Kesah Si Badia Si Nampati Bahan Bimbingen PA Moria 22-28 Maret 2026

Bahan Bimbingen PA Moria 22-28 Maret 2026
Kesah Si Badia

SI MAN OGEN : Johanes 14:25-26

25. Si enda Kukataken man bandu asum Aku ras kam denga.
26. Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu.

TEMA : Kesah Si Badia Si Nampati

TUJUN : Gelah Moria:
• Meteh pendahin Kesah Si Badia si isuruh Dibata.
• Nuriken pengalamen isampatit iajari, ras ipersingeti Kesah Si Badia

METODE PA: Kesaksin

Kata Penaruh
Kebiaren, kearun ate dingen lit penggejapen si sada ngalaken perbeben maun jadi i bas geluh. Ajar-ajar Jesus pe nggejapken perbeben si bage. Kitab Johanes e me kitab Injil sinuriken kesaksin kerna Jesus selaku Dibata. Semalna isi kitab enda mbue nuriken si la itulisken i bas kitab Injil sidebanna. Erdandanken si e mekatep ikataken maka kitab enda nulisken bagin si la idatken i bas kitab sideban. Teks PA enda nuriken kerna kerehen penampat man ajar-ajar. Jesus meteh maka lanai ndekahsa idungiNa me dahinNa. IpetetapNa ukur ajar-ajar maka labo itadingkenNa kalak enda melumang, tapi ibereNa nge penampat si rehna i bas Dibata nari. Guna si e kita ipegegehi alu kata Dibata wari enda, si ngajuk kita nggejapken kuasa Kesah Si Badia si nampati kita i bas ndalani kegeluhenta.

Mpebagesi Pengangkan
Ope denga Jesus mate iturikenNa me pedah si perpudi man ajarNa. Pedah enda isina e me kap kerna uga kearusen ajar-ajar e kenca Jesus mate. Jesus mereken persinget man ajar-ajar guna ndalanken pedahNa gia Jesus lanai ras ia.
Iangka Jesus kerna gegeh ras kengasupen ajar-ajar e guna ndalanken pedah-pedahNa. Adi ras Jesus denga ajar-ajar e tentu banci ipersingeti dingen ipegegehiNa guna ndalanken pedahNa e. Tapi uga adi lanai ras Jesus? Banci saja pagin turah ukur ajar-aja e guna ngadi ndalankenca erkiteken latih iakapna. Ipetetap JeSus ukur ajar-ajar e, ipadankenNa kerehen Kesah Si Badia. Kesah Si Badia e me kap penampat man ajar-ajar lako ndalanken pedah Dibata. I bas ayat 26 ituriken kerna ise kin Kesah Si Badia e janah uga pendahinNa. Kesah Si Badia e me kap si isuruh Bapa i si bas gelar Jesus. Enda encidahken maka Bapa, Jesus ras Kesah Si Badia SADA kap, saja ngenca caraNa erdahin si erbage-bage. Adi Jesus erdahin alu jadi manusia si banci iidah ajar-ajar e, Kesah Si Badia e la iidah alu mata, tapi erkuasa. Kuasa Kesah Si Badia e guna nampati ajar-ajar:
1. Ngajar kerna kai pe. Ertina Kesah Si Badia e erdahin guna mereken pengertin man manusia. Pengertin si iberekenNa e labo pengertin doni, tapi kepentaren guna ngangkai sura-sura Dibata i bas geluhta. Janah kepentaren si iajari Kesah Si Badia n e la terjeng gelah ngasup ngukurisa ngenca, tapi iajariNa ka guna ndalanken sura-sura Dibata e.
2. Mpersingeti kerna kai si enggo iajarken Jesus. Erkiteken doni Si enda la seri perayakenna ras sura-sura Dibata, ndauh sirang ras sura-sura Dibata. Kesah Si Badia erdahin guna mpersingeti manusia lako tetap erdalan i bas dalan Tuhan.
Arah kai siituriken Jesus kerna pendahin Kesah Si Badia selaku penampat i bas ndalanken pedah Dibata ajar-ajar e labo si sada, a tapi Dibata erdalan ras ia. i.

Pengkenaina
"Bolehkah seorang ibu lelah?" Penungkunen enda jadi persoalen i bas kegeluhen pernanden, kususna Moria. Kinatana melala kal tanggung jawab si arus idalanken sekalak nande: ngurus anak, dapur, perbulangen, perduiten, erdahin, pelayanen gereja ras si debanna. Situhuna nande pe erbatas gegehna, lit perasanna dingen lit kebosanenna. Tapi sekalak nande arus tetap megegeh. "Menjadi seorang ibu melelahkan, tapi seorang ibu dilarang lelah!" E maka lit istilah "burn out" (kelelahan fisik, mental ras emosional) man sekalak pernanden. Gejalana: latih amin gia enggo ngadi, merawa, sisada iakapna bana, la bahagia janah la iakapna sikap bana jadi sekalak nande. I bas sekalak nande si erkiniteken tentu arus lit kesabaren, kiniteruken ukur, keriahen, kelemahlembuten ras kerina pedah-pedah Dibata nggeluh i bas kai si ilakoken kita. Ertina, Dibata pe idahNa nge kinilatihennta, iakuiNa janah ikelengiNa kita i bas perjuangenta. Alu bage ula siakap kita sisada ndalanisa, seh maka lanai lit keriahen bas geluhta, Dibata kap ras kita ndalanisa. Lit kap Kesah Si Badia erdahin guna ngajari ras nampati kita i bas ndalani kegeluhen enda. Kesah Si Badia jadi penampat. man banta adi i bas dirinta nari pe lit usaha guna ndalanken si ngena ate Dibata. Dibatanta e biakna erdahin ras rusaha, e maka ngena kai ateNa anak-anakNa si nggit berjuang ndalanken si ngena ateNa. Man kalak si bage nge itambahiNa gegeh alu penampat Kesah Si Badia. Siperjuangken kinitekenta e alu.
1. Ertoto ras ngoge Pustaka Si Badia: i bas ertoto kita ngerana-ngerana ras Dibata kerna kai sura-suraNa ras sura-surata. I bas ngoge Pustaka kita erlajar nandai Dibata, kuasaNa, keleng ateNa ras sura-suraNa i bas geluhta.
2. Beligai ulih perjuangenta gelah ngasup kita megenggeng ngalaken kinilatihen geluh. Gelem prinsip "lit ulih latih".
3. Makeken kusa Kesah. Ertina nggit erlajar bagi sura-sura Dibata i bas kiniteken (melatih diri).
4. Ola sirangi perpulungen. I je kita banci erbagi ras mpegegehi sada ras sidebanna, ngaloken pasu-pasu Dibata, janah jadi inganta pekesahken i bas kinilatihenta nari.
Kesah Si Badia e Dibata kap, ula kal sempat ijadiken jadi alat sierbahansa lanai kita maksimal i bas ndahiken dahinnta. Ninta i bas ukurta lit nge kari Kesah Si Badia nampatisa. Jadi dahin e enggo meros, si enda labo ngena ate Dibata.

Kesaksin
Bereken kesempaten man Moria sipulung guna naksiken kerna perbeben mberat si pernah idalanina, janah turiken penggejapenna kerna pendahin kuasa Kesah Si Badia i bas nampati, ngajari ras mpersingeti ia lako ngalaken perbeben e!

Saat engkau lelah, kekuatan terbesarmu adalah BERSERAH ( alemgintings )

Pdt. Rasmalem Br Ginting