Pulung Tupung Kebaktin Kerja Rani

PULUNG TUPUNG KEBAKTIN KERJA RANI
Bahan Bimbingen PJJ Tanggal 7-13 Juni 2026
(Kerja Rani)

Ogen : Bilangen 28:26-31

Persembahen asum Kerja Rani
(Im 23:15-22)
26. I bas wari si pemena asum Kerja Rani e, asum iendeskenndu persembahen gandum si mbaru iperani man TUHAN, arus kam pulung erbahan kebaktin, janah la banci erdahin.
27. Bahan sada persembahen tutungen jadi sada bau si merim iakap TUHAN: dua jenggi lembu si nguda denga, sada bajar biri-biri, ras pitu anak biri-biri bajarna umur sada tahun, kerina si la lit man pandangen.
28. Bahan persembahen buah gandum si payo i bas tepung nari icampur ras minak saitun: telu kilo ras tep-tep jenggi lembu, dua kilo ras bajar biri-biri.
29. Janah sada kilo ras tep-tep anak biri-biri.
30. Tole persembahken pe sada bajar kambing jadi persembahen pengalemi dosa, janah alu bagenda bahan acara pembersihen dosa man bangsa e.
31. Bahanlah persembahen enda ras persembahen anggur jadi tambahen persembahen tutungen ras persembahen buah gandum si tep-tep wari.

Model PJJ : KESAKSIN

KATA PERLEBE
I bas kegeluhenta, tuhu mbue pasu-pasu Tuhan si gejapken kita. Janah selaku kalak si nginget dingen ngukurken pasu-pasu Tuhan e, rusur ka nge kita ngataken bujur alu nehken persembahen tanda riah ukurta secara pribadi ku gereja. Amin bage gia, secara khusus i bas persembahen Kerja Rani enda, isingetken man banta segelah kita pulung ngelakoken Kerja Rani. Tentuna, lit nge kekhususenna e maka isingetken gelah pulung erbahan kebaktin Kerja Rani. Pengangkaan enda ka me si perlu si pebagesi segelah alu meriah ukur silakoken Kerja Rani. Ola min si akap jadi beban si mberat tupung kita ngelakoken Kerja Rani. Rikutken oraten PJJ-nta enda kita tole banci ngangkai kerna kepulungenta erbahan Kerja Rani. Alu bage kita pe banci nikapken jabu-jabunta, PJJ-nta bage pe Runggun Gereja lako pulung meriah erbahan kebaktin Kerja Raninta.

ISI
   Kitab Bilangen igelari Kitab Bilangen erkiteken i bas kitab enda lit ituriken dua bilangen sensus bangsa Israel si ndarat Mesir nari. Bage pe melala ituriken kerna daftar bilangen pemimpin singelakoken sensus, daftar persembahen si harus ibaba tupung nangkuhken batar-batar bage pe daftar persembahen-persembahen si ibaba tupung wari raya si itetapken Tuhan.
   Amin bage gia, Kitab Bilangen enda pe nuriken kerna perdalanen bangsa Israel i taneh mesawang, mulai kin ndarat Mesir nari seh ku baluren Moab, 40 tahun kenca si e. I baluren Moab me bangsa Israel nimai bengket ku taneh Kanaan, taneh perpadanen e. I bas perdalanen i taneh mesawang enda, bangsa Israel ibentuk kinitekenna. Tuhan si enggo mulahi dingen maba bangsa Israel ndarat i Mesir nari irespon bangsa enda alu jungut-jungut. Kinilasetian bangsa enda erbahanca generasi si ndarat i Mesir nari la banci bengket ku taneh perpadanen e. I bas taneh mesawang enda me Tuhan nikapken generasi si mbaru guna mengketi taneh perpadanen e. Tuhan nikapken generasi si mbaru, e me generasi si nggeluh selaku bangsa Tuhan si patuh ngikutken perentahNa. Tuhan nikapken generasi enda alu mpetangkas aturen-aturen, hukum kerna pantangen, pengaturen kemah perjumpan, tugas kalak Lewi bage pe aturen kerna persembahen-persembahen.
   Khususna i bas ogen PJJ-nta enda ituduhken me aturen persembahen asum Kerja Rani.
1. Rikutken Kitab Imamat 23:15-21 ras Ulangen 16:9-12, maka kalender pelaksanan Kerja Rani e me 50 wari kenca Paskah. E ngatakenca maka lit hubungen Paskah, e me peristiwa pembebasen bangsa Israel i Mesir nari. I bas Ulangen 8:7-10, ipetangkas kerna sura-sura Tuhan mbebasken bangsa Israel. Sura-sura Tuhan segelah i bas taneh perpadanen e Tuhan mereken kegeluhen man bangsaNa alu kai pe si iperluken bangsaNa e. Nginget si e kerina maka man bangsaNa iperentahken segelah ulih peranin buah gandum si pemenana e ipersembahken man Tuhan. Enda me si igelari persembahen Kerja Rani. Arah persembahen Kerja Rani enda me bangsa Israel arus ngataken bujur dingen la ngelupaken Tuhan si enggo erpadan mereken taneh si mehumur dingen pagin bangsa e ngenanami ulih taneh si mehumur e. E maka Kerja Rani enda nuduhken bukti penjayamen Tuhan nandangi kegeluhen bangsa Israel. Kerja Rani e sebagai penginget man bangsa Israel maka Tuhan tetap nge i bas padanNa lako ngepkep bangsaNa. Kerja Rani e me pengataken bujur man Tuhan si enggo mbebasken dingen mereken ingan nggeluh, ingan erdahin dingen mereken ulih pendahin. I bas kegeluhennta genduari enda kita nggejapken dingen ngakukennca maka i bas Jesus Kristus kita nggo ndatken pembebasen i bas kuasa dosa nari dingen ndatken jaminen penyamen Tuhan subuk i bas kegeluhennta genduari enda bage pe kegeluhen si rasa lalap. Kerja Rani pe jadi sada tanda man banta kerna penjayamen Tuhan, pengkelengi Tuhan man banta dingen pengataken bujurta man Tuhan Dibata. E maka Kerja Rani-nta pe silakoken kenca Paskah ras wari pe lima puluhken (Pentakosta).

2. Asum Kerja Rani, e me ngendesken persembahen gandum si mbaru iperani man Tuhan, bangsa Israel arus pulung erbahan kebaktin. Engkai maka arus pulung erbahan kebaktin? Bangsa enda pulung erbahan kebaktin erkiteken padan Tuhan e pe isehken man kerina bangsa Israel. Bangsa e pulung lako nginget maka man kerina bangsa Israel e nge padan e enggo isehken Tuhan. Erkiteken padan e man kerina bangsa Israel, e maka bangsa enda pe arus pulung ras-ras ngataken bujur. Enda nuduhken maka pasu-pasu e man kerina bangsa Isarel, labo hanya sekalak-sekalak. Arah pulung erbahan kebaktin, bangsa enda saling mpeteguhi identitasna selaku bangsa Tuhan, sada ras si debanna jadi persinget dingen pergegeh maka pasu-pasu Dibata e tuhu-tuhu tangkas teridah. Adi sibandingken ku Kitab Ulangen 16:11, maka kepulungen e me kepulungen ras-ras ermeriah ukur. Keriahen pribadi jadi keriahen bersama/kolektif (anak-anak, suruh-suruhen, kalak Lewi, kalak pertandang, anak melumang, ras diberu balu-balu ras-ras kerina ermeriah ukur). Arah kepulungen e pe jadi pelajaren kiniteken man anak-anak kerna pengepkepen Tuhan i bas kegeluhen kalak si erkiniteken (penerusan iman kolektif).

E maka genduari pe, Kerja Raninta silakoken alu pulung ras-ras guna ngakuken maka kerina kita radu ras ngaloken penebusan Kristus. Kita radu ras ngejapken penjayamen Tuhan, radu ras ermeriah ukur ras kerina kalak si butuh penampat segelah radu ras ka ngejapken pasu-pasu Tuhan. Kerja Rani e pe jadi kesaksin dingen pendidiken kiniteken man anak-anakta. E maka i bas kepulungen Kerja Rani-nta pe aruslah melibatken anak-anakta.

3. I bas ayat 27-31, idaftarken kerna kai saja si jadi persembahen dingen kuga nehken persembahen tupung pulung ngelakoken Kerja Rani e. Idaftarken rubia-rubia si jadi persembahen tutungen, si merim iakap Tuhan. Bage pe persembahen buah gandum si payo, ikut pe minak saitun ras anggur. Enda kerina idalanken alu aturen si enggo itentuken.

I bas kepulungennta genduari enda, asum kita nehken persembahen Kerja Raninta e maka pulunglah kita lebe ras anak jabunta, radu ras se isi jabunta ngukurken, nginget dingen ngakuken pasu-pasu Tuhan, khususna pembebasen si enggo sialoken idur Kristus nari. Jenari sisikapkenlah persembahen si "merim" dingen "payo" ku adep-adepen Tuhan. Sitotokenlah ku Dibata segelah tetap ukurta nehken persembahen Kerja Raninta dingen persembahennta e tuhu-tuhu "merim" dingen "payo" iadep-adepen Tuhan.
Kita pe ngejapken maka lit ka nge si la rulih jumanta, binaganta, usahanta entah pe ngadi i bas pendahinnta nari. I bas situasi si bagenda, siingetlah maka Kerja Rani e me "ulih peraninta" arah kegeluhen si ibereken Dibata man banta. Adi kita la rulih, tentuna la bo ka ngatakenca maka kita la ipasu-pasu Tuhan. Payo, la lit ulihta secara materi, tapi lit ulih si deban si ibereken Tuhan. Kitab Habakuk 3:17-19, nuriken alu tangkas maka aminna la gia rulih, tapi ibahan Tuhan ka nge kegeluhennta e "bagi nahe belkih", paguh perdalannta dingen la celus. Enda ka me si erbahanca meriah ukurta. Bage pe kita, i bas masa-masa sulit, lit nge ibahan Tuhan dalanna kita banci nehken persembahen si "merim" dingen "payo", la gia secara materi, misalna gegeh, waktu, ketrampilennta ikut muat bagin i bas ngelai. Prinsipna, rikutken 2 Korinti 8;12, ukurta ersuruh guna mere erpalasken kai lit i bas kita e me si jadi persembahennta man Tuhan Dibata.

PENGKENAINA
Rikutken oraten PJJ-nta enda, ersikaplah jabunta lako erbahan persembahen Kerja Raninta. Menaken bas jabunta me kita lebe pulung erbahan Kerja Rani. Raduken se isi jabunta, kita ras-ras ngukuri, nginget, ngejapken dingen ngakuken pembebasen si enggo ilakoken Tuhan. Tep-tep anggota jabu banci nuriken kesaksinna kerna pasu-pasu Tuhan si tetap nge ngarak-ngarak kegeluhenna. Nginget pasu-pasu Tuhan si enggo mbebasken kita arah kuasa dosa nari dingen arah pasu-pasu Tuhan ka me kita banci ngusahaken kegeluhen siibereken Tuhan denga maka ersada ukur bas jabu e nehken ulih si pemena lako jadi persembahen Kerja Rani jabu e. Ulih si pemenana ngatakenca, maka Tuhan si mada kerinana, termasuk pe kegeluhennta. Pasu-pasu Tuhan me si jadi pemenana kegeluhenta. Ulih si pemenana nuduhkenca maka kita erpengendes dingen ernalem man Tuhan si merekenca labo kita mbiar nandangi si lit i bas kita. Ulih si pemenana nuduhken kepastin kiniteken i tengah-tengah situasi si sulit pe. Makna Kerja Rani e lah lebe si pepaguhi i bas tep-tep jabunta (Penungkunen Engkai erbahan Kerja Rani lebe tangkas). Ula langsung ku bas penungkunen si pemenana "asakai persembahen Kerja Raninta" tahun enda? Tek kita rikut-rikut nge persembahen e jadi persembahen si "merim" dingen "payo" adi tangkas lebe alasenna "engkai" asangken "asakai."
Bage pe si sikapkenlah kepulungenta erbahan Kerja Rani i bas tep-tep PJJ entah pe kepulungen secara Runggun Gerejanta. Kepulungennta e jadi dalan kita ras-ras ngataken bujur, ermeriah ukur, kesaksin dingen pendidiken kiniteken man anak-anakta kerna penjayamen Tuhan Dibata. Tuhan si mpengasup kita nikapken kepulungenta erbahan Kerja Rani tahun 2026 enda.

DISKUSI
1. Kai nge siakap erti dingen maknana kita pulung ngelakoken Kerja Rani e? Banci pe si bandingken ku kita nehken persembahen pengataken bujur secara pribadi.
2. Oge Habakuk 3:17-19. Kai nge sigejapken ertina "bagi nahe belkih" i bas geluhta si erbahanca paguh dingen la guling kita i bas ndalani masa-masa sulit geluhta enda? Enda ka me si erbahanca kita ngasup ngidah si mehuli, ermeriah ukur dingen makeken kegeluhennta jadi persembahennta man Tuhan.

USULEN ENDE-ENDEN:
1. KEE GBKP No. 354:1,2,3 ( KLIK JUDUL UNTUK MELIHAT TEKS LIRIK )
2. KEE GBKP No. 291:1,2 ( KLIK JUDUL UNTUK MELIHAT TEKS LIRIK )
3. KEE GBKP No. 320:1,2 ( KLIK JUDUL UNTUK MELIHAT TEKS LIRIK )
4. KEE GBKP No. 420:1,2,3 ( KLIK JUDUL UNTUK MELIHAT TEKS LIRIK )

DAFTAR BACAAN :

Pdt. Tanda Pinem, S.Si (Teol)

HP/WA: 0853-6367-9900

---- PJJ MINGGU SI REH ILAKOKEN I BAS JETRO ----