Ersembah Man Dibata

Bahan Bimbingen PA Mamre
Tanggal 23-29 Agustus 2026
( Teologia Bapa VII : Bapa Simbaba Jabu Ersembah / Ibadah Keluarga )

Ogen : Kejadin 35:1-4

Jakup ipasu-pasu Dibata i Betel
1. Nina Dibata man Jakup, “Lawes lah kam minter ku Betel. I jah me kam ringan. Pajekken i jah sada batar-batar ingan ersembah man bangKu. Aku kap Dibata si petandaken baNa man bandu i Betel sanga kam lompat nadingken seninandu Esau.”
2. Erkiteken si e ngerana Jakup man keluargana ras man kerina kalak si ras ia, “Ambekkenlah kerina dibata-dibata si deban si lit i bas kam; urasi bandu maka kam bersih kerina, jenari pakelah uisndu si bersih.
3. Sitadingken me ingan enda, lawes kita ku Betel, i jah kupajekken ateku sada batar-batar ingan persembahen man Dibata si enggo mulahi aku sanga i bas kiniseran, si enggo ngarak-ngarak aku kujapa pe aku lawes.”
4. E maka ibereken kalak enda kerina dibata-dibata si lit i bas ia man Jakup, ras anting-anting si ipakena pe. Itanemken Jakup kerina barang-barang i teruh batang kayu si galang deher Sikem.

Tema : Ersembah Man Dibata

Tujun : Gelah Mamre :
1) Meteh semangat Jakub ibas mabai jabuna ersembah man Dibata
2) Jadi usihen ersembah ibas Jabu

I. KATA PENARUH
Kita nggeluh ibas zaman si ermajuna. Ibas kemajun zaman enda tentu melala hal positif ras negatif pe si tentu i gejapken ras-ras. Ibas kemajun zaman pe siidah erbuena kalak si mengalami ganguan ibas kesehaten mental. Emaka ibas paksa si genduari isu ketahanen keluarga jadi isu penting, uga kerina keluarga ngasup si sampat-sampaten guna mpenahang perbeben si lit bas anggota jabu. Adi si baba ku bas kinitekenta tentu gegeh kengasupenta eme bas Dibata. Ras guna banci kita meteh sura-sura Dibata e tentu la banci ilepasken arah kerembakenta ibas kata Dibata. Bahan PA nta minggu enda mabai kita guna jadi mamre si mabai jabu ersembah man Tuhan ibas ibadah keluarga sebagai salah sada cara bertahan ibas buene perbeben kegeluhen.

II. URAIAN TEKS
   Bahan PA wari enda la banci ilepasken arah Kejadin 34 ija sebelumna isuratken sada peristiwa pembunuhen si ilakoken anak-anak Jakup man kalak Kanaan erkiteken Dina anak Jakup enggo i cedai Sikem. Kenca kerina ibunuh turah kebiaren man Jakup. Mbiar ia adi kerina kalak Kanaan ersada arih ngelawan nggo pasti talu. Enda me situasi si jadi latar belakang Kejadin 35.
  Emaka nina Dibata laweslah ku Betel. Menarik guna ngidah perintah si ibereken Dibata man Jakup gelah pindah nadingken Sikem si melala i je beban, konfik, ingan kalak si meluat ras keluarga si la erkiniteken. Dibata ndilo Jakup gelah pindah ku Betel. Betel bas bahasa aslina banci iertiken rumah Allah. Maka perentah Tuhan la terjeng perpindahen ingan tading tapi pe perpindahen kiniteken. Alu kiniteken man Dibata maka kesusuren Jakup ikawali Dibata i Rumah Dibata (Betel).
  Pas iakap Jakup kerina si ikataken Dibata maka nina man keluargana kerina ambekkenlah kerina dibata-dibata si deban, lakoken pembersihan diri ras pe pake uis si mbaru (ay.2). i Betel kerina si enda tentu la nai ngena iakap Dibata guna i dalanken. Gelah ngaloken perlindungen bas Dibata nari, Jakup sadar maka ia pe harus ngelakoken si telu enda ndai. Nadingken kerina dibata-dibata e encidahken pemurnian iman. Pembersihen diri e encidahken harusna lit perotabaten moral ras gantiken uis e encidahken sada bentuk pembaharuan identitas diri.
   Kenca si e isaksiken Jakup me ise Dibata e man bana man anak jabuna. Arah perdalanen kegeluhenna Jakup nggo ngejapken uga Dibata ngarak-ngarak kegeluhenna kujapape ia pernah lawes, la enggo ia itadingken Dibata. Erkiteken si e sura-surana eme lawes ku Betel ras majekken ingan ersemban man Dibata ije. Pas iakap keluarga Jakup kai siikatakenna e maka kerina pe ngelakoken kai sikataken Jakup alu nadingken kerina dibata-dibata dingen anting-anting si ipakena ras e kerina i tadingken i Sikem. Enda me ulihna kai si ikataken Jakup, maka ia kerina sada keluarga nggo ersada guna nembah Dibata i Betel.

III. PENGKENAINA
Ibas melala perbeben kegeluhen situhuna melala kal referensi kegeluhen si banci jadi rujukennta. Doni enda menawerken erbage bage rujuken kegeluhen man banta ibas ngalaken erbage persoalen kegeluhen. Arah bahanta wari enda si idah maka keluarga Jakup ngikutken referensi doni, balasna kejahaten alu munuh keluarga Sikem si erbahnca kedungenna ia la tenang. Tapi kenca ibegina pendilo Dibata datna me ketenangen. Arah ibadah keluarga si rutin si bahan bas jabunta ateta kerina keluarga secara rutin megiken sora Dibata seh maka ibas ndalani erbage corak kegeluhen kita tetap ngasup milih keputusen si tepat erkiteken kata Dibata me jadi referensinta.
Terdauhen kalak si nggo masuk ku Betel nadingken kebiasan si ndekah, ia i pesikap seh erulina me dirina. Ibadah keluarga enda pe jadi sarana guna mpekena diri. Kalak si rutin erbahan ibadah keluarga i pekana-kena me dirina alu ngorati kata Dibata seh maka tambah warina tambah ulina caranta ndalani kegeluhenta. Emaka enda me jadi pengajuk man banta kerina Mamre gelah kerina bagi Jakup ngajuk jabunta kerina pindah ku Betel (rumah Dibata) alu ras-ras ngelakoken ibadah keluarga.

IV. DISKUSI
1. Adi rikutken bahan PA-ta wari enda, kai ngge maka Abraham kedungenna erbahan ingan ersembah i Betel?
2. Rikutken pengalamenta sekalak-sekalak, kai ngge ulihna adi lit ibadah rumah tangga ibas jabunta sekalak sekalak? Turiken pengalamenta.

USULEN ENDE-ENDEN
1) KEE GBKP No. 283:1-2 ( KLIK JUDUL LAGU UNTUK MELIHAT LIRIK )
2) KEE GBKP No. 348:1-3 ( KLIK JUDUL LAGU UNTUK MELIHAT LIRIK )
3) KEE GBKP No. 204:1-2 ( KLIK JUDUL LAGU UNTUK MELIHAT LIRIK )
4) KEE GBKP No. 385:1 (Persembahen) ( KLIK JUDUL LAGU UNTUK MELIHAT LIRIK )

Pdt. Jefri Alexander Keliat, M.FIl.

HP/WA:0813 6064 5511