Beluh Muat Ukur
Bahan Bimbingen PJJ Tanggal 14-20 Juni 2026BELUH MUAT UKUR (PJJ Intergenerasional : Fokus Keluarga) ILAKOKEN I BAS JETRO
Bahan Bimbingen PJJ Tanggal 14-20 Juni 2026
Ogen : 1 Timotius 5: 1-7
MODEL PJJ : KESAKSIN
KATA PERLEBE
Beluh muat ukur eme sada kemampun si perlu kal lit guna mbangun sada relasi/ hubungen ras kalak si deban. Kebeluhen muat ukur tergantung ku bas kengasupen sekalak jelma ncibalken dirina . Timotius sekalak si nguda denga, tapi arus ia jumpa/ ngelai kalak i bas erbage generasi bage pe kecibal geluhna. Guna si e me Paulus selaku "Bapa Rohani" mere pedah ajar man bana gelah cibal ia i bas pelayanenna.
PJJnta sekali enda e me PJJ Intergenerasional e me PJJ simelibatken kerina generasi usia (KAKR, PERMATA, Moria, Mamre ras Saitun). Perpulungen jabu-jabu arusna jadi ingan bertumbuh Bersama i bas kerina kategorial si lit i tengah-tengah gereja. Arah PJJ Intergenerasional enda, iarapken perpulungen ngasup berbagi pengangkan ras pengalamen geluh sada persada. Tep-tep kalak mereken sumbangsih perukuren nandangi si debanna, sintua mereken pedah ajar man si nguda, singuda pe pang nuriken ukur ras arapenna man si metua. Prinsip PJJ intergenerasional eme prinsip persahabatan antar kerina kelompok usia. Tujunnta arah PJJ sekali enda, beluh min kita kerina muat ukur (ncibalken dirinta). Sintua (orang tua) beluh muat ukur singuda (anak), singuda (anak) beluh muat ukur singgo metua (orang tua). Alu bage tergejap kekelengen ras teridah kiniersadaan arih itengah-tengahta.
ISI
Surat 1 Timotius igelari surat penggembalaan. Paulus nulisken surat enda man Timotius selaku anak rohanina/ anak bas kiniteken (1 Tim 1:2). Timotius e me murid Paulus (1 Kor 4:17), nandena kalak Kristen Jahudi, bapana labo kalak jahudi (Kis.16:1). Lit telu tujun Paulus nuratken surat enda eme: Sipemena, mereken pertenget kerna pengajaren si papak bas perpulungen. Sipeduaken, keterangen kerna uga kin ngaturken perpulungen. Sipeteluken, mereken persinget man Timotius kerna uga arusna jadi persuruhen Jesus Kristus si mehuli ras kerna tanggung jababna nandangi erbage-bage golongen kalak si tek. Renungenta e me bagin sipeteluken arah tujun surat 1 Timotius isuratken.
Paulus nuriken piga-piga ajar dingen perbahanen si arus ilakoken Timotius gelah beluh ia ncibalken dirina i bas kerina generasi ntah pe golongen siman kep-kepenna. Kata beluh muat ukur, i bas terjemahen Bahasa Indonesia ipake kata "tegorlah", Bahasa inggris sederhana "Let your talk" enda merujuk ku bas uga ncibalken ranan. Kinibeluhen muat ukur tergantung ku bas uga kita ncibalken ranan bage pe ncibalken dirinta i bas erbage usia ras keadaan siman jumpanta.
Piga-piga pengajaren Paulus bas renungenta e me :
• Man kalak si tuan asangken ia, Paulus mpersingeti Timotius gelah ola irawaina, tapi beluh min ia muat ukurna. Arus maka ibahanna ia bagi bapana. Kalak si tuan asangken kita, tentu kitik kal ukurna dikune, sirawai ntah megang kita ngerana man bana. Bicara beluhen pe kita ntah ganjangen sekolahta, tapi dari pengalamen kegeluhen tentuna buen si enggo ibentasina. Pelajaren penting ijenda e me, perlu kita mehamat man kalak si tuan asangken kita, subuk i bas pengerana bage pe perbahanenta.
• Man kalak si nguda arus ibahanna bagi agina. Kata agi siipake e me "Adelphos" secara harafiah ertina "senina sidilaki ntah senina kandung". Tapi i bas konteks surat-surat Paulus rusuren kata enda ipake guna nuriken kerna senina i bas kiniteken aminpe labo sada dareh. Agi si imaksud ijenda e me teman si sada kiniteken si ngudan asa kita. Selaku kaka ntah pe si lebih dewasa, tentu perlu kal sicidahken keteladanen si mehuli guna iusihna. Pedahna eme, man kalak si ngudan asa kita perlu kal kita ncidahken usihen si mehuli man bana.
• Man diberu si enggo metua bahan bagi nande, man diberu si nguda bahan bagi turang. Timotius selaku serayan dilaki bas kiningudanna, iajari Paulus uga ngergaken ras mperlakuken sekalak diberu subuk si nguda ntah pe si metua. Sebagai nande berarti arus ielakuken alu mehamat ras selaku turang tentu la banci mejar-jar.
• Man diberu-diberu si enggo mbalu. Adi la ersima-sima tetap arus ihamati, tapi adi lit anak ntah kempuna, arus iajari gelah keluargana simpekena-kenasa. Man diberu si enggo mbalu, Paulus ningetken Timotius gelah tetap mperdiateken ras nampatisa, sue ras kecibalna.
PENGKENAINA
Arah surat Paulus man Timotius, teridah uga Paulus ncidahken kinata pelayanen siman jumpan Timotius i bas erbage dinamika. Kecibal perpulungen si melala curakna, dilaki ras diberu. Si metua ntah si nguda, si enggo mbalu si la ersima-sima bage pe si lit denga keluargana. Tentu enda pe jadi gambaren bas kegeluhenta si tep-tep warina. Ija kita megati jumpa ras kalak si erbage situasi bage pe golongen usiana. I bas kecibal enda me tep-tep kita perlu kal erlajar gelah beluh muat ukur.
Beluh muat ukur labo dalam rangka terjeng mpesenangken ukur kerina kalak, sabab labo mungkin kita ngasup mpesenangken kerina jelma. Tapi beluh muat ukur ertina, ngasup kita ncibalken dirinta, subuk arah pengerana ras perbahanenta si sentudu ras situasi kalak si berhubungen ras kita. Arah kebeluhenta muat ukur, tentu reh teremna kalak si banci ermeriah ukur erkiteken kehadirennta, jenari reh buena kesempatennta guna mpetandaken Tuhan arah relasinta. Kebeluhen muat ukur jadi sada dalan gelah banci terjadi hubungen si mehuli bas kita selaku anak-anak Dibata. Subuk kalak nguda bage pe si metua, banci ersada arihna. jenari meriah ukur tep-tep kali kita jumpa. I bas kiniersadan arih ras keriahen e, tentu ije me maler pasu-pasu Dibata.
Piga-piga dampar si perlu si kembangken gelah beluh kita muat ukur e me :
• Sipemena, sitandai ise kita ras ise ka temanta ngerana.
• Sipeduaken, mediate ras kepate nandangi kecibal kalak si deban.
• Sipeteluken, ngasup kita ngaloken kalak si deban uga litna.
• Sipempatken, beluh kita ncibalken ranan rikutken payona.
SHARING DAN GAMES
Sharing
Kundul sue ras kategorialna (KAKR & PERMATA, MAMRE, MORIA, SAITUN)
I bas masing-masing kelompok, ibereken kertas HVS guna nuriken ras nulisken uga cara ngerana si payo iakapna/ si erbahanca malem atena guna isehken man bana (asa bancina bas kelompok kategorial e kerina nuriken ukurna)
(Penungkunen sharing ijabab sue ras kelompok/ kategorial)
1. KAKR & PERMATA : selaku anak, uga akapndu cara si payo orang tua muat ukurndu ?
2. SAITUN : Selaku orang tua, uga akapdu cara si payo anak/permain/kela/kempu muat ukurndu?
3. MAMRE :Selaku perbulangen, uga akapndu cara si payo ndehara muat ukurndu?
4. MORIA: Selaku ndehara, uga akapndu cara si payo perbulangen muat ukurndu?
Kenca dung ituriken ras itulisken bas kelompok, e maka kerina anggota kelompok tedis jenari sekalak ngogekenca gelah ibegi kerinana.
Games : Games tebak gerakan
Pengurus PJJ/ serayan si jadi pemimpin games, enggo nikapken kertas si ertulisken sada geraken, misalna : Erdakan janah rende, napui janah siul-siul rsd. Ibahan piga2 instruksi geraken sue ras jumlah kelompok.
Cara bermain :
1. Kelompok maju bergiliren/perkategorial, imulai kelompok KAKR, PERMATA, MORIA, MAMRE, SAITUN. (ibahan bergiliren perkategorial, gelah tupung sada kelompok ngelakoken permainen, si deban banci mengamati ija terjadi perubahen geraken)
2. Setiap kelompok si maju/ tampil erbaris 1 kupudi (memanjang ke belakang).
3. Kalak pertama ngala/ menghadap kempak simemandu games, kalak ke 2 ras seterusna ngala/ menghadap ku belakang.
4. Pemandu games ncidahken bacaan (intruksi Gerakan) ku kalak si pertama, kenca enggo ogena, 2 x ras enggo iangkana. E maka kertas ibuat pemandu games.
5. Kalak si pertama, ngkuit kalak si kedua, e maka iperagakenna geraken siibacana ndai. Kenca iulihi 2 x, kalak.si pertama berbalik badan ka, e maka kalak si ke 2 ikuitna ka kalak si ke 3, iperagakenna ka 2 kali, kenca berbalik badan ka ia, e maka ikuit kalak si 4 ken ka si pe 5, bage seterusna seh kalak si terakhir i bas kelompok e.
6. Kalak si terakhir mperagaken, jenari iturikena kai ertina
7. Kelompok si paling tepat jawabenna e kelompok si menang. Asa bancina ibereken hadiahna, misalna makanan ringan guna memeriahkan games.
8. Kenca dung kerina kelompok ngelakoken permainan/ games, 1 kalak mewakili tiap kategorial nuriken kai siipelajarina arah permainen e.
USULEN ENDE-ENDEN:
- Bertemu dalam kasihNya
- Lagu KAKR : K-A-S-I-H
- Ku kasihi kau dengan kasih Tuhan
- KEE GBKP No. 281 :1,3
0 Response to "Beluh Muat Ukur"
Post a Comment