Agiku Meherga Kuakap Bahan Bimbingen PA Permata 5-11 April 2026

Bahan Bimbingen PA Permata
Tanggal 5-11 April 2026
JAM ERTOTO RAS AKSI
(HUT KAKR rikut ras Sehna Berita Simeriah ku Kalak Karo (18 April 1890:136 tahun)

Nas : Matius 18:10

Ingatlah, jangan menganggap rendah seorang dari anak-anak kecil ini. Karena Aku berkata kepadamu: Ada malaikat mereka di sorga yang selalu memandang wajah Bapa-Ku yang di sorga.

Tema : Agiku Meherga Kuakap

GELAH PERMATA GBKP
1. Meteh dingen nggejabken maka agina meherga dingen arus ijagana
2. Jadi kaka si mehuli nandangi agi-agina (KAKR)

Metode: Jam Ertoto ras Aksi Perayaan HUT KAKR

I. PENJELASEN RAS PERSIKAPEN KEBAKTIN
1. Perlu kel persikapen ope benaken Jam Ertoto. Sikapken Pustaka Sibadia, Buku Bimbingen PA PERMATA GBKP, kantong persembahen. Simabai doa persembahen ras Doa Syafaat nggo iaturken.
2. Pelayan si mabai Jam Ertoto arus ngkuasai alur liturgi, kalimat-kalimat iogeken arus mperdiateken intonasi bagepe titik koma.
3. Lagu-lagu si iendeken ipelajari alu mehuli guna mengiringi Jam Ertoto, upayaken lit pemusik, adi la lit banci isikapken musik instrumen ibas Youtube sue ras judul.
4, Isikapken ingan Jam Ertoto si teneng, bersih, nyaman janah kerina kundul alu posisi ertoto.
5. Isikapken lilin berbentuk salib i tengah-tengah PERMATA GBKP si kundul melingkar.

II. KEBAKTIAN
P : Mejuah-juah, salam ibas keleng ate Tuhanta Jesus Kristus. Wari enda banci kita pulung ibas ingan enda guna ersembah ras muji mpermuliaken Dibata. Mari si bereken pusuh ras ukurta ibas kebaktin enda.

RENDE KEE GBKP No.479 (3x)
P: Tep-tep kalak si reh ndahi Tuhan, meriah ukurna. Sebab Tuhan e ulu keriahenta. Erbage kecibal geluhta, si megati erbahanca kote ras labuh tendinta Tedeh ateta jumpa ras Dibata. Mari si penangkih penembahenta man baNa, Sikataken man Tuhan: "O Dibata Kam kap Dibatangku, kudahi tedeh ateku Kam".

Rende: KEE GBKP No.388:1.

P : Keleng ate Tuhan mbelin kel man banta. Arusna min katawari paksa pe kita muji Tuhan, tapi megati erkiteken melala perbeben si reh erbahanca kita labuh. Emaka perlu kita penampat ibas Tuhan nari. Gejabkenlah maka keleng kel ate Tuhan kita, la pernah ipediatNa kita sekalak ndalani geluh enda. Mari erlebuh kita man Tuhan, Ia ngenca penalementa dingen ulu gegehta.

Rende: KEE GBKP No.462:1

P: Keleng ate Tuhan si nggo si aloken ngajuk kita guna ngasup jadi pancur keleng ate Tuhan man kalak si deban, khususna man agi-aginta KAKR GBKP. Nggo nge si akap meherga agi-aginta? Nggo nge si jaga ia alu mehuli? Nggo nge kita jadi kaka si mehuli nandangi agi-aginta? Si akukenlah kinilangasupenta ngergai agi-aginta KAKR GBKP.

---Ibereken kesempaten man banta guna ngukuri uga perbahanenta selama enda man agi-aginta KAKR arah pengerananta bagepe arah sikapta---

Rende: KEE GBKP No.362:1

P : Sura-suranta ndahiken si mehuli man agi-aginta KAKR tentu adi si andalken gegeh ras ngasupta, banci jadi labo kita ngasup ndalankenca. Tapi adi gegeh kuasa Kesah Si Badia si ringan bas kita, lebih asa si terukuri, ngasup kita ndalankenca. Emaka si pindolah Kesah Sibadia erdahin ras nampati kita guna jadi kaka si mehuli man agi-aginta. Rende :

KEE GBKP No.187:1

P : Gundari marilah si pesikap pusuhta guna ndengkehken Kata Dibata gelah erngasupna kita ndalanken sura-sura Dibata i bas geluhta.

Rende: KEE No.345:1

Renungan: (Ertoto ope renungen ras ertoto kenca dung renungan ibabai pemimpin Jam Ertoto).

Nas: Matius 18:10

Ingatlah, jangan menganggap rendah seorang dari anak-anak kecil ini. Karena Aku berkata kepadamu: Ada malaikat mereka di sorga yang selalu memandang wajah Bapa-Ku yang di sorga.

Tema: Agiku Meherga Kuakap

Anak KAKR eme pemere Dibata si itepa alu dem keleng ate. I bas wari enda kita ipersingeti uga kita mperlakuken anak KAKR ras kai tanggungjawab ta selaku kaka si lebih dewasa secara usia asangken ia. Nas enda me lanjuten pengajaren Tuhan Jesus man ajar-ajarNa si encidahken uga keberpihakan Tuhan Jesus nandangi kalak si ianggap la meherga. Hal enda turah erkiteken penungkunen ajar-ajar Jesus kerna "ise si mbelinna ibas Kinirajan Surga". Jesus mengantisipasi gelah ajar-ajar la nggeluh ibas pemahamen si salah kerna Kinirajan Surga. Kalak si ianggap la meherga igambarken bagi sekalak danak-danak. Ijenda Jesus ngataken maka kalak si kitik si ianggap la meherga enda lit kap malekatna si katawari pe natap ku nyo Bapa i Surga. Ertina nandangi kalak si kitik e itugasken Dibata persuruhenNa (malekat) guna njagai ia. Danak-danak si kitik si megati ianggap la meherga man bana pe atan kap Kinirajan Surga. Anak-anak si kitik pe meherga i adep-adepen Dibata. Adi Tuhan Dibata meherga kel ia kapna anak-anak si kitik e, emaka kita pe labo banci menilai rendah anak-anak si kitik.
Sue ras tema: Agiku Meherga Kuakap. Nggo si idah uga Tuhan Jesus tuhu-tuhu ngergai anak-anak ras mereken man bana identitas si seh kel ganjangna, eme `Empuna Kinirajan Dibata". Emaka bagi Tuhan Jesus si meherga akapna anak-anak, kita pe harus meherga si akap anak-anak si kitik. Selaku kaka, mari si evaluasi dirinta, nggo nge kita jadi kaka simehuli sura-sura Dibata nandangi agi-aginta KAKR? Marilah si bayangken rupa agi-aginta KAKR, ayona si polos, ketulusenna, kesederhanan, sikapna si lucu, ras kebergantungenna man kalak si lebih dewasa. Tatap dage ia, agi-aginta si membutuhken kita kakana. Aminna pe mungkin saja pernah itukohina kita, la iergaina kita, tapi agi-aginta membutuhken kita kakana. kaka si mehuli man kerina agi-aginta. Jadilah kita usihen ibas kerina kempak ia. Ulanai si inget-inget sikap ras pengeranana si kurang sopan man banta kakana. Tapi marilah si tuntun agi-aginta gelah reh tambahna penandaina kerna Kristus, siperdiateken kegeluhen rohanina. Enda me si jadi tanggungjawabta ras-ras.

Rende: Mengasihi Lebih Sungguh (iulihi 2 kali)

P : Genduari alu pusuh, mata, cuping ras perukuren si mbaru, aloken dage agi-aginta KAKR, ergai ia bagi kita ngergai dirinta jine. Melala kel i bas dirina si kurang, tapi kita kap isuruh Dibata erbahanca ietehna apai si mehuli apai si lang. Seri keleng ate Dibata man PERMATA GBKP bagepe man KAKR. Si ajar-ajarenlah PERMATA GBKP gelah ngasup endalanken pedah Tuhan ibas geluhta. Ertotolah kita man Tuhan gelah ibereken Tuhan gegeh kengasupen, bagepe si totokenlah agi-agita KAKR enda gelah jadi anak si erkemalangen man Tuhan.

Rende: KEE GBKP NO.464:1-2

P : Mari si sehken persembahen pengataken bujurta man Tuhan. Kata Dibata si jadi palas man banta ibas kita ngendesken persembahen: "Kalak si empersembahken pengataken bujur, IA. nge si empehaga kap Aku, janah man kalak si perdalinna la erpandangen, kucidahken kesangapen ni Dibata" (Masmur 50:23). I bas kita ngendesken persembahen, mari ras kita rende i bas: KEE No.289:1-2

Pertoton Syafaat
PERMATA GBKP 1 : Notoken gelah PERMATA GBKP ngasup ngergai agi-agina
PERMATA GBKP 2: Notoken gelah PERMATA GBKP ngasup jadi usihen man agi-agina
PERMATA GBKP 3: Notoken kerina KAKR ras kerina anak-anak i doni enda
PERMATA GBKP 4 : Notoken Persembahen ras si turah ibas perpulungen

Rende: KEE GBKP No.466

Pertoton Tuhan

III. AKSI
Bahanlah perencanaan guna ngerayaken hari Ulang Tahun KAKR. Usulen: I bas wari Minggu tanggal 19 April 2026, PERMATA GBKP reh ku Kebaktin KAKR maba kue ulang tahun. Bagepe PERRMATA GBKP mendampingi KAKR ibas ia ngikuti kebaktin, kundul rembak ras KAKR. Kenca dung ibadah bahan perayaan ulang tahun KAKR.

Pdt. Tetty Hanna Susanna Br Sinulingga, S.Psi, M.Div

(Pendeta Runggun Gunung Tinggi-Medan Kampung Lalang)