Liturgi Pekan Kebaktin Keluarga Wari Peteluken Selasa 19 November

Liturgi Pekan Kebaktin Keluarga Wari Peteluken

Selasa, 19 November 2019

I. PERSIKAPEN :
Pertua, Diaken radu ras perpulungen nikapken si ertugas ras perlengkapen sini perluken i bas kebaktin.

II. KEBAKTIN :
1. Kata penaruh
Mejuah-juah..........Mari radu ras kita ertoto...
Mari si puji Tuhan, rende kita : KEE No. 163:1,2,5 (Perp. Tedis)

Badia badia Tuhan si erkuasa,
Dem me doni enda salu kemulianNa
Badia badia Tuhan bala surga,
Kam me kap Bapa si ermulia

Badia badia Bapa si perkuah,
Reh kerina kami alokenNdu gelah
Badia badia Tuhan maba Tuah,
Reh kami enda baNdu ersembah

Badia badia tetap perkelengNa
Nehken pendiloNa man jelma perdosa
Badia badia Tuhan penebusta
Sembahlah IA Yesus Tuhanta

2. Votum-Salam :
L    : i bas gelar Dibata Bapa, AnakNa Jesus Kristus ras i bas gelar Kesah si Badia. Perkuah ate ras dame i bas Dibata Bapa, ras i bas Jesus Kristus nari, i bas kerembaken Kesah si Badia ras kita (kam) kerina gelah. Amin.
P    : Amin...Amin...Amin...(iendeken)
L    : Adi kam ngerana ula sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa (Ep. 4:29).

3. Rende: KEE No. 425:1,2
Adi ras Yesus malem naring pusuhta
iperdiatekenNa me kita ban kelengNa
Amin gia jumpa erbage percuban
La kap itadingkenNa kita isampatiNa
Reff :
Matem me ate je kita pe dat dame ras keriahen ukur
bene me kebiaren tading me keguluten
mberat jadi menahang, pusuh pe jadi salang

Adi ras Yesus seh damena ukurta, ibereNa kepentarenNa idur kuasaNa
Ndauh me dage ukur ras ate ceda, ukur mehuli turah ban sialoken kataNa
Reff :...

4. Kesangapen jabu kalak Kristen
L : Labo pernah lit kalak elem-elem nandangi kulana. Tapi ipekena-kenana dingen ikawalina kulana e bagi Kristus mpekena-kena dingen engkawali perpulungen.

P    : Sabap kita me ringring kula Kristus.

L    : Bagi lit tersurat i bas Pustaka Si Badia, "Erkiteken si e, sekalak dilaki nadingken nande bapana, jenari ersada ia ras ndeharana, janah si dua e jadi sada kula me."
P    : Si enda ncidahken rahasia si mbelin kal ertina. Janah aku jine ngidah, maka si enda nuduhken persadan Kristus ras perpulungen.
L    : Mari sipuji Tuhan arah KEE No. 248:1

Si njabuken bana ndatken pasu-pasu
bas Dibata nari e min arapkenndu
Kata Tuhan Yesus nggeluh i bas jabu
TerangiNa pusuh malem kel atendu
Reff :
Siajar-ajaren radu ras sikeleng-kelengen
Sisampat-sampaten, sada ukur maba kegeluhen
Tengah-tengah jabu, Tuhan Yesus jadi persukuten
Gelah min pepagi, perjabunndu banci man usihen

5. Kecibal jabu sigenduari
L      : Jabu si ipanteki Dibata eme jabu si ermalem ate, banci arih-arih ras kerina se isi jabu. Jabu e maba kemalemen ate pe man jabu-jabu si deban.

Bapa : Erkiteken kesibuken bas pendahinku Tuhan, arih-arih ras ercakap-cakap tengah jabu enggo kurang, apai ka megiken isi pusuh ndehara ras anak-anakku.

Nande : Erkiteken sibuk ngukuri keperlun jabu, lanai sempat aku megiken isi pusuh anak ras perbulangenku, apai ka ngukuri si mehuli man kalak si deban.

Anak   : Megati la ku gejapken kemalemen ate bas jabu erkiteken kerina sibuk ngukuri keperlunna jine, dungna aku pe ndarami kemalemen ate.

L         : Kesangapen ras kemalemen ate ndai lanai tergejap bas jabu kami Tuhan, tempa Kam la erdahin guna jabu kami, lang situhuna kami nge rusuren nadingken Kam erkiteken kesibuken-kesibuken kami.

P         : Alemi kami Tuhan bas kerina kelepaken kami.
Rende KEE No. 362 :1,2

Alemindu aku bas dosangku, alemindu aku bas lepakku,
O Tuhan sasap min, o Yesus sasap min, alemi dosangku

Si la payo dem i bas geluhku, ngaku aku baNdu o Yesusku,
O Tuhan sasap min, O Yesus sasap min alemi dosangku

(Perp. Tedis)

L : Ola iakapndu sia-sia si tersurat i bas Pustaka, "Kesah Si Badia si itamaken Dibata i bas kita, ersura-sura gelah kita setia man baNa."Amin bage gia belinen nge lias ate si iberekenNa asangken cemburuNa. Bagi lit tersurat i bas Pustaka Si Badia, "Itulak Dibata nge kalak si meganjang ukurna, tapi man kalak si meteruk ukurna iberekenNa lias ateNa. (Jak. 4:5-6) Turang ras senina meriah ukurta ngaloken perkuah ate Dibata si mbelin e. Emaka si puji IA arah ende-endenta KEE No. 311:1,3

Pujilah tendingku puji Tuhan, segedang-gedang geluhku
Ateku ersembah rasa lalap, ban keleng ateNdu tetap
IjujuriNdu geluhku, dage ku puji Kam Tuhan,
Haleluya...Haleluya

Kam me kap o Tuhan penampatku, malem kal ateku banNdu ibegikenNdu kap pertotonku, sebab setia Kam tuhu
Kam kap si nepa kirinana, Kam me tetap si njayamsa Haleluya...Haleluya

6. Ngoge Kata Dibata: Kuan-kuanen 1:7-10 (Perp. Kundul)
Cara ngogesa pegancih-gancih, ay. 7 Liturgis ngogesa, Ay. 8, 9 Mamre, Ay. 10 Moria si ngogesa.

L : Ketuahen kalak si megiken kata Dibata dingen si makekenca i bas geluhna si teptep wari. Haleluya

P : Haleluya Haleluya Haleluya (iendeken)

7. Kotbah : Jakub 1:19-25

Megi dingen ndalankenca
19. O senina-seninangku, ingetlah! Kerina arus metinggel, tapi ola minter ngerana, dingen ola sukah merawa.
20. Rawa manusia labo ngasup erbahan si mehuli si ngena ate Dibata.
21. E maka pedauhlah i bas kam nari kebiasan-kebiasan si melket ras lagu langkah si jahat. Alokenlah alu meteruk ukur kata si isuanken Dibata i bas pusuhndu, sabap kata e ngasup nelamatken kam.
22. Ola tipu bandu alu megi-megi kataNa saja, tapi dalankenlah kai si iajarken Kata e.
23. Kalak si megi Kata e tapi la idalankenna, bali me ia ras kalak si ercurmin, janah idahna kuga rupana jine.
24. Ipepayona dirina, jenari lawes ia, janah minter lupa ia kuga rupana.
25. Kalak si mperdiateken pedah Dibata alu mehuli, si terus mpergermetkenca, si la megi-megi saja, kalak si bage ipasu-pasu Dibata i bas kerina pendahinna. Sabap pedah Dibata e serta kap dingen ngasup mbebasken manusia.

a. Ertoto ope Kotbah
b. Kotbah
Tema : Jabu Si Megermet Ndalanken Si Ngena Ate Dibata
c. Ertoto kenca kotbah

8. Pengakun kiniteken (Perp. Tedis)

9. Persembahen (Perp. Kundul)
L : Kata Dibata si jadi palas i bas kita ngendesken persembahen pengataken bujurta i buat i bas kuan-kuanen 8 :21 ; 'Man kalak si engkelengi Aku, Ku bereken kebayaken melala, rumahNa ku demi alu erta-erta si meherga'.

Iher kita ngendesken persembahenta si puji Tuhan arah ende-endenta KEE No. 420 :1-3
Asa gegeh ras kengasupen, kami nehken persembahen,
Endesken kami bandu Tuhan, alu dem keriahen
Reff :
Ajari kami ngergaken, talenta ras kiniliten
Arah ukur ras perbahanen, Tuhan ipermuliaken

Mbue tuhu kami aloken, pasu-pasuNdu o Tuhan
KelengNdu i gejapken kami, Kam kap si negu kami Reff : .......

Arak-arak tetap o Tuhan, kegeluhen anakNdu e
Gelah ngasup tetap o Tuhan, makeken si tading e Reff :........

10. Pertoton persembahen ras pertoton syafaat
Topik pertoton syafaat :

Persembahen
Simada jabu ras tuan rumah berngi si pagi
Gelah kerina ngawan GBKP dewasa i bas kiniteken
Gelah kerina ngawan GBKP tetap ersada ras Jesus i bas ndalani kegeluhen i doni enda
Si turah bas perpulungen

11. Perpadanen ras Tuhan (Perp. Tedis)
L      : Turang ras senina, jabu si sangap eme jabu si erkemalangen man Tuhan, si megermet ndalanken si ngena ate Tuhan suari ras berngi

Bapa    : Ku pakeken pedahndu bas tengah jabuku Tuhan, ku babai ndehara ras anak-anakku megiken, niksiki ras ngukuri kataNdu dingen ndalankenca bas jabu kami nari. Teknologi si lit genduari ipakeken kami mpersadaken arih tengah jabu.

Nande : erjuang aku lanai ngukuri keperlun jabuku jine, ku talangi pusuhku megiken isi pusuh perbulangen ras anak-anakku. Ku litken waktungku ndampingi anak-anak ras perbulangenku i bas make teknologi si lit bas jabu kami.

Anak    : aku pe megiken pengajaren nande ras bapangku, lanai ndarat ku turiken isi pusuhku, arah teknologi si gundari reh buena waktuku arih- arih bas jabuku.

L+P     : Teknologi si gundari e pemereNdu kap Tuhan, ipakeken kami e alu pentar, arah e kami ersaksi kerna kataNdu, janah ipakeken kami kerina e jadi pasu-pasu man sekelewet kami.

Rende KEE No. 296:1-3

Man bandu Yesus Tuhanku ku endesken geluhku
Nggeluh si keleng-kelengen nggit si sampat-sampaten
Reff :
Erbuah kata ni suan bas kita anak Tuhan
Erbuah kata ni suan bas kita anak Tuhan

Nggeluh si tatang-tatangen kita radu megegeh
Nggit kita ngalemi salah pusuh dame meriah Reff : .......

Mediate ras mesayang si m'uli ula sungsang
Tetap si ajar-ajaren la si togan-toganen Reff : .....

11. Pertoton Tuhan

12. Pemasu-masun
L : Berkatlah! dalani wari-wari si isikapken Dibata man bandu, pakeken lah e alu tetap erkemalangen man baNa! Si jadi gegehndu, alokenlah pasu-pasu idur Dibata nari. Ipasu-pasu janah ikawali Dibata kita (kam), siang ayo Dibata ersinalsal i babonta (ndu) janah melias ateNA ngenehen kita (kam), itatap Dibata kita (kam) janah malem ateta (ndu) ibahanNa. Amin.

P : Amin....Amin...Amin (iendeken)

DISKUSI

I bas ogenta ipersingeti kita lalan megiken asangken ngerana, apaika merawa. Kinata gundari bas jabu-jabu, lanai enterem si ngerana-ngerana, tapi megi-megi pe lang, kerina sibuk make alat teknologina, deba lupa tunduh pe. Uga nge kinata i bas jabuta genduari?
Sidiskusiken uga ngenda si payona pemaken alat-alat teknologi subuk bas jabu, gereja bage pe bas ingan-ingan si deban.

Pdt. Nurbety br Ginting, M.Th.

Mohon Bantuan Subscribe dan Like Youtube Channel GBKP KM 8. Bujur