Pemeteh Si Kuh Dingen Serta

Bahan Bimbingen PJJ
Tanggal 7 - 11 Oktober 2026
(Mengenal Tuhan Membuat Mampu Mengenal Diri "Fokus 2027 Mengenal Diri")

TEMA : PEMETEH SI KUH DINGEN SERTA

OGEN : 1 Korinti 13: 11-12

11. Asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e.
12. Kai siidah kita genduari enda bali ras awih si meremang-remang i bas cermin tembaga; tapi pagin kerina siidah alu petala-tala. Pemeteh si lit i bas aku genduari langa dem; tapi pagin pemetehku e jadi kuh dingen serta me, bali ras pemeteh Dibata kerna aku kuh dingen serta kap.

MODEL PJJ : Kesaksin

KATA PERLEBE
Uga nge penandaita nandangi dirita? Penungkunen enda banci jadi menukah, adi terjeng gelar, merga/beru, ingan tubuh, ntah ingan tadingta saja. Tapi banci jadi mesera bicara ikawitken ras kepribadin, kiniteken, jati diri, perukuren, penggejapen, ntah pe sura-surata, sabab kerina e la teridah tapi jadi bagin penting i bas kegeluhenta. Penandai kerna diri enda mbelin kal ngaruhna nandangi cara nggeluhta. I bas sisi si deban, penandai nandangi diri pe erkawiten kel ras penandai nandangi Dibata. E maka perlu kel pemeteh guna si e, amin gia pemetehta la kuh. Proses nggeluh, ibenaken kitik-kitik nari seh ku dewasa, mabai pemetehta ertambah-tambah amin gia la kuh. Kondisi pemeteh si la kuh enda, iantusi Paulus, sekalak rasul si enggo ngikutken Jesus i bas kegeluhenna, sebage tanda pengarapen nandangi pemeteh si kuh idur Dibata nari.

ISI
   Surat Paulus man perpulungen i Korinti, bindu 13 ngerana kerna keleng ate. Tangkas kel penuriken Paulus kerna keleng ate. Rikutken pengukuri Paulus, erbage biak kalak si erkeleng ate teridah i bas perbahanenna, buena lit 15 poin (megenggeng, mehuli, la percian, la meganjang ukur, la sombong, labo mekarus, la ncariken untung man bana saja, la pergelut, la ngkira kesalahen kalak, la meriah ukurna adi kalak erbahan jahat, ikut ermeriah ukur i bas si benar, ngasup ngengken kai-kai pe, tek maka lit si mehuli i bas kerinana, tetap erpengarapen, dingen saber i bas kai pe (ay. 4-7). Kerina biak enda nuduhken maka keleng ate labo terjeng penggejapen ntah perasan, tapi perbahan si tuhu-tuhu (reel), si idalanken tep-tep wari. Jenari itegasken Paulus maka keleng ate e la erkeri-kerin. Keleng ate si rehna i bas Dibata nari me jadi palas kegeluhen perpulungen, si ngajari guna ndalanken sura-sura Dibata.
   Tulisen Paulus enda ngerana kerna apokaliptik (Junani: apokalyptein si ertina "penyingkapan" ntah pe "pewahyuan" si terkait ku bas ujung jaman ntah masa depan). Pemeteh ras nubuatenta labo dem, tapi kenca reh pagi si kuh dingen serta, bene me si la kuh dingen la serta. Lalit jelma si ngasup ngantusi kerina pemeteh dingen nubuaten. Tupung kita nggeluh denga, erbage kata Dibata dingen tanda-tanda jaman banci sialoken, tapi labo kuh pemetehta. E maka labo lit dalan guna peganjangken ukur, tep-tep kalak arus meteruk ukur i lebe-lebe Dibata bage pe temanna manusia. Dahin si ibereken Dibata eme nuduhken keleng ate man ise pe i teruh penampat Kesah Si Badia. Sabab keleng ate me si la lit batasna (segala sesuatu terbatas, kecuali kasih).
   Secara khusus, i bas ay. 11, Paulus ngerana kerna waktu, nina: "asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e." .P.aulus nuriken proses transformasi nggeluh, benaken i bas anak-anak nari seh ku - dewasa. Telu kategori si ipilih Paulus eme pengerana, perukuren, ras pengertin. Kerina kategori e banci nuduhken tingkat kematangen spiritualitas sekalak jelma. I bas masa kuno, anak-anak umumna diabaikan, ipandang sebelah mata, labo iakui sebagai pribadi si erpemeteh. Adi anak-anak, megati orientasi ntah fokusna cenderung guna diri sendiri, e maka icidahken Paulus kerna kecibal anak-anak, kerinana bali ras anak-anak. Jenari pertumbuhen e iumputi jadi sekalak si dewasa, si nadingken kerina biak anak-anak. Ertina lit sada pertumbuhen si terus berproses ras berlanjut. Analogi si ipake Paulus enda cukup menarik, anak-anak nari seh ku dewasa, guna mengilustrasiken natur (pembawaan, watak, sifat ntah pe biak) manusia si terbatas i bas pemahamen bage pe pertumbuhen spiritual. Asum anak-anak denga aku, pengeranangku, perukurenku, ras pengertinku bali ras anak-anak. Ertina pemeteh kerna Dibata enggo nge lit paksa anak-ana k nari, amin gia meremang-remang (samar-samar) denga. Tapi kenca dewasa, ertambah-tambah pemeteh dingen reh ngasupna nggeluh i bas pengertin si payo sentudu ras u ra-sura Dibata. Analogi enda ipake Paulus gelah perpulungen sura-sura bana i lebe-lebe Dibata.
   Terkait ku bas penandai nandangi diri enda, Pamela Cooper White, sekalak pendeta dingen profesor teologi pastoral ras konseling, nuriken kerna piga-piga poin penting si erkawiten ras karakteristik penciptaan manusia. Sipemena, manusia eme bagin tinepa Dibata, e maka mehuli kel keberadaan manusia. I bas kitab Kejadin, ungkapen "sangat baik" ras "sungguh sangat baik" (Karo: meriah kal ukur Dibata), lit i bas kerina tinepa Dibata, termasuk manusia. Alu bage, "kebaikan" ntah "kiniulin" eme palas kegeluhen kerina tinepa. Afirmasi "kebaikan" e labo i bas manusia nari tapi idur Dibata. Enda me si jadi original blessing (pasu-pasu si pemena) si ialoken manusia guna nandai dirina i lebe-lebe Dibata. Sipeduaken, manusia eme makhluk si terbatas (rapuh) sabab ijadiken i bas abu taneh nari (Kej. 2:7; 3:19). Manusia ijadiken i bas taneh nari, janah jadi taneh ka mulihi. Keterbatasan enda iakui, ialoken, dingen igejapken sebage kondisi tinepa guna tetap erpengendes man Dibata. Sipeteluken, manusia terdiri dari erbage unsur si njadiken ia unik. Unik i bas pengertin berbeda dari yang lainnya (like no other), lalit si seri secara tampilen fisik; tapi i bas pengertin tertentu seri, misalna merga, suku, ntah negara (like some others - kalak Karo, kalak Indonesia, rstna), bage pe seri secara universal ras kerina manusia si deban (like all others). Ertina, i bas kategori fisik ntah tampilen, lalit manusia si seri; tapi i bas kategori si deban (suku, merga, asal kuta, kebangsaan, rsdna), banci jadi seri; janah i bas kategori universal eme tinepa Dibata, kerina manusia seri. Sipeempatken, keberadaan manusia ersifat rasional, terhubung ras kerina tinepa, bage pe Dibata. Manusia labo banci nggeluh adi ernalem man gegeh, pemeteh, dingen kengasupenna saja. Manusia perlu tinepa Dibata si deban guna banci tetap nggeluh. Janah manusia perlu Dibata si jadi ulu kegeluhen.

PENGKENAINA
Kegeluhen enda enggo iaturken Dibata alu mehuli. Benaken kitik-kitik nari seh ku dewasa, kerina e jadi sada proses si la peltep. Reh belinna sekalak jelma, reh tambahna pemeteh dingen pengertin guna ngantusi kegeluhen. Janah reh mbagesna pe pengukuri ras penandaita nandangi diri i lebe-lebe Dibata. Alu bage, katawari paksa pe tetap erpengendes man Dibata, sabab Ia nge si nandangi kita secara kuh, janah pemeteh si kuh dingen serta pe reh idur Dibata nari. Tetaplah erpengarepen man baNa sabab itandaiNa nge kita tinepaNa.

DISKUSI:
1. Kenca si pepayo bimbingen dingen teks PJJ wari enda, 1. Kenca si pepayo bimbingen dingen teks PJJ wari enda, penandaita nandangi dirinta i bas Dibata?
2. Turiken perubahan-perubahen pengangkan si lit i bas dirindu rikutken pertumbuhen diri (danak-danak nari ku dewasa)!

USULEN ENDE-ENDEN:
1.KEE No. 217:1-2 ( KLIK JUDUL LAGU UNTUK MELIHAT LIRIK ATAU TEKS )
2.KEE No. 185:1-2 ( KLIK JUDUL LAGU UNTUK MELIHAT LIRIK ATAU TEKS )
3.KEE No. 423:1-2 ( KLIK JUDUL LAGU UNTUK MELIHAT LIRIK ATAU TEKS )
4.KEE No. 343:1- ( KLIK JUDUL LAGU UNTUK MELIHAT LIRIK ATAU TEKS )

DAFTAR BACAAN :
1. Andar Ismail, "Selamat Mengaku: 33 Renungan tentang Identitas", 2018, Jakarta: BPK Gunung Mulia.
2. Pamela Cooper-White, Many Voices: Pastoral Psychotherapy in Relation and Theological Perspective, 2011. Minneapolis: Fortress Press Book.

Pdt. Joice Ria Sitepu, M.Th

HP/WA: 081385807335