Tuhan Dibata Si Mabai Perdalanen Nggeluh

Bahan Bimbingen PA Moria
31 Mei - 6 Juni 2026
Alasan Mengasihi Allah

SI MAN OGEN : Ulangen 8:1-10

Banci bandu taneh si mehumur e
1. “Ikutkenlah alu tutus kerina undang-undang si kubereken sendah man bandu, gelah banci kam nggeluh, dingen ertambah-tambah beliganndu, janah ngiani negeri si ipadanken TUHAN man nini-ninindu.
2. Inget kuga TUHAN Dibatandu mabai kam i bas perdalanen si nggedang mentasi gurun pasir empat puluh tahun dekahna; i je iberekenNa melala kiniseran guna nguji kam, gelah ietehNa ukurndu, ntah iuekenndu perentahNa ntah lang.
3. IpelepasNa kam kelihen, e maka iberekenNa manna man panganndu, pangan si langa pernah ipanndu tah ipan nini-ninindu. IlakokenNa e, guna ngajar kam, maka labo pangan ngenca si pegeluhken manusia, tapi manusia nggeluh erdandanken kasakai si ikataken TUHAN.
4. Kidekah empat puluh tahun e, uisndu pe la merigat ras nahendu pe la besar.
5. Ingetlah, maka TUHAN Dibatandu ngajarken ras ngukum kam bali ras sekalak bapa ngajarken anak-anakna.
6. E maka nggeluhlah rikutken kai si enggo iperentahken TUHAN man bandu: nggeluh lah rikutken undang-undangNa janah mbiar man baNa.
7. TUHAN Dibatandu maba kam ku taneh si mehumur, i ja melala ulu lau, lau, ras sumbul si erburak launa i bas baluren ras uruk-uruk.
8. Taneh si mereken ulih gandum, jelai, buah anggur, buah ara, buah ndalima, saitun ras tengguli.
9. I jah la banci kam kelihen, la banci kam kurang kai pe. Batu-batuna isin biji besi, i bas uruk-urukna banci ibuatndu tembaga.
10. Idatndu kai atendu ipanndu. Erkiteken si e ngataken bujur me kam man TUHAN Dibatandu, kerna taneh si mehumur si iberekenNa man bandu.”

TEMA : Tuhan Dibata Si Mabai Perdalanen Nggeluh

TUJUN : Gelah Moria:
• Ngidah Perbahanen Tuhan man bangsaNa.
• Erbahan gambar 20 tahun pengalamen geluh.

METODE PA : Life Story

Kata Penaruh
Empat puluh tahun perdalanen i Padang Gurun e me waktu si cukup gedang. Sada generasi bangsa Israel terlewati, e me bangsa Israel si ngenanami perbudaken Mesir ras si ibaba Musa ndarat i Mesir nari enggo keri. Lanai lit si tading. Bangsa Israel si genduari e me si mbelin-mbelin i Padang Gurun. Kalak e ikataken angkaten si mbaru, angkaten si lanai meteh paskah si inanami orangtuana si ndube. Si la meteh uga Musa ngaloken sepuluh pedah Dibata i Deleng Sinai. La ingetna janji Tuhan si mabai ia ku taneh Kanan ras mereken taneh e jadi sikerajangenna. Man angkaten si mbaru e perlu iulihi turi-turin pendahin Tuhan man bangsaNa seh banci ia tading i padang gurun alu la kekurangen. Bage pe ituriken man bana padan Tuhan si nai enggo ibelaskenNa man bapa leluhur bangsa Israel, bengket ras ngiani taneh perjanjin. Iarapken angkaten si mbaru enda tetap tek man janji Tuhan.

Mpebaqesi Penaanqkan Kerna Oqen
Ulangen 8:1-10 e bagin pidato Musa man angkaten si mbaru bangsa Israel si lanai ndekah bengket ku taneh Kanaan. Pidato Musa e i bas bentuk pengajaren/perintah, persinget ras mpetetap ukur bangsa e gelah tetap ras Tuhan. Gelah patuh ngikutken undang-undang si ibereken Tuhan, si jadi aturen (norma-norma) si cukup tegas ras lengkap. Kepatuhen e ulihna gedang umur, ertambah beligan bangsa e ras banci ngiani taneh perjanjin. Gedang umur e ertina nggeluh ermalem ate erkiteken ngikuti aruren-aturen si itetapken Tuhan dingen nggeluh ersada ras IA. Ngiani taneh perjanjin ertina jadi si mada taneh (pemilik), iberekenNa man bangsa Israel erkelangken bangsa-bangsa si enggo leben ngiani taneh e.

Engkai maka iperintahken Musa gelah bangsa Israel patuh man Tuhan?
1. Perlu ieteh bangsa e maka kurang lebih 40 tahun ia ipadang gurun ipekena-kena Tuhan, icukupken Tuhan panganna, uisna ras kesehatenna (la besar nahena). Ibereken Tuhan manna, zat si entebu si ndarat arah babah serangga e me sisa zat si idatkenna arah batang kayu Tamariska. E me si jadi pangan bangsa Israel sedekah ia tading i padang gurun. Litna roti manna enda jadi sada kesaksin maka Tuhan si make tinepa sideban nikapken pangan man bangsaNa.
2. Guna persikapen bangsa Israel mengketi taneh Kanaan. Lit nge pagi perlawanen bangsa Kanaan e tupung Israel ngiani kuta e. Labo ipediatna bage-bage saja bangsa Israel ringan i je. Saja i bas kepatuhen bangsa Israel man Tuhan, ialokenna serpang pulah ras kemenangen.
3. Gelah bangsa Israel tahan ngalaken godan, sabap situasi Kanaan ndauh bedana ras situasi Padang Gurun. I Kanaan tanehna mehumur, melala ulu lau, ras sumbul si erburak-burak launa, taneh si mereken ulih gandum, jelai, buah anggur, buah ara, buah andalima, saitun ras tengguli. Situasi e nuduhken kemakmuren. Bangsa e lanai banci kelihen i je. Ipersingeti di kune pe pagi enggo makmur ula lupaken Tuhan.
4. Gelah bangsa Israel muji Tuhan arah kerina si inanami subuk kesusahen entah kemakmuren. Muji Tuhan (Ibrani "Baraka'', memberkati). Bangsa Israel muji Tuhan alu dem kiniteruken ukur, ngakui maka kerina si lit i bas geluhna e rehna i bas Tuhan nari. E maka ikatakenna bujur man Tuhan alu ngulihkensa sada bagin pemere Tuhan e arah geluhna sl teptep wari.

Patuh man Tuhan e jadi sada pergegeh i bas ngalaken kerina situasi geluh. Subuk tupung ngalaken kesusahen entah pe ngalaken kemakmuren, nggejapken simpar pasu-pasu Tuhan.

Pengkenaina
Engkelengi Tuhan ertina sigejapken ras siakui maka simpar pasu-pasu Tuhan i bas kita mentasi perdalanen nggeluh. I bas kita nggejapken pasu-pasu Tuhan e lit sura-suranta lako ersemulih man baNa alu ngedesken sada bagin pemereNa e, jadi persembahen pengataken bujur ras puji-pujinnta. Engkelengi Tuhan e me ngendesken puji-pujin ras pengataken bujur alu perbahanen-perbahanen si mehuli ku sekelewetta.
Padang gurun simbol kesusahen, rusur kurang pangan ras inemen. Kanaan simbol kemakmuren, kejayan, la lit si kurang. Dua situasi enda banci saja nderpa geluhta. Susah entah senang pegancihen sinanami. Ibereken Tuhan kesempaten man banta nggeluh i bas kesusahen gelah lit dalanta ngidah ras nggejapken penampat Tuhan e si ncukupken keperlun geluhta. I bas situasi senang si man bentasen ula sempat meganjang rukur, inget maka kerina si lit e; kesehaten, rejeki simpar, semangat, pemeteh e kerina pemere Tuhan. Pengakun si bage mpeturah pengataken bujur ras puji-pujinnta man Tuhan.

Life Story- Menggambar
1. Teptep Moria nikapken kertas, HVS 4 lembar (lbr), pensil ras cat/crayon
2. Teptep Moria nggambar pengalamen geluhna asa siingetna mulai 0-10 tahun 1 Ibr, 11-25 tahun 1 Ibr, 26-35 tahun 1 lbr, 36. seh genduari 1 Ibr. Waktu menggambar kira-kira 30 menit
3. Piga-piga kalak moria ersaksi uga perbahanen Tuhan i bas kerina pengalamen geluh si igambarkenna.

Pdt Nurbety br Ginting

Sentah sipepulung kolekte extra guna KWK GBKP