Liturgi Pekan Kebaktin Keluarga Wari Peempatken Rabu 20 November

Liturgi Pekan Kebaktin Keluarga Wari Peempatken

Rabu, 20 November 2019

I. PERSIKAPEN
1. Nikapken kerina alat-alat kebaktin
2. Ngaturken siman totonken bas doa syafaat

II. KEBAKTIN
1. Kata Penaruh (lbabai Runggun Gereja)
Turang ras senina .....

2. Ertoto

3. Rende : KEE GBKP No. 3: 1-2 ( Perp. Tedis )

Puji Dibata e Raja mbelin simulia
Kita kerina erjimpuh ertoto ku la
Pulunglah min, rende ersurak me kin
Krina me kam manusia

Puji Dibata e, si ng'rajaisa kerina
E maka kerajang jelma mehuli jadina.
Rajanta e numpak ginemgemNa nge
Em peraten bagidina..

(Tupung rende ngendesken perlengkapen si maba kebaktin)

4. Votum + Salam

L : Kebaktin enda ibenaken i bas gelar Dibata Bapa sinjadiken jabu-

jabu kalak si tek,i bas gelar AnakNa Jesus Kristus si engkelengi

kerina jabunta ras i bas gelar Kesah si Badia si nampati kita njagai

kebadiaan jabunta.

Perkuah ate ras dame i bas Dibata Bapa, AnakNa Jesus Kristus ras

kerembaken Kesah si Badia ras kita (kam) kerina gelah. Amin

P : Amin...Amin...Amin... (iendeken)

5. Invocatio

L : "O Tuhan, jagai min babahku, eruk min biberku" (Msm. 141:3)

Erpalasken kata Dibata enda, mari radu ras kita ngendeken :

KEE GBKP No. 374:1,2

Yesus ulu kegeluhenku, Kam me ngenca pengendesenku
Lalap tedeh ate pusuhku, kupehaga Kam bas geluhku
Reff :
OTuhan pernehen pusuhku, si ertedeh ate man baNdu
Kugelem pedah ras padanNdu, ku sembah Kam i bas geluhku

Ku sembah Tuhan penebusku, si mereken kekelengenNa Alu tutus reh aku Tuhan, ras kerina isi jabungku Reff :....

6. Pujin Kerna Perbahanen Dibata (Jes. 63:7-9) (Perp. Kundul)
L          : Ateku nuriken kerna kekelengen Tuhan si.la lit sibarna, kupuji la, erkiteken kasa kai enggo ibahanNa.

Dilaki   : Man bangsa Israel enggo mbue kel pasu-pasuNa, erkiteken. kekelengenNa si tetap ras perkuah ateNa.

Diberu : Nina Tuhan," Bangsaku kap ia, emaka labo banci aku i tipuna," erkiteken si e ikeliniNa bangsa e i bas kiniseran nari.

Kerina : Labo malekat, tapi Tuhan jine kap si ngkelinisa. Erkiteken kekelengenNa ras perkuah ateNa, ipulahiNa bangsa e.

L          : Enggo si idah uga belinna kuasa Dibata e, dage mari kita rende : KEE GBKP No. 386:1-2

Tuhan kap permakan geluhku, maka la kekurangen aku
Itengah mbal-mbal simeratah, geluhku ipesenangkenNdu
Reff:
O Tuhan Kam penalemenku, temaniNdu i bas dalanku
Tuhu malem teneng tendingku, perbahan Tuhan temanku

Kempak lau siteneng malerna, I tegu-teguNdu geluhku
PelimbaruiNdu gegehku, dalan pinter babaNdu aku. Reff :........

7. Kecibal Keluarga si Ngena Ate Dibata
L                   : Enggo tangkas man banta kerna keleng ate Dibata Bapa simpersadaken kita ras jabunta. KekelengenNa e mpengasup kita.meteh mehuli ras ndalanken simehuli. Simehuli siapai si enggo sidalanken e?

Nini bulang   : Asa ngasup ras gegeh kami, enggo iajarken kami si mehuli man anak ras kempu kami. Pasu-pasulah Tuhan kerina anak ras kempu kami.

Nini tudung   : Asa ngasup ras gegeh, kami pe enggo mereken contoh uga njagai jabu si erkemalangen man Tuhan, gelah dame ras mejuah-juah keluarga kami. Pasu-pasulah tole Tuhan.

Bapa              : Igejapken kami kel kerina si mehuli ibereken Dibata man kami. Emaka kami selaku bapa tetap ersura-sura ndalanken tanggungjawab kami lako nuanken kiniteken anak jabu ras ngelitken perbeliten jabu kami. Tuhan, Kam ngenca kap sinampati.

Nande            : Tuhu kel mehuli Dibata man banta, kami pe selaku nande tetap ertedeh ate engkelengi ras njagai jabu kami alu makeken pengajaren Dibata. Sampati kami Tuhan guna ndalankenca. Anak Pemere Dibata igejapken kami arah nini bulang, nini tudung, nande bage pe bapa kami. Kerina simehuli enggo iajarkenna ma kami anak ras kempuna. Ajari kel kami Tuhan i bas ndalankenca gelah sukses kami ras meriah ukur orangtua kami.

L                     : Bage me kelengna ate Dibata man banta kerina, maka ipengasupna nge kita guna jadi kalak si mehuli arah ranan, perukuren ras perbahanenta. Erkiteken penggejapen kinitekenta mari dage radu ras kita rende KEE GBKP No. 248:4

Adina Dibata enggo masu-masu. Si engkawalisa i bas perjabun
Perdalinen nggeluh malem kel atendu
Rembak ras Dibata la kam kemalun.
Reff :
Si ajar-ajaren, radu ras sikeleng-kelengen
Si sampat-sampaten, sada ukur maba kegeluhen.
Tengah-tengah jabu, Tuhan Yesus jadi persukuten
Gelah min pepagi, perjabunndu banci man usihen.

8. Ngoge : Kolose 3:18-21 (Iogeken kalimbubu simada jabu)

Erbage-bage pedah man keluarga Kristen18. O, kam ndehara, patuhlah man perbulangenndu, sabap bage me arusna ibahanndu selaku kalak Kristen.
19. O, kam perbulangen, kelengilah ndeharandu janah ola kasar man bana.
20. O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata.
21. O, kam orang-tua ola rusursa junguti anakndu gelah ola bene ukurna.

L : Ketuahen kalak simegiken kata Dibata, dingen si makekenca i bas geluhna si teptep wari, Haleluya.

P : Haleluya...Haleluya...Haleluya...(iendeken)

9. Kotbah : Kuan-kuanen 15:1-5

1. Alu jabap si melias mantak rawa si gara,
tapi jabap si merampus pekeke ate merawa.
2. Ranan kalak pentar dem alu pemeteh,
tapi ranan kalak bodoh la lit ertina.
3. Kai pe si jadi idah TUHAN i japa pe,
iperdiatekenNa kerina perbahanen si jahat ntah pe si mehuli.
4. Ranan mehuli mereken kegeluhen,
cakap si ngelukai pusuh erbahanca bene ukur.
5. Kalak bodoh la iperdiatekenna ajar bapana,
kalak pentar ilakokenna ajar orang tuana.

Tema : Ranan Jabu si Maba Kegeluhen

10. Pengakun Kiniteken (Perp. Tedis)

11. Persembahen (Perp. Kundul)
L : Kata Dibata sijadi palas man banta guna ngasup ngendesken pengataken bujurta i buat i bas 1 Kronika 16:29 Pujilah gelar Tuhan si mulia; babalah persembahen, jenari ngadaplah man baNa ku bas Rumah PertotonNa. Sanga Tuhan ncidahken baNa alu kemulianNa, erjimpuhlah iadep-adepenNa".

Tupung si endesken persembahenta ras kita rende i bas KEE GBKP No. 445 : 1-2
Si pepulung me persembahenta.
Siendesken dage man Dibata
Tanda m'riah ukur ban pasu-pasuNa, si simpar b'reNa man banta
Reff :
Asa si 'nggo isikapken, asa si 'nggo itotoken Em pengataken bujurta, kempak Dibata Tuhu simpar pemere Dibata, Man perjuma ras si erbinaga K'rina sierdahin si ngarap man baNa ituahi pasu-pasuNa Reff :

12. Pertoton Persembahen ras Pertoton Syafaat
Topik Pertoton :
a. Persembahen si enggo iendesken
b. Gelah ngawan GBKP ngasup njagai rananna guna mereken semangat kegeluhen nandangi se isi jabu
c. Notoken si mada jabu wari/berngi enda ras berngi pelimaken
d. Siturah i bas ngawan perpulungen

13. Perpadanen Man Dibata (Perp. Tedis)
L    : Dibata kap ngenca sibanci mpersadaken jabu-jabu kalak si erkiniteken.

P    : Erpadan kami Tuhan, guna mpeturah komunikasi simehuli i bas jabu kami.

L    : Malem tuhu ate kalak si ernalem man Dibata.

P    : Tetap ukur kami genduari nari seh rasa lalap makeken kata Dibata sijadi palas kegeluhen jabu kami.

L    : Mari kita rende i bas kita enggo nggejapken keleng ate Tuhan i bas KEE GBKP No. 329:1-2

Tuhan Yesus penampatku, IA penalemenku
Kuikutken me dalanNdu, Kam me kegeluhenku
Reff :
Teneng tetap tendingku, paguh kinitekenku
Lanai lit kebiarenku, tan Tuhanku menegu.

Tuhan Yesus penampatku, Kam me kapen gegehku
LayasiNdu kap ukurku la teralang uliNdu. Reff :.....

14. Pertoton Tuhan

15. Pemasu-masun :
L : Bengketlah ku bas jabundu sekalak-sekalak. Pakekenlah kata i Dibata jadi senjata. Janah gejapkenlah pasu-pasu Tuhan bas kegeluhenndu. Guna ngejapkenca alokenlah pasu-pasu i bas Dibata nari, " Ipasu-pasu janah ikawali Dibata kita (kam), siang ayo Dibata ersinalsal ibabonta (ndu) janah melias ateNa ngenehen kita (kam). Itatap Dibata ku kita (kam) janah malem ateta (ndu) ibahanNa." Amin.

P : Amin... Amin... (iendeken)

III. Sharing
1. (ljabab Mamre) uga sedekah enda komunikasinta ras anak jabunta (nandangi ndehara ras anak-anak) sedekah enda siateta sipekena?
2. (ijabab Moria) uga sedekah enda komunikasinta ras anak jabunta (nandangi perbulangen ras anak-anak) sedekah enda siateta sipekena?

Pdt. Oktaria br Surbakti, M.Th.

Mohon Bantuan Subscribe dan Like Youtube Channel GBKP KM 8. Bujur