Liturgi Pekan Kebaktin Keluarga Wari Pelimaken Kamis 21 November

Liturgi Pekan Kebaktin Keluarga Wari Pelimaken

Kamis, 21 November 2019

A. PERSIKAPEN
1) Runggun Gereja mperdiateken Liturgi si ipake maka kerina erdalan alu ratur.
2) Kerina ngawan ni perpulungen ras serayan Tuhan nikapken pusuh ras ukur lako ngadap man Tuhan.
3) Pengurus PJJ nikapken kerina peralaten si iperluken i bas pelaksanaan
    Kebaktin : Ingan persembahen ras si debanna.
4) Pertoton Syafaat ibabai sekalak Mamre, sekalak Moria, sekalak Pertua Diaken.
5) Mpelajari ende-enden i bas wari/berngi enda.
6) Asa bancina si sikapken alat musik guna ipakeken i bas Kebaktin.

B. KEBAKTIN 
1. Kata Penaruh 
Mejuah-juah man banta kerina kekelengen ni Tuhan....
Guna menaken Kebaktin ta emaka mari radu ras kita kerina ertoto Mari dage si endesken dahin enda man kemahen Tuhan janah rende kita rikutken KEE GBKP No. 249 : 1,4 (lendesken me perlengkapen man si mabai Kebaktin Perp. Tedis) 

Ajar aku o Tuhanku, make Kata ras pedah Ndu
Kueteh payo ras sentudu, ku ikutken bas geluhku
Reff :
Si ngikut pedah Dibata, daten me kerembakenNa
Pedah Kata tangkas k'rina, em jadi gelementa

Kalak si tegu Dibata, em si lembab kin ukurna
Man si nembah rusur baNa, ukum ajarkenNa banta. Reff :......

2. Votum - Salam 
Votum    : Kebaktin Pekan Keluarga GBKP wari/berngi si pe 5 ken enda ibenaken i bas gelar Dibata Bapa, AnakNa Jesus Kristus takal perpulungen, ras i bas gelar Kesah si Badia si mpersadaken jabu kalak si tek
Salam    : Penampat man banta (bandu) reh i bas Jahwe nari si nepa langit ras doni, si engkawali perberkat ras permulihta (ndu) genduari nari seh rasa lalap, Amin
Perp      : Amin...Amin...Amin...(iendeken)

3. Berita kerna pendahin ras sura-sura Dibata (Invocatio)
"Setialah kempak ndeharandu dingen man bana sajalah atendu ngena" (Kuan-kuanen 5:15)
Erpalasken Kata Dibata enda, si puji IA alu radu ras kita ngendeken : KEE GBKP No. 218 : 1 - 3

`Nggo kenca seh i bas paksana, radu ras me kita rende k'rina
Si puji gelar ni Dibata, m'riah cawir dage ban soranta
Si bas Berita si Meriah, perukuren tetap min ergiah
Bas si la tengka minter nilah, giluh si mbaru madin peturah

'Nggo kenca seh i bas paksana, si penangkih me dage totonta
Bersih ras bulat ban ukurta, maka serta kita bas k'rajanNa
Si bas Berita si Meriah, perukuren tetap min ergiah
Bas si la tengka minter nilah, g'Iuh si mbaru madin peturah

'Nggo kenca seh i bas paksana, si orati me Kata Dibata
Idur Pustaka si Badia, gelah tambah rusur pengertinnta
Si bas Berita si Meriah, perukuren tetap min ergiah
Bas si la tengka minter nilah, g'luh si mbaru madin peturah

4. Palas Perjabun Kalak Kristen (erpalasken Msm. 128:1-6) (Responsoria) 
Liturgis    : Perdalanen geluh manusia enggo iaturken Dibata menaken kin i bas IA nepasa bage pe seh kegeluhen manusia e rujung. Janah tek kita maka enggo isikapkenNa pe kerna pasangen geluhta si jadi temannta i bas ndalani kegeluhen guna mpermuliaken Dibata e. I bas kita ndalanken kerina sura-sura Dibata tetap si gejapken maka : Sangap kal kalak si malang man TUHAN, si nggeluh ngikutken kerina perentahNa.

Perp         : Kesangapen jabu kalak si tek eme i bas perbulangen ras ndehara ndaIanken perentah Tuhan bage pe erkeleng ate man anak-anakna ras kepate man teman manusia.

Mamre     : Tuhan, bere lah man jabu kami enda kesangapen

Moria       : Tuhan, ajarilah kami makeken wari-wari si iberekenNdu man jabu kami

Liturgis    : Kalak si tetap ngendesken kegeluhen jabuna man Dibata kedungenna ndatken pasu-pasu i bas Dibata nari, eme : "Ipanna me ulihna latih, sangap nggeluh, mehuli sikerajangenna".

Kerina Rende : KEE GBKP No. 247 : 1 

Ipasu-pasu ni Tuhan Dibatandu, kam si dilaki bage pe si diberu
`Di Tuhan Yesus lah tetap temuendu,
gedang geluhndu la kam ermedu-medu
Itadingkenndu me kap orangtuanta, segelah tumbuk ersada kam duana
Adina enggo persadaken Dibata lanai arusna sirangken manusia 

Liturgis     : Selaku perbulangen si erkiniteken man Dibata maka tetap nge kam ertanggungjabab nandangi jabu, sabab bage kin arusna bapa. Janah pengarapenta maka isi jabu e pe tetap ka mabai keriahen, seh maka : Ndeharandu bali ras anggur si meramis buahna i bas rumahndu, dingen anak-anakndu bali ras tunas batang saitun i sekelewet mejandu.

Perp         : Bage me pe pasu-pasu Tuhan, man sekalak perbulangen si malang man baNa. Mamre Bujur Tuhan sebab enggo ipersingetiNdu kami selaku perbulangen maka kami arus nggeluh malang man baNdu dingen ngikutken kerina perentahNdu

Moria       : PengasupNdulah kami Tuhan maka kami banci jadi ndehara si pentar maka kami jadi keriahen man isi jabu kami

Liturgis     : Emaka man bandu duana kekelengen kami, gejapkenlah maka : Tuhanlah si masu-masu kam, mbera idahndu kesangapen kidekah umur geluhndu.

Kerina Rende : KEE GBKP No. 247 : 1 

Ipasu-pasu ni Tuhan Dibatandu, kam si dilaki bage pe si diberu
`Di Tuhan Yesus lah tetap temuendu, gedang geluhndu la kam ermedu-medu
Itadingkenndu me kap orangtuanta, segelah tumbuk ersada kam duana
Adina enggo persadaken Dibata lanai arusna sirangken manusia

Liturgis    : Emaka i bas kiniersadan ukurta kerina bage pe alu erpengarapen man Dibata ngarap kal kita kerina maka "Cawirlah kita metua, maka sempat siidah kempu-kempunta. Dame lah sikerajangenta" 

Morimar   : Pegegehi kami Tuhan, ndalanken sura-suraNdu i bas jabu kami.

Perp         : Malem me ateta kerina nggeluh i bas jabu-jabunta janah asa ndigan pe ola kal silupaken Tuhan Dibata si mada jabunta e.

Liturgis    : Ergakenlah Tuhan alu tetap mabai isi jabunta lako muat bagin i bas dahin GerejaNa e, eme reh ku Gereja, Perpulungen Jabu-Jabu, PA Kategorial bage pe dahin-dahin si debanna. Kerina Asa gegeh ras kengasupen kami, reh kami ndahi Kam, Tuhan. Amin

Kerina Rende : KEE GBKP No. 247 : 1

Ipasu-pasu ni Tuhan Dibatandu, kam si dilaki bage pe si diberu
`Di Tuhan Yesus lah tetap temuendu, gedang geluhndu la kam ermedu-medu
Itadingkenndu me kap orangtuanta, segelah tumbuk ersada kam duana
Adina enggo persadaken Dibata lanai arusna sirangken manusia

5. Nginget Perpadanen Perjabun 
Liturgis    : Dage si enggo ipersadaken Dibata la banci isirangken manusia. Kerinalah kam ngergaken perjabun, janah patuhlah kam sekalak nandangi si debanna erkiteken kam mehamat man Kristus (Heb. 1.3:3; Ep. 5:21)

Mamre     : Kuinget tetap perpadanen perjabunku emaka ningku asum si e : Aku muat kam jadi ndeharaku. Janah aku erpadan tetap ngaloken kam i bas paksa senang, ntah pe susah, subuk i bas paksa sehat, ntah, pe sakit, subuk i bas paksa meriah ukur bage pe ceda ate. Aku erpadan njaga kebadian perjabunta seh Dibata nirangken kita alu kematen.

Moria       : Si jadi kesikelku si mbelinna bas jabu e me ndalanken perpadanen perjabunku : Aku muat kam jadi perbulangenku. Janah aku erpadan tetap ngaloken kam i bas paksa senang, ntah pe susah, subuk i bas paksa sehat, ntah pe sakit, subuk i bas paksa meriah ukur bage pe ceda ate. Aku erpadan njaga kebadian perjabunta seh Dibata nirangken kita alu kematen.

Liturgis     : Adi bage, tetaplah cikep perpadanenndu e janah dalanilah kegeluhen jabu e bas pemasu-masun Tuhan. Pakekenlah KataNa bas kerina dampar kegeluhen. Amin

Kerina Rende KEE GBKP No. 468 : 1, 2 

1. Tuhan demi aku salu KesahNdu, Tuhan demi aku salu KesahNdu
Pusuhku bagi tambe ku baba ku pancurNdu,
Tuhan demi aku salu KesahNdu
2. Tuhan demi aku salu KataNdu, Tuhan demi aku salu KataNdu
Pusuhku bage tambe ku baba ku pancurNdu,
Tuhan demi aku salu KataNdu

6. Kata Dibata
a) Ngoge Kata Dibata Bagin Si Pemena : 1 Tesalonika 4:1-8 (logeken si mada jabu)

Kegeluhen si ngena ate Dibata
1. Kedungenna, o senina-senina, kam enggo iajari kami kuga arus nggeluh gelah sentudu ras peraten Dibata. Tuhu bagenda nge kegeluhenndu gelgel nari. Janah genduari ipindoken kami kal man bandu i bas gelar Tuhan Jesus dalankenlah lebih asa si e!
2. Sabap ietehndu nge pedah si ipeseh kami man bandu alu kuasa Tuhan Jesus.
3. Sura-sura Dibata nandangi kam e me gelah kam iserapken jadi sikerajangenNa nggeluh la erlua-lua.
4. Kerina dilaki i tengah-tengahndu arus ietehna min kuga muat ndeharana alu cara badia dingen terpuji,
5. labo erpalasken sura-sura kula saja, bagi kalak si deban si la nandai Dibata.
6. I bas si enda, ola min ise pe erbahan salah nandangi senina si sada kiniteken ntah pe meneken ia. Enggo ikataken kami man bandu mbaru enda. Enggo ikataken kami man bandu alu terang-terangen maka kalak si ndalanken kesalahen-kesalahen si bage iukum Tuhan nge pagi.
7. Kita ipilih Dibata labo gelah nggeluh erlua-lua. Dibata ersura-sura gelah kita nggeluh badia.
8. E maka kalak si nulak pengajaren enda labo manusia si itulakna, tapi Dibata si mereken Kesah Si Badia man bandu nge si itulakna.

L    : Ketuahen jabu si megiken Kata Dibata, dingen si makekenca i bas geluhna si teptep wari, Haleluya
P    : Haleluya...Haleluya...Haleluya... (iendeken)
b) Kotbah : Jabu Si Setia (Maleaki 2:13-16) — ibenai ras idungi alu pertoton

13. Enda me sada nari si ilakokenndu. Enggo gedap ibahandu batar-batar TUHAN alu iluh; tangis ras ngandung kam sabap lanai ialokenNa persembahen si ibahanndu.
14. Isungkunndu ngkai maka lanai Ia nggit ngalokenca. La ialokenNa erkiteken enggo ilanggarndu padanndu man ndeharandu si iempoindu tupung kam nguda denga i ja TUHAN jadi saksi. Ia kap temanndu janah enggo ilanggarndu padanndu man bana, aminna pe enggo kam erpadan i adep-adepen Dibata maka kam tetap setia man bana.
15. Ma enggo ibahan Dibata kam sada kula ras sada ukur ras ia? Kai kin sura-sura Dibata i bas si enda? Sura-suraNa gelah ipupusndu anak-anak si tuhu-tuhu kal bangsa Dibata. E maka inget ola sada pe kam ngelanggar padanna man ndeharana.
16. “Nembeh ateKu kalak si mulihen,” nina TUHAN Dibata man Israel. “Nembeh kal ateKu adi lit kam ngelakoken perbahanen si kejam e nandangi ndeharana. Inget maka tetap igelemndu padanndu maka kam tetap setia man ndeharandu.”

Model diskusi : Permainen ntah pe kuning-kuningen (Game) Jabu si Setia

7. Pengakun Kiniteken (Perp. Tedis)

8. Nehken Persembahen (Perp. Kundul)
a. Kata Dibata kerna persembahen : E maka si sehkenlah puji-pujin man Dibata katawari pe, si jadi persembahenta arah Kristus, e me persembahen arah babah si ngakui maka IA kap Tuhan. (Heb. 13:15)
b. Tupung si sehken persembahen pengataken bujurta man Dibata, ras kita rende KEE GBKP No. 264 : 1 - 

Ateku tedeh man baNdu o Tuhan, malem me ateku jumpa si erkuasa
Aku megegeh di ras Kam o Tuhan sabab Kam me kapen, ulu si nasana
Reff : 
Kubegi kataNdu, Kata tuhu-tuhu
keke me ukurku,
Nehken peratenNdu

Terang KataNdu, nerangi pusuhku, pusuh jadi senang, ergiah geluhku
Gegeh si mbaru, berekenNdu bangku. Labo aku talu, meriah ukurku.
Reff : Kubegi kataNdu .....

Ib'reNdu pedah, kuakap pe megah. Tambah pengertin, dat kiniulin
Tambah pemeteh, turah kapen gegeh.. PemereNdu sampur ras kusehken bujur. Reff :.....

c. Ertoto kerna persembahen ras pertoton syafaat (ibabai sekalak Mamre ras sekalak Moria/Sekalak Pertua Diaken)
1) Kerna persembahen
2) Kerna jabu-jabu anggota perpulungen bas ingan ta enda
3) Jabu si la kuh tetap ikuhi Tuhan Dibata bas kerina kecibalna
4) Gelah perbulangen tetap erkeleng ate man ndehara
5) Gelah ndehara tetap patuh dingen mehamat man perbulangen si malang man Dibata
6) Man anak kekelengenta si langa atena njabuken bana bage pe si langa ndatken teman geluh
7) Pekan Keluarga wari/bemgi pe 6 ken
8) Si turah bas perpulungen

9. Tekad guna ndalanken jabu bagi si ngena ate Tuhan
Liturgis    : Jabu e lit erkiteken pendahin Tuhan dingen iaturken Tuhan me maka banci tumbuk si dilaki ras si diberu bas pemasu-masunNa

Mamre     : Malem ateku bas perbahanen Tuhan bage pe pendahin gerejaNa sabab iatankenNa kap aku jadi imam itengah-tengah jabungku

Moria       : Meriah ukurku i bas pemere Tuhan sekalak dilaki si enggo jadi perbulangenku dingen ras ia me aku ndalani wari-waringku bas doni enda.

Pt — Dk  : Sikeleng-kelengenlah kam bas kegeluhen jabundu e

Liturgis    : Kenca enggo idalanindu kegeluhen bas jabundu ras teman geluhndu e, kai nge si jadi tekadndu bas wari/berngi enda?

Mamre     : I bas palas malang man Tuhan aku ertekad guna nggeluhken kegeluhenku jadi perbulangen si setia man ndeharangku dingen erkeleng ate man anak-anakku bage pe sangkep geluhku

Moria      : I bas sura-sura ras perukuren lako njadiken diringku selaku penampat man perbulangen emaka ku pala-palai lako mabai jabungku jadi jabu si sempabu dingen aku jadi keriahen man isi jabungku

Kerina    : Kami ras isi jabu kami Tuhan saja ngenca isembah ras ipatuhi kami.

Liturgis   : Dibata ni pengarapen idemiNa pusuhndu alu erbage-bage keriahen dingen dame i bas kiniteken maka bayak kam i bas pengarapen salu kuasa Kesah si Badia, Amin 
Rende : KEE GBKP No. 309:1-2

Pengasup kami o Tuhan, gelah pedahNdu banci idalanken
Em kap tendang kami bas kegeluhen, KataNdu si man gelemen
Gelah tangkas kata ras perbahanen, ban min kami tetap bas kebujuren
SurgaNdu kap perayaken

Temani kami o Tuhan, bengket ku doni si dem keguluten
SampatiNdu kami lako naluken, dosa si man sirangenken
Emaka ola kal kami tadingken, i bas kami ndalani kegeluhen
Glah dat kami kemenangen

10. Pertoton Tuhan 

11. Pemasu-masun 
Mulihlah alu dame ras mejuah-juah, nggeluhlah alu setia lako jadi perbulangen ras ndehara bas jabu-jabunta (ndu) janah guna si e alokenlah pasu-pasu i bas Dibata nari :
L    : Perkuah ate Tuhan Jesus Kristus, kekelengen Dibata Bapa, ras kerembaken Kesah si Badia, ras kita (kam) kerina perbulangen, ndehara ras anak-anak i bas jabunta (ndu).
P    : 5   .   6   .    5   .   6   .   5   .   4   .    3
         A...Min      A....min     A.............Min


C. Permainen ntah pe kuning-kuningen (Game) Jabu si Setia 
✓ Bagilah si pulung ku bas 2 ntah 3 kelompok rikutken jabu-jabu si reh. Mamre (perbulangen) si reh Moria (ndehara) na arus bas sada kelompok. Ikira piga jabu si reh emaka ibagi jadi 2 ntah 3 kelompok. Si mehulina perkundul pe bas kelompok masing masing.

✓ Kenca si e pilih salah sada jabu si kuh reh pulung Moria ras Mamre na jadi utusen kelompok

✓ Si mabai Pekan Kebaktin Keluarga erbahan penungkunen permainen ntah pe Game ku utusen keiompok e.

✓ Penungkunen Permainen (Game) :
1) Piga nomor sepatu ntah pe selop pasangenndu ? 
2) Pangan kai si paling merhat pasangenndu manca ? 
3) Kai nge tanda-tandana si teridah ibahan pasangenndu adi lit akapna si la cocok bas kam ?
4) Belasken dage tanggal tubuh anak-anak bas jabundu! 
5) Rupa kai nge si senangna akap pasangenndu ? 
6) Bahanlah 2 ntah 3 penungkunen pribadi arah kam si maba Pekan Keluarga enda, si tujunna guna ncidahken penandaindu nandangi pasangen masing-masing 

D. Diskusi (Adi la memungkinken permainen ganti alu diskusi) 
1. Kai nge tantangen kesetian jabu paksa enda?
2. Kai nge siakap tole perlu si ban njaga kesetian jabunta?

Pdt. Agustinus Ginting Manik, M.Th.

Mohon Bantuan Subscribe dan Like Youtube Channel GBKP KM 8. Bujur

Share this post