Kegeluhen Si Tuhu-Tuhu

Bahan Bimbingen PA Moria
Tanggal 7 - 13 Juni 2026
Alasan Manusia Mengasihi Allah

SI MAN OGEN : Johanes 3:14-21

14. Bagi ipeganjangken Musa nipe tembaga i gurun pasir, bage pe Anak Manusia si isuruh Dibata ipeganjangken,
15. gelah kerina kalak si tek man baNa ngaloken kegeluhen si tuhu-tuhu si la erkeri-kerin.
16. Sabab bage pengkelengi Dibata doni enda, e maka iberekenNa AnakNa Sitonggal, gelah ola bene isie pe si tek man Bana, tapi gelah dat kegeluhen si tuhu-tuhu si la erkeri-kerin.
17. Sabap Dibata nuruh AnakNa ku doni enda labo jadi Hakim tapi jadi Singkelini manusia.
18. Ise tek man Anak Dibata e la iukum; tapi ise la tek, enggo kena ukumen, sabap la ia tek man Anak Dibata si Tonggal.
19. Ukumen e: Terang enggo reh ku doni enda, tapi ngenan ate manusia si gelap e asa terang, sabap jahat perbahanenna.
20. Sabap kalak jahat la atena ngena terang e, dingen la ia nggit ku terang e gelah ola teridah perbahanenna si jahat e.
21. Tapi kalak si ndalanken si ngena ate Dibata reh ia ku terang e, gelah i je teridah maka kai si ibahanna e sue ras kai si ngena ate Dibata.”

T E M A : Kegeluhen Si Tuhu-tuhu

T U J U N : Gelah Moria:

Ngidah Perbahanen Jesus man manusia
Nulisken tekad tetap nggeluh i bas kegeluhen si tuhu-tuhu.

METODE PA : Erbahan Selogan

Kata Penaruh
Perikop enda nuriken sada bagin percakapen Jesus ras Nikodemus (sekalak pemimpin agama Jahudi). Nikodemus reh njumpai Jesus tupung berngi gelah banci ngerana secara pribadi ras Jesus. Banci pe erdandanken mbiar ia ieteh teman-temanna selaku pemimpin agama Jahudi adi ia jumpa ras erpihak ku Jesus. Tujun Nikodemus e me nungkun kerna pengajaren Jesus kusus kerna 'tubuh peduakaliken' bagi siikataken Jesus. Selaku pemimpin Agama Jahudi, Nikodemus pe tertarik nandangi tanda-tanda sengget si ibahan Jesus, bage pe pengajaren Jesus sidebanna terlebih kerna si lit hubungenna ras Kinirajan Dibata.
Jesus nuriken maka guna bengket ku Kinirajan Dibata, manusia arus tubuh peduakaliken. Bengket ku Kinirajan Dibata ngingetken kerna keleng ate Dibata si bage belinna man doni enda si icidahkenNa arah mereken AnakNa Si Tonggal, e me Jesus si jadi bukti keleng ate Dibata si la ersibar gelah kerina kalak si tek man baNa ndatken kegeluhen si tuhu-tuhu, si rasa lalap.

Mpebagesi Pengangkan Kerna Ogen
Johanes 3:14-21 nuriken kerna pengorbanen Anak Dibata ras keselamaten man kalak si tek. Pengorbanen Jesus ikawitken ras Musa si mpeganjang nipe i Padang Gurun guna nelamatken kalak Israel sinatap kempak nipe e. Bage me pe Anak manusia arus ipeganjang (i kayu persilang) gelah kerina kalak si natap dingen tek man baNa ndatken kegeluhen si rasa lalap. Man kalak si natap nipe e, la mate.
Keleng kal ate Dibata doni enda, e maka kalak si tek la iukum tapi kalak si la tek lit i teruh ukumen. Palasna e me, i bas Ia kap TERANG e (Jesus ras pengajarenNa), Ia si reh ku doni enda, tapi ngenan ate manusia kegelapen e maka perbahanenna pe dem alu kejahaten. Kejahaten rusur ibahanna, sabab la ngena atena terang e, ertina ngenan ate manusia kegelapen e sabab i bas kegelapen e melala kejahaten banci ibuniken.
Kata "ngaloken ntah nulak," Jesus nuriken maka doni enda enggo mabai dirina jine ku kebenen, sabap manusia buen milih kegelapen asangken terang, ngelakoken si jahat, segat atena terang janah la ia nggit reh ku terang e sabap jahat perbahanenna.
Perbahan keleng ate Dibata man manusia ras doni enda, e maka iberekenNa AnakNa Si Tonggal Jesus Kristus lako nebusi dosa doni enda. Keleng ateNa e jadi dalan man manusia guna ndatken kegeluhen si tuhu-tuhu. E maka ise pe si tek baNa la bene, tapi ndatken kegeluhen si rasa lalap. I bas sienda teridah uga perluna ngangkai, nggejabken keleng ate Dibata si mbelin si isehkenNa man manusia ras doni enda. La lit keleng ate simbelinna seakatan mereken dingen ngkorbanken anak i bas kegeluhen enda.
Tanggungjabap manusia e me tek man baNa tuhu-tuhu (100%) janah ngendesken kegeluhenna alu bulat ukur. La cukup ngakui keleng ate ras kuasaNa saja, tapi pe mpelebeken Ia i bas kerina keadan, dingen ngikutken peratenNa. Mereken diri guna ibabaiNa arah dalan si ngena ateNa ras patuh nandangi sura-suraNa.

Tanda-tanda tek nandangi Dibata:
Ngakui maka Tuhan e lit, sue ras isi Pustaka Si Badia. Mereken diri iatur ras ipimpin Tuhan, labo terjeng i bas perukuren ntah perasaan. Erpengarapen man Tuhan i bas kerina dampar kegeluhen. Tek nandangi Kata Dibata, patuh man baNa dingen setia. Ngaloken dingen ngendesken diri alu mbersihken biak si la mehuli, janah alu meriah ukur ngelai Dibata. Lit hubungen intim, mbages dingen nteguh ras Dibata, ulihna e me kap la bene, tapi ndatken kegeluhen si rasa lalap.
Jesus nuriken maka Ia isuruh ku doni enda labo jadi hakim tapi jadi singkelini manusia. Man kalak si tek, ialokenna me keterkelinen e. KerehenNa maba keadilen, e me si tek terkelin, si la tek iukum. Si tek nggeluh i bas terang dingen mehuli perbahanenna. Tapi si la tek ngena atena si gelap dingen jahat gelah ola teridah perbahanenna si jahat e.

Pengkenaina
Melala kalak nggeluh i doni enda, tapi labo piga kalak singgejabken kerna kegeluhen si tuhu-tuhu. Sabab belinen rusur sura-sura si jahat siengkuasai pusuh, pengerana ras perbahanenna. Biak i bas kegeluhen si tuhu-tuhu e me mpelebeken padan ras sura-sura Dibata, janah e lit i bas kalak si tek. Kegeluhen si tuhu-tuhu (rasa lalap) labo terjeng kegeluhen kenca kematen, tapi pengalamen kegeluhen i bas hubungen si intim dingen payo ras Dibata siibenaken genduari nari i doni enda seh rasa lalap. E maka man kalak si nggeluh i bas kegeluhen situhu-tuhu, nggo ngaloken keselamaten e, lanai nggeluh i bas kegelapen, erngena ate nandangi Terang ras kataNa janah erciga ate nandangi kejahaten. Mblelin kal keleng ateNa, sabab Ia sinepasa ras Ia simadasa, itandaiNa kita, e maka ipekena-kena ras ikelengiNa kita, lebihen asa keleng ate nande man anakna. I bas doni enda labo lit sekalak nande si mereken anakna guna kalak perdosa, tapi Dibata ngelakoken perbahanen si bage man banta si perdosa, gelah kita si tek man baNa ndatken keterkelinen mulai genduari nari. Keleng kal ateNa kita, maka kelengilah Ia arah perukuren, pengerana ras perbahanenta.

Diskusi Ras Erbahan Seloqan
1. Cuba turiken pengertin ras penggejapenndu kidekah enda kerna Johanes 3:16.
2. I bas kegeluhenta sitep-tep wari, lit sijumpai kalak si erngena ate nandangi kejahaten, pernah nge mengga ateta nandangi kegeluhen ras perbahanenna?
3. Teptep kalak nuratken tekadna alu erbahan selogan, nggeluh i bas kegeluhen situhu-tuhu (3-5 menit, suasana hening).

Pdt. Jennie Elliyani Keliat.