Bahan PJJ 8-14 Maret 2026

Bimbingen PJJ Tanggal 08-14 Maret 2026
INGANTA RUNGGU
(Musyawarah Ngawan)

Bahan Ogen : Kejadin 23:10-20

10. Tupung si e Epron sangana kundul ras kalak Heti si deban i bas ingan runggu i gerbang kuta e; asum kerina kalak megisa erjabap ia nina,
11. “Begiken Tuan; kubereken man bandu kerina juma e ras gua si lit i je. I jenda i lebe-lebe bangsangku jine, kubereken man bandu ingan e gelah banci ikuburkenndu ndeharandu i je.”
12. E maka erjimpuh Abraham i lebe-lebe kalak Heti e,
13. jenari nina man Epron, “Ngarap aku gelah megi-megi kam kerina. Kutukur me dage juma e. Aloken lah tukurna i bas aku nari, gelah kukuburken ndeharangku ije.”
14. Erjabap Epron nina,
15. “Tuan, erga juma e 400 duit pirak ngenca kai lah e ertina i bas kita duana? Kuburkenlah ndeharandu i je.”
16. Payo akap Abraham, e maka ibeligaina duit pirak e asa pemindon Epron si ibelaskenna i adep-adepen jelma si nterem, e me 400 duit pirak, sue ras timbangen si ipake perbinaga.
17. Bage me turi-turinna, maka taneh Epron si i Mahpela, arah matawari pultak Mamre, enggo jadi sikerajangen Abraham. Si itukurna e, e me kap juma, gua si lit i bas juma e, ras kerina batang kayu si i bas juma e seh ku tepi taneh e.
18. Kerina kalak Heti si ikut i bas perjumpan e, enggo jadi saksi maka taneh e genduari Abraham empuna.
19. Kenca bage ikuburken Abraham ndeharana Sara i bas gua e i taneh Kanaan. 20Erkiteken si e maka juma si nai kalak Heti empuna, ras gua si lit i je, genduari enggo jadi sikerajangen Abraham si ibahanna jadi taneh kuburen.

KATA PERLEBE
Musyawarah ngawan e me kap sada kesempaten man kerina perpulungen GBKP lako ngerunggui kerina perdalinen pelayanen gerejanta. I bas musyawarah ngawan ibereken kesempaten man kerina perpulungen lako ngerana guna ngevaluasi bage pe nuriken pengarapenta kerna gerejanta. Amin gia i bas musyawarah ngawan labo jadi inganta guna muat keputusen (Tata Gereja pasal 31:1-6.), tapi ije me kesempatennta kerina perpulungen guna nuriken isi pusuhta. Erbuena pendapat siibereken kita i bas musyawarah ngawan tentu erbayakna gerejanta. Persoalenna melala denga perpulungen si lenga nggejapken maka musyawarah ngawan enda e me kap hak sekaligus kewajibenta selaku warga perpulungen. Alu bage sekali enda iajuk kita mulihi niksiki kerna kai kin erti ras pentingna runggu erpalasken Pustaka Si Badia.

ISI
   Bahan PJJnta minggu enda nuriken kerna uga cara si i lakoken Abraham guna ngkuburken ndeharana i Kanaan. Idahina bangsa Heti janah ersura-sura ia lako nukur Gua Mahpela ras tepi jumana jadi ingan engkuburken Sara. Erkiteken simada gua enda e me kap Epron e maka idahi Abraham Epron guna nuriken sura-surana. I bas ayat 10 ituriken maka Epron sangana kundul ras kalak Heti i bas ingan runggu i gerbang kota e, janah i je me ituriken Abraham sura-surana. Alu meriah ukur ngerana Epron maka iberekenna atena ingan e man Abraham guna engkuburken ndeharana (ay.11). Jenari erjimpuh Abraham gelah itukurna min juma e, janah tupung ia ngerana ikatakenna man kalak Heti e gelah megi-megi ia kerina (ay.13). Amin gia situhuna Epron erpenulak igalari erkiteken ergana 400 duit perak ngenca (ay.15), tapi igalari Abraham asa patutna (ay.16). Kerina kalak Heti si atan bas percakapen e nggo jadi saksi maka taneh e nggo jadi sikerajangen Abraham. Teridah i jenda kiniteruken ukur ras keterbukaan Abraham lako nuriken isi pusuhna. Erkiteken terus terang Abraham, teraloken Epron janah meriah ukurna lako ngaloken pemindon e. Tangkas kata tangkas ukur e me kap perbahanen si penting i bas runggu.
   Arah bahan oratenta enda teridah maka runggu enggo jadi kebiasan kalak Israel i bas jaman si nuria nari. I bas runggu e tentu jadi sada ingan arih-arih muat si mehuli, sabab kerina jelma si atan i je banci ibegiken pendapatna. Menarik, i bas Abraham arih-arih ras Epron pe ikut kalak Heti ije megi-megi ras naksikenca. Si enda mbelin gunana man Abraham, Epron, bage pe kalak Heti sabab kerina ia petala-tala janah ngidah kai si jadi paksa si e. Gunana man Abraham e me kap, lit saksi si ngidahsa maka taneh e tuhu-tuhu enggo itukurna ras igalarina man Epron. Gunana man Epron e me kap, tetap ertahan kehamaten kalak Heti man bana sabab Abraham pe ilakokenna bagi arusna man Epron. Adi Abraham Pe mehamat dingen la mekarus man Epron i lebe-lebe kalak Heti, tentu enda pe jadi usihen man bangsa Heti. Ertina perjumpan e pe erguna man kalak Heti lako mereken usihen si mehuli man bana.
   Tangkas teridah maka i bas sura-sura Abraham engkuburken ndeharana i Kanaan isehkenna alu runggu (arih-arih). Sipemena lebe arih-arih ia ras kalak Heti, jenari ras Epron ras iergakenna bangsa Heti si ninggel-ninggel i bas perarihenna e. Teridah maka gia ceda sangana pusuh Abraham, tapi tetap lit kepentaren i bas ia guna nuriken sura-surana. La ia nggit mindo taneh e alu paksa ntah pe terjeng ngarapken perkuah ate, tapi arihkenna alu mehuli seh maka mehuli ulihna ku kerina jelma. Tupung nggit Abraham arih-arih janah iturikenna sura-surana alu meteruk ukur maka Epron ras kalak Heti pe ermeriah ukur lako nehken pengarapen Abraham. Bagenda me dalanna Sara ikuburken i Gua Mahpela i taneh Kanaan.

PENGKENAINA
Runggu e me kap arih-arih si ilakoken kalak Karo guna ndatken sada keputusen. Si atan i bas perarihen e biasana rakut si telu ( Senina, Kalimbubu, Anak Beru). Anak Beru dahinna e me kap jadi penengah (protokol) percakapen, biak Senina jadi janah Biak Kalimbubu jadi penggurun i bas perarihen e. Alu bage runggu i bas kalak Karo biasana iarihken alu tasak sabab ikut ije sangkep nggeluh ngukurisa. Ertina, budaya runggu jadi kebiasan i bas kita kalak Karo janah ulihna mehuli erkiteken enterem si ertimbang i bas runggu e. Erkiteken si e gerejanta GBKP pe erbahan sada ingan runggu man kerina perpulungen i bas Musyawarah Ngawan. I bas Musyawarah ngawan kerina perpulungen banci ngerana, ertimbang, bage pe mereken pendapat. E maka jiwa keterbukan ras kiniteruken ukur pe perlu kel sijagai i bas Musyawarah Ngawan i tengah-tengah gerejanta. Kerina pendapat i tampung janah iergaken, jenari kari irungguken Majelis Runggun i bas sidang Runggun guna iputusken simehulina guna gereja.
Pustaka Si Badia si jadi oratenta wari enda pe ncidahken ulih runggu si ilakoken Abraham, Epron ras kalak Heti guna ngkuburken Sara. Ulihna mehuli, janah kerina si atan i je ermalem ate. Musyawarah ngawan jadi inganta runggu guna pelayanen gerejanta ku si terulin. Kerina kita warga bali pentingna kehadirenta i bas musyawarah enda. La kita kerina ngerana, megi-megi pe mbelin kel gunana (bagi kalak Heti i bas bahan oratenta ndai). Tentu i bas runggu enda arus lit etika si ibaba kita, e me kap siergan ras sihamaten. Alu bage bahasa si ibelasken kita i bas musyawarah ngawan pe arus bahasa si pentar. Jenari arus ka siergaken pendapat temanta sabab labo seri kerina penggejapen ras penggangkanta. Tambah si e ula ka min siakap kitik man banta gia usulenta la jadi keputusen i bas sidang runggun berikutna. Tentu keputusen si i buat i bas persidangen pe lit ka nge pertimbangenna.

DISKUSI :
1. Turiken kai-kai saja ulih si mehuli si pernah ialoken arah lakon musyawarah ngawan guna pekena-kena pelayanen gerejanta!
2. Arihkenlah i bas sektorta kai-kai saja si jadi usulen/masukenta i bas musyawarah ngawanta tahun enda!

USULEN ENDE-ENDEN:
1. KEE GBKP No. 57:1-3 ( KLIK UNTUK MELIHAT LAGU )
2. KEE GBKP No. 71:1-2 ( KLIK UNTUK MELIHAT LAGU )
3. KEE GBKP No. 92:1-2 ( KLIK UNTUK MELIHAT LAGU )
4. KEE GBKP No. 209:1-2 ( KLIK UNTUK MELIHAT LAGU )

DAFTAR BACAAN :

Prinst, Darwin. 2002. Kamus Karo Indonesia. Medan: Penerbit Bina Media.
Tarigan, Sarjani Drs. 2008. Dinamika Orang Karo, Budaya dan Modernisme. Medan: Lamerose Press

Pdt. Rasmalem Br Ginting, S.Si (Teol).,M.M.

HP/WA: 085228896030