Kempak Jesus Kita Natap - Bahan Bimbengen PJJ 14 - 20 April 2019

Kempak Yesus Kita Natap - Bahan Bimbingen Perpulungen Jabu-Jabu 14 - 20 April 2019

HUT GBKP Ras Sehna Berita Si Meriah 18 April 2019, Jumat Si Mbelin

Ogen : Heber 12 : 1 - 11

Dibata Bapanta
1. Dage man banta, nteremkap saksi si ngkeleweti kita. E maka siaguilah kerina si ngambati i bas perdalanenta, bage pe dosa e si lalap ncerawisi kita. Tutuslah ateta ngikuti perlumban si lit i lebe-lebenta.
2. Kempak Jesuslah kita natap, sabap ia me sumbul ras tujun kinitekenta. IgengkenNa ngenanami kiniseran i kayu persilang! Tapi erkiteken keriahen si nimai IA, lanai iukuriNa mela mate i kayu persilang. Janah genduari kundul IA arah kemuhen kursi kinirajan Dibata.
3. Ukurilah kuga belinna kiniseran Jesus ngalaken perlawanen si rehna i bas kalak perdosa nari. E maka ola kitik ukurndu, dingen ola kam putus asa.
4. Sabap i bas kam erbebe ngelawan dosa langa kam seh ngamburken dareh.
5. Lanai kin ingetndu pengajaren si ikataken Dibata man bandu selaku anak-anakNa?
“O anakKu, perdiatekenlah adi iajarken Tuhan kam,
janah ola kitik ukurndu adi irawaiNa kam.
6. Sabap iajarken Tuhan kalak si ikelengiNa,
janah iligasNa tep-tep kalak si ialokenNa jadi anakNa.”
7. Gengkenlah kiniseran si reh man bandu. Alokenlah e bagi ajar i bas sekalak bapa nari, sabap kiniseranndu e ncidahken maka ibahan Dibata kam bagi anak-anakNa. Lit kin sekalak anak si la ididik bapana?
8. Adi la kam iajarken bagi anak-anakNa si deban, labo kam anak si sah, tapi anak haram.
9. I doni enda lit bapanta. Bapanta e ndidik kita, janah mehamat kita man bana. Adi bage tentu arus pe lebihen sibahan nandangi Bapanta si i Surga, gelah kita nggeluh.
10. Bapanta si i doni enda kentisik ngenca kita iajarkenna, bagi mehuli iakapna. Tapi kita iajarken Dibata guna kiniulinta, gelah banci kita dat bagin i bas kebadianNa.
11. Asum kita iajarken, ceda ateta, la siakap meriah. Tapi dungna, kita si enggo terdidik, pengajaren e erbahanca kita nggeluh rikutken si ngena ate Dibata, seh maka malem ateta.

I bas kegeluhen i doni enda, megati kita natap kempak si menarik siakap. Emaka lit nge belas-belas orangtuanta nai nina 'bagi kerbo si lupa nggagat taren natap' erkiteken jilena man tatapen. Si tatap kita e la saja situasi, kecibal ntah pe sada kejadin tapi pe kegeluhen kalak si deban, banci saja ia sibahan sukat-sukat geluhta. Umpamana: siidah anak kalak, sikap siakap, bagah min anakku ateta. Sitatap perbulangen ( ndehara ) kalak, bagah min temanku ateta. Sitatap uis kalak siakap siakap, merincuh kita janah lit pe si mengga ateta. Labo salah kita natap kawes ntah kemuhenta tapi ula min sempat turah si la uli i bas ukur. Renungenta enda ngajuk kita gelah natap kempak Jesus. Ngkai? Tentuna lit piga-piga hal si jadi gelementa arah natap IA. Penulis kitab Heber nuriken maka:

Kegeluhen enda desken perlumban kiniteken eme ngelawan dosa. Gelah banci menang mpesikap ras megermet ndalani dalan e bage pe ngagui kerina si ngambati ras dosa si rusur ncirawisi. Perlu jelas tujun, la banci melala si man tatapen, arus sada eme Jesus Kristus si enggo kundul arah kemuhen Dibata. Ku je matata natap, si enda ngatakenca e me si jadi perayaken, e jadi tujunnta. Lanai lit si deban si banci ngolangi kita seh ku bas tujun perlumban e. IA me sumbul ras tujun, IA me pemimpin si mabai kita, IA me usihenta amin ngenanami kiniseran seh mate, la IA mela sabab jelas ietehNa ulih siialokenNa.
b. Erbage-bage kiniseran si man alanken kalak si tek, tapi kepeken kiniseran siman alanken kalak si tek i bas ngelawan dosa e langa kai pe e ibandingken kiniseran si inanami Jesus. Alu mperdiateken dingen natap si enda, kalak si tek arus megegeh, ula bene ukur, ula minter lemah ntah pe talu. Perlu kal jadi kalak si megenggeng, enda sada proses pembelajaren man manusia. Dibata ndidik anak-anakNa, nehken pengajaren salah sadana alu proses kiniseran. Penulis kitab Heber enda ngangkat kai si pernah ikataken man Job i bas ia ngalaken kiniseran si mberat bage pe kitab Kuan-kuanen gelah tetap nggeluh alu megiken, mperdiateken ras ndalanken pengajaren.
Tugas Bapa eme nikapken anak-anakna gelah ngasup ngalaken perbeben ras ndatken masa depan, tentuna e labo menukah, orangtua arus ngajari dingen ndidik anakna alu displin. Pendidiken eme cara gelah banci ndatken pemeteh, keterampilen ras ndatken tanda kelulusen i bas erbage tahap kegeluhen. Ikut i bas proses pendidiken la menukah, sabab arus mpersilahang sura-sura daging alu fokus ku bas tujun. Kedungenna banci lulus dingen ngenanami kemalemen ate. Bage me si ibentasi ras inanami Jesus guna tujun keselamaten manusia si enggo erdosa.

Enda me proses pembelajaren man kalak si tek. Alu natap kempak Jesus, kerina paksa-paksa kegeluhen subuk senang ntah mesera tetap kita megenggeng. Janah enda salah sada proses pendewasan kiniteken man banta. Perlumbanta i bas paksa si genduari tentuna labo seri kal ras nai sabab teptep jaman lit kesusahenna jine tapi si pasti tetap sada tujunta eme Jesus Kristus Tuhanta. Enggo ibereNa usihen i bas ndalani kiniseran.

Enggo 129 tahun dekahna Berita si Meriah seh man banta kalak Karo, warga GBKP, enda nuriken maka enggo sibentasi paksa-paksa si erbahanca maka GBKP bagi litna genduari enda. I bas kecibal si bage rupana, kuga kegeluhen warga gerejanta? Me enggo reh dewasana? Me enggo banci jadi usihen nandangi doni enda? Enda man evaluasinta, man renungenta secara pribadi ras bersama warga GBKP. Arusna enggo paguh sabab adi mata kiniteken ras pengarapenta tetap ku Jesus, lanai man pilasen kegeluhen kinitekenta. Amin la sitik perbeben rikut tantangen geluh i doni enda si man alanken.

Emaka i bas mperingeti kematen Jesus sigelari kita Jumat si Mbelin, enda pe ngingetken kita maka geluh enda kentisik. Amin pe kentisik melala si la bagi ukur si man alanken. Amin bage gia adi kita tetap natap ku Jesus reh gegehna ras reh ngasupna kita ngalaken perbeben e sabab enggo iberekenNa usihen man banta. Sabab kiniseran e jadi sada proses pendewasaan man manusia kususna banta warga GBKP. Bagi Jesus enggo jadi Berita si Meriah nandangi doni enda, geluhta pe banci jadi Berita si Meriah si saksiken kita nandangi sekelewetta. Emaka jelaslah si man usihen ras tatapennta gelah la kita lalar ndalani geluh i doni enda.

EVALUASI :
Turiken ulih aksinta i bas HUT KAKR.

DISKUSI :

Enggo me kempak Jesus kita natap i bas ngalaken kiniseran?
I bas HUT GBKP 129 tahun, kedewasan kiniteken si uga nge banci si saksiken ku sekelewetta?

AKSI :
Si banlah aksi i bas HUT GBKP umpamana: mbersihken gereja, nuan bunga, mbersihken kuta entah sekelewetta, rsd, si lit nanamna man kalak si deban.

USULEN LAGU :

KEE GBKP No : 192 : 1,3 ( KLIK JUDUL KEE UNTUK MELIHAT LIRIK )
KEE GBKP No : 171 : 1,3 ( KLIK JUDUL KEE UNTUK MELIHAT LIRIK )
KEE GBKP No : 282 : 1-3 ( KLIK JUDUL KEE UNTUK MELIHAT LIRIK )
KEE GBKP No : 273 : 1-3 ( KLIK JUDUL KEE UNTUK MELIHAT LIRIK )

TOPIK PERTOTON SYAFAAT :

Ngawan GBKP ngidah kiniseran Jesus dingen tetap natap ku IA alu bage megenggeng i bas kiniseran.
Ngasup ngataken bujur erkiteken kematen Jesus mere keterkelinen man manusia ras sehna Berita si Meriah ku kalak Karo.
Ngawan GBKP gelah reh dewasa i bas ndalani kegeluhen.

Pdt. Suenita br. Sinulingga, M.Th.