Setia Ersembah Man Tuhan Dibata

Bahan Bimbingen PA Moria
Tanggal 14 - 20 Juni 2026
Cara Manusia Mengasihi Allah

SI MAN OGEN : Ulangen 12:29-32

Kata persinget gelah ola nembah berhala
29. “TUHAN Dibatandu ngkernepken bangsa-bangsa negeri e, sanga kam erperang rassa, gelah banci iciati ras iinganindu tanehna.
30. Kenca ikernepken TUHAN bangsa-bangsa e, jaga maka ola iikutkenndu bicara agama kalak e, sabap adi bage kena siding kematen kam. Ola kal icubakenndu mpelajari kuga cara kalak e ersembah man dibatana, alu tujun guna ngusih-ngusih ia.
31. Ola sembah TUHAN Dibatandu seri ras penembahna dibata-dibatana, sabap sanga isembahna dibata-dibatana, ilakokenna perkara-perkara si melket si erbahanca nembeh ate TUHAN. Terlebih-lebih pe igelehna anak-anakna jadi persembahen i bas api i babo batar-batarna.
32. Lakokenlah kerina si enggo kuperentahken man bandu, ola kurangi sitik pe, ola tambahi kai-kai pe.

T E M A : Setia Ersembah Man Tuhan Dibata

T U J U N : Gelah Moria:

• Meteh kata persinget Tuhan Dibata man bangsaNa
• Nulisken orat nggeluh kalak si setia ersembah man Tuhan Dibata

METODE PA : Diskusi

Kata Penaruh

Kitab Ulangen e me kitab si pelimaken bagin Pentateukh, isina e me pidato-pidato Musa sope lenga bangsa Israel bengket ku Taneh Perpadanen. Kitab Ulangen 12, e me sada kitab si itulisken Musa guna ngingetken bangsa Israel maka Israel e me bangsaNa si badia (UI:7). Badia (Indo: kudus) ertina, memisahkan, mengkhususkan dan mengabdikan. Si badia ipeserap i bas si biasa entah pe melket. Israel idilo Dibata jadi bangsa si badia ertina ipeserap i bas bangsa-bangsa si deban nari guna jadi sikerajangen Dibata. Perpadanen si ipelimbarui Dibata nandangi bangsaNa mereken pengajaren si tangkas segelah bangsaNa nggeluh bagi si ngena ate Dibata.

man bangsaNa.

Mpebagesi Pengangkan Kerna Ogen

Ulangen 12:29, nuriken maka TUHAN Dibata si erkuasa nampati bangsa Israel gelah bangsa e ndatken kemenangen janah banci ringan i Kanaan. KuasaNa si nampati tupung Israel erperang rassa. Labo erkiteken gegeh ras pemeteh bangsa Israel, tapi erkiteken peraten Dibata bangsa e ngianisa sue ras padanNa nandangi Abraham, Ishak ras Jakub (Kej. 12:7; 15:18). Taneh Kanaan si i ingani bangsa-bangsa alu budaya ras kiniteken si la nandai Dibata. Bangsa Kanaan itandai alu praktik-praktik agama Pagan, e me Praktek ersembah man Ba'al ras Syera, igelehna anakna jadi persembahen i bas api i babo batar-batar, ritual seksual i bas ibadahna, isembah. janah ibangunna pe tiang/bangunen berhala guna I bas situasi bangsa si ringan i taneh e, TUHAN mpersingeti bangsa Israel gelah ola ngikutken kiniteken kalak e, ula ipelajari, ula iusih' ula icampur ras tata cara nembah Dibata. Cara nembah bangsa Israel man Dibata Ia banci seri ras cara bangsa e nembah dibatana, (menolak sinkritisme) (ay 30-31). Ertina, peperangen guna ngiani taneh enggo imenangken TUHAN, seterusna peperangen bangsa enda e me njagai dirina tetap badia, tandana bangsa e tetap setia ersembah man Dibata. Di kune bangsa e nilah, TUHAN mereken persinget e me kena siding kematen (ay. 30, bdk Ulangen 28).

Pengkenaina

Setia ersembah man Tuhan tentu la terjeng i bas kata-kata saja, tapi teridah arah motivasi ras perbahanenta. Banci sibayangken sekalak prajurit si ersumpah setia nandangi komandanna, labo mungkin erpekat ia ras musuhna, berarti ia la setia. Umpamana perbulangen-ndehara, si enggo erpadan tapi ibagikenna keleng atena nandangi kalak si deban. Keleng ate Dibata arah padanNa enggo isehkenNa man manusia. Kesetianta nandai Dibata labo terjeng aktif erkebaktin Minggu, PA, PJJ ras dahin-dahin sideban tapi teridah arah :

1. Kristus e me pusat kerina si ilakoken kita.

Ngelailah alu ukur sipayo janah kerina guna kemuliaan Kristus. Tentu adi Kristus e me pusat perukurenta, amin pe lit tantangen ras pe si jadi la bagi ukurta la e erbahansa kita lanai setia, mundur, ngadi, entah pe lanai ndahiken tanggungjababta. Ngelai Kristus, alu tetap mereken simehulina arah kedisiplinen ras pe kiniteruken ukurta.

2. Sikapken waktu man Tuhan, labo adi sempat. Mawen posisi Kristus tergantiken alu sura-suranta, umpamana: taren ndahiken kesibukenta, pendahin, entah pe pelayanenta, ngaturken keperlun anak sekolah, ngaturken isi jabu, lanai si inget pe ertoto, ngoge ras ngorati kata Dibata bage pe ersembah man Tuhan. Jangan biarkan hari kita berlalu tanpa berelasi dengan Tuhan.

3. Kita me bangsa pilihenNa e (1 Pet 2.9-10), bagi bangsa Israel siiperentahken TUHAN guna ngeruntuhken penembahen berhala, kita pe sipedauhlah berhala-berhala e i bas geluhta. Lanai kita tek nandangi kuasa dibata-dibata sideban, ajimat, tangkal-tangkal, singian daging, ras sidebanna. Bage pe sipedauh berhala modern i bas kita nari. Si igelari berhala e me kerina i bas doni enda sierbahansa kita ndauh arah Dibata, banci arah duit, karier, popularitas, tekhnologi, kenyamanen nggeluh, pendahin, ras dibata-dibata sideban.

4. Lakokenlah kerina si enggo kuperentahken man bandu, ola kurangi sitik pe, ola tambahi kai-kai pe (ay. 32). Ayat enda ndilo kita nggeluh i bas sada kepatuhen man Tuhan. Kata Dibata e me sukat-sukat kegeluhenta. Perentah Dibata iberekenNa erkiteken keleng ateNa man banta, sabap la ateNa kita bene. E maka i ja pe kita ringan, tetap perentah Dibata sijadiken sukat-sukat si benar, subuk i rumah, i bas pendahin, i tiga, i jambur, i dalan, i bas kerina ingan ras paksa. Kerina ingan ras kecibalta, jadi ingan pelayanenta nuduhken kesetiaan man Tuhan. Tetap sipertahanken nilai kejujuran, ula erpekat ras perguak, ula sibuat adi la kin hakta, tapi siimani maka i ja pe kita ringan, kai pe silakoken, mata Tuhan la tunduh ngidah kecibalta. Kesetiaanta man Tuhan la teridah terjeng i bas perpulungen tapi sicidahken pe arah kerina dampar kegeluhenta.

Diskusi

Moria i bagi ku bas kelompok 3-5 kalak, ras teptep kelompok nulisken jabapenna i bas kertas.

1. Turiken ras suratkenlah bukti kesetian Dibata man bangsa Israel!

2. Ibas pengakapndu enggo nge kam setia ersembah man Tuhan? Adi enggo, turikenlah! Adi lenga, kai nge ndia godan si mbelinna kel si erbahansa Moria la setia ersembah man Tuhan? Daftarkenlah.

3. Kenca er-PA enda kai nge ndia si banci ilakokenndu gelah jadi Moria si setia ersembah man Tuhan?

Pdt Sri Muliana br Kaban

Minggu si reh metode PA Puzzle, sisikapkgn perlengkapenna