Make Manusia Si Mbaru

BAHAN BIMBINGEN PA MORIA
Tanggal 27 September - 3 Oktober 2026
Menghargai Diri

SI MAN OGEN : 1 Korinti 6:17-20
17. Tapi kalak si mpersadaken dirina ras Tuhan, enggo ia jadi sada ras Tuhan secara pertendin.
18. E maka silahkenlah perbahanen erlagu la mehuli. Banci ka pe nina kalak, “Kasa kai dosa si ilakoken kalak labo empengaruhi kulana.” Tapi e labo payo, sabap kalak si erlua-lua erdosa ia nandangi kulana.
19. La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna.
20. Sabap kam enggo itukur Dibata meherga kal. Dage muliakenlah Dibata arah kulandu.

T E M A : Make Manusia Si Mbaru

T U J U N : Gelah Moria:
• Meteh maka kula e me Rumah Pertoton Kesah Si Badia.
• Mendaftarken kai saja kekurangen ras kelebihen diri (berdamai dengan diri sendiri).

METODE PA : Menginventarisir

Kata Penaruh
Surat 1 Korinti enda isuratken Paulus erkiteken mbue pers si man alanken kalak Kristen hususna persoalen kegeluhen ras kiniteken. Korinti paksa si e kota si cukup maju si iingani erbage-bage bangsa i bas erbage percampuren karakter, pendahin, agama. Janah paksa si ndai kuta Korinti enda e me sada kuta si terkenal erkiteken perbinaganna, budayana, termasuk pe lagu langkahna si lanai mehuli. E maka situasi enda mabai mbue perpulungen si enggo lanai ngasup njagai dirina seh salah i bas pengertin sura-sura Dibata kerna kulana, deba enggo ndabuh ku bas dosa. Terdauhen i bas perpulungen pe enggo jadi perpecahen erkiteken pengangkan si la payo kerna aturen-aturen perpulungen, lagu langkah perjabun, kekeken i bas si mate nari, ras sidebanna. Bahan PA enda bagin persoalen i bas makeken kula, sabap lit pengangkan si ngatakenca selaku manusia bebas ia ngelakoken kai pe, termasuk kempak kulana.

Mpebagesi Pengangkan Kerna Ogen
1 Korinti 6:17-24 e me bagin si ngingetken gelah make kula guna muji Dibata. Tentu si idah situasi lagu langkah perpulungen si ibegi Paulus maka i tengah-tengah perpulungen lit kalak si erlua-lua, janah sinilakokenna e la mahan ceda atena tapi ipeganjangna ka ukurna (1 Kor. 5). Situasi enda nuduhken maka pengangkan kebebasen makeken kulana si lit i bas perpulungen enggo lepak. Sabap man perpulungen kulana e ate-atena guna mpergunakenca. Kula e me ring-ring Kristus e maka labo banci ipake erlagu la mehuli tapi guna Tuhan (ayat 13). Pengangkan si payo desken si ituriken Paulus :
- Si mpersadaken dirina ras Tuhan enggo sada secara pertendin (ayat 17).
Kalak si enggo ipersadaken ras Tuhan arah Peridin Si Badia teridah i bas kegeluhenna. Perpulungen Tuhan enggo bebas bas dosa. Kebebasen enda meherga erkiteken mabai persadan ras Kristus si mereken diriNa, e maka perpulungen arus njaga kulana segelah lanai ipakekenna guna lagu langkah si la payo. Em ngiket persadan e seh ku pertendin pe. E maka la terjeng kula, tapi seh ku pertendin perpulungen ersada ras Tuhan.
- Silahkenlah perbahanen erlagu la mehuli (ayat 18).
Paulus ngajuk perpulungen guna ngkuasai diri selaku kalak Kristen. Paulus ngidah tantangen perpulungen i bas mpertahanken kiniteken e me kerna pangan ras pergaulen bebas. Perpulungen Korinti erpengangka maka ia bebas man pangan si ipersembahken man berhala, rikut pe persoalen si peduaken kerna pergaulen bebas si la mehuli i bas perjabun.
- Kulandu e me Rumah Pertoton Kesah Si Badia (ayat 19).
Kula si enggo ersada ras Tuhan, Ia punana. Janah kula e jadi ingan Dibata ringan. E maka biakna ingan Dibata e me badia, jadi kulanta pe arus badia.
- Muliakenlah Dibata arah kulandu (ayat 20).
Penebusen i kayu persilang labo alu barang si masap secara doni tapi alu dareh ras kesah si biakna tahan rasa lalap. E maka meherga kal, seh ise pe la ngasup seakatan Dibata nebusi manusia. E maka perpulungen arus mpermuliaken Tuhan arah kulana i bas teptep kesempaten si lit i doni enda.

Pengkenaina
Kegeluhen i bas Korinti enda relevan ras kegeluhen jaman genduari enda. Nina Prof Rhenald Kasali fenomena genduari nuduhken uga manusia makeken kulana, salah sadana kutipen adi gelgel 1 orang tua lit anakna 3,4, ras seterusna. Tapi genduari 1 anak banct 3 entah 4 orang tuana. Si enda jadi erkiteken la meherga akapna perjabun.
Moria GBKP nggit min njaga ras makeken kulana alu badia. Tentu lanai persoalen igung harus mancung, kulit arus mberntar, bersih, buk arus lurus mbiring bagi iklan tv, tapi uga litna diri Moria. Moria banci njaga babahna alu melasken ranan si payo, la perbual. Makeken tanta guna ertoto man Tuhan, guna erdahin ncariken ulih pendahin alu jujur. Makeken nahenta guna ndahi rumah pertoton Tuhan, guna ndahi dahin gereja, labo ndahi ingan prostitusi.

Menginventarisir Cara Meningkatkan Kelebihen Diri
1. Cuba arihken i bas kelompok kitik (3-4 kalak) kai saja kelebihen diri teptep Moria. Je nari cakapken kuga carana meningkatken kelebihen diri i bas teptep Moria si pulung.
2. Teptep Moria njemak barana, jenari kerina ertekad alu melasken "Bujur Kula-ngku, kuergai ras ku kelengi kam asa ngasupku, sehat-sehat ya."

Pdt. Dian Sari br Girsang

Minggu enda sipepulung kolekte ekstra gunai LAI