Dibata Ras Kita Bahan PA Moria 3-9 Mei 2026

Bahan Bimbingen PA Moria
Tanggal 3-9 Mei 2026
Dibata Ras Kita
IMANUEL

SI MAN OGEN : Matius 1:18-25
Ketubuhen Jesus Kristus
(Luk 2:1-7)
18. Kerna ketubuhen Jesus Kristus, bagenda me: Maria nande Jesus ertunangen ras Jusup. Tapi ope denga erjabu Maria enggo mehuli kulana arah Kuasa Kesah Si Badia.
19. Jusup tunangen Maria e kalak bujur. Labo lit sura-surana ngaduken Maria gelah ola mela iakap Maria. Saja ngenca ersura-sura ia nirangken Maria alu sinik-sinik.
20. Tapi asum ia rukur-rukur kerna si e, teridah man bana malekat Dibata arah nipina. Nina malekat e man bana, “O Jusup, kesusuren Daud, ola kam mbiar muat Maria jadi ndeharandu. Sabap anak si lit i bas bertinna e jadi erkiteken kuasa Kesah Dibata.
21. Ipupusna pagi sekalak anak dilaki janah arus ibahanndu gelarna Jesus – sabap IA me pagi si nebusi bangsaNa i bas dosa-dosa nari.”
22. Kerina si enda jadi gelah seh kai si ikataken Tuhan arah nabi nina,
23. ‘Singuda-nguda e pagi mehuli kulana, jenari ipupusna sekalak anak dilaki. Anak e pagi igelari Immanuel’ (ertina: “Dibata ras kita”).
24. E maka kenca keke Jusup, ikutkenna kata malekat Tuhan e. Ialokenna Maria jadi ndeharana.
25. Tapi Jusup ras Maria langa erjabu, ipupusna anak dilaki. Kenca tubuh anak e ibahanna gelarna Jesus.

T E M A : Dibata Ras Kita

T U J U N : Gelah Moria:
• Meteh biak siman tadingenken selaku tinepa simbaru.
• Tetap nggeluh ras Dibata alu erbahan paksa teneng teptep wari

Metode PA : Yel-Yel

Kata Penaruh
Turi-turin kerna Maria ras Jusup i bas Matius 1:18-25 nuduhken maka la sitik perbeben si man alanken manusia. Ketubuhen Jesus pe lit i bas erbage dampar perbeben, kearun ras kesuliten. Maria mehuli kulana arah pendahin Kesah Si Badia (si la teraloken secara akal sehat), i bas dampar sideban Jusup erbebe i bas kepatuhen ndalanken undang-undang ras kekelengen. Tapi Dibata hadir selaku Imanuel, Dibata ras kita (ia). Arah kepatuhen Maria ras Jusuf, Jesus tubuh. Bage me Dibata ncidahken dingen mpetandaken diriNa ku doni enda gelah kalak sierkiniteken nandai Dibata i bas kegeluhen doni enda.

Mpebagesi Pengangkan Kerna Ogen
Guna nambahi pengangkan ras penandaita kerna Dibata si erkuasa i bas doni enda lit piga-piga gelar si ipetandaken rikut paksaNa.
Arah bahan PA enda ituriken kerna gelar enda.
1. Si la terukuri manusia banci i bas IA (ayat 18)
Maria mehuli kulana arah Kesah Si Badia. "ek pneumatos hagiou" Kata ek nuriken sumber, asal. Jadi, Jesus tuhu-tuhu karya Kesah Si Badia. Pilihen enda tuhu-tuhu mbelin ulihnna seh pe iakap keliamen. Amin bage gia Maria tetap patuh nandangi pilihen ras pendilo Dibata. Kiniteken Maria icidahkenna arah pang ngalaken situasi si la pernah terukurkenna.
2. KehadirenNa mehuli dingen bujur
Jusup tunangen Maria e kalak bujur (Bahasa Yunani "dikaios" ertina benar, adil, nggeluh sue ras undang-undang Dibata). Labo terjeng mehuli saja, tapi njadiken Dibata pusat geluhna. E maka labo lit sura-surana ngaduken Maria gelah ola mela iakapna. Jusup la nggit njadiken Maria jadi usihen si la uli janah enda naksiken maka kekelengen si ersada ras kebenaren.
3. KehadirenNa mere ketetapen ukur.
Ayat 20-21: Malekat mereken ketetapen ukur man Jusup. Guna tetap paguh i bas kebujuren. Nina Malekat man Jusup "ola kam mbiar ( sekali pe ola mbiar) muat Maria jadi ndeharandu."
4. Dibata mpetandaken diriNa alu erbage cara.
Ayat 22-23: Jesus me penggenapen janji Dibata, igelari Imanuel. "Emmanoel"="Dibata ras kita." Guna mpetetap ukur Maria ras Jusup ngalaken kerina si jadi pagi man bana. Enda me penggenapen janji Dibata, kai si la terukuri manusia, nyata i bas Ia. Kuasa doni megati erbahan labuh. Tapi, Jesus lit i doni enda ras manusia si mpeturah semangat.
5. Ayat 24-25: kenca Jusup ngaloken kata malekat e, keke me Yusuf. Keke i jenda labo ngatakenca terjeng tedis ntah pe medak i bas medemna nari. Tapi keke ertina "egertheis" bangun, berdiri, paguh i bas kiniteken. Kepatuhen Yusup bukti "kebangkiten rohanina."

Pengkenaina
Arah kerehen Jesus, nubuat igenepi — Imanuel : Dibata ras kita. Kerehen Jesus ncidahken maka Dibata e la ndauh, Ia reh i bas kegeluhenta, mere pengalemi dosa ras pengarapen. Tek ras patuh jadi asamta guna ndalani kegeluhen si mbaba kedamen ras kemalemen ate.
Jadi refleksi man banta Moria
1. I bas ngalaken persoalen si la pernah terukuri, Moria arus paguh sabap Jesus lit i tengah-tengahta si nampati ras si mereken serpang pulah.
2. Sigejaplah maka rencana Tuhan si mehulina nge man banta.
3. Moria perlu tetap bujur, patuh i bas ndalanken persuruhen Tuhan.
4. Amin lit perbeben si man alanken ola mbiar. Arah pertoton, mari sirembakken diri ku Tuhan si katawari paksa pe Ia nemani kita.

Erban Yel-Yel : Tetap Ngikut Jesus

1. Bagi kelompok sue ras beru si 5 (isesuaiken).
2. Arah 4 poin refleksi enda mari si ban Yel-yel janah ola lupa belasken beru kai kelompokndu maka teridah beru si 5 tetap paguh alu nggejabken penemani Dibata i bas kegeluhenna.

Yel-yel di upload ke medsos ras ola lupa tag BPP Moria GBKP

Pdt. Inri Ohistauni Br Ginting

Ingin sukses tapi tetap awet muda kan? Indah 6 resep awet muda dari TUHAN:
1. Supaya pipi lesung : Tebarkan selalu senyuman tufus kepada setiap orang yang Anda temui
2. Supaya mata cantik menawan : Lihatlah kebaikan-kedaikan orang lain dan lihatlah selalu yang positif
3. Supaya bibir tampak menarik: Ucapkan selalu perkataan yang baik, membangun dan positif
4. Supaya tubuh langsing ideal : Makanlah secukupnya, jangan berlebih dan berbagilah dengan niereka yg berkekurangan
5. Supaya wajah bersih bercahaya : Basuhlah selalu dengan Ucapan Syukur kepada Tuhan
6. Supaya Jemari Lentik Menawan : Hitunnglah selalu berkat-berkatNya, maka hidupmu akan berkecukupan dan berkelimpahan.