Sikeleng-kelengen Dingen Mesayang

Bahan Bimbingen PA Moria
28 Juni - 04 Juli 2026
PA HARGANAS Wujud Mengasihi Allah Terlihat Dalam Keluarga

SI MAN OGEN : 1 Petrus 3:8-16

Ngenanami kiniseran erkiteken perbahanen si mehuli
8. Dage kedungenna ersada min ukurndu ras ersada min penggejapenndu. Sikeleng-kelengen min kam bagi ersenina, dingen mesayang janah meteruk min ukurndu sekalak nandangi si debanna.
9. Ola balas perbahanen si jahat alu si jahat, ntah sumpah alu sumpah. Tapi balaslah alu pasu-pasu, sabap pasu-pasu me si ipadanken Dibata iberekenNa man bandu, asum kam idiloNa. 10Bagi lit tersurat i bas Pustaka Si Badia, “Kalak si mesikel nggeluh cawir metua dingen senang, la banci melasken si jahat, bage pe la banci erbual.
11. Arus jera ia i bas perbahanen-perbahanen si jahat nari, jenari ibahannalah si mehuli; arus idaramina tuhu-tuhu perdamen alu bulat ukur.
12. Sabap Tuhan tetap natap kempak kalak bujur, janah tetap ibegikenNa pertotonna; tapi ilawanNa kalak si ndalanken perbahanen si jahat.”
13. Ise kin nuhsahi kam adi ergiah-giah ukurndu ndalanken si mehuli?
14. Tapi aminna pe arus kam ngenanami kiniseran erkiteken kam ndalanken si mehuli, malem me atendu! Ola kam mbiar nandangi ancamen kalak janah ola aru atendu.
15. Tapi mehamatlah kam man Kristus i bas pusuhndu, janah pehagalah IA selaku Tuhan. Ersikaplah katawari pe guna njabap kalak si mindo gelah iterangkenndu pengarapen si lit i bas kam.
16. Tapi bahanlah e alu lemah lembut dingen mehamat. Jagalah maka pusuh peratenndu tetap bersih. Alu bage adi ihina kalak kam, kalak si ncekuraki lagu langkahndu si mehuli selaku kam pengikut Kristus, jadi mela iakapna erkiteken kai si ikatakenna.

T E M A : Sikelengen-kelengen Dingen Mesayang

TUJUN : Gelah Moria:
• Ngangkai tanda-tanda nggeluh ersada ras Kristus.
• Mujiken perbahanen si mehuli anggota jabu teptep wari.

METODE PA : Diskusi dan Aksi

Kata Penaruh
Surat Petrus si pemena ialamatken man kalak Kristen si merap (diaspora) i daerah Asia Kitik. Surat enda ngajuk kerina perpulungen gelah nggeluh alu ngusih Kristus, nggeluh alu mehuli, dingen paguh i bas ngalaken kiniseran si reh erkiteken kiniteken man Tuhan Jesus. Kiniseran labo banci naluken ia, erkiteken Kristus si enggo ngenanami kiniseran dingen mate i kayu persilang nebusi dosa manusia, janah enggo ipekeke Dibata pe i bas si mate nari. E maka kalak Kristen pe tetaplah erpengarapen dingen nggeluh i bas kegeluhen si mbaru. Bahan PA nta enda ngajuk kalak si tek man Kristus tetap njaga diri badia selaku bangsa pilihen Tuhan.

Mpebagesi Pengangkan Kerna Ogen
Perpulungen si Badia e me persadan jabu kalak si tek. Hubungen sada jabu ku jabu sidebanna tetap min Badia. Piga-piga pertenget si ipetangkas Petrus si erkawiten ras hubungen e, e me:
1. Ersada min ukurndu ras ersada min penggejapenndu. Sikeleng-kelengen min kam bagi ersenina, dingen mesayang janah meteruk min ukurndu sekalak nandangi si debanna. Petrus nuriken maka hubungen si mehuli, termasuk i bas ndehara ras perbulangen arus erpalasken kekelengen si teridah arah :
- Ersada ukur ertina seri isi pikirenna si rehna i bas Dibata nari erpalasken kataNa. Labo terjeng ersada arih muat keputusen, tapi ersada arih guna ngaloken kebenaren Dibata. Ersada arih labo ngatakensa maka la lit perbedan pendapat sada ras sidebanna, tapi i bas kinierbagen pendapat enda, tetap sada prinsip guna si mehuli si ngena ate Dibata.
- Ersada penggejapen ertina la mpebelin keakunta (keegoisen) nggit nggejapken kai sinanami kalak sideban. Erceda ate ras kalak si kemalangen, dingen ermeriah ukur ras temanta si sangana nggejapken keriahen ukur. Sepenggejapen enda rehna i bas perukuren si ikuasai Kristus
- Sikeleng-kelengen bagi ersenina, la erkira-kiran, la ngarapken semulih, nggit korban waktu, tenaga, materi. Palas nehken keleng ate e erkiteken Kristus enggo leben erkorban guna anak-anakNa.
- Mesayang erkiteken perkuah ate Dibata si mbelin i ja iberekenNa anakNa Jesus Kristus tersalib guna nebusi dosa doni enda. Perkuah ate e me erbahansa kalak Kristen mesayang nandangi sidebanna. Mesayang e sabar nandangi teman si la bagi ukur.
- Meteruk ukur, enda sada pengajaren si mbelin si icidahken Jesus arah kegeluhenna, dingen si enda jadi usihen man perpulungen. Kalak si meganjang ukur ipeteruk Dibata kap, tapi kalak si meteruk ukur ikelengina.

2. Ula balas perbahanen si jahat alu si jahat, ntah sumpah alu sumpah. Tapi balaslah alu pasu-pasu, sabap pasu-pasu me si ipadanken Dibata IberekenNa man bandu, asum kam idiloNa. I bas paksa si e, perpulungen melala ngenanami kiniseran si rehna i bas kalak si deban nari. Enda salah sada kinata si arus ialaken perpulungen, tapi arus ia erlajar arah Jesus ras pengajarenNa. Perpulungen arus ngalaken kalak si erbahan kiniseran man bana alu cara si benar, si erpalasken kata Dibata e me: la erbalas nandangi kalak si erbahan jahat alu si jahat, ntah sumpah alu sumpah, tapi pasu-pasu. Kalak si la erbalas, isehken Dibata me pasu-pasu bagi si enggo ipadankenNa man anak-anakNa.

3. I bas ngelumbaken kiniteken, amin ngenanami kiniseran, ermalem atelah i bas Dibata. Tetap tek dingen njaga diri sentudu bagi peraten Dibata, dingen mehamat man Kristus, la mbiar nandangi ancamen-ancamen kalak janah la er-aru ate. Jagalah maka pusuh peratenndu tetap bersih. Alu bage adi kalak ihina kalak kam, kalak si ncekuraki lagu langkahndu si mehuli selaku kam pengikut Kristus, jadi mela iakapna erkiteken kai si ikatakenna. Enda me kerina biak-biak ras perbahanen si arus teridah i bas kalak si nggeluh ersada ras Kristus.

Pengkenaina
Biak sikeleng-kelengen dingen mesayang arus lit i bas kegeluhen jabunta gelah reh sikapna hubungen sada ras sidebanna i bas jabu. Lanai kita erlumba ndarami kesalahen ntah sipandangpunjuten, lanai erbalas nandangi kejahaten tapi pasu-pasu. Bage me si ngena ate Dibata guna sidalanken i bas jabunta. Radu silegin ukur alu make biak-biak nggeluh si ersada ras Kristus, tentu reh sikapna jabunta dingen reh paguhna kekelengenta i bas jabunta sekalak-sekalak. Erlumba-lumbalah nehken pujin ras siajar-ajaren. Bagi kuan-kuan kalak karo: "si kuning-kuningen radu megersing, si ageng-agengen radu mbiring."

Diskusi Ras Aksi
1. Biak-biak kai saja si arus lit i bas kalak si nggeluh ersada ras Kristus? Biak-biak siapai ngenda si enggo sikap si dalanken, janah biak si apai ka si mesera kel siakap ndalankenca? Turikenlah!
2. Siapai ngenda rusur si dalanken i bas jabunta: ndarami kesalahen (sikap negatif) anggota jabunta, ntah rusaha kita ndarami si mehuli (sikap positit) i bas ia?
3. Pengurus nikapken kertas origami. Peserta ibagi i bas sada kelompok (banci pe jabu, ntah piga-piga kalak). Kertas origami ibagiken nandangi kerina peserta si hadir. E maka i bas kertas origami enda, situlisken kalimat-kalimat pujin nandangi isi jabunta (ndehara, anak, perbulangen, orang tua). Kenca si e, itutup alu pertoton i bas kelompok masing-masing alu mpepulung topik doa.

Pdt Linawati Br Ginting