Teologi Persembahen: Kerja Rani ( Kubereken Simehulina Man Dibata )

Bahan Bimbingan PA Permata 9 - 15 Juni 2019

"Teologi Persembahan: Kerja Rani"

Nas : Ulangen 16 : 9 - 12

Kerja Rani
(Kel. 34:22; Im. 23:15-21)
9. “Beligai pitu minggu i bas kam menaken rani gandumndu.
10. Kenca bage maka bahanlah Kerja Rani, guna pehaga TUHAN Dibatandu, alu maba persembahen ukur meriah man baNa. Buena rikutken pasu-pasu si iberekenNa man bandu.
11. Ermeriah ukurlah i adep-adepen TUHAN radu ras anak-anakndu, suruh-suruhenndu, ras kalak Lewi, kalak pertandang, anak melumang, ras diberu balu-balu, si tading i kutandu. Lakoken e i bas ingan ersembah si sada e.

12. Jaga maka tetap iikutkenndu perentah-perentah enda; ola lupa maka nai kam jadi budak i Mesir.”

Tema : Kubereken Simehulina Man Dibata

Gelah PERMATA GBKP:

nggejapken maka erbahan Kerja Rani eme guna mpehaga Dibata, emaka harus mereken simehulina man Dibata
Ikut muat bagin erbahan Kerja Rani

Metode: Aksi ( Muat Bagin ibas Kerja Rani )

I. BENA KATA
Ibas tradisi kegeluhen bangsa Israel, lit 3 ( telu ) wari raya / kerja simbelin si ilakoken tep-tep tahun eme: Wari Raya Paskah guna mperingeti pulahna bangsa Israel ibas perbudaken Mesir nari ( Kel. 10:2 ); Wari Raya Kerja Rani / Wari Raya Lepas Pitu Minggu si kedungenna ibas Padan Si Mbaru igelari Wari Raya Pentakosta, sebab Wari raya enda ilakoken kenca 50 ( lima puluh ) wari raya paskah entah kenca 50 wari benaken peranin. Enda ilakoken guna nehken pengataken bujur ibas ulih si idat i juma nari bekas pemasu-masun Tuhan Dibata; Wari Raya Sapo-sapo guna mperingeti perdalanen i gurun pasir ija bangsa Israel si tading i sapo-sapo 40 tahun dekahna. Ibas teluna wari raya enda, tep-tep keluarga arus maba persembahenna man Dibata ( Ke1.23:15, Im.23:17 ). Ertina maka kerina anggota jabu arus iikutsertaken ibas wari raya e, janah enda me sebage pembelajaren man anak ras kempuna bage pe gelah kebiasaan enda tetap ilakoken turun temurun seh maka la banci lupa kerna kai si enggo ilakoken Dibata man orangtuana ndube.Alu bage maka gerejanta pe tetap mewarisi tradisi enda ibas rangka mpehaga Tuhan Dibata si seh wari enda lenga ngadi masu-masu kegeluhenta ibas kerina dampar.Sebab tek kita maka kai siilakoken bagepe siiusahaken kita alu erbage-bage pendahinta ( ku juma, erbinaga, ulihta erdahin entah encari ) e kerina bekas pemasu-masuNa. Selaku PERMATA GBKP ikut muat bagin ibas nehken persembahen kerja rani, tandana kita PERMATA GBKP pe enggo ikut mendukung perdalinen pelayanen gerejanta sebab persembahen kerja rani eme salah sada pemasuken keuangen si iarapken mbelin ulihna guna mendukung dahin ti tugas panggilan gerejanta GBKP. Emaka ibas paksa enda mari radu ras kita mulihi erlajar kerna uga kin arusna selaku PERMATA GBKP mereken persembahen kerja rani simehulina man Dibata??

II. ISI
Ibas padan si ndekah ( PL ) lit piga-piga kali ituriken kerna kerja rani (Pesta Panen), eme: ibas Keluaren 23:16, 19; 34:22,26; Imamat 23:15-22; Bilangen 28:26-31; Ulangen 16:9-12; 26:1-10. Kerja rani situhuna enggo idalanken ope bangsa Israel ringan i taneh Kanaan. Enda ilakoken ibas daerah pertanian sebage pengataken bujur ibas enggo dung masa peranin. Tentuna man dewa kesuburen si iteki enggo masu-masu seh dung peranin. Kedungenna kerja rani enda ibuat / iadopsi bangsa Israel jadi sada tradisi agamana si ibenaken ibas tahun pertama ia ndatken asil i taneh Kanaan. Si enda ilakoken tep-tep tahunna ras enggo jadi sada tradisi keagamaan guna ngataken bujur man Tuhan Dibata tep-tep dung peranin ibas taneh si enggo iberekenNa lako isuani bangsa e. Kerja rani eme perentah / aturen man bangsa Israel guna ilakoken tep-tep tahun kenca menaken rani gandum buah si pemena si buena rikutken pasu-pasu si iberekenNa man bangsa e alu tujun:

Guna mpehaga Dibata. Dibata si enggo maba bangsa Israel ndarat ibas Mesir nari ija ia ndube iperbudak maka budak si labo banci peranina ulih jumana, ku taneh Kanaan ija ia enggo sebage pemilik taneh si enggo banci inanamina ulih rani jumana. Enda kerina jadi erkiteken perkuah ate ras pemere Dibata si mereken taneh e man bana. Dibata si enggo nepa doni ras kerina isina.
Carana eme alu maba persembahen ulih rani e alu ukur meriah man Dibata. Persembahen ukur si meriah man Dibata enda la itentuken asakai buena tapi rikutken pasu-pasu si enggo ialokenna sekalak-sekalak. Ertina maka ibas nehken persembahen ulih rani e me alu mereken si mehulina ( yang terbaik ) man Dibata, labo gelah enggo saja / mekarus (asal-asalan) adi bage tentu tercurna gelar Dibata.
Ibas perpulungen ngerayaken wari raya kerja rani enda, ilakoken i adep-adepen Tuhan Dibata radu ras anak si dilaki ras anak si diberu, suruh-suruhen, kalak Lewi, kalak pertandang, anak melumang, diberu balu-balu si tading ras ia i kuta e. Ertina keriahen kerja rani e tuhu-tuhu ernanam nandangi kalak si deban, la kita ngenca si ngenanamisa pasu-pasu Dibata e tapi pe ikut inanami kalak si deban.
Inganna, khusus ituriken ibas ingan ersembah si sada e, eme ingan perpulungen bangsa Tuhan. Kenca ingan ersembah ipusatken i Jerusalem me ilakoken.
Kerina enda eme ketetapen si ibahan Dibata man bangsaNa, alu bentuk kesadaren maka iingetna ia pe pernah jadi budak i Mesir. Alu bage keikutsertan kalak musil ibas kerja enda labo saja nehken sumbangen man bana tapi guna keadilen ija kegeluhen kalak musil banci reh ulina.

III. PENGKENAINA
Arah kerja rani si ilakoken bangsa Israel maka lit piga-piga hal si jadi perenungenta eme:sipemena, kerja rani si ilakoken kita e tujunna guna mpehaga Tuhan Dibata ( menghormati Allah ), matuhi perentah Dibata alu ngendesken ulih ranita / ulih pencarin ras pendahinta si enggo sialoken arah Dibata. Janah kerja rani e labo sekedar perayan saja tapi sebage sada proklamasi maka PERMATA GBKP eme anak-anak Tuhan si ikelengiNa arah pendahinna sekalak-sekalak.Sipeduaken, ibas nehken kerja rani kempak Dibata ipernehenNa kondisi pusuh ukurta si dem alu pengataken bujur dingen ngakuken maka kai si lit ibas kita e rehna ibas Dibata nari. Labo arah terpaksa tapi arah ukur meriah man baNa si buena rikutken pasu-pasu si iberekenNa man banta. Ertina maka persembahen kerja ranita e me si mehulina si bereken man Dibata ( yang terbaik yang berguna dan bukan sisa-sisa bahkan bisa menjadi bibit tanaman berikutnya ). Sipeteluken, selaku PERMATA GBKP, si genduari lanai bo kerina pendahinta ku juma, tapi enggo erbage-bage bentuk pendahinta sekalak-sekalak bahken lit denga kang si sekolah ( SMA sederajat ras KULIAH ). Tentu ibas kiningudanta nari pe kita arus erlajar guna ikut muat bagin nehken kerja rani. Sebab ibas kita enggo muat bagin nehken persembahen kerja rani, kita enggo ertanggung jawab ibas kinitekenta alu mehamat man Tuhan Dibata si mada kegeluhen, kecukupen ras kinihumuren tinepaNa radu ras kerina kalak si enterem subuk kalak musil, kalak bayak, kalak si sitik buatenna bage pe si melala buatenna. Ertina keriahen kerja rani e tuhu-tuhu ernanam min nandangi kalak si deban, la kita ngenca si ngenanamisa pasu-pasu Dibata e tapi pe ikut nanami kalak si deban. Ibas PERMATA GBKP ikut muat bagin ibas kerja rani tahun enda, PERMATA GBKP enggo ikut mpeteguhi persadanna ras Dibata sekaligus ras temanna sada kiniteken i belang-belang daerah pelayanen GBKP. Sebab gereja ras kerina kegiaten pelayanenna membutuhken pembiayaan. Janah sumber pembiayaan e la banci lang litna kesediaan tep-tep ngawan ni perpulungen guna mereken kontribusina si igelari alu 'persembahen'.

IV. AKSI
PERMATA GBKP Ikut Muat Bagin Erbahan Kerja Rani.

Selamat mpehaga Dibata man banta kerina PERMATA GBKP alu mereken simehulina man Dibata arah kerja ranita ibas tahun 2019 enda.

"NAMU UKUR KUTANA SEH BELANGNA

RIDI KU LAU KULAP ERBANCA JORE UKURTA

ERMERIAH UKUR NGGEJAPKEN PASU-PASUNA

PEHAGA DIBATA ALU MEREKEN SI MEHULINA KERJA RANITA"

V. USULAN ENDE-ENDEN