Mereken Kesempaten Man Anak Singuda

Bahan Bimbingen PA Moria
30 Agustus 2026 - 5 September 2026
HUT Permata Kreatif

SI MAN OGEN : Keluaren 35: 30-35

Tukang-tukang si beluh erbahan Kemah si Badia
(Kel 31:1-11)
30. Nina Musa man bangsa Israel, “TUHAN enggo milih Besalel, anak Uri, kempu Hur i bas suku Juda nari.
31. Ia enggo idemi Dibata alu kesahNa, janah enggo iberekenNa man bana kepentaren, kengasupen, ras pengertin erbahan kerina barang-barang si mejilena,
32. guna ngerencanaken potongen barang si mejile, jenari erbahanca i bas emas, pirak ras tembaga nari;
33. erbahan permata-permata ras namakenca i bas bingkena; erbahan ukir-ukiren kayu, ras erbage-bage dahin si deban, erbahan barang-barang si mejilena.
34. Man Besalel ras man Oholiap anak Ahisamah, i bas merga Dan nari, enggo ibereken TUHAN kengasupen ngajarken kebeluhenna ertukang man kalak si deban.
35. Man bana duana enggo ibereken TUHAN pemeteh i bas erbage-bage dahin jadi tukang ukir, ras tukang tenun si ngasup erbahan lenen halus; wool biru, ungu, ras megara; ras uis si deban. Ia ngasup erbahan kai-kai pe janah pentar ka pe ngerencanaken potongen barang si mejile.

TEMA : Mereken Kesempaten Man Anak Singuda

TUJUN : Gelah Moria :

Ngusih Musa si nandai ras makeken potensi si lit i bas Besalel ras Oholiap.
Ndaftarken potensi si lit i bas anak Permata

METODE PA: Diskusi ras Aksi

Kata Penaruh
Kitab Keluaren nuriken kerna perdalinen bangsa Israel i padang gurun kenca ngepari Laut Kolsum. I bas kepemimpinen Musa lit kurang lebih 40 tahun dekahna i padang gurun. Erbage situasi si inanamina; muas, melihe, latih erdalin, entah ngenanami meriah ukur. I je ia ngaku ngikutken Tuhan, la ndekahsa minter jungut-jungut dingen nilah i bas Tuhan nari. Tapi i bas dampar sideban, kitab Keluaren e nuduhken kerna kesabaren ras pemeliharan Tuhan nandangi bangsa Israel. Igambarken desken rajawali maba anak-anakna i datas kabengna. Icukupken Tuhan keperlun bangsa e, dingen ipekena-kenana kerina kegeluhenNa. I bas perpudi kitab enda bangsa e isuruh majekken Kemah si Badia, ingan perjumpan Tuhan ras bangsaNa. Teks PAta enda termasuk bagin perpudi kitab Keluaren si ngerana kerna Tuhan milih piga-piga anak singuda guna majekken Kemah si Badia.

Mpebagesi Pengangkan Kerna Ogen
I bas kepemimpinen Musa, isuruh Tuhan bangsa Israel majekken Kemah Si Badia. E maka alu meriah ukur enterem bangsa e muat bagin mereken si lit i bas ia guna pembangunen kemah e. Lit si maba kancing perhiasen, anting-anting, cincin, bura ras erbage perhiasen emas. Lit si maba lenen halus, wool biru, ungu, megara; uis si ibahan i bas bulu kambing nari. Lit si maba pirak ras tembaga, ras lit si maba kayu jati. Lit si maba batu permata delima ras batu- batu permata sidebanna si itamaken i bas batu epod, paken imam ras tutup tentenna, bage pe rempah-rempah ras minak wangi si merim guna lampu-lampu, guna minak penangkuhen imam ras man barang tutungen si merim. Kerina enda ipersembahken man Tuhan lako majekken Kemah si Badia.
I bas majekken Kemah si Badia e, Musa milih anak-anak singuda lako jadi tukang, pengawas ras singajari teman-temanna. Ipilih Musa Basalel anak Uri, kempu Hur i bas suku Juda nari ras Oholiap anak Ahisamah, i bas merga Dan nari si enggo idemi Dibata alu kesahNa. Idemi Dibata alu kesahNa, ertina Tuhan mereken kepentaren, kengasupen, ras pengertin si husus la bali ras man kalak sideban gelah ngasup ia jadi pemimpin i bas majekken Kemah si Badia e. Pemere Dibata e banci si nen arah tabel enda:

Kepentaren, pemeteh ras pengertin bas Dibata nari mereken sadasemangat man bangsa Israel maka kerina sienggo iberekenna kitik entah mbelin gia labo sia-sia, lit si beluh njadikensa jadi barang-barang si mejile, ras erguna i bas majekken rumah pertoton e. Musa selaku pemimpin bangsa Israel paksa si e ngidah kebeluhen si lit i bas anak-anak singuda e, e maka iendeskenna dahin e man bana lako majekken Kemah si Badia.

Pengkenaina
Arah teksta siidah maka anak singuda nggit siajar-ajaren, nggit erbagi pemere Dibata si lit i bas ia. Tuhu pemere Dibata man anak-anakta pelain-lain, saja adi kerina ia nggit siajar-ajaren melala dahin si banci idahikenna. I bas kiningudanna tentu semangatna pe erburak-burak denga. Perlu kal orangtua ngidah ras nandai pemere-pemere Dibata si lit i bas diri anak-anakta si nguda (PERMATA) janah sibereken man bana kepercayan lako ndahiken dahin dahin i bas keluarganta, perpulungen, ras gereja. Genduari erbage kal pemeteh si lit i bas anak singuda, lit seniman, penjait, photografer, lit si beluh dekorasi, editor, lit i bas bidang seni tari, pemusik, songleader, lit si ahli bahasa, lit i bas IT, ras sidebanna. Kerina e Dibata kap uluna, ikembangkenna arah nggit erlajar dungna jadi sada keahlinna. Adi si tandai kerina kebeluhen anakta tentu banci iendesken dahin-dahin gereja rikutken kebeluhenna. Sifasilitasi kiniersadan anak-anak singuda, gelah ia pe siajar-ajaren. I bas HUT PERMATA GBKP ke 78 si usulken ku runggun gelah kerina PERMATA ertugas i bas kebaktin minggu; selaku songleader, pemusik, singalo-ngalo bas pintun gereja, kolektan, erkira teremna perpulungen si ku gereja, liturgis (PERMATA si enggo jadi serayan), tim IT ras sidebanna. La terjeng sie libatken pe PERMATA jadi panitia natal runggun, panitia Kerja Rani runggun, panitia PASKAH entah seksi inventaris gereja, banci ka tim meliput data statistik runggun ras sidebanna.

Diskusi Ras Aksi
1. Kira-kira kai nge akapndu kelebihen Basalel ras Oholiab maka banci ia ipilih jadi pemimpin majekken kemah si Badia?
2. Mari sidaftarken kengasupen PERMATA i bas sektor ras runggunta. Kira-kira i bas bidang kai ia banci si libatken ndahiken dahin-dahin gereja? E maka siusulken ku runggun (BPMR) gelah erbahan jadwal PERMATA jadi petugas ibadah minggu. Si jadi aksinta, peseh ucapen selamat Ulang tahun man anakta PERMATA i bas sektor ras runggunta alu erbahan video singkat, e maka si share man anakta arah WA group, IG, entah FB.

Pdt Nurbety Br Ginting