Liturgi Pekan Kebaktin Keluarga Wari Pepituken Sabtu 23 November

Liturgi Pekan Kebaktin Keluarga Wari Pepituken 

Sabtu 23 November 2019

A. PERSIKAPEN
Nikapken perlengkapen guna kiniraturen kebaktin dingen ngaturken si mabai pertoton syafaat.

Perpulungen nikapken pusuh ras ukur guna ngadap man Tuhan   

(Musik)

B. KEBAKTIN 
1. Kata Penaruh
Turang senina ....
• Ertoto
• Rende :
  KEE GBKP No. 325 : 1 - 2   (Perp. Tedis)

Tuhan i tengah-tengahta, m'reken pasu-pasuNa
Maler desken lau si mbelin, lanai lit si terulin
Reff : 
Usekenlah min KesahNdu, temani geluh kami
Gegeh kami p'limbarui, k'rina jadi mehuli

Tuhan i tengah-tengahta, reh riahna ukurta
Reh tenengna pertendinta, reh damena pusuhta Reff : ...

2. Votum - Salam 
L    : I bas gelar Dibata Bapa si njadiken langit ras doni, i bas gelar AnakNa Jesus Kristus si tubuh guna kiniulin doni enda, ras i bas gelar Kesah si Badia si negu pusuhta (ndu) guna jumpa ras Tuhan. Perkuah ate ras dame si rehna idur Dibata Bapa, AnakNa Jesus Kristus ras kerembaken Kesah si Badia, ras kita (kam) kerina gelah. Amin.

P    : Amin...Amin...Amin... (iendeken

3. Berita Kerna Perbahanen Ras Sura-sura Dibata (Invocatio) 
L    : "Terpujilah Dibata i bas Surga si meganjangna. Janah dame i doni man manusia si ngena ateNa." (Luk. 2:14)

Erpalasken Kata Dibata enda, sipuji IA alu ras kita ngendeken : KEE GBKP No. 178

Pujilah min, pujilah min Dibatanta, Dibatanta sini datas
Dame ni surga nusur ku doni ngena ate man manusia.
Pujilah min Dibatanta } 2x
Dame ni surga nusur ku doni } 2x
Ngena ate, ngena ate man manusia
Ngena ate man manusia, man manusia
Pujilah min, pujilah min Dibatanta, Dibatanta sini datas
Dame ni surga nusur ku doni ngena ate man manusia.
A....min... A....min... A....min...

4. Pengarapen Manusia Nandangi Ketubuhen Tuhan (Perp. Kundul) 
L    : I bas berngina, ija Jesus tubuh, melala kal anak kuta Betlehem si la meteh kerna ketubuhen Tuhan Jesus. Manusia kuskas ibahan perbebenna, picet kal kesibukenna i bas mperjuangken ketenangen nggeluh. Piah lanai lit ingan guna ketubuhen Jesus. Amin bage gia, Tuhan Jesus labo surut i bas nehken keleng ateNa nandangi manusia.

P    : O Tuhan, idahNdu kap kekoten ras kelepaken kami. Daramilah kami, i bas kami lalar ibahan sura-sura kami. Dahilah kami, tupung pendahin kami nirangken kami ras Kam. Rehlah Kam Tuhan, ringanlah Kam i bas pusuh kami.

L    : Ras kita rende i bas nuriken pengarapenta alu ende-endenta : KEE GBKP No. 377:1-2

Kuakuken me dosangku, ilebe Tuhan
Megati aku lalar bas kegeluhenku
Keleng atendu pengarapenku
I teruh perkuahNdu malem me pusuhku
Keleng atendu pengarapenku
I teruh perkuahNdu malem me pusuhku

Erlebuh aku baNdu, o Yesus Tuhanku
Alemi min o Bapa, salah ras lepakku
Keleng ateNdu pengarapenku
Tedeh 'teku ngidah belinna perkuahNdu
Keleng ateNdu pengarapenku
Tedeh 'teku ngidah belinna perkuahNdu

5. Berita Kerna Kerehen Dibata (Perp. Tedis) 
L    : Aku me Raja Dame si reh man bandu guna nampati ras mulahi kam i bas kerina kesusahenndu. Ernalemlah kam man bangKu, ola suhsahi bandu alu dahin-dahin si la penting, tapi ayakilah kai si ngena ateKu. Aku me penampatndu si mereken ketenengen man bandu. Amin.
Mari ersikap kita ngaloken ketubuhen Jesus, janah ras kita rende i bas : KEE GBKP No. 184:1-2

Yesus Tuhanku njaminisa, K'rina dosangku tebusiNa
Geluh si mbaru jujurkenNa, M`riah ukurku ngalokenca
Reff :
Tuhanku Yesus Kam me tetap, pengendesenku rasa lalap
Temani aku o penampat, Tuhanku Yesus Jurus'Iamat

Ngendes man baNa sikap tuhu, Keleng ateNa negu-negu
Mindo man baNa ola medu, Maka i'breNa pasu-pasu  Reff : ....

6. Kata Dibata (Perp. Kundul)
a. Ngoge Kata Dibata Bagin Si Pemena: Jesaya 7:13-15 (iogeken jabu kundulen)

13. Megi si e nina Jesaya njabapsa, “Genduari begikenlah o kesusuren Raja Daud. Kesabaren manusia enggo keri ibahanndu; la kin akapndu bias e, maka kesabaren Dibata pe ikerikenndu ka atendu?
14. Dage TUHAN genduari mereken tanda man bandu e me: Mehuli me pagi kula sekalak singuda-nguda jenari ipupusna me sekalak anak dilaki janah ibahanna gelarna ‘Imanuel’.
15. Kenca enggo pagi dem belinna, dingen ngasup ia erbahan keputusen jine, i je me pagi bangsa enda minem susu ras man tengguli.

L    : Ketuahen kalak si megiken Kata Dibata, dingen si makekenca bas geluhna si teptep wari, Haleluya.
P    : Haleluya...Haleluya...Hateluya... (iendeken) 
b. Kotbah : (Ibenai ras idungi alu pertoton)
Teks : Roma 1:1-7

1. Surat enda rehna i bas aku nari, Paulus. Aku me suruh-suruhen Kristus Jesus, rasul si enggo ipilih dingen iserapken Dibata guna meritaken Berita Si Meriah si reh i bas Dibata nari.
2. Berita Si Meriah e ipadanken Dibata nai-nai arah nabi-nabiNa janah enggo isuratken i bas Pustaka Si Badia.
3. Berita e kerna AnakNa, Tuhanta Jesus Kristus: IA manusia, IA tubuh arah kesusuren Daud.
4. Janah erkiteken Kesah Si Badia tangkas maka IA Anak Dibata si erkuasa. Enda teridah arah kekekenNa i bas si mate nari.
5. Arah IA, dingen i bas gelarNa me Dibata mereken hak istimewa man kami, gelah ibabai kami kerina bangsa maka tek dingen erkemalangen man Kristus.
6. Ikut pe kam kerina si ringan i Roma, si enggo ipilih Dibata jadi sikerajangen Jesus Kristus.
7. E maka o kam kerina si ringan i Roma si ikelengi Dibata dingen si enggo ipilihNa jadi anak-anakNa: Dibata Bapanta ras Tuhan Jesus Kristuslah mereken lias ateNa man bandu janah malem atendu ibahanNa.

Tema : Jabu Singaloken Hak Istimewa

7. Pengakun Kiniteken (Perp. Tedis) 

8. Persembahen (Perp. Kundul) 
L    : Kata Dibata si jadi palas i bas kita nehken persembahen pengataken bujurta man Dibata : "O senina ras turang, nginget perkuah ate Dibata si mbelin si isehkenNa man banta, kupindo man bandu : "Endeskenlah kulandu man Dibata saja selaku persembahen si nggeluh rikutken si ngena ateNa. Sabab bage me arusna kam ersembah man Dibata sue ras biakndu selaku makhluk si rukur." (bdk. Rm. 12:1-2).

Iherta ngendesken persembahen, rende kita i bas : KEE GBKP No. 302:1-2

Nginget perkuah Dibata si Mbelin,
siisehkenNa man banta k'rina kin
I bas kerina dampar kegeluhen, i doni si dem alu keguluten
Reff : 
Endeskenlah kulanta man Dibata,
kerinana si lit i bas geluhta
Selaku persembahenta si nggeluh,
em persembahen si ngena ateNa

Sabab bage me arusna kita kin, Ersembah man Dibatanta si mejin
Si nggo m'reken man banta manusia, Keg'Iuhen si mehuli ras badia Reff...

Pertoton Persembahen ras Pertoton Syafaat: 
1. Persembahen
2. Gelah ngawan perpulungen nikapken pusuh peraten ras jabu ngalo ngalo kebaktin ras perayan natal.
3. Gelah Panitia Natal banci erdahin alu tutus nikapken ras ngaturken natal.
4. Lakon Persadan si Badia wari pepagi.
5. Kerna tuan/nyonya rumah ras si turah i bas perpulungen.

9. Perpadanen Man Dibata (Perp. Tedis) 
L    : O turang ras senina, Dibata perkeleng kap. lberekenNa hak istimewa man banta eme keselamaten.

P    : Tetap aku nggeluh i bas keselamaten si enggo kualoken idur Dibata nari.

L    : Ibereken Dibata pe man banta hak istimewa guna meritaken berita keselamaten man kerina manusia.

P    : Tetap kuberitaken keselamaten si enggo kualoken man kalak si deban maka reh teremna kalak nggeluh i bas keselamaten. Amin.

I bas kita mpeteguhi perpadanen man Dibata, rende kita i bas : KEE GBKP No. 286:1,4

Kuikutken me dalanNdu dalan dame man bangku
Terkelin me kap geluhku itebusi darehNdu
Reff : 
Kuikutken me dalanNdu kuendesken geluhku
Bas Kam o Jurus'lamatku dame senang tendingku

Kupetetap me ukurku nggeluh bujur ras tuhu
B`reNdu usihen man bangku puji sembahku baNdu Reff :...

10. Pertoton Tuhan

11. Pengutusen Ras Pasu-Pasu Dibata
L    : Bengketlah ku kegeluhenta (ndu) sekalak-sekalak. Tetaplah aloken dingen beritaken keselamaten idur Dibata nari. Guna si e, alokenlah pasu-pasuNa : "Ipasu-pasu janah ikawali Dibata kita (kam), siang ayo Dibata ersinalsal ibabonta (ndu), janah melias ateNa ngenehen kita (kam). Itatap Dibata ku kita (kam), janah malem ateta (ndu) ibahanNa." Amin.

P    : Amin...Amin...Amin...(iendeken)

C. Diskusi/Sharing 
Sicakapkenlah kegiaten sektor i bas persiapen natal umpamana: gotong royong i bas lokasi rumah pertoton, pembagin sembako murah, ngelitken pernak-pernik natal siiperluken ras si debanna siiperluken i bas natal tahun 2019 enda.

CATATEN
1. Sijaga kebadian i bas kebaktin.
2. Tedis ras kundul rikutken kecibal perpulungen.

Pdt. Christopher Sinulingga, M.Th.

Mohon Bantuan Subscribe dan Like Youtube Channel GBKP KM 8. Bujur

Share this post