji ka IA tole, si engkelini aku dingen penampatku.
7-8. I jenda, i taneh pembuangen enda getem kal pusuhku, e maka teringet aku man TUHAN. Gedap aku i bas galumbang ate ceda, keguluten ngombakken aku, desken Lau Jordan si ergeruhguh, i Deleng Hermon dingen Deleng Misar nari.
9. Icidahken TUHANlah keleng ateNa si tetap tupung siang wari, maka banci aku rende tupung berngi, jenari ertoto man Dibata ulu kegeluhen.
10. Ningku man Dibata, penampatku, “Engkai maka lanai ingetNdu aku? Engkai maka tetap ceda ateku, erkiteken itindih musuh-musuhku?”
11. Getem pusuhku sabap iuru-uru musuhku aku. Nina gedang nu wari, “I ja Dibatandu?”
12. Engkai maka ndele ateku? Engkai maka susah kuakap? Ku Dibata saja aku erpengarapen jenari kupuji IA tole, si engkelini aku dingen penampatku.

TEMA : Dibata Ingan Pengarapen

T U J U N : Gelah Moria:
• Meteh kerina kiniseran ras pengarapen Pemasmur.
• Netapken pilihen guna erpengarapen man Tuhan.

METODE PA : Curhat

Kata Penaruh
Mbue ende-enden rohani turah erpalasken Masmur 42 enda; "bagi belkih kenca luah (KEE No. 28),""pribadi yang mengenal hatiku," "seperti rusa rindu sungaiMu," ras sidebanna. Mazmur 42 enda ende-enden pengajaren i bas anak-anak Korah nari, seri biakna i bas piga-piga Masmur sidebanna (Mas 42-43, 49, 84, 87-88). Korah e me golongen Lewi, kesusuren Korah si jadi pemimpin pujian i bas rumah pertoton (bd. 2 Kronika 20:19). Ende-enden enda jadi erkiteken litna perbeben siinanami Pemasmur, ia lit i bas pembuangen/pengasingan, turah pengejapen ndauh bas Dibata nari. Tupung e megati nge pemimpin-pemimpin Israel nadingken Jerusalem erkiteken tekanen politik harus ngungsi seh kondisi aman. Banci ka pe arus nadingken kota Jerusalem erkiteken pemberontaken entah tekanen ekonomi. E me salah sada kemungkinen si ialami Pemasmur. Ndauh ia i Jerusalem nari, ingan Rumah Pertoton, terasing ras nggeluh i tengah tengah kalak sila nandai Dibata (fasik). Kalak si la nandai Dibata e nggombang-nggombangi Pemasmur, nina kalak e: 'I ja Dibatandu?' Kai siikataken kalak e, encedai pusuh Pemasmur tempa-tempa Dibata la ngasup nampati entah pe enggo nadingken ia.

Mpebagesi Pengangkan Kerna Ogen
   I bas perbeben Pemasmur enda ndai igejapna tedeh kel atena man Dibata. Iumpamakenna dirina bagi belkih muas nandangi lau maler. I bas paksa perlego, belkih tuhu-tuhu muas kerina sumbul lau enggo kerah, lanai lit lau si man inemen. Gelah banci jumpa lau maler, belkih erdalan ndauh, jumpa ras erbage-bage rubia-rubia simerawa (predator), sibanci njerngem belkih e. Amin bage gia belkih e tetap erdalan ndarami lau maler, sierbanca lanai muas. Bagi belkih simejehe nandangi lau maler bage me igejapken Pemasmur muasna tendina ersembah man Dibata. Lanai teralang tedeh atena man Dibata guna ersembah, ngerembakken diri man baNa, ngejapken maka Dibata e mbela geluhna, sierbahanca ia ngandung ras erceda ate.
  Tole pe i bas perbebenna Pemasmur nginget uga riahna ukurna nai tupung ia banci ersembah man Tuhan. Ibabaina perpulungen lawes ku Rumah Tuhan alu araken-araken si meriah janahna rende kerina. Nginget kerina kenangen si meriah e mpeturah pengarapenna maka Dibata kap ngenca penampatna, singasup engklini ia i bas kesusahenna. Melala kiniseran Pemasmur, iturikenna alu tangkas nina:
- Getem pusuhna i bas taneh pembuangen, i tengah bangsa si la nandai Dibata singuru-nguru ia alu ngataken: 'i ja Dibatandu?'
- Gedap i bas kecedan ate, erkiteken itindih musuh.
- Mombak iakapna bana erkiteken kegulutenna. Mombak ertina ndauh i bas Dibata nari.
  Litna penggejapen getem pusuh, gedap ras mombak si e kerina encidahken perbeben si mesangat, terpuruk, lit i bas titik nol. Amin bage gia, lit pengarapen Pemasmur maka Dibata sinampati ia. Pengarapen e jadi gegeh, peturah semangat ukur ergiah-giah. Nina: `engkai maka ndele ateku? Arah penugkunen e lit keyakinenna maka Tuhan nampati ia i bas kesusahenna. Tek ia maka Tuhan encidahken keleng ateNa si tetap, singklini ras nampati ia.

Pengkenaina
Perbeben e me bagin kegeluhen manusia, la lit jelma si la lit perbebenna, entah e pinakit, ekonomi, perbeben i bas pendahin, kurang siperiahen (relasi sikurang mehuli) i bas jabu, perbeben kerna anak-anak ras sidebanna. Perbeben e biasa, sipenting uga kita ngalaken perbeben e. Arus pentar ras erpengarapen man Dibata gelah sehat kula ras pertendinta (sehat mental). Aminna pe lit perbeben entah tekanen geluh la seh ku gangguan mental, umpamana merawa-rawa la erturi-turin, aru ate, lanai semangat ndalani nggeluh, stress berkepanjangan seh pe banci jadi depresi (sakit mental). Sekalak si sehat mentalna ngasup ia ngalaken perbeben geluhna, malem atena nggeluh, tenang, aminna latih ras mberat i bas dahinna tetap ermeriah ukur ndahikenca (produktif), ngasup ngataken bujur ras ngenanami nggeluh dem kemalemen ate; ngasup ngergai kalak sideban. Si jadi perenungennta:
1. Aminna mberat kecibal nggeluh tetap ertedeh ate man Tuhan, ersembah man bana. Kebutuhen pertendinta e me ersembah man bana. Lit kalak adi reh perbeben nggeluh ndauh ia ras Dibata. Ku gereja pe kisat, ertoto pe lanai ernanam nina.
2. Pemasmur i bas kesusahenna, iingetna paksa sienggo lepas uga riahna tupung ia maba perpulungen ersembah man Dibata. I bas ngalaken kiniseran lit terapi alu nginget-nginget kerina si mehuli si enggo terbentasi i bas geluh. Nginget pengalamen si mehuli mpeturah semangat si mbaru, mpeteneng perukuren ras ngkurangi kesusahen si genduari. Terapi e nambahi semangatta i bas ngalaken perbeben si genduari.
3. I babo si e kerina Dibata kap ingan pengarapenta i bas kerina kesusahen nggeluh. Nina Pemasmur "ku Dibata saja aku erpengarapen." Dibata labo pernah nadingken kita (Imanuel). Uga pe kecibalta keleng ateNa kita, ikelingiNa ras isampatiNa pe kita. Entah pertotonta langa siakap ijabab Dibata, ula ngadi erpengarapen man baNa. Em erbahanca teneng tendinta. Belinen kap Dibata asangken perbebenta.

Curhat Ras Mereken Semangat Geluh (Motivasi).
1. Ban kelompok curhat e me 2 kalak perkelompok. Bahan tekad maka teman curhat banci njaga rahasia ras er-empati man temanna curhat. Tetapken ise lebe ngerana/pegancih-gancih.
2. Sekalak nuriken perbebenna ras temanna curhat nampati guna mpeturah pengarapenna. Usih cara Pemasmur i bas ngalaken perbebenna. Curhat iujungi alu ertoto. Kenca si e bereken kesempaten 2-3 kalak ersaksi.

Pdt Sariyani br Barus