Make Manusia Si Mbaru

Bahan PA Moria 25-31 Januari 2026 ( EVALUASI )

Si MAN OGEN : Kolose 3:8-11
8. Tapi genduari ambekkenlah kerina si bage rupa: merawa, ngamuk, ras segat ate. Ola cekurak ntah pe melasken cakap melket.
9. Ola perguak, sabap enggo itangtangindu manusia si male ras kerina kebiasanna,
10. janah genduari enggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken tempasNa jine. Tujunna e me gelah itandaindu alu serta Dibata.
11. E maka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. Kristus ersada ras kerinana.

TEMA : Make Manusia Si Mbaru

TUJUN : Gelah Moria
• Meteh biak siman tadingenken selaku tinepa simbaru. .
• Nuratken perbahanen siergan si enggo ilakoken

METODE PA : Evaluasi/Nuratken (Ncurmini diri)

Kata Penaruh

Kota Kolose rembak ras Kota Epesus, kira-kira 100 mil ngenca dauhna. Tupung Paulus nehken berita si meriah i kuta Epesus, enterem temanna si erlajar man bana kerna berita si meriah. Teman-temanna e me si maba Berita Si Meriah e ku Kota Kolose. Paulus labo seh ku Kota Kolose tapi pengajarenna kerna berita si meriah tersiar i je. Perpulungen i Kota Kolose teremen kalak si labo Jahudi. Lit kalak Junani, kalak Sekit, kalak barbar ras suku sidebanna. Suku-suku si tading i je enterem si labo nandai Dibata. Teridah arah kata-kata si isuratken Paulus man perpulungen e. Nina: nai kam labo nandai Dibata, gundari kam enggo jadi anak-anakNa erkiteken Kristus. Geluhndu nai seri ras cara geluh kalak kafir, si la nandai Dibata. Tapi sada keriahen man Paulus tupung ibegina arah Epafras maka perpulungen Kolose paguh i bas kiniteken man Jesus. Perpulungen e pe ikut encidahken buah kinitekkanna arah nampati teman si lit i bas kekurangen.

Mpebagesi penqanakan kerna ogen
Aminna perpulungen Kolose enggo encidahken buah kinitekenna tapi Paulus tetap mereken pengajaren kerna orat nggeluh kalak si enggo jadi sikerajangen Dibata. Pengajaren e itulisken arah suratna man perpulungen Kolose. Pengajaren e tujunna gelah perpulungei Kolose pulah i bas pengajaren si papak si lit paksa e, si ngajarken kebebasen nggeluh bagi sura-surana saja, prinsip pengajaren sesat lah si nanamilah kegeluhen doni sabap kentisik ngenca kita nggeluh i je.

I bas dampar sideban, perpulungen Kolose si erbage suku, lain ka biak ras perayakenna. Kalak Jahudi istimewa akapna bana, sabap bangsa pilihen Dibata. Bangsa sideban akapna jadi ranting pagi i bas neraka. Ertina kitik akapna kerina bangsa sideban e ras katakenna bangsa kafir. Kalak Junani e me kalak si erpendidiken, ahli filsafat, meganjang pemetehna. E maka meteruk akapna kerina suku sideban si la erpendidiken bagi kalak barbar. Erkiteken si e erpilihen nge si jadi temanna. Kalak Sekit, terkenal kalak si la erpendidiken, enterem jadi budak dingen menukah kal mpeturah perubaten i bas kalak si enterem. Bagenda me situasi si man alanken perpulungen i Kota Kolose.

Lit dua bentuk pengajaren si sehken Paulus e me:
Si pemena, perubahen si benaken i bas diri nari entah pe i bas pusuh nari (perubahen pribadi). Desken sekalak si iperidiken, itangtangina jubahna si ndekah, kenca iperidiken ipakena baju jubah si mbaru. Si man tadingenken anak-anak Dibata e me: sura-sura daging si ngolangi ndalanken sura-sura Dibata. Erlua-lua, i bas jaman kuno ngelakoken hubungen seks bebas biasa, lenga pe erjabu bebas ngelakoken hubungen seksual, ganti- ganti pasangen pe biasa, la niakap pantang. Biak rangap si la erbias-bias, la erpuas-puas, enggo pe lit kurang denga. Sura-sura si bage banci mpeturah dosa, sabap guna nehi sura-surana banci saja nangko, munuh, ermengga ate nandangi barang kalak.
Merawa, lit dua bentukna,

Di kune la pas bagi ukurna mis merawa meledak ledak tapi la ndekah. Igambarken bagi api si gurlah nutung batang page si kerah. Kentisk ngenca garana, kenca keri batang page e mis nimpet.
Merawa erelem-elem. La nggit erdame, la tempa teridah tapi ngutkut i bas pusuh. Siapai pe bentukna lanai payo adi enggo jadi kalak Kristen.

Tole si man pedauhen e me melasken kata si la tuhu (fitnah), bage pe kata-kata si melket (kotor). Kalak Kristen pengeranana mehuli, mbelasken kata tuhu, la erbual. Kalak Kristen arus mpertanggungjabapken kerina si ibelaskenna.

Sipeduaken, kalak Kristen ngaloken suku-suku sideban jadi temanna sikeleng-kelengen, sisampaten dingen geluh erdame. Kalak Kristen lanai arusna mpebelin perbedan si lit, lanai ernembeh ate man suku sideban, tapi maba perdamen, ngaloken suku sideban si la seri ras ia. Kalak si cara ibadahna la seri, banci teraloken i bas persadan perpulungen. Si pendidikenna meganjang, budaya mejile ersada ras si la erpendidiken. Budak ras kalak bebas ersada i bas Gereja Tuhan. Seri kerina, la erdobahen. Bage me pengajaren si ipeseh Paulus man perpulungen kolose. Arah pengajaren e tuhu-tuhu teridah bedana si nandai Dibata. Kata e la terjeng pengajaren tapi perlu kal ipraktekken i bas kegeluhen. Pengajaren e min jadi orat nggeluh kerina perpulungen Kristen Kolose.

Pengkenaina
Adi kataken negara Arab, agama kai nge si mis terlintas i bas pusuhta? Agama Islam, sabab teremen masyarakat Arab agamana Islam. Tapi me lit nge agama Kristen i Arab? Tupung Petrus erkotbah i bas wari Pentakosta, lit i je pulung kalak Arab. Ras ia pe idemi Kesah Si Badia seh maka tek la nandangi pengajaren Petrus. Kalak e me si maba berita si meriah i Arab, e maka pantek perpulungen i je. Kalak Kristen Arab ras Islam Arab sikade-kaden, sidahi-dahin, si keleng-kelengen. I bas kebaktin-kebaktin kalak Kristen Arab make bahasa Arab, lagu-laguna pe make bahasa Arab. Pendetana pe kalak Arab. Agama la nirangken perkade-kaden kalak e. Tupung lit perbeben i bas negara Arab, kalak Kristen ras Islam ersada ngalaken perbeben e. Radu ras ia mersan beban negara. Igejapna maka Islam ras Kristen e tetap sada keluarga, erturang ras ersenina. Pengajaren agama la ipersoalken si perlu idalanken ajaren agama sekalak-sekalak si encidahken perdamen.

Erlajar arah pengajaren Paulus man kalak Kristen Kolose bage pe kegeluhen kekeluargan i bas kalak Arab, si tarik ku bas kegeluhenta secara pribadi bage pe secara perpulungen, seh i ja kita enggo ngaloken kinierbagen suku, agama, pendidiken, budaya, umur, karakter, latar belakang keluarga ras kalak sideban si la seri ras kita?

Minggu enda me pemena kita erbahan PA Moria GBKP i bas tahun 2026 enda. Perjumpan pemena enda kita erbahan evaluasi kerna pendalankennta Kata Dibata rikutken sasaren pelayanen GBKP tahun 2025, e me dewasa ngaloken perbedan i bage pe tema umum PA Morianta e me siergan. Si man bahanen i bas evaluasi enda, me kai si enggo silakoken i bas perpulungen bage pe lingkungen sekelewetta nuduhken kita siergan ras dewasa ngaloken perbedan e.

Evaluasi/Nuratken (encurmini diri)
Nuratken perbahanen siergan si enggo ilakoken Moria secara pribadi/sektor/runggun rikutken tabel si enggo isikapken i teruh enda.