Undalen Nebu-Nebu ( Tantangen : Kurang Setia Ras Jujur )
Bahan Bimbingen PA Moria 9 - 15 Juni 2019
Tantangen : Kurang Setia Ras Jujur
SI MAN OGEN : Kejadin 31:1-21
Jakup kiam nadingken LabanT E M A : UNDALEN NEBU-NEBU TUJUN : Gelah Moria
1. Jakup megi anak Laban si dilaki ngerana, “Enggo ibuat Jakup kerina sikerajangen bapanta. Kerina kebayakenna rehna i bas sikerajangen bapanta nari.”
2. Idah Jakup pe maka Laban lanai bagi si gelgel e ulina.
3. E maka nina TUHAN bana, “Mulihlah kam ku taneh bapandu, ku keluargandu. Aku ras kam.”
4. Erkiteken si e itenahken Jakup si Rahel ras Lea njumpai ia i mbalmbal ingan asuh-asuhen e.
5. Nina man bana duana, “Enggo kuperdiateken maka bapandu lanai bagi si gelgel e ulina man bangku; tapi Dibata bapangku tetap ras aku.
6. Itehndu duana, aku enggo erdahin ras bapandu asa gegehku.
7. E pe i tebu-tebuna kang aku. Enggo sepuluh kali iubah-ubahna upahku. Tapi la ipelepas Dibata aku bene ibahan kejahatenna.
8. Adi ikataken Laban kenca, ‘Kasa kai kambing si meruntik jadi upahndu,’ e maka kerina ka asuh-asuhen e meruntik anakna. Kenca ikataken Laban, ‘Kasa kai si mekambing jadi upahndu,’ e maka kerina ka asuh-asuhen e mekambing anakna.
9. Enggo ibuat Dibata asuh-asuhen bapandu janah iberekenNa man bangku.
10. Sanga asuh-asuhen paksa si ikut-ikuten, ernipi aku maka kuidah kerina kambing bajar si kawin ras beruna e, rupana ergaris-garis, mekambing ras meruntik.
11. Ngerana malekat Dibata man bangku i bas nipi e nina, ‘O Jakup!’ ‘Kai,’ ningku.
12. ‘Nen,’ nina, ‘Bajar si kawin ras beruna e, kerina ergaris-garis, mekambing, ras meruntik rupana. Enda Kubahan erkiteken enggo Kuidah kerina perbahanen Laban man bandu.
13. Aku kap Dibata si teridah bandu i Betel. Tupung si e ipajekkenndu sada batu jadi peringet-ingeten, janah iamburkenndu minak saitun i babona tandana maka batu e enggo ipersembahkenndu, janah i je enggo kam erpadan man bangKu. Genduari ersikaplah kam mulih ku taneh inganndu tubuh ndube!’ ”
14. Nina Rahel ras Lea ngaloi Jakup, “Lanai kap lit kai pe tading-tadingen man kami i bas bapa kami nari.
15. Enggo seri akapna kami ras kalak tandang-tandang. Idayakenna kami, janah genduari enggo ikerikenna kerina tukur kami e.
16. Kerina kebayaken enda si enggo ibuat Dibata i bas bapa kami nari e me sikerajangen kami ras anak-anak kami. Bahan lah kai si enggo ikataken Dibata man bandu.”
17-18. E maka ersikap Jakup mulih ndahi bapana i taneh Kanaan. Itamakenna anak-anakna ras duana ndeharana ku das unta, jenari igerana kerina asuh-asuhenna leben asa ia ras kasa si idatna i Mesopotami.
19. Sanga si e Laban enggo lawes nggunting mbulu biri-birina. Tupung si e me ibabaken Rahel gana-gana si ni pajuh keluarga bapana.
20. Iakali Jakup si Laban, e maka la ikatakenna perberkatna.
21. Ibuatna kerina sikerajangenna, pedas-pedas ia lawes. Ikeparina Lau Eprat, jenari erdalan ia kempak deleng Gileat.
- Meteh perbahanen Jakub ras Laban eme si tebu-tebun.
- Nilahi si tebu-tebun i bas kerina dampar.
Kata Penaruh.
Melala si erbahansa kita la banci reh sikapna i bas sada-sada pendahin ( usaha ). Enda banci reh bas dirinta nari ( internal ) banci ka i darat dirinta nari ( eksternal ). I darat nari umpamana, la akap kalak payo adi sikap usahanta, emaka iusahakenna gelah usahanta e ndabuh. Kimaun la iergaken kalak kai si ibahan kita e, bas pemasarenna kurang, lenga melala ingan ndayakensa ras sidebanna. Lit ka deba erdandanken kurang kengasupen ngembangken sada-sada usaha erkiteken kurang nggit erlajar, perkisat, kurang modal, kurang tutus seh maka labo melala iidah kemajunna usaha e. Tapi lit ka kalak Si tutus bas erdahin ( rusaha ) alu erbage-bage cara. Lit si mehuli ras lit ka si la mehuli. Si mehuli umpamana, tutus, bujur, ertanggungjabab, nggit erlajar ras mpekena-kena diri, make dalan ras cara si lit alu mehuli, pentar bas nerusi usahana. Cara-cara mehuli umpamana, nokoh, nipu entah nebu-nebu. Cara-cara si ibahanna e guna dirina saja, la ngukuri kalak sideban. Tentu cara si bage labo payo.
Mpebagesi Pengangkan Kerna Ogen.
Jakub ras Laban, duana ia kalak si terberita bas Pustaka Si Badia..Duana kalak si tutus erdahin. Ketutusenna teridah i bas usahana ngasuhi asuh-asuhenna. Saja ngenca i bas rusaha enda duana la radu-radu ngukurken keuntungenna saja. Benana Jakub kiam ku Mesopotamia gelah pulah bas kakana si Esau nari. I Mesopotamia ibenakenna erdahin ras mamana Laban. Dahinna eme nampati ngasuhi kambing ras biri-biri. I je me turah atena ngena man Rahel anak mamana si Laban. Kenca iturikenna ukurna amana man mamana, meriah ukur si Laban tapi ietehna pe, maka kebiasan kala Mesopotamia, la banci ilebei agina kakana erjabu.
Erdandanken sie, iaturken si Laban syarat guna ngempoi anakna si Rahel, eme Jakub arus erdahin 7 tahun dekahna guna banci tumbuk ersada ras Rahel. Kenca seh si 7 tahun, iendesken Laban si Lea ( kaka Rahel ) kempak si Jakup. Kidekah Jakup erdahin ras si Laban ertambah kal kambing ras biri-biri si Laban ( Kel. 30:27 ). Ngidah si enda nembeh kal ate Jakup seh maka itadingkenna atena si Laban. Mindo si Laban gelah ula Jakup lawes nadingken mamana e. Iberena pe upahna asakai asuh-asuhen si meruntik, si mbiring ras mekambing. Tapi nggo leben serapken mamana si nguda ras asuh-asuhen si megegehna. Teridah i je maka Laban la jujur, itebu-tebuna Jakub alu pirasatna si macik. Bage me Jakub ngasuhi si itadingken mamana ndube.
Alu pemetehna ras kinibeluhenna, si Jakup erbahanca biri-biri ndai banci tubuh meruntik ras mekambing. Dungna enggo buen sikerajangenna asang sikerajangen mamana. Teridah maka Jakub pe enggo mulai ngukuri keuntungenna jine. Kenca melala ertana, janah Rahel si isurakenna jadi ndeharana pe enggo seh. Arih-arih ia ras Lea bagepe Rahel, iturikenna uga perbahanen Laban man bana. Nina: lanai bagi si gelgel ulina perbahanen bapandu man bangku. Itehndu nge uga aku tutus erdahin ras ia, tapi bage gia itebu-tebuna kang aku. Enggo sepuluh kali isambarina upahku. Tapi Dibata tetap ras aku, la ipediatNa aku bene i bas kejahaten Laban. Erkiteken sie isuruh Tuhan aku mulih ku kuta bapangku radu ras kam kerina. Dungna ersada arihna ras ndeharana maka mulih ku kutana.
Emaka ersikap Jakub mulih ku Taneh Kanaan, alu mpeberkat ndehara, anak ras kerina asuh-asuhenna. Ibenaken Laban nebu-nebu si Jakup kenca bage erbalas ka Jakup nebu-nebu Laban. Erkiteken si e lawes si Jakup lanai erkata man Laban mamana. Ulih si tebu tebun ndai eme lanai si tabehen, turah si rawa-rawa ras kiniseran.
Pengkenaina.
Banci saja pernah nge kita jumpa perbahanen si tebu-tebun si bagenda rupa, seh maka lanai tempa si akap salah bas ndalankensa. Umpamana engkurangi berat timbangen, entah nambahi berat batu timbangen. Adi kita erbelanja ku tiga si tukur ndai sada barang beratna 1 Kg, si galari senna erga 1 Kg, tapi kenca itimbang sekali nari, barang ndai beratna 9 ons. Kenca bage belanja ka sekali nari si nukur ndai bas ingan si seri, enggo leben buatina barang ndai i bas tanna, sada bagin ngenca itimbangna. Si bas tanna nadai lanai ikut itimbang. Bas ukurna, sange pe itebu-tebuna aku, me bage ka ku bahan carana, gelah enggo seri. Duana ia erjuang guna sitebu-tebun. Kai nge akapndu si dat adi kita si tebu-tebun?
Sitebu-tebun e nuduhken maka kita la jujur, la adil. Enda situhuna biak dosa si man sirangenken. La kal ngena ate Dibata nggeluh sitebu-tebn. Ras perbahanen si bage labo dat pasu-pasu. Kentisik ngenca si meriah kedungenna mpeturah ndele ate. Perlu si inget maka nebu-nebu, teman bali e ras nebu-nebu Dibata. Siniarapken bas PA wari enda kerina Moria erlajar bujur ras adil bas ndalanken usaha bas erteman pe kegeluhen jabu, Gereja ras masyarakat pe. Kalak si bujur ndalanken usahana pasti ipasu-pasu Dibata.
Drama.
Narasi Kenca dung er PA Moria dua kalak Moria erdalan-dalan ku `pajak buah', Duana ia ersura-sura nukur buah jadi luah ku rumah. Itukurna me buah ndai bas ingan si la seri, kenca dung si tawaren ergana, itukurna buah terdua kilo sekalak. Sada bas Moria enda ndai, la ia tek nandangi timbangen buah si itukurna. Sabap ikantingna buah si itukur temanna ndai la akapna bali beratna, padahal radu-radu 2 Kg. Emaka itimbangna ulihi buah si itukurna ndai kepeken beratna 1,8 Kg. Merawa atena sabap la bujur si erbinaga e. Tapi bas ukurna: "ndat nge engko pagi, reh denga ka nge aku pagi sekali nari, je maka pagi tehmu ise aku". Minggu sirehna kenca dung PA ulihina ka ku ingan si erbinaga ndai, itukurna ka buah si seri, tapi enggo leben ipanganina ncubakensa entebu entah lang, si ipanna epe enggo ka ndeher 0,5 Kg. Emaka ibuatna ka lima biji nari ras e la itimbang, nina `bahan man bangku 2 kg nari'. Merawa si perbinaga ndai, katakenna ia nangko, sabap enggo panganina pe melala, buatna denga ka bas tanna ras e la itimbang. Adi kira kerina enggo ndeher 3Kg bana, galarina 2 Kg. Nggo rubat ia, nina Moria ndai, sange pe itebu-tebundu aku, nindu 2 Kg, kepeken 1,8 ngenca. Me kutebu-tebu ka lah kam. Nggo seri kita. Satu-satu...
Mari dage si saksiken drama enda.
Nd. Sikap : ( Sekalak perbinaga buah-buahen i pajak tradisional). Mari enda buah nake, pangan si sehat, murah menah, mari....mari...
Nd. Beluh : Asakai nge buah e nak, si tawar cuba, ( nina nande beluh man nd. Bujur )
Nd. Bujur : Ue yah nak, rumah pe ndai enggo keri buah
Nd. Beluh : Asakai buah enda seklio nak?
Nd. Sikap : 15.000 sekilo nak.
Nd. Beluh : Iih.. lanai kurang, kurangi nak yah, 2 kg buat kami.
Nd. Sikap : Lanai kurang nak, bage kin enggo ergana .
Nd Bujur : Bage dage... (aku ku ingan si sada nari ah ya nak, la ka ateku buah si bagena nina Nd.Bujur man Nd. Beluh, emaka lawes Nd. Bujur ku ingan si deban )
Nd. Beluh : Adi bage, ban dage 2 kg man bangku ( kepeken Nd. Bujur pe nukur buah 2 Kg )
Nd. Bujur : Piga kilo ndai tukurndu nak
Nd. Beluh : 2 kg nak,
Nd. Bujur : Aku pe ndai 2 Kg e, nen cuba entah seri kin beratna. Ngenenca saja nge, ( emaka iangkatna duana tukurenna ndai ) ih maka la bali beratna si kutukur e ras si itukurndu. Endi gia angkat.
Nd. Beluh : ( Iangkat Nd. Beluh duana alu tanna si kawes ras si kemuhen ) payo tuhu me, e la pas si erbinaga ah ndai. Emaka itimbangna bas tukang kilo si deban, buah si itukurna ndai 1,8 kg ngenca, si itukur temanna ndai pas 2 kg. ( Bas ukurna ndat nge engko pagi )
Narator : Minggu si rehna, lawes ka Nd. Beluh ku tiga, ku inganna nukur buah minggu si lewat.
Nd. Beluh : Asakai bandu ergana buah enda nak?
Nd. Sikap : Biasa nak 15.000.
Nd. Beluh : Egia me entebu nge, banci cubaken (ipangani Nd Beluh melala buah ndai, atena ncubaken nge ngenca)
Nd. Sikap : (Iperdiatekenna kal Nd. Beluh enda) adi ncubaken, labo melala pan nak
Nd. Beluh : Bageng ari, ban dage bangku 2 kg yah ( buatna ka buah ndai lima biji nari )
Nd. Sikap : Si panndu ndai ras si bas tanndu ena enggo ndeher sekilo nak, galarindu 2 kg ngenca, nangko kap kam e...
Nd. Beluh : O... minggu si lewat itebu-tebundu aku, nindu 2 Kg, tapi ku timbang sekali nari 1,8 ngenca. Emaka ku jenda ka aku gelah enggo tehndu, aku pe banci nge nebu-nebu kam, enta barangku ena ndai, endi senna.
Narator : Enggo rubat Nd. Sikap ras Nd. Beluh, si gangen sora ia duana tengah tiga. Kalak si deban pe nggo ngenen ia duana. Mulih Nd. Beluh ku rumahna, megara ayona, melas pusuhna. Bage ka pe Nd. Sikap lalap jungut-jungut, bas erbinaga e pe lanai dame pusuhna. Bageme adi sitebu-tebun, ulihna la kepe mehuli, la maba kejuah-juahen. Dibata pe labo erngena ate nandangi perbahanen si tebu-tebun.
Catatan.
Drama enda enggo min isikapken pemainna seminggu sope er-pA sikapken pe keranjang buah ras piga-piga jenis buah-buahen.
Undalen ertina resiko, kalak si erdalan bas si la payo ulihna kiniseran.
Pdt. Nurbety br. Ginting, M.Th
0 Response to "Undalen Nebu-Nebu ( Tantangen : Kurang Setia Ras Jujur )"
Post a Comment