Bahan PJJ 01-07 Februari 2026

Bahan Perpulungen Jabu-Jabu Tanggal 01-07 Februari 2026
ALOKEN MIN TEMANNDU
(Evaluasi Sasaren Pelayanan 2025)

BAHAN OGEN : Roma 15:7-13

Berita Si Meriah isehken pe man kalak si labo Jahudi
7. Bagi Kristus enggo ngaloken kam, kam pe alokenlah temanndu sapih-sapih kam gelah terpuji Dibata.
8. Sabap kukataken man bandu maka Kristus enggo erdahin guna kalak Jahudi lako encidahken maka Dibata setia i bas nehken padanNa man nininta nai.
9. Janah gelah kalak si labo Jahudi pe banci muji Dibata erkiteken perkuah ateNa. Bagi lit tersurat i bas Pustaka Si Badia, “E maka kukataken bujur man baNdu, i tengah-tengah bangsa-bangsa si deban, rende me aku muji gelarNdu.”
10. Tole nina, “O kam kalak si labo Jahudi, meriahlah atendu ras bangsa pilihen Dibata.”
11. Lit ka pe tole tersurat, “Pujilah Tuhan o kam kerina kalak si labo Jahudi; pujilah IA o kerina bangsa.”
12. Bage pe nina Nabi Jesaya, “Turah me tunas i bas urat Isai nari, keke me IA pagi guna merentah kalak si labo Jahudi, janah man baNa me kalak si labo Jahudi e erpengarapen.”
13. Dibata sumbul pengarapen, IAlah ndemi kam alu keriahen ras kemalemen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa.
Sura-sura Paulus si mbelinna e me meritaken Berita Si Meriah
14. O seninang-seninangku, kugejap tuhu-tuhu maka melala kal si mehuli i bas kam. Kam pe dem alu erbage-bage pemeteh maka kam ngasup siajar-ajaren.
15. Tapi i bas surat enda enggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erkiteken lias ate Dibata si enggo iberekenNa man bangku.

MODEL PJJ: KESAKSIAN

Sasaren pelayanen GBKP tahun 2025 dewasa menerima perbedaan enggo si bentasi. Rikutken Garis-garis Besar Pelayanan (GBP) GBKP tahun 2021 seh 2025 maka nuate si jadi i bas anggota GBKP kenca mentasi Sasaren pelayanen GBKP tahun 2025 dewasa menerima perbedaan enda e me:

Nilai Baru: Jemaat GBKP dewasa dalam menghadapi konflik. Dewasa artinya jemaat memiliki pemahaman bahwa perbedaan pandangan adalah lumrah; perdebatan atau adu argumentasi bukanlah sebuah pertengkaran yang menciptakan permusuhan tapi justru mempertajam pemahaman yang ada. Dialektika satu dengan yang lainnya semakin diperkaya dalam mempelajari pemahaman yang baru.
Model: Dewasa dalam berdebat. Artinya, dalam setiap persidangan jemaat melihat perdebatan sebagai pengarahan/Pendidikan untuk memerlengkapi pemahaman atas materi percakapan.
Target:
1. Setiap jemaat tidak alergi dengan perbedaan pandangan/ pendapat.
2. Setiap Pelayan menjadi Juru Damai dalam konflik bukan sumber konflik.
3. Konflik di jemaat lokal diselesaikan secara lokal.
4. Tidak ada perpecahan jemaat karena konflik.
5. Tidak ada jemaat dan pelayan yang bertikai sehingga harus memekarkan PJJ atau pindah gereja.

I bas Perpulungen jabu-jabunta paksa enda me nuate guna valuasi kerna kinata kengasupen dewasa menerima perbedan i e si jadi i bas kerina anggota GBKP tentuna ikut pe kerina serayan Tuhan i bas GBKP kenca mentasi tahun 2025 dingen enggo bengket ku tahun 2026.

ISI

Kinata si idah Rasul Paulus i tengah-tengah perpulungen Roma e me litna kelompok si megegeh ras si kote i bas kimteken. Kalak si megegeh kinitekenna kurang ngasup ersada ras si kote kinitekenna e maka la teridah kiniersadan perpulungen. Erpalasken kecibal enda, Rasul Paulus nehken pedah kempak perpulungen segelah kerina min anggota perpulungen banci ersada alu bage si megegeh ras kote kinitekenna ipersada jadi sada kula alu bage subuk kalak Jahudi ras la Jahudi enggo pulung i bas sada persadan. Lit telu (3) erbage isi teks enda e me:

Pemindon
Kerinana min anggota perpulungen banci ngaloken temanna. Palasna e me erkiteken Kristus selaku takal perpulungen enggo ngaloken kerina manusia. Si nikataken Paulus e me kalak Jahudi si enggo ngaloken padan Dibata e me padan keselamaten si ndube enggo ipadanken Dibata kempak nini-nini kalak Jahudi e me Abraham, Isak ras Jakub. E maka ipindoken Paulus kalak Jahudi lako ngaloken kalak si deban (non Jahudi) segelah banci ia ersada kerinana. Perbedan suku, kiniteken ras si debanna ula jadi tembok penghalang kiniersadan.
Pengajaren
Rasul Paulus nehken pengajaren kempak perpulungen (kalak Jahudi) segelah temanna sada perpulungen (kalak si labo Jahudi) pe banci min muji Dibata. Erkiteken Dibata e labo Dibata kalak Jahudi saja tapi pe Dibata kerina bangsa-bangsa. Dibata nehken perkuah atena kempak doni enda labo ku kalak Jahudi saja tapi pe kalak si labo Jahudi. Palas kerna si enda ibuat Rasul Paulus idur Padan Si Ndekah nari e Samuel 22:50; Masmur 18:50; Ulangen 32:43; Masmur117:1 Jesaya 11:10. I bas ayat-ayat enda alu tangkas ituriken maka kerina bangsa min muji Dibata sabab Ia me Dibata kerina bangsa.
Pengarapen
I bas pendungi teks enda, Rasul Paulus nehken pengarapenna man Dibata kerna perpulungen enda e me gelah Dibata ndemi perpulungen alu keriahen dingen kemalemen ate erpalasken kiniteken. Bage pe erkiteken gegeh Kesah Si Badia reh tambahna pengarapen anggota perpulungen man Dibata. Ertina kecibal geluh si mehuli si inanami anggota perpulungen bage pe kiniersadanna ras kalak si deban bage pe ras Dibata tuhu-tuhu mehuli.

Kesimpulen teks enda e me: bagi Dibata nehken perkuah ateNa kempak kerina manusia maka gereja pe arus ngaloken kerina jelma i bas kinierbagen.

PENGKENAINA

Tema Perpulungen Jabu-jabu (PJJ) enda e me aloken min temanndu. Teman sinimaksudken rikutken tema enda e me teman sada jadu, gereja ras masyarakat. Perbedan e me kepastin. Erbage-bage perbedan lit i bas jabu, gereja ras masyarakat. Perbedan suku, agama, ras bagepe golongen. La terjeng si enda tapi megati jadi litna perbedan pendapat. Perayaken sasaren pelayanen GBKP tahun 2025, dewasa menerima perbedan e me segelah kerina ngawan perpulungen GBKP ngasup ngaloken dingen ngergai perbedan khususna perbedan pendapat. La turah kitik ukur, perubaten dingen perpecahen i bas litna perbedan pendapat. Alu kata si deban i bas litna perbedan peturah si mehuli labo si la mehuli. Adi kecibal si bagenda jadi tentuna nuriken maka kerina anggota GBKP enggo dewasa i bas perbedan.

Rikutken teks PJJ enda ituriken maka kalak si ngasup ngaloken perbedan e me kalak si ngasup muji Dibata sabab Dibata nepa manusia i bas kinierbagen. Perkatan enda nehken pengajuk (motivasi) man banta kerina maka segelah dewasa i bas perbedan.

AKSI

Erbahan potret sektor kerna dewasa menerima perbedaan. I bas PJJ enda Pertua, Diaken ntah Pengurus PJJ nikapken kertas potret sektor kerna dewasa menerima perbedaan. I bas kertas la padah isuratken gelar. Kenca kerina si pulung ndatken kertas enda, e maka penungkunen si lit ijabab rikutken pengidah masing-masing alu erbahan tanda ✓ (cheklist) i bas kolom pilihen. Kenca dung e maka ipepulung dingen itabulasi jabapen kerina si pulung. E maka ibahan kesimpulen kecibal sektor i bas dewasa menerima perbedan: enggo, maun-maun ntah lenga (sudah, kadang-kadang atau belum). Pemena kesimpulen tep-tep nomor, kenca si e kesimpulen kerinana. Kesimpulen akhir em jadi kecibal sektor i bas dewasa menerima perbedan.