Pekan Iman Anak Dan Remaja GBKP - Ngantusi Anak I Bas Kegiatenna ( Bahan PA Moria )

Bahan Bimbingen PA Moria Minggu, 16 - 22 Juni 2019
Pekan Iman Anak Dan Remaja GBKP ( PIARA )

SI MAN OGEN : Lukas 2 : 41 - 52

T E M A: NGANTUSI ANAK I BAS KEGIATENNA

T U J U N : Gelah Moria

Meteh kuga Jesus mereken pengangkan man orangtuaNa
Ngajuk anak ngikuti dahin-dahin gerejawi ras la er-aru ate tupung anak e ngikuti kegiaten Gereja (PIARA).

METODE PA : Diskusi / Aksi

Kata Penaruh
Erbage-bage caranta guna ngarak-ngarak kegeluhen anak-anakta, i bas mpebelin-belinsa. Si perdiateken kerina dampar perkembangenna, subuk kulana, perukurenna ras pertendinna. Megati kita erlajar ras erpenungkunen man si erpemeteh kerna anak bagepe siniperluken anak-anak e rikutken umurna. Salah sada cara ndidik ( ngajarken, ngarak-ngarak ) anak-anak si lepak eme pola asuh "over profektif". Ertina mejagasa, ku japa pe anak e la banci, panganna erpilihen, temanna pe erpilihen kedungenna anak e iarapken si mehulina saja ilakokenna, idalankenna ras iusihna gelah pagin anak e pe mehuli saja ( anak manis / anak baik ).

Cara si bage labo payo, erkiteken labo si mehulina saja si lit bas doni enda. Kedungenna anak e jadi perbiar, la beluh erteman, la mandiri, menande ras mebapa pe. Kedungenna la beluh erbahan keputusen erdandanken megati ipengaruhi pendapat orangtua.

Arah PA-nta wari enda, erlajar me kita Moria kerna cara pengajaren ras pengarak-ngarak kalak Jahudi nandangi anakna. Mari si pelajari kerna si mehuli i bas pengajaren kalak Jahudi e nari.

Mpebagesi Pengangkan Kerna Ogen.
Pengogenta wari enda, nuriken kerna perdalanen kegeluhen Jesus mulai IA tubuh seh ngasa umurna 12 tahun. Tupung umur Jesus 8 wari, IA enggo iendesken ku Rumah Pertoton. Rikutken aturen kalak Jahudi i je me IA isunatken, eme benanna pengajaren pertendin / keagamaan man Jesus. Kenca bage, tupung umurna 12 tahun ibaba orangtuaNa me Ia erdalan 3 wari ku Jerusalem guna mperingeti Paskah rikutken aturen kalak Jahudi ka pe ( Keluaren 12 : 1 -36 ). Kenca ngikuti perayan paskah enda me maka anak igelari 'Anak Taurat'. Perayan Paskah, teptep tahun iperingeti kalak Israel alu mulihken ku Jerusalem amin i ja gia kalak Israel e ringan.

I bas umur Jesus si pe sepuluhduaken, ikut me IA ras nande-bapaNa,ras rombongen i Nasaret nari ku Jerusalem guna perayan Paskah alu erdalan nahe 3 - 4 wari. I bas rombongen si mbelin e biasana anak-anak erdalan anak-anak, ben wari tupung ngadi mulihken me ia ku orangtuana. Bagenda me perdalanen e mabai keriahen ukur ras kesempaten man kerina jelma guna banci si tandan ras si oraten tutur seh maka labo jadi kearun ate kal man Jusup ras Maria asum perdalanen mulih seh ngayak ben wari Jesus la njumpai ia duana. Pengakap Maria ras Jusup, Jesus tetap i bas rombongen e alu ngerembakken dirina ras kade-kadena si deban.

Kenca sada wari perdalanen lalap la idahsa Jesus, maka kidaram me ia duana. Isungkunina kerina kade-kade si erdalan arah pudi narus seh mulihken ia ku Jerusalem. I bas wari peteluken ( 1 wari enggo erdalan muat mulih ku Nasaret, wari peduaken erdalan mulihken ku Jerusalem, wari peteluken ndarami Jesus i Jerusalem) idapetina me Jesus i Rumah Pertoton kundul ras guru-guru agama Jahudi, megi-megi kerna pengajaren guru e. Si jadi kemamangen, beluh kal Jesus njabap penungkunen guru-guru e. Tupung Jusup ras Maria njumpai Jesus, ituduhkenna keriahen ukurna sabap ndube aru ate kal atena kerna kecibal Jesus. Tapi Jesus mereken jabab si la iangkai Maria, bage gia tetap nge iikutkenNa nande-bapaNa mulih ku Nasaret, reh belinna Jesus dingen reh tambahna pe pemetehNa

Pengkenaina.
Pesta Iman Anak dan Remaja ( PIARA ) si enggo kesemalen ras tanda-tanda perayan si mbelin man anak-anak Gerejanta GBKP ( jadi Icon, Trend ras Brand ) GBKP, enda me ulih perkunjungen pengurus KAKR Moderamen ngikuti sada kegiaten si mbelin i Jerman, eme ‘Kirchentag' ( hari Gereja ) tahun 1991. Kirchentag eme sada kegiaten si iprakarsai jemaat Jerman i bas tahun 1949 si tujunna eme guna mpegegehi kiniteken, nikapken jemaat ngangkai tanggungjawab nandangi Gereja, njemba perpulungen la saja ngukurken dirina saja tapi pe banci ngidah doni enda secara lebih luas. Mulai tahun 1954 Kirchentag jadi kegiatan si ilakoken tiap dua tahun sekali, i ja kerina kalak Kristen i Jerman ras-ras 5 wari dekahna ngerayakenca. Acarana berlangsung i bas piga-piga kota si enggo itentuken panitia, alu kegiaten si erbage-bage ( i stadion, i gereja ras ingan-ingan umum ). Mbue pe si reh ku Jerman / kota si itentuken panitia kusus guna ngikuti Kirchentag. Ngidah manfaat, semangat ras kebersamaan Si cukup kuat i bas kirchentag enda emaka GBKP erbahan sada kegiaten si fokusna eme man anak-anak, eme si gelari kita PIARA.

Pas kal bagi bahan oratenta wari si sendah i ja kalak Jahudi ijapa nari pe mulih ku Jerusalem guna ngerayaken Paskah ( perayan agama Jahudi si mbelin ), bageme situhuna pemaknan kerna PIARA enda, kerina anak ras remaja ijapa nari pe mulih guna erpesta kiniteken ( PIARA ). Guna si tandan, si pegegehen kiniteken, guna ngajarken tanggungjawab nandangi Gereja bagepe mabai anak ngidah doni enda alu metode kebersaman kidekah pelaksanan PIARA. Paksa sie Jesus pe lenga ingawanken emaka PIARA pe man anak-anak si lenga ingawanken.

I bas konsep bangsa Israel lit 3 wari raya si mbelin kal maknana man bangsa Israel eme: Wari raya pondok daun, wari raya paskah ras wari raya roti tidak beragi. Janah teluna wari raya enda sentralna eme i Jerusalem. Bagi bangsa Israel erdalan 3-4 wari tentu asa si ikut i bas rombongen e saling mperdiateken ia, saling memotivasi, ercakap-cakap kerna pengalamenna si pelain-lain ras mbue pengalamen-pembelajaren si meherga idatken tep-tep kalak i bas rombongen e si la terpelajari i bas sistem pendidiken secara formal. Bageme pe i bas PIARA enda, perlu kal kita ngenehen i bas dampar si bagenda rupa. Mbue kal pelajaren si banci idatken anak-anakta kidekah ngikuti PIARA. Antara lain:

Anak-anakta erlajar berbagi, anak e mediate (ingan tunduh, ingan ridi, berbagi selimut, berbagi makanan).
Anak-anakta erlajar berinteraksi (erdalan ras-ras, man ras-ras), nggeluh i bas kesederhanan.
Anak-anakta erlajar terampil (njaga barang-barangna, njaga kesehatenna).
Anak-anakta erlajar jadi anak si megegeh, tahan banting, mandiri ras mampu mengambil keputusan sendiri.
Janah bagi wari raya pondok daun ras roti tidak beragi, kuga bayakna pe si reh ku Jerusalem enda, inganna tading eme pondok daun, si man panganenna eme roti si la eragi. Adi sedekah enda ia sikap akapna i rumahna, ntabeh panganna, tapi reh ia ku Jerusalem guna ras-ras subuk bayak ras musil, seri kerina.

Jadi situhuna PIARA labo saja terjeng konsep program si iaturken panitia, tapi lebih asa sie PIARA secara "Alkitabiah" pe mbue mereken pembelajaren man anak-anakta eme gelah banci anak-anakta enda ngidah komunitas kebersaman si seh kal teguhna ngaruhna guna masa depanna, tentu guna masa depan Gereja pe Jadi selaku Moria perlu kal si dukung anakta ngikuti kegiaten Gereja secara umum sabap i je turah keleng ate man Gereja, tanggungjawab anak-anakta, bagepe pembentuken karakter si seh kal pentingna. Terkusus i bas PIARA tahun enda, tuhu anak-anakta la ras kita 6 wari dekahna, la si idah, la si eteh kai si bakal jadi man bana, mbue biaya si iperlukan pe guna mpeberkat ia. Ula aru ateta kerna perpanna, kecibalna ras sidebanna, PIARA jadi kesempaten si meherga kal jadi persinget-ingeten segedang geluhna, njemba ia ras mbentuk karakterna pe. Emaka dukunglah, bere kesempaten man bana guna ertanggungjawab kerna dirina.

Diskusi :

Jesus melala ndatken pengalamen ras pembelajaren si meherga, la saja arah orangtuana si tutus erkiniteken, tapi pe arah lingkungen masyarakat ras Rumah Pertoton ( sue ras bahan oratenta ). Cubaken dage diskusiken i bas jaman gundari enda, selain pendidiken formal ras orangtua, faktor kai dage si lebih mpengaruhi pertumbuhen karakter anakta, janah kuga ulihna?
Kai nge akapndu si erbahanca anakta penting ngikuti kegiaten Gereja, kususna PIARA? Ngukuri buen tantangen kedonin si mabai ras mereken pengajaren si papak man anakta. Turiken pengalamendu!

AKSI :