Meritaken Keleng Ate Tuhan Bahan PA Moria 29 Maret - 4 April 2026

Bahan Bimbingen PA Moria
20 Maret - 4 April 2026
HUT Saitun : Bahagia di Masa Tua

SI MAN OGEN : Masmur 92:1-16

Ende-enden pujin
1. Ende-enden tupung wari Sabat.
2. O TUHAN, seh riahna ngataken bujur man baNdu, janah rende muji Kam, o Dibata si Meganjangna;
3. meritaken keleng ateNdu erpagi-pagi, dingen pertetapNdu tupung berngi,
4. janah ngkuit gitar si sepuluh tinali, rikut ras gambus ras kulcapi.
5. Sabap perbahanenNdu kap si pegedang ukurku, erkiteken perbahanenNdu, aku rende alu meriah.
6. O TUHAN, seh kal belinna perbahanenNdu, andiko bagesna perukurenNdu.
7. Kalak bodoh la ngasup ngantusisa, kalak longor la ngasup ngerti,
8. ngkai maka kalak jahat turah mehumur desken dukut, kalak si ilat reh bayakna dingen sikap geluhna. Tapi nandangi meripuk me ia kerina,
9. sabap Kam, o TUHAN, erkuasa seh rasa lalap.
10. Ieteh kami maka kernep me kerina imbangNdu, kerina kalak jahat marpar-merap me.
11. IbahanNdu aku megegeh desken banteng, janah masu-masu aku alu simpar keriahen.
12. Enggo kuidah imbangku italuken, sora serko kalak jahat kubegi pinger.
13. Kalak bujur ertunas desken batang kurma, mehumur perturahna bagi batang cemara Libanon.
14. Bali ia ras kayu si isuan i Rumah TUHAN, dingen turah i bas Rumah Dibatanta.
15. Lalap ia meratah dingen paguh, aminna pe enggo metua, tetap erbuah.
16. Encidahkenca maka bujur kap TUHAN, IA kap pembelangku, la lit si la bujur i bas IA.

T E M A : Meritaken Keleng Ate Tuhan 

TUJUN : Gelah Moria:
• Ngasup ngidah keleng ate Dibata.
• Ngaturken waktu ndahi ntah nelepon Saitun. 

METODE PA : Sharing ras Aksi 

Kata Penaruh 
    Masmur ertina "puji-pujin" ntah "ende-enden si iendeken raduken ras alat musik." Mbelin kel ngaruhna musik e i bas ngelakoken kebaktin (bdk. 1 Kronika 15:16-22; Msm. 149:1-150:6). Sinuratken Masmur 92 enda labo itandai (kemungkinen Daud), tapi amin bage pe teridah maka penulis e me kalak si muji Tuhan erkiteken kiniulin perbahanenNa ras biakNa si mehuli si enggo igejapkenna.
    Masmur enda megati iendeken i bas ingan si badia asum wari Sabat. Wari e jadi peringet-ingeten si ilakoken erkawiten ras ulih Dibata nepa, bage pe kuga Dibata mpeken-kena bekas tinepaNa e. 

Mpebagesi Penganqkan kerna oqen 
    Ngendeken ende-enden pengataken bujur man Tuhan i bas wari Sabat e me paksa si mehuli kal, sabap i bas paksa si e iarapken la lit kesibuken sideban si ilakoken seakatan ngelakoken dahin-dahin pertendin sabap enggo ialoken kekelengen Tuhan sope Sabat. Ende-enden si bage mpekeke ukur lako muji Tuhan la terjeng wari Sabat tapi teptep warina seh ku berngina pe. Terdauhen ka, wari ku warina, rikut pe minggu ku mingguna, bulan ku bulanna, tahun ku tahunna, tetap muji Tuhan. Si e banci ilakoken pe alu ngkuit gitar si sepuluh tinali, rikut ras gambus ras kulcapi. Alat musik i je gunana ncidahken "sukacita spiritual" (keriahen pertendin) i bas pusuh si muji Tuhan.
    Tapi, ola min erkiteken lit alat musik maka meriah ukur. Keriahen si tuhu-tuhu, erkiteken ngggejap perbahanen Dibata si erkuasa segedang-gedang geluh. Reh dekahna nggeluh, reh tergejapna perbahanen ras kekelengen Tuhan. Enda me si man beritankenta.
    Janah, si e kerina mpeturah ketenengen ukur, gia melala denga kalak si jahat perbahanenna. Kalak si rende lako meritaken keleng ate Tuhan banci mperobahi kalak si jahat. Sabap Tuhan erkuasa nampati ras nginget si ngena ateNa arah ende-enden e. Di kune lit si la robah enggo pe ipersingeti arah ende-enden e, perbahanen Tuhan engkernepken kerina imbangNa, kerina kalak jahat merap-marpar me.

Pengkenaina
    Umurta terus ertambah erkiteken keleng ate Tuhan. I bas tambahna umur e iarapken maka Moria GBKP make kesempaten lako muji ras mpermuliaken Tuhan. Rikutken keputusen gerejanta maka usia Saitun e me 60 tahun ku datas. E maka, perlu ikira piga tahun nari moria bengket ku Saitun. I bas erkira e sikapken pe diri tetap erberita kerna perbahanen kekelengen Tuhan, kususna arah perdalanen kegeluhen si enggo ibentasi.
    Hari Ulang tahun Saitun siperingeti i bas tanggal 27 April 2026, janah enggo genep 11 tahun umur SAITUN GBKP. Tambahlah kengasupen Moria ngidah keleng ate Dibata arah ertambahna umur Saitun bage pe arah erbage-bage keadaan kegeluhen si enggo idalani. Gia pe enggo iputusken Moria GBKP tahun 2025 maka umur maksimal jadi Pengurus Moria e me 55 tahun, la ateta morah sebab arah si e sigejapken maka Tuhan ngataken man Moria, "Moria".. Pakekenlah kesempatenndu guna bengket ku Saitun GBKP." Lakokenlah aksi PA Moria alu dem keleng ate dingen pengataken bujur man Tuhan. 

Sharing ras aksi
Sharing
Marilah si endeken telu (3) kali KEE GBKP No. 59:1,
Keleng ateNdu tangkas bangku, si kupujiken lalap min.
Kam Tuhan Jesus me Rajangku, si erkeleng man bangku kin. Madin keleng ateNdu kuinget asang k'rajangku me tersinget. 

Kenca dung si endeken, rnari si sharingken :
1. Ngasup nge Moria mujiken Tuhan bas kerina keadaan geluhna?
2. Turiken sada pengalamen geluhndu maka pentingen akapndu keleng ate Tuhan asangken sikerajangenndu si tersinget. Kai ulihna man bandu? 

Aksi:
Teptep Moria si reh PA mpepayo anggota Moria si enggo Saitun i bas sektor ntah pe runggun si la hadir PA wari enda, e maka telepon ntah pe dahilah kari temanndu e guna meritaken keleng ate Tuhan.
1. Adi iteleponndu sendah, pakeken waktu 30 detik lako nelpon janah kataken: "Selamat Ulang Tahun Saitun, teruslah meritaken keleng ate Tuhan" Adi idahindu, pagi ntah kedun, kataken, "Selamat Ulang Tahun Saitun, teruslah meritaken keleng ate Tuhan"
2. Ogeken pantun man saitun upload ku media sosial, tag Saitun si lit i bas sektor ras runggunndu. 

Pdt. Agustinus Ginting Manik 

Senuan bulah i Kacaribu
Melala kembiri i Kuta buluh
Enggo metua payo nge tuhu
I bas Dibata tetap nge paguh 

    Melala bulungna si batang saitun
    Suahna meramis melala gunana
    Sepuluhsada tahun umur kategorial Saitun
    Kesempaten emas guna erberita 

SELAMAT ULANG TAHUN SAITUN GBKP

TETAPLAH ERBERITA !!! 

Share this post